Shwe Thit (2026)

08/09/2026

မိတ္ထီလာတွင် အငှားယာဉ်မောင်းအား သေနတ်ဖြင့် ပစ်သ-တ်၍ ကားလုယူသွားသည့် လူကုန်တား ဒုရဲအုပ်ကို နေပြည်တော်၌ ဖမ်းဆီးရမိ 🇲🇲

နေပြည်တော်မှ မိတ္ထီလာသို့ ငှားရမ်းစီးနင်းလာသည့် အငှားယာဉ်မောင်း ကိုဝင်းကိုအား သေနတ်ဖြင့် ပစ်သ-တ်ကာ မော်တော်ယာဉ် လုယူထွက်ပြေးသွားသည့် လူကုန်ကူးမှု နှိမ်နင်းရေးတပ်ဖွဲ့မှ ဒုရဲအုပ် ရဲရင့်အောင် ဆိုသူကို စက်တင်ဘာ ၇ ရက် နံနက်ပိုင်းတွင် နေပြည်တော် ဘောဂသီရိအဝိုင်းအနီး၌ ဖမ်းဆီးရမိခဲ့ကြောင်း သိရသည်။ ဖြစ်စဉ်မှာ စက်တင်ဘာ ၆ ရက် ညနေပိုင်းတွင် ပြစ်မှုကျူးလွန်သူ ဒုရဲအုပ်သည် မိတ္ထီလာမြို့အဝင် ကန်ကြီးကုန်းကျေးရွာအနီး၌ ယာဉ်မောင်းအား ခြောက်လုံးပြူးသေနတ်ဖြင့် ပစ်သတ်ကာ ကားကို လုယူခဲ့ခြင်းဖြစ်ပြီး၊ စစ်ဆေးရေးဂိတ်များ တင်းကြပ်နေသဖြင့် ကားကို စွန့်ပစ်ထားခဲ့ကာ နေပြည်တော်သို့ ပြန်လည်ဝင်ရောက်စဉ် ဖမ်းဆီးခံခဲ့ရခြင်းဖြစ်သည်။ လတ်တလောတွင် ပြစ်မှုကျူးလွန်သူ ဒုရဲအုပ်အား မိတ္ထီလာမြို့မရဲစခန်း၌ (ပ) ၁၄၉/၂၀၂၆၊ လူသတ်မှုပုဒ်မ ၃၀၂ ဖြင့် အမှုဖွင့် အရေးယူဆောင်ရွက်လျက်ရှိသည်။

#ရွှေသစ်သတင်း

07/09/2026

ရန်ကုန်နှင့် မန္တလေးမြို့ကြီးများတွင် စစ်မှုထမ်းရန် လူငယ်များကို အဓမ္မ ဖမ်းဆီး ပေါ်တာဆွဲမှုများ ပိုမိုများပြားလာဟု ဒေသခံများနှင့် စောင့်ကြည့်သူများ ပြောကြား 🇲🇲

ရန်ကုန်နှင့် မန္တလေးကဲ့သို့ မြို့ကြီးများတွင် စစ်မှုထမ်းရန်အတွက် ဩဂုတ်နှင့် စက်တင်ဘာလအတွင်း လူငယ်များကို အဓမ္မ ဖမ်းဆီး ပေါ်တာဆွဲသည့် ဖြစ်စဉ်များ ပိုမိုများပြားလာကြောင်း မြို့ခံများနှင့် စစ်ရေးစောင့်ကြည့်သူများထံမှ သိရသည်။ စက်တင်ဘာလ ပထမပတ်အတွင်း၌ပင် ရန်ကုန်မြို့နယ် ၁၀ ခု၌ လူငယ် ၃၀ ထက်မနည်း အဓမ္မ စုဆောင်းခံခဲ့ရပြီး မင်္ဂလာတောင်ညွန့်မြို့နယ်တွင် အများဆုံး ဖြစ်ပွားခဲ့သည်။ ထို့ပြင် မန္တလေးမြို့ မဟာအောင်မြေမြို့နယ် အပါအဝင် မြို့ပေါ် ရပ်ကွက်အချို့၌ စစ်မှုထမ်းရန် မဲနှိုက်ပွဲများ ပြန်လည် ပြုလုပ်နေပြီး ပုံမှန်ထက် ပိုမိုတိုးမြှင့် စုဆောင်းရန် ညွှန်ကြားထားကြောင်း သိရသည်။ စစ်ကောင်စီအနေဖြင့် ဇူလိုင်လတွင် သင်တန်းပတ်စဉ်သစ် မဖွင့်လှစ်နိုင်ဘဲ ဩဂုတ်လ ၈ ရက်မှသာ အပတ်စဉ် ၂၇ ကို စတင်နိုင်ခဲ့သဖြင့် တပ်သားသစ် ရရှိရေး ခက်ခဲနေချိန်တွင် ယခုကဲ့သို့ အဓမ္မ ဖမ်းဆီးမှုများ ပိုမိုလုပ်ဆောင်လာခြင်းဖြစ်သည်။ အာဏာပိုင်များဘက်က အဓမ္မ ဖမ်းဆီး စုဆောင်းမှုမရှိကြောင်း ငြင်းဆိုထားသော်လည်း မြေပြင်တွင် လူငယ်များ၏ ညဘက် သွားလာရေးနှင့် လုံခြုံရေးအတွက် အထူး စိုးရိမ်ပူပန်မှုများ မြင့်တက်လျက်ရှိသည်။

#ရွှေသစ်သတင်း

07/09/2026

ဗီယက်နမ်မြေပေါ်မှ မြန်မာစစ်တပ်ကို ဆန့်ကျင်သည့် လှုပ်ရှားမှုများ ခွင့်မပြုရန် သဘောတူ - ထောက်ပို့များနှင့် စစ်မှုထမ်း တိမ်းရှောင်သူများအတွက် အန္တရာယ်ရှိနိုင်ကြောင်း သတိပေး 🇲🇲🇻🇳

ဗီယက်နမ်နိုင်ငံ နယ်မြေကို အသုံးပြု၍ မြန်မာစစ်ကောင်စီအား ဆန့်ကျင်သည့် နိုင်ငံရေး၊ စစ်ရေးနှင့် အခြားလှုပ်ရှားမှုများ ပြုလုပ်ခြင်းကို ခွင့်ပြုမည်မဟုတ်ကြောင်း ဗီယက်နမ်အစိုးရနှင့် စစ်ကောင်စီတို့အကြား စက်တင်ဘာလ ၅ ရက်က ဟနွိုင်းမြို့၌ တွေ့ဆုံစဉ် သဘောတူညီခဲ့ကြသည်။ အဆိုပါ သဘောတူညီချက်အရ နှစ်နိုင်ငံနယ်မြေကို အခြားတစ်ဖက်အား ဆန့်ကျင်သည့် လှုပ်ရှားမှုများအတွက် အသုံးပြုခွင့်မပြုရန်နှင့် ကာကွယ်ရေးဆိုင်ရာ ပူးပေါင်းဆောင်ရွက်မှုများ မြှင့်တင်ရန် သဘောတူခဲ့ကြသဖြင့် နွေဦးတော်လှန်ရေး ထောက်ပံ့ကူညီသူများ၊ တော်လှန်ရေးအသိုင်းအဝိုင်းမှ လူပုဂ္ဂိုလ်များနှင့် ပြည်တွင်းမှ စစ်မှုထမ်းဆင့်ခေါ်မှုကို တိမ်းရှောင်ရန် ထွက်ခွာလာသူများအတွက် ဗီယက်နမ်နိုင်ငံသို့ သွားရောက်ခြင်း၊ Stay သက်တမ်းတိုးခြင်းနှင့် ယာယီနေထိုင်ခြင်းများ ပြုလုပ်ရာတွင် လုံခြုံရေး အထူးသတိပြုရန် လိုအပ်လာသည်။ ဗီယက်နမ်သည် ထိုင်းနိုင်ငံအခြေစိုက် မြန်မာနိုင်ငံသားအချို့ ဗီဇာသက်တမ်းတိုးရန်နှင့် စစ်မှုထမ်း တိမ်းရှောင်ရန် အဓိက သွားရောက်လေ့ရှိသည့် နိုင်ငံတစ်ခုဖြစ်ပြီး ယခင်ကလည်း မော်ဒယ်ဟန်လေး ဗီယက်နမ်သို့ ဗီဇာသက်တမ်းတိုး သွားရောက်စဉ် ပတ်စပို့ ဖျက်သိမ်းခံရသည့် အဖြစ်အပျက်မျိုး ရှိခဲ့ဖူးကြောင်း သိရသည်။

#ရွှေသစ်သတင်း

05/09/2026

ရွှေကူမှ ဗန်းမော်သို့ ဆန်တက်သည့် စစ်သင်္ဘောအုပ်စု ကြားဖြတ်တိုက်ခိုက်ခံရပြီး ၈ စီး ဖျက်ဆီးခံရကာ စစ်သုံ့ပန်းနှင့် မိသားစုဝင် ၁၉၀ ဦး ဖမ်းဆီးရမိ 🇲🇲💥

မန္တလေးမြို့မှ ဧရာဝတီမြစ်ကြောင်းအတိုင်း ဗန်းမော်မြို့သို့ ဆန်တက်လာသည့် စစ်ကောင်စီ၏ ရေယာဉ် ၁၅ စီးပါ အုပ်စုကို ကချင်လွတ်လပ်ရေးတပ်မတော် (KIA) နှင့် တော်လှန်ရေး ပူးပေါင်းတပ်ဖွဲ့များက ကြားဖြတ်တိုက်ခိုက်ခဲ့ရာ ရေယာဉ် ၈ စီးကို ဖျက်ဆီးနိုင်ခဲ့ပြီး အလံဖြူထောင် လက်နက်ချသူများ အပါအဝင် စစ်သား ၁၅၁ ဦး၊ ရဲ ၁၇ ဦးနှင့် မိသားစုဝင် ၂၂ ဦး (အမျိုးသမီး ၁၆ ဦး၊ ကလေး ၆ ဦး) စုစုပေါင်း ၁၉၀ ဦးကို ဖမ်းဆီးရမိခဲ့သည်။ ဩဂုတ်လ ၂၁ ရက်က စတင်ထွက်ခွာလာသည့် အဆိုပါ စစ်ရေယာဉ်အုပ်စုသည် ဩဂုတ်လ ၂၇ ရက်တွင် ရွှေကူသို့ ရောက်ရှိခဲ့ပြီး စက်တင်ဘာလ ၂ ရက်တွင် ဗန်းမော်ဘက်သို့ ဆက်လက်ထွက်ခွာစဉ် ဇင်းဘုံ-စင်းခန်းဒေသအနီး ပြင်းထန်စွာ တိုက်ခိုက်ခံခဲ့ရခြင်းဖြစ်သည်။ ကျန်ရှိသည့် ရေယာဉ်များအနက် ၆ စီးသည် စက်တင်ဘာလ ၃ ရက်တွင် ဗန်းမော်မြို့သို့ ရောက်ရှိသွားခဲ့ပြီး ၁ စီးမှာ လမ်းခရီး၌ သောင်တင်ကျန်ရစ်ခဲ့ကြောင်း စစ်ရေးသတင်းရင်းမြစ်များထံမှ သိရသည်။

#ရွှေသစ်သတင်း

03/09/2026

ရန်ကုန်တွင် လူငယ်များကို အလုပ်ပေးမည်ဟု လိမ်လည်ကာ ဖမ်းဆီးချုပ်နှောင်ထားသည့် အရန်မီးသတ်တပ်ခွဲမှူး အပါအဝင် ၂ ဦး ဖမ်းဆီးခံရ 🇲🇲

ရန်ကုန်မြို့၊ အင်းစိန်မြို့နယ်၊ တညင်းကုန်းရပ်ကွက်၌ လူငယ်များကို အလုပ်ရမည်ဟု လိမ်လည်ခေါ်ဆောင်ကာ နေအိမ်အတွင်း အချုပ်ခန်းများ ဆောက်လုပ်၍ တရားမဝင် ဖမ်းဆီးချုပ်နှောင်ထားသည့် ဒေသအရန်မီးသတ်တပ်ခွဲမှူး သိန်းဦးနှင့် သားမက်ဖြစ်သူ သန်းစိုးတို့ကို ဩဂုတ်လ ၂၅ ရက် ညနေပိုင်းတွင် ဝင်ရောက်ဖမ်းဆီးခဲ့ကြောင်း သိရသည်။ တညင်းကုန်းလမ်းဆုံတစ်ဝိုက် လူပျောက်တိုင်ကြားမှုများ များပြားလာသဖြင့် ဝင်ရောက်စစ်ဆေးရာမှ ထိတ်တုံးခတ်၍ ချုပ်နှောင်ခံထားရသည့် လူငယ် ၄ ဦးကို ပြန်လည်တွေ့ရှိခဲ့ခြင်းဖြစ်ပြီး၊ အဆိုပါဖြစ်စဉ်တွင် စစ်တပ်နှင့် ရဲတပ်ဖွဲ့ဝင် အချို့လည်း ပါဝင်ပတ်သက်မှုရှိကြောင်း သတင်းရင်းမြစ်များက ဆိုသည်။ လက်ရှိတွင် ဖမ်းဆီးခံထားရသည့် လူငယ်များကို မိသားစုနှင့် ပြန်လည်အဆက်အသွယ်ရရှိရန် ဆောင်ရွက်ပေးနေပြီး ပြစ်မှုကျူးလွန်သူ ၂ ဦးကို အင်းစိန်မြို့နယ်ရဲစခန်း၌ ရာဇသတ်ကြီးပုဒ်မ ၃၆၅ ဖြင့် အမှုဖွင့် အရေးယူထားကြောင်း သိရသည်။

#ရွှေသစ်သတင်း

01/09/2026

၂ လအတွင်း PDF ထောက်ပို့တပ်သား ၅ သောင်းကျော် လျော့နည်းသွား

ပြည်သူ့ကာကွယ်ရေး တပ်မတော် (PDF) ၏ တပ်ရင်းရိက္ခာနှင့် အထွေထွေအသုံးစရိတ် ၈၅ ရာခိုင်နှုန်း (အမေရိကန်ဒေါ်လာ သန်း ၃၀ ကျော်) ကို ထောက်ပံ့ပေးနေသည့် ပြည်သူ့တော်လှန်ရေး ထောက်ပို့တပ် (PRF) က ပြီးခဲ့သည့် ၂ လအတွင်း ထောက်ပို့တပ်သား ၅၄,၉၂၇ ဦး လျော့နည်းသွားကြောင်း ထုတ်ပြန်ခဲ့ရာ အဆိုပါ အရေအတွက်မှာ ရုတ်တရက် အစုလိုက်အပြုံလိုက် ရပ်နားသွားခြင်း မဟုတ်ဘဲ ၂၀၂၁ ခုနှစ် ဒီဇင်ဘာလ စတင်တည်ထောင်ချိန်မှစ၍ အကြောင်းအမျိုးမျိုးကြောင့် တာဝန်မထမ်းဆောင်ဖြစ်တော့သည့် ကိုယ်ပိုင်နံပါတ်ရ ရဲဘော်များ၏ စုစုပေါင်း စိစစ်ထားသော အရေအတွက်ဖြစ်ကြောင်း ရှင်းလင်းထားသည်။ လက်ရှိတွင် လစဉ် မပျက်မကွက် ပါဝင်နေသည့် အမာခံထောက်ပို့တပ်သား ပျမ်းမျှ ၂ သောင်းဝန်းကျင်ရှိပြီး လစဉ် အမေရိကန်ဒေါ်လာ ၆ သိန်းအထက် ကောက်ခံရရှိကာ တပ်ရင်းရိက္ခာ ထောက်ပံ့မှု ၃၈ ကြိမ်အထိ ပေးပို့နိုင်ခဲ့ကြောင်းသိရပါတယ်။

#ရွှေသစ်သတင်း

31/08/2026

ကနီမြို့နယ်တွင် စစ်ကောင်စီတပ်နှင့် တော်လှန်ရေးတပ်ဖွဲ့များ တိုက်ပွဲပြင်းထန်၊ စစ်ကောင်စီဘက်မှ ထိခိုက်မှုများပြားပြီး ဒေသခံများ ရေရှည် စားဝတ်နေရေး အကျပ်အတည်းဖြစ်ပေါ်နေ 🇲🇲💥

စစ်ကိုင်းတိုင်း၊ ကနီမြို့နယ်အတွင်းရှိ မုံရွာ-ယာကြီး-ကလေး ကားလမ်းမကြီးကို ပြန်လည်စိုးမိုးနိုင်ရန် အင်အားအလုံးအရင်းဖြင့် လေကြောင်းစစ်ကူယူကာ မြေပြင်စစ်ကြောင်းထိုးလာသည့် စစ်ကောင်စီတပ်နှင့် ဒေသတွင်း တော်လှန်ရေးတပ်ဖွဲ့များအကြား ဩဂုတ်လ ၃၀ ရက် ညနေပိုင်းက သင့်ဝင်ရွာအနီးတွင် တိုက်ပွဲပြင်းထန်စွာ ဖြစ်ပွားခဲ့ပြီး စစ်ကောင်စီဘက်မှ ထိခိုက်‌ေ-ဆုံးမှု များပြားခဲ့ကြောင်း သိရသည်။မေလကတည်းက စစ်ကောင်စီတပ် အထိုင်ချထားသည့် ချောင်းမကျေးရွာ အပါအဝင် အနီးဝန်းကျင် ရွာပေါင်း ၇ ရွာထက်မနည်းမှ ဒေသခံများသည် ၅ လနီးပါးကြာ နေရပ်စွန့်ခွာ စစ်ဘေးရှောင်နေကြရသဖြင့် မိရိုးဖလာ တောင်သူလုပ်ငန်းများ မလုပ်ကိုင်နိုင်ဘဲ ရေရှည်တွင် အငတ်ဘေးနှင့် ရင်ဆိုင်လာရမည်ကို စိုးရိမ်လျက်ရှိကြောင်း သိရသည်။

30/08/2026

နန်းမယ်ခုံမြို့နယ်ရှိ ကျေးရွာတစ်ရွာကို စစ်တပ်က လေကြောင်းဖြင့် ဗုံးကြဲတိုက်ခိုက်မှုကြောင့် ကျောင်းဆရာမ နေအိမ်အပါအဝင် ၆ လုံး ပျက်စီး 🇲🇲💥

ကရင်နီပြည်၊ နန်းမယ်ခုံမြို့နယ်အတွင်းရှိ ကျေးရွာတစ်ရွာကို စစ်ကောင်စီတပ်က ဩဂုတ်လ ၂၈ ရက် နံနက်ပိုင်းတွင် ဂျက်ဖိုက်တာဖြင့် ဗုံးကြဲတိုက်ခိုက်ခဲ့ရာ ကျောင်းဆရာမတစ်ဦး၏ နေအိမ်အပါအဝင် နေအိမ် ၆ လုံး ပျက်စီးခဲ့ကြောင်း သိရသည်။ အဆိုပါ တိုက်ခိုက်မှုသည် မိုးဗြဲမြို့မှ စစ်ကောင်စီတပ်က အင်အား ၁၅၀ မှ ၂၀၀ နီးပါးဖြင့် လွယ်ယင်းတောင်ခြေဘက်သို့ ဒရုန်းနှင့် လက်နက်ကြီးများ အသုံးပြု၍ ၁၅ ကြိမ်ထက်မနည်း ပစ်ကူပေးကာ ချဉ်းကပ်လာစဉ် ကရင်နီတော်လှန်ရေး ပူးပေါင်းတပ်ဖွဲ့များနှင့် တိုက်ပွဲပြင်းထန်ခဲ့ပြီး စစ်ကောင်စီဘက်မှ အထိနာခဲ့ခြင်းဖြစ်သည်။ တိုက်ပွဲအတွင်း ဖယ်ခုံ၊ မိုးဗြဲ၊ လွိုင်ကော်နှင့် လွိုင်လင်လေး အခြေစိုက် စစ်ကောင်စီတပ်ရင်းများမှ လက်နက်ကြီး အလုံး ၈၀ ထက်မနည်း ပစ်ကူပေးခဲ့ကြောင်း၊ ဒေသခံများမှာ ကြိုတင် တိမ်းရှောင်နေကြသဖြင့် ထိခိုက်ဒဏ်ရာရရှိမှု မရှိခဲ့သော်လည်း တိုက်ပွဲများ ပိုမိုပြင်းထန်လာနိုင်သည့်အတွက် လွယ်ဝိုင်း၊ လွယ်ယင်းတောင်ခြေ၊ လီဝိုးနှင့် နန်းမယ်ခုံ ဆက်သွယ်ထားသည့် မည်သည့်လမ်းကြောင်းကိုမျှ ဖြတ်သန်းသွားလာခြင်း မပြုကြရန် သတိပေး နှိုးဆော်ထားကြောင်း သိရသည်။

#ရွှေသစ်

29/08/2026

Chinland FC အသင်း၏ ကစားသမား Pa Lung ဘေးကင်းစွာ ပြန်လည်တွေ့ရှိပြီး အသင်းနှင့် ပြန်လည်ပူးပေါင်း ⚽️🇲🇲

(၇) ရက်ကြာ အဆက်အသွယ်ပြတ်တောက်နေသည့် Chinland FC ဘောလုံးအသင်း၏ အသက် ၂၂ နှစ်အရွယ် ကစားသမား Pa Lung ကို ယခုအခါ ဘေးကင်းစွာ ပြန်လည်တွေ့ရှိခဲ့ပြီး အသင်းနှင့် ပြန်လည်ပူးပေါင်းနေပြီဖြစ်ကြောင်း ထုတ်ပြန်လိုက်သည်။ ကစားသမား Pa Lung သည် မိခင်ဖြစ်သူ၏ အရေးပေါ်ကျန်းမာရေးအခြေအနေကြောင့် အသင်းထံ အကြောင်းမကြားနိုင်ဘဲ နေရပ်သို့ အရေးပေါ်ပြန်သွားခဲ့ရခြင်းဖြစ်ပြီး ခရီးလမ်းတွင် ဖုန်းအားကုန်သွားခြင်းနှင့် ဆက်သွယ်ရေးအခက်အခဲများကြောင့် အသင်းနှင့် အဆက်အသွယ်ပြတ်တောက်ခဲ့ခြင်းဖြစ်သည်။ ကစားသမား ပျောက်ဆုံးနေစဉ်အတွင်း Chinland FC အနေဖြင့် သက်ဆိုင်ရာ ရဲစခန်း၌ အမှုဖွင့်တိုင်ကြားကာ (၅) ရက်ကြာ လိုက်လံရှာဖွေခဲ့ရပြီး ဘေးကင်းရေးအတွက် အများပြည်သူထံ အကူအညီတောင်းခံခဲ့ဖူးသည်။ ယခုအခါ ကစားသမား ဘေးကင်းစွာ ပြန်လည်ရောက်ရှိလာပြီဖြစ်၍ Myanmar Football Federation (MFF)၊ Myanmar National League (MNL)၊ သက်ဆိုင်ရာ တာဝန်ရှိသူများနှင့် ကူညီပေးခဲ့သူ အားလုံးကို Chinland FC က အထူးကျေးဇူးတင်ရှိကြောင်း အသိပေးထားသည်။

#ရွှေသစ်သတင်း

29/08/2026

ချင်းပြည်နယ်တွင် စစ်ကောင်စီက မြို့ပေါ်ဧရိယာအချို့နှင့် လမ်းကြောင်းအနည်းငယ်ကိုသာ ထိန်းချုပ်နိုင်ပြီး ကျန်ဒေသများကို စိုးမိုးနိုင်ခြင်းမရှိဟု ချင်းပြည်ကောင်စီ ပြောကြား 🇲🇲

ချင်းပြည်နယ်အတွင်း စစ်ကောင်စီအနေဖြင့် တွန်းဇံနှင့် ဖလမ်း ကဲ့သို့သော မြို့ပေါ်ဧရိယာအချို့နှင့် ကလေး-ဟားခါး၊ ကလေး-တီးတိန် လမ်းကြောင်းပေါ်ရှိ စစ်စခန်း ၃၀ ကျော်ကိုသာ ထိန်းချုပ်ထားနိုင်ပြီး ကျေးရွာများနှင့် ကျေးလက်ဒေသများတွင် ထိရောက်သော အုပ်ချုပ်ရေးနှင့် ဩဇာသက်ရောက်မှု မရှိကြောင်း ချင်းပြည်ကောင်စီ အတွင်းရေးမှူး Salai Kep Chin Thang က ဩဂုတ်လ ၂၈ ရက် သတင်းစာရှင်းလင်းပွဲတွင် ပြောကြားခဲ့သည်။ စစ်ကောင်စီသည် လမ်းကြောင်းများ ထိန်းချုပ်ရန်အတွက် ယခင်က တပ်စွဲထားသည့် တပ်မ ၇၇ တပ်ဖွဲ့ဝင်များအစား ရဲတပ်ဖွဲ့ဝင်များဖြင့် အစားထိုး တပ်ချထားခြင်းဖြစ်ပြီး မြို့ပေါ်ဧရိယာများကိုပင် အပြည့်အဝ စိုးမိုးနိုင်ခြင်း မရှိသေးကြောင်း ဆိုသည်။ ထို့အပြင် ချင်းပြည်အစိုးရအနေဖြင့် ချင်းအမျိုးသားတပ်မတော် (CNA) နှင့် ချင်းကာကွယ်ရေးတပ်ဖွဲ့ (CDF) များအပါအဝင် လက်နက်ကိုင်တပ်ဖွဲ့များအားလုံးကို အရပ်သားအစိုးရ၏ ကွပ်ကဲမှုအောက်၌ ထားရှိရန် ဖွဲ့စည်းပုံအခြေခံမူများနှင့်အညီ ဆက်လက် အကောင်အထည်ဖော် ဆောင်ရွက်လျက်ရှိကြောင်း သိရသည်။

#ရွှေသစ်သတင်း

Shwe Thit

08/09/2026

07/09/2026

07/09/2026

05/09/2026

03/09/2026

01/09/2026

31/08/2026

30/08/2026

29/08/2026

29/08/2026

Address

Telephone

Website

Alerts

Contact The Business

Shortcuts

Share

Listing takedown request