17/09/2026
𝗫𝗔𝗡𝗔𝗡𝗔 𝗚𝗨𝗦𝗠𝗔̃𝗢 𝗡𝗢 𝗦𝗜𝗚𝗡𝗜𝗙𝗜𝗞𝗔𝗗𝗨 𝗗𝗢𝗖𝗧𝗢𝗥 𝗛𝗢𝗡𝗢𝗥𝗜𝗦 𝗖𝗔𝗨𝗦𝗔: 𝗛𝗨𝗦𝗜 𝗟𝗨𝗧𝗔 𝗕𝗔́ 𝗜𝗡𝗗𝗘𝗣𝗘𝗡𝗗𝗘́𝗡𝗦𝗜𝗔 𝗧𝗢’𝗢 𝗟𝗜𝗗𝗘𝗥𝗔𝗡𝗦𝗔 𝗣𝗢́𝗦-𝗞𝗢𝗡𝗙𝗟𝗜𝗧𝗨
𝗜𝗻𝘁𝗿𝗼𝗱𝘂𝘀𝗮𝘂𝗻
Universitas Hasanuddin (Unhas), Makassar, Indonézia, fó títulu Doctor Honoris Causa bá Primeiru-Ministru Repúblika Demokrátika Timor-Leste, Kay Rala Xanana Gusmão, nu’udár rekoñesimentu bá nia trajetória lideransa, kontribuisaun bá konstrusaun Estadu Timor-Leste, no papél iha promosaun rekonsiliasaun no dame.
Títulu ne’e atribui husi Programa Doutoramentu Administrasaun Públika, Fakuldade Siénsias Sosiais no Polítikas Unhas, iha serimónia ne’ebé hala’o iha Baruga A.P. Pettarani, Kampus Unhas Tamalanrea, Makassar, iha 5 Setembru 2026.
Doctor Honoris Causa mak títulu onoráriu ne’ebé universidade ida fó bá ema ida nu’udár forma rekoñesimentu bá nia kontribuisaun no trajetória ne’ebé universidade konsidera iha valór boot bá sosiedade, nasaun, koñesimentu, páz, diplomasia, siénsia, kultura, direitu umanu ka área importante sira seluk.
Liafuan Doctor refere bá títulu doutor, enkuantu Honoris Causa, husi liafuan Latin, signifika “tanba onra” ka “bá razaun onoráriu”.
Tanba ne’e, Doctor Honoris Causa la’ós hanesan doutoramentu regulár, hanesan PhD, ne’ebé estudante tenke tuir programa akadémiku, hala’o peskiza, hakerek disertasaun ka teze no defende nia rezultadu peskiza.
Iha Doctor Honoris Causa, universidade hala’o prosesu akadémiku no institusionál atu avalia trajetória no kontribuisaun kandidatu, antes atribui títulu nu’udár rekoñesimentu onoráriu.
Nune’e, bainhira Unhas fó títulu ne’e bá Xanana Gusmão, ida-ne’e la signifika katak Xanana remata programa doutoramentu Administrasaun Públika iha Unhas. Signifika katak universidade konsidera nia trajetória no kontribuisaun iha área sira ne’ebé relevante bá estudu Administrasaun Públika no lideransa pós-konflitu.
𝗛𝘂𝘀𝗶 𝗹𝗶́𝗱𝗲𝗿 𝗹𝘂𝘁𝗮 𝗯𝗮́ 𝗸𝗼𝗻𝘀𝘁𝗿𝘂𝘁𝗼́𝗿 𝗱𝗮𝗺𝗲
Iha fundamentasaun atribuisaun títulu ne’e, Promotór Unhas, Prof. Dr. Hafid Abbas, identifika razaun prinsipál haat.
Primeiru, Xanana Gusmão konsideradu nu’udár figura importante iha luta ne’ebé lori bá harii Repúblika Demokrátika Timor-Leste.
Husi kampu Rezisténsia to’o espasu diplomátiku internasionál, Xanana partisipa iha luta bá autodeterminasaun Timoroan no, depois, iha prosesu harii nasaun foun.
Segundu, Unhas destaka nia papél iha transformasaun hosi konflitu bá rekonsiliasaun entre Timor-Leste ho Indonézia.
Hafoin tinan 24 hosi konflitu no okupasaun, Timor-Leste enfrenta dezafiu atu harii dame, rekonstrui relasaun no loke dalan bá futuru ne’ebé bazeia bá diálogu no kooperasaun.
Iha perspetiva Unhas, rekonsiliasaun la’ós signifika haluha pasadu. Rekonsiliasaun signifika enfrenta istória, rekoñese kanek no, iha tempu hanesan, loke oportunidade atu harii relasaun foun.
Terseiru, Xanana Gusmão hala’o tranzisaun husi líder Rezisténsia bá estadista no konstrutór instituisaun Estadu.
Depois restaurasaun independénsia, responsabilidade lideransa muda husi luta bá libertasaun sai responsabilidade atu harii no hametin instituisaun, demokrasia, governasaun no dezenvolvimentu nasionál.
Iha nasaun pós-konflitu, konstrusaun Estadu la depende de’it bá lideransa pesoál, maibé mós presiza instituisaun ne’ebé forte, lei, servisu públiku, konfiansa sidadaun no kapasidade atu fó resposta bá nesesidade povu.
Kuartu, Unhas haree iha trajetória Xanana Gusmão valór sira ne’ebé liga ho páz no umanidade, inklui rekonsiliasaun, diálogu no kooperasaun.
𝗥𝗲𝗸𝗼𝗻𝘀𝗶𝗹𝗶𝗮𝘀𝗮𝘂𝗻 𝗧𝗶𝗺𝗼𝗿-𝗟𝗲𝘀𝘁𝗲 𝗵𝗼 𝗜𝗻𝗱𝗼𝗻𝗲́𝘇𝗶𝗮
Transformasaun relasaun Timor-Leste ho Indonézia sai parte importante husi fundamentasaun akadámika ne’ebé Unhas aprezenta.
Iha diskursu simu títulu, Xanana Gusmão rasik fó-hanoin kona-bá mudansa husi relasaun konflitu bá relasaun amizade no viziñansa.
Timor-Leste la bele harii nasaun ida bazeia bá vingansa no ódiu, maibé presiza harii aliserse rekonsiliasaun no esperansa.
Ohin loron, Timor-Leste ho Indonézia servisu hamutuk iha área oioin, inklui edukasaun, komérsiu, saúde, fronteira no kooperasaun rejionál. Xanana mós destaka katak jovem timoroan barak agora mai Indonézia atu estuda, halo amizade no prepara sira-nia futuru.
𝗦𝗼𝗯𝗲𝗿𝗮𝗻𝗶𝗮 𝗻𝗼 𝗿𝗲𝘇𝗶𝗹𝗶𝗲́𝗻𝘀𝗶𝗮 𝗻𝗮𝘀𝗶𝗼𝗻𝗮́𝗹
Iha nia diskursu iha Unhas, ho títulu “Sovereignty and National Resilience in a Contested World”, Xanana Gusmão foka mós bá soberania no reziliénsia nasionál.
Tuir Xanana Gusmão, independénsia polítika presiza suporta husi kapasidade ekonómika no institusionál atu bele sustenta nasaun iha longu prazu.
Bá Timor-Leste, soberania la remata iha rai. Nia mós involve direitu soberanu iha tasi, delimitasaun fronteira marítima, jestaun rekursu naturál no kapasidade atu halo desizaun kona-bá futuru nasaun.
Xanana hateten katak, Timor-Leste kontinua negosiasaun ho Indonézia kona-bá fronteira marítima, bazeia bá diálogu, UNCLOS no direitu internasionál.
Subliña mós kona-bá nesesidade atu harii ekonomia produtiva, kria oportunidade bá juventude, hadi’a seguransa ai-han no uza rekursu naturál bá benefísiu povu.
𝗔𝗦𝗘𝗔𝗡 𝗻𝗼 𝗿𝗲𝘀𝗽𝗼𝗻𝘀𝗮𝗯𝗶𝗹𝗶𝗱𝗮𝗱𝗲 𝗿𝗲𝗷𝗶𝗼𝗻𝗮́𝗹
Timor-Leste nia integrasaun iha ASEAN mós sai parte husi diskusaun kona-bá futuru nasaun pós-konflitu.
Depois prosesu naruk, Timor-Leste tama ASEAN nu’udár membru-11 iha 2025. Iha 2029, Timor-Leste sei iha responsabilidade atu lidera ASEAN.
Bá Xanana Gusmão, integrasaun rejionál la diminui soberania nasionál. Envezde ne’e, nasaun soberanu bele hili livremente oinsá atu servisu hamutuk ho nasaun sira seluk.
Nasaun ki’ik no dezenvolvimentu presiza kooperasaun multilaterál, instituisaun rejionál no respeitu bá direitu internasionál atu bele responde bá dezafiu sira ne’ebé nasaun ida la bele rezolve mesak.
𝗘𝗱𝘂𝗸𝗮𝘀𝗮𝘂𝗻 𝗻𝘂’𝘂𝗱𝗮́𝗿 𝗽𝗼𝗻𝘁𝗲 𝗲𝗻𝘁𝗿𝗲 𝗻𝗮𝘀𝗮𝘂𝗻 𝗿𝘂𝗮
Unhas mós tau atensaun bá edukasaun nu’udár ponte entre Timor-Leste ho Indonézia. Iha nia diskursu, Xanana Gusmão hateten katak estudante timoroan sira ne’ebé estuda iha Indonézia sai parte husi ligasaun foun entre nasaun rua.
Iha Unhas rasik, estudante timoroan sira estuda ona iha área pós-graduasaun, no iha Setembru 2026, estudante timoroan na’in-57 tama iha intake pós-graduasaun foun.
Unhas haree interkámbiu edukasaun no kooperasaun akademika nu’udar forma ida atu hametin relasaun entre povu rua, liuhosi estudante, dosente, peskiza no rede profisionál.
𝗣𝗮𝗻𝘁𝗲 𝗠𝗮𝗰𝗮𝘀𝘀𝗮𝗿 𝗻𝗼 𝗽𝗼𝗻𝘁𝗲 𝗸𝗼𝗻̃𝗲𝘀𝗶𝗺𝗲𝗻𝘁𝘂
Iha fundamentasaun Unhas, relasaun entre Makassar ho Timor mós liga ho istória marítima. Naran Pante Macassar, iha Oecusse, sai marka ida ne’ebé fó-hanoin kona-bá ligasaun istórika entre Timor ho komunidade Bugis-Makassar.
Iha tempu uluk, tasi sai dalan bá komérsiu no interasaun entre komunidade. Iha tempu agora, Unhas hakarak transforma ligasaun istórika ne’e sai ponte foun liuhosi koñesimentu, edukasaun, peskiza no amizade.
Iha perspetiva ida-ne’e, tasi la’ós de’it espasu ne’ebé fahe territóriu, maibé mós bele sai dalan ne’ebé liga ema, universidade no nasaun sira.
𝗨𝗻𝗶𝘃𝗲𝗿𝘀𝗶𝗱𝗮𝗱𝗲 𝗻𝗼 𝗸𝗮𝗽𝗮𝘀𝗶𝗱𝗮𝗱𝗲 𝗻𝗮𝘀𝗶𝗼𝗻𝗮́𝗹
Papél universidade sai mós tema importante iha diskursu Xanana Gusmão nian. Nia hatete katak nasaun ida presiza ema ho koñesimentu, abilidade no kapasidade atu kompriende opsaun sira no halo desizaun kona-bá nia futuru.
Iha era intelijénsia artifisiál, nia subliña katak edukasaun no pensamentu krítiku sai importante liután, tanba teknolojia bele ajuda ema asesu bá koñesimentu, maibé bele mós fasilita kriasaun no distribuisaun informasaun falsu.
Tanba ne’e, universidade tenke prepara ema sira ne’ebé bele husu fonte, haree evidénsia no halo sira-nia julgamentu rasik.
Tuir Xanana Gusmão, koñesimentu ajuda ema kompriende mundu. Julgamentu ajuda ema deside saida mak tenke halo kona-bá mundu ne’e.
𝗗𝗼𝗰𝘁𝗼𝗿 𝗛𝗼𝗻𝗼𝗿𝗶𝘀 𝗖𝗮𝘂𝘀𝗮 𝗻𝗼 𝘁𝗿𝗮𝗷𝗲𝘁𝗼́𝗿𝗶𝗮 𝗮𝗸𝗮𝗱𝗲́𝗺𝗶𝗸𝗮 𝗫𝗮𝗻𝗮𝗻𝗮
Atribuisaun husi Unhas mós aumenta lista rekoñesimentu Doctor Honoris Causa ne’ebé Xanana Gusmão simu ona hosi universidade 19 husi nasaun oioin.
Tuir lista ofisiál Governu Timor-Leste nian ne’ebé eskritór uza iha matéria ne’e, atribuisaun ne’e inklui universidade sira iha Portugal, Austrália, Coreia do Súl, Japão, Malázia, Xina, Kambodja, Brazil no Indonézia.
Entre atribuisaun sira ne’ebé iha fonte ofisiál, Universidade do Porto konfirma Xanana Gusmão nu’udár Doutor Honoris Causa iha 31 Outubru 2000, enkuantu Universidade Presbiteriana Mackenzie fó títulu ne’e iha 29 Agostu 2025.
Unhas sai atribuisaun foun liu iha 5 Setembru 2026, ho área Administrasaun Públika no foku bá lideransa pós-konflitu, rekonsiliasaun, konstrusaun Estadu no kooperasaun rejionál.
Tuir fonte ofisiál Universidade Hasanuddin (Unhas), to’o 2026, iha lider polítiku ka líder Estadu na’in-tolu ne’ebé dokumentadu simu títulu Doctor Honoris Causa hosi Unhas: Soekarno iha 1963, Nelson Mandela iha 2005, no Kay Rala Xanana Gusmão iha 2026.
Xanana Gusmão sai líder polítiku ka líder Estadu da-toluk iha lista ne’e, hafoin Soekarno no Mandela. Unhas fó títulu bá Xanana iha área Administrasaun Públika, ho rekoñesimentu bá nia lideransa, konstrusaun Estadu, rekonsiliasaun, dame no kooperasaun rejionál.
Unhas mós fó Doctor Honoris Causa bá Dr. Bruce Michael Alberts iha 2022, maibé nia mak siénsista biokimia no la’ós líder polítiku ka líder Estadu.
𝗛𝘂𝘀𝗶 𝗹𝘂𝘁𝗮 𝗯𝗮́ 𝗶𝗻𝗱𝗲𝗽𝗲𝗻𝗱𝗲́𝗻𝘀𝗶𝗮 𝘁𝗼’𝗼 𝗹𝗶𝗱𝗲𝗿𝗮𝗻𝘀𝗮 𝗽𝗼́𝘀-𝗸𝗼𝗻𝗳𝗹𝗶𝘁𝘂
Iha ikus, signifikadu Doctor Honoris Causa ne’ebé Unhas fó bá Xanana Gusmão bele kompriende liuhusi trajetória ida: hosi luta bá independénsia, bá rekonsiliasaun; hosi rekonsiliasaun, bá konstrusaun dame; no hosi dame, bá harii no hametin Estadu.
Ba Unhas, trajetória ne’e iha valór atu estuda no aprende, liu-liu kona-bá oinsá lideransa iha nasaun pós-konflitu bele enfrenta dezafiu harii instituisaun, hametin relasaun entre povu sira, garante soberania no loke oportunidade bá kooperasaun rejionál.
Títulu ne’e, la’ós de’it símbolu onra akadémiku. Iha kontestu atribuisaun Unhas, nia mós sai ponte entre memória istórika, rekonsiliasaun, edukasaun, diplomasia no futuru kooperasaun Timor-Leste–Indonézia.
Iha lia-fuan ne’ebé sai tema iha fundamentasaun akadémika Unhas, trajetória husi konflitu bá rekonsiliasaun no husi rekonsiliasaun bá amizade bele sai matéria aprendizajen bá jerasaun foun.
Nune’e, Doctor Honoris Causa ne’ebé Unhas fó bá Xanana Gusmão iha 5 Setembru 2026 marka ida husi rekoñesimentu akadémiku bá nia trajetória, maibé mós sai momentu atu haree fali bá papél koñesimentu, edukasaun no universidade sira iha prosesu harii nasaun no hametin dame iha rejiaun.
𝗛𝘂𝘀𝗶: 𝗖𝗶𝗽𝗿𝗶𝗮𝗻𝗼 𝗖𝗼𝗹𝗼
𝗥𝗲𝘃𝗶𝘇𝗼́𝗿 𝗶𝗵𝗮 𝗗𝗶𝗿𝗲𝘀𝗮𝘂𝗻 𝗠𝗲́𝗱𝗶𝗮 𝗻𝗼 𝗞𝗼𝗺𝘂𝗻𝗶𝗸𝗮𝘀𝗮𝘂𝗻 𝗚𝗮𝗯𝗶𝗻𝗲𝘁𝗲 𝗣𝗿𝗶𝗺𝗲𝗶𝗿𝘂-𝗠𝗶𝗻𝗶𝘀𝘁𝗿𝘂
