10/06/2026
Krueldade - Toman Ho Hahalok Na'ok, La Trava To'o Halakon Nadine Nia Vida, Alerta Sedu Ba Prevensaun
SAP News TL, Díli : Autoridade Seguransa Polisia Nasional Timor-Leste (PNTL), nia Diresaun Servisu Informasaun Polisia (DSIP) junta ho Servisu Nasional intelijénsia detein suspeitu nain-2 ne’ebé envole iha kazu furtu agravadu, hadau ema nia pasta ho telemovel to’o rezulta Nadine da Costa Baptista Ribeiro Garcia do Carmo lakon vida.
Tuir publikasaun ne'ebe Sapnews.com asesu lou hosi página ofisial PNTL haktuir katak kazu ne’e akontese iha Domingu, 07 Juñu 2026, tuku 21:00 kalan, iha área Pantai Kelapa besik Pertamina Mãe da Graça nian, suspeitu sira uza motorizada Beat metan ida hodi hadau vitima sira nia pasta no telemovel.
Durante akontesimentu, vitima sira duni tuir suspeitu sira to’o iha kios 24, ne’ebé lokaliza besik Timor Plaza, suspeitu sira halo asaun ida ne’ebé rezulta vitima nain-rua monu husi motorizada to’o vitima ida ho naran, Nadine da Costa Baptista Ribeiro Garcia do Carmo lakon vida no vitima ida seluk sofre kanek grave.
Vitima ida ne’ebé sofre kanek grave, daudaun ne’e sei hetan tratamentu médiku intensivu iha Hospital Nacional Guido Valadares.
Hafoin simu informasaun kona-ba kazu ne’e, PNTL liuhusi DSIP, hamutuk ho servisu nasional intelijénsia, hala’o operasaun buka-tuir suspeitu sira.
"Autoridade sira konsege identifika no detein suspeitu nain-2 ne’ebé suspeita forte envole iha krime refere". Sita Media PNTL, Dili,10/06/2026.
Oras ne'e, suspeitu sira tama ona iha prosesu investigasaun no asegura ona iha sela polisia kumpri oras 72, hafoin submete ba interrogatóriu dahuluk iha Tribunal ho evidénsia sira hodi kompleta prosesu legal tuir lei vigora iha Timor-Leste.
Iha Komferensia imprensa, Porta-vóz Komandu Jerál PNTL, Superitendente Xefe Polísia João Belo dos Reis, informa, suspeitu na'in-rua ne'e ekipa Polísia kaptura iha área BTN 3, Tasi -Tolu, ho evidénsia motorizada ne'ebé suspeitu sira utiliza hodi halo asaun hadau karteira no telemovel.
Porta Voz PNTL relata, bainhira ekipa konjunta identifika no deskobre, katak suspeitu na'in-rua ba kazu hadau karteira iha, Domingu (07/06/2026), to'o rezulta vitima Nadine da Costa Baptista Ribeiro Garcia do Carmo lakon vida, nu'udar autór ne'ebé sempre halo asaun naok iha kapitál Díli.
"Suspeitu na'in-rua ne'e mós halo asaun naok loron tolu antes iha loja Grasia-Kampung Baru nia kotuk, naok morizada ida Motorizada ida neʼebé sira na'in-rua uza hodi naok ka hadau karteira no telemovel iha área Pantai Kelapa besik Pertamina Mãe da Graça ne'e no mós sira naok kalan tolu antes motor ida," informa Porta Voz PNTL Superitendente Xefe Polísia João Belo dos Reis iha Dili,09/06/2026. Segundu media PNTL
Porta-vóz ne'e hateten, suspeitu na'in-rua ne'e hanesan autór ne'ebé hadau beibeik ema nia sasan, ikus maka hadau iha Pantai Kelapa besik Pertamina Mãe da Graça nian hodi rezulta vitíma Nadine da Costa Baptista Ribeiro Garcia do Carmo lakon vida no vitíma nia bin rasik kanek grave.
"Prosesu sira-ne'e, ita sei akumula hotu aprezenta ba Tribunál, agora dadaun sira iha ami nia liman iha detensaun sela oras 72, depois ami sei submete ba Tribunál," informa Porta Voz PNTL.
Kazu ida ne’e agora dadaun autoridade PNTL rejista ho prosesu Númeru Uniku Krime (NUC), 0206/2026 PNSIK, no kontinua husu ba Ministeriu Públiku atu halo despaixu mai PNTL atu kontinua buka tuir ema neʼebé envolve iha grupu Naok-ten.
Alende ne’e Porta-vóz PNTL mos husu ba públiku liu liu ba sira ne'ebé sente motór lakon iha loja Gracia nia kotuk iha loron tolu liubá atu hakat ba iha Komandu Jerál PNTL lori ho dokumentu komprovativu sira hodi haré motór sira ne'e dadaun ne’e asegura iha edifisiu DSIK iha kuartel Jerál PNTL Caicoli.
Tanba ne’e autoridade seguransa PNTL kontinua reafirma nia kompromisu atu kontinua garante seguransa públika no husu komunidade atu nafatin koopera ho autoridade seguransa sira liuhusi hato’o informasaun relevante ruma ne’ebé bele ajuda iha prevensaun no kombate kriminalidade iha nasaun Territoriu Nasional.
Foto : 𝐌𝐞𝐝𝐢𝐚 𝐏𝐍𝐓𝐋
