27/12/2025
🔴نتوقع جائزة أكبر متحيل لسنة 2025 ما ينجم ينحيهالو حد..؟!!
إلي في الصورة هذا خو Ebo Noah على الاقل كيفاش هو مسمي روحو،
السيد رقد و قام في غانا،
فاللهم أنا نبي،
و ربي بعثلي رسالة انو نهاية العالم بش توفى بطوفان يقعد بين 3 و 4 سنين كاملين،
و بش يبدى من نهار 25 ديسمبر 2025..
و قال أنو بعثلو رسالة زادة ربانية أمرو فيها بش يبني سفن عملاقة يهز فيها العباد بش يمنعهم..
و بدا الماركيتينغ و التسويق للفكرة عبر حساب عملو على تيكتوك..
توى تضحك الحكاية لحد هوني و إنتوما ماخذينها تكوميكة..؟
السيد ولى في ظرف ايام فقط عندو 1.3 مليون متابع على تيكتوك..
ناس تبيع في أرزاقها و ممتلكاتها بش يا إما يعطيووه فلوس بش يعاونوه يبني الفلايك الكبار يا إما بش يقبل انهم يطلعو عليهم أصلا..
ألاف ناس إقتنعت و آمنت بيه..
ملايين المشاهدات على تيكتوك متاعو..
و ناس قبل نهار 25 توافدت بش تضمن بلاصة و صف متاع طوفان بشري هاربين و خايفين من طوفان نهابة العالم..
حتى لين السلطات الغانية إعتقلتو..
و سيبوه من بعد لأسباب قيل أنها في الأخير هاذي حرية معتقد..!
و الغريب أنو موش كان من غانا بركة جاتو الناس..
ثمة عباد تحملت عناء السفر من دول إفريقية مجاورة و باعو إلي وراهم و إلي قدامهم بش يجيو يمنعو مع النبي المنقذ نهار 25 ديسمبر..!
السيد نهار 23 يعمللهم فيديو على تيكتوك من Lounge في أوتيل حفالي و قاللهم كان ربي يستجيب للدعاء متاعي و ما يصيرش الطوفان نهار 25 ديسمبر تلقاوني هوني بش نحتفل معاكم..
أيا بش نزيدوش نطولوها..
البارح..
ماو نهار 25 ديسمبر و الناس تستنى شادة الصف بش تمنع..
و السيد ماجاهمش أصلا..
النبي يعني... 😂
وقتها بركة شموها تحيل و لا طوفان و لا رمان..
حرقو هاك السفن..
و من الضفة الأخرى خونا النبي هبط فيديو على تيكتوك هابط من مرسيدس جديدة نبرة شاريها و قاللهم ربي زاد عطانا وقت بش نبنيو فيه أكثر سفن خاتر موش بش يهزونا الكل و عطانا فرصة بش نستغلو الحياة اكثر و سكر هاك المرسيدس بالمفتاح و توكل على روحو..!
الحكاية ممكن تضحك..
و ممكن تبكي..
لكن واقع وحيد ملموس..
و لا شك فيه..
أنو مواقع التواصل الإجتماعي ولات سلاح فتاك لتسميم العقول..
و كل فئة عندها شكون على قد قياسها قادر يتلاعب بيها..
و لكل مستوى مستوى تحيل يتماشى معاه.
