23/08/2025
أيا سيدي هاذي عينة من الانتدابات اللي حالتهم الدولة ...اما موش للبطّالة.
دار ثقافة بش تحل على قريب في معتمدية منزل المهيري من ولاية للقيروان طالبين انتداب أستاذ موسيقى و استاذ مسرح و استاذ اعلامية و استاذ فنون تشكيلية و استاذ ادب..عربية ، فرونساي، انڨلش...اللي يجي
للبطّالة الانتدابات هاذي؟
لا حبيبي، اول شرط للانتداب انك تكون عون عمومي
شمعناها عون عمومي؟
يعني مثلا استاذ موسيقى، استاذ مسرح، استاذ اعلامية ، استاذ تربية تشكيلية ...و مباشر خدمتك في معهد عمومي يعني تقرّي.
هوكا عاد في سوايع راحتك تمشي لدار الثقافة تعمل نادي و تنشّط الصغيرات، ادّورهم بيك و تغنيلهم ماصار مڨياس يعجب و مطهّر يا المطهّر .
ولا تعلمهم يرسمو بأقلام الزينة و الألوان المائية شخبط شخابيط لخبط لخابيط مسك الألوان و رسم عالحيط.
ولا تعمل نادي مطالعة ...خاصة جماعة الأدب ماهم مغرومين عاد بالمطالعة، تلم الصغيرات و تقرالهم ليلى و الذئب ولا السلحفاة و الأرنب....يا ولدي احكيلهم حتى حكاية امي سيسي رجعيلي بعيصيصي.
اي عاد هذا الكل بلاش؟
توا اذيكا حد نيتك حبييي؟ فما حاجة بلاش في تونس؟
السوايع اللي يقريهم فالليساي يخلص عليهم من وزارة التربية و السوايع اللي ينشطهم في دار الثقافة يخلص عليهم من وزارة الثقافة . ..
شهريتين يا بو ڨلب ؟
يا ولدي اسكت خلي الناس تخدم على ارواحها ...حاسدهم انت؟
موش البطال أولى بالانتدابات هاذي؟
يا ولدي اسكت على روحك قلّو البطال أولى...البطال ينجم يستنى...يزيد يصبر
هاو جاي المولد عزيزي البطال...كول العصيدة و زيد استنى مديدة :)
