22/08/2023
شربنا لحليب الي نكرهوه، كلينا لبخسة والضرب، لعبنا في الشارع بالتراب والحجر للمغرب وروحنا للدار كلنا طبع، بكينا اول نهار في لقراية، وشرينا ڨوم وقلم رصاص وضيعنا ادواتنا، بكينا وقت جبنا تسعطاش عل عشرين ، فرحنا وقت وصلنا لمرحلة انو انجمو نكتبو بالستيلو وحبر ..وانو ولينا نقرو ببارشا كتب، عرفنا لصحاب بين الباهي ولخايب، وخفنا من الدنيا وقت وصلنا لمرحلة التوجيهي ،فدينا وقت وصلنا لسن الثمنطاش وعمبالنا سي بون كبرنا وولت محسوبة علينا لغلطة (الزلڨة بفلڨة) ، جربنا بريسك انواع الناس لكل الحساسين النكديين الطيبين لمغشاشين لمصالحية المرضى والتافهين ولكيوتات ، ضحكو علينا خاطرنا قصار وطوال وناصحين ونخافو، حبينا وماتحبيناش وحبونا وماحبيناش ، جربنا فقدان اعز لعباد ، عشنا حروب وثورات ،شفنا ناس تتقاتل في بعضها، ندمنا عل بارشا علاقات وتجرحنا منها وتوجعنا من بعدها، بكينا عل حاجات تافهة بارشا تتمثل في قطعة من دبشك تحبها عملتها امك خيشة تمسح بيها الدار، ولا شعر مش حاب يتسوا عصباح وانت تقرا ولا خارج، تعودنا حت وكان ماعناش فلوس نخرجو للدنيا نتفسحو نتنفسو ،جربنا ناكلو كل شي ووكان ماعناش نناكلو لهوا ونشبعو، سمعنا وشفنا وعشنا حكايات كنا عمبالنا تصير كان في الأفلام، صلينا وقربنا من ربي وبطلنا وجربنا شمعناها تأنيب ضمير، ختمنا لقرآن وبكينا، قرينا كتب لين قلنا يزي، تفرجنا عل افلام لين عفناها، حفظنا غنايات لين فدينا، كذبنا وخبينا عل اهلنا لين ملينا وفي نفس الوقت منطيقوش فيهم دڨة الشوكة، صرفنا بارشا فلوس عل حاجات تافهة وماتستحقش، مرضنا ألف مرض وتوجعنا وحسينا انها آخرتها، نقصنا نظر وشرينا ألف لينات، ضعف سمعنا وولينا نطفيو ،وذقنا وجيعة المعدة بسبب نكدنا، متنا فشلنا ألف مرة ووقفا عل رسقيننا ،متنا في ليوم ميتين مرة ورجعنا حيينا،.........ومازال مازااال... ، هذاكا علاش بالله لاعاد نحب نسمعها كلمة راك صغيرة ومزلت ماريت شي من الدنيا، انت اوكاي جربت وعشت كل شي ،اما لفرق بيناتنا انو نحنا عشنا هالتجارب وهالمواقف مرة وحدة اما الناس لكبار عاشوها اكثر من مرة ،وتوفا لهنا لحكاية!💛
