15/03/2026
🚨 WAR DEG DEG AH
Kadib markii Benjamin Netanyahu, Raysal Wasaaraha Israel, muddo ku dhow laba toddobaad aan si toos ah loo arkin, ayaa h**ey warbaahinta uga soo muuqday muuqaal dood badan dhaliyay. Muuqaalkaas oo si weyn loogu faafiyay baraha bulshada ayaa warbaahinta qaar ku sheegtay inuu u muuqday mid lagu sameeyay AI (sirdoonka macmalka ah), kadib markii dad badan ay ku arkeen khaladaad muuqaalka ku jiray, gaar ahaan faraha gacantiisa oo u ekaaday 6 farood halkii ay ka ahaan lahaayeen 5.
Arrintaasi waxay dhalisay dood ballaaran iyo shaki badan oo ku saabsan saxnaanta muuqaalka, iyadoo dad badan ay su’aal ka keeneen in muuqaalku yahay mid dhab ah ama la farsameeyay.
Si kastaba ha ahaatee, maanta ayuu mar kale soo muuqday Raysal Wasaaraha Israa’iil isagoo soo bandhigay muuqaal cusub oo uu ku sheegay inuu nool yahay isla markaana uu beeniyay wararkii la xiriiray muuqaalka h**e. Wuxuu si cad u yiri: “Waan noolahay, farahayguna ma aha 6 ee waa 5.”
Balse inkastoo uu sidaas sheegay, haddana dadka falanqeeya muuqaalada iyo isticmaaleyaasha baraha bulshada ayaa mar kale arkay arrin muran dhalisay. Markii muuqaalka cusub uu gaaray ilbiriqsiga 23-aad, waxaa la sheegay in gacantiisa mar kale u muuqatay inay leedahay 6 farood, taasoo keentay in dad badan ay si degdeg ah screenshot uga qaadaan qaybtaas muuqaalka.
Sawirradaas ayaa isla markiiba ku faafay internetka, waxaana sii kordhay doodda ku saabsan in muuqaalka la beddelay ama uu jiro khalad farsamo oo ku jira. Ilaa hadda ma jirto xaqiijin rasmi ah oo ka timid xafiiska Raysal Wasaaraha Israa’iil oo ka jawaabaysa arrintan, balse dooddu weli si xooggan ayay uga socotaa baraha bulshada iyo qaar ka mid ah warbaahinta.
Somali Radio 📻
