07/06/2025
( حمام العيد ايام زمان )
لما كنا اصغار كنا نكره الحمام ليش ؟؟؟
لانه الله يطول بعمرهن كانن يعذبنا تعذيب لما يحممونا ..
الله العظيم لما تقولي قوم عالحمام أنصرع من الخوف .. تقول بس محشور بغرفه :
تبدأ رحلة العذاب من تشليح الاواعي ..
تشلحني الكنزة تقول بتنتّف بريش دجاجة .. وآذاني كل أذن بجهه .
طول ما بتتحمم بدك تظل قاعد قرفصة ..
طيب يا حجه والله رجليّ وجّعوني ..
عالسريع بتناولني كف وبتقولي سكّر ثمّك ..
بالنسبه للميّة لازم تكون تحت درجة الغليان بنتفة .
يا يُما لحمي ذاب ( انهلط ) !!
بيجي الكف الثاني ..
لما تفرك راسي اقسم بالله تقول بتفرك بمصباح علاء الدين عشان تطلّع المارد
وراسي بلولح يمين ويسار اتقول دالية أيام الشتا .
والمشكله لما ينزل صابون عوجهك وبدها تقيمه بتغير ملامح وجهك .. غير حرقة العينين
المشكله إنها الصابونة ( الغار الحلبي ) أقسى من الحجر .
والفرك فيها مصارعه ..
نيجي لعند ما تمسك خشمك وتقولك " ننننفففففف "
بتصير تنف من آذانك .. لأنه كل مجاري التنفس مسكرة
فقرة التلييف :
بتمسك الليفة وبتفركها بالصابونة وهي تنظر إليك تقول جزار بسن بسكاكينه للذبح
طبعا ربنا حامينا .. والا فركها للجسم بجيب شلل رباعي ..
طيب .. هدّي اشويّ يا حجه أنا حاسس كأنك بتبشري بجبنة ..
طبعا الحمام بالدور .. والكبير قبل الزغير ..
ولما أسمع اخوي الكبير ببكي وهي بتحممه .. أنا بالغرفة الثانية بصير أبكي من الخوف
بعد الحمام بتطلّع عحالك في المراية والبخار قاعد بطلع من جسمك كانك طنجرة ضغط مفتوحة .
الاصابع بكونو مجعلكات ولون جسمك أبيض واحمر من كثر الفرك .
تعال لتلبيس الأواعي ..
راسك قد قبة البلوزة خمس مرات وبدها تدخل راسك خاوه ..
بتلبس أول بلوزه وثاني بلوزة .. ويا ويلك إذا فلتت الكم لما تقولك امسك كمّك مشان تلبسك البلوزة الثانية .
نيجي لتمشيط الشعر ..
وحفاظا على تنظيف الراس من القمل والشوائب .. بتغرز المشط براسك وببلش الحراث وطبعا في احتمال إنه أسنان المشط يوصلو مخك
مع حمام الغاليه الحجة .. لو انك صومالي بتصير أبيض
الله يرحم هديك الايام 😂😂
تحياتي: ابو شادي7/6 ثاني أيام عيد الأضحى المبارك
كل عام وانتم بخير وحمام الهنا🌹🌹🌹
