08/06/2026
Müğənni Bahar Lətifqızı internatda böyüyən və hazırda Kəmalə Ağazadənin sığınacağında yaşayan Səbinənin toyu münasibətilə ona xüsusi xonça hazırlatdırıb. Toy günü Bakıda olmayacağı üçün öncədən hazırladığı hədiyyələrlə bu gün sığınacağa baş çəkən sənətçi Səbinəyə xoş arzularını çatdırıb.
Bahar Lətifqızı sığınacaqda yaşayan balaca qızlarla da görüşərək onlarla səmimi söhbət edib. Duyğularına hakim ola bilməyən sənətçi öz həyat yolundan danışaraq kövrək anlar yaşayıb.
“Bir zamanlar mən də internatda böyümüşəm. Akt zalında çıxış edəndə xəyal edirdim ki, nə vaxtsa xalqımın sevgisini qazanacağam. Bu gün həmin sevginin sayəsində ayaqdayam və sizin yanınızda olmaqdan qürur duyuram”, – deyə o bildirib.
Uşaqlıq illərini xatırlayan sənətçi göz yaşlarını saxlaya bilməyib:
“Bizim vaxtımızda belə diqqət və dəstək yox idi. Amma nə xoş ki, bu gün sizinlə birlikdə olub sizə ümid verə bilirəm. Əgər həyat hekayəm sizə örnək olursa, bu mənim üçün ən böyük xoşbəxtlikdir.”
Bahar Lətifqızı bildirib ki, ata-anasız və internatda böyümüş bir insan kimi uşaq evlərində və sığınacaqlarda yaşayan uşaqlara dəstək olmağı özünə mənəvi borc hesab edir:
“Mən internatda böyüyən bir insan kimi bu uşaqların yanında olmağı özümə borc bilirəm. Xalqımız məni ucaltdı, mənə arxa-dayaq oldu və məni sevilən bir sənətkara çevirdi. Buna görə hər zaman minnətdaram.”
Sənətçi sonda valideynlərə də təsirli çağırış edib:
“Qoy övladlarını atanlar, qızlara və qadınlara zorakılıq edənlər bundan nəticə çıxarsınlar. Heç bir valideyn öz övladını tərk etməsin. Övlad Allahın əmanətidir və ona sahib çıxmaq hər bir valideynin borcudur
