23/05/2026
Kombe la Dunia la FIFA 2026, litakuwa na tafsiri ya lugha ya ishara katika mechi zote, pamoja na huduma nyingine za upatikanaji ili kuwawezesha mashabiki wote kufurahia tamasha hilo la kimataifa
FIFA kutoa huduma za hisia maalum (sensory services), maelezo ya sauti kwa wasioona, vibao vya mguso (tactile boards) na huduma nyingine zaidi
Kombe la Dunia la FIFA 2026™ litakuwa mashindano ya kwanza ya FIFA kuwa na matangazo ya lugha ya ishara kwa kila mechi
Mpango huu unaendana na dhamira ya FIFA ya uwajibikaji wa kijamii na ujumuishaji wa watu wote
FIFA imejizatiti kuhakikisha kuwa mashabiki wote – wakiwemo watu wenye ulemavu pamoja na familia na marafiki zao – wanapata uzoefu bora katika Kombe la Dunia la FIFA mwaka huu.
Kwa mara ya kwanza mashindano haya yatakuwa na timu 48, jambo litakalofanya mashindano kuwa ya ujumuishaji mkubwa zaidi kuliko hapo awali. Mbali na kuongeza ushiriki wa mataifa mengi zaidi, FIFA pia imeboresha huduma za upatikanaji kwa mashabiki wenye ulemavu kupitia huduma mbalimbali zitakazofanya uzoefu wa siku ya mechi kuwa wa kukumbukwa.
Baadhi ya huduma hizo zinaendeleza yale yaliyotumika kwa mafanikio katika Kombe la Dunia la Klabu la FIFA 2025™, k**a mifuko ya msaada wa hisia (sensory bags) na maelezo ya sauti kwa wasioona. Jambo jipya mwaka huu – na la kwanza katika mashindano yoyote ya FIFA – ni matangazo ya lugha ya ishara kwa kila mechi.
Hii itawawezesha mashabiki waliopo ndani na nje ya uwanja kufuatilia mchezo na msisimko wake kupitia maelezo ya moja kwa moja ya mchezo pamoja na tafsiri ya sauti muhimu za uwanjani.
Katika maandalizi ya Kombe la Dunia kubwa zaidi kuwahi kufanyika, FIFA inaendelea kufanya kazi ya kuinua kiwango cha ujumuishaji katika soka, pamoja na kutoa huduma na msaada unaowawezesha mashabiki wote kufurahia mchezo huu mzuri.
Tafsiri ya lugha ya ishara
Maelezo ya lugha ya ishara yanazidi tafsiri ya kawaida. Yanatoa uzoefu wa moja kwa moja na wenye hisia kwa mashabiki viziwi na wenye matatizo ya kusikia kwa kutafsiri nguvu na hisia zote za mchezo. Wakalimani maalum wa FIFA hawatatafsiri tu matukio ya mchezo hatua kwa hatua, bali pia watawasilisha sauti muhimu k**a vile filimbi za mwamuzi, nderemo za mashabiki na mabadiliko ya hisia ndani ya uwanja, ili mashabiki waweze kuhisi kila tukio la mechi kwa wakati halisi.
Ili kuhudumia vizuri jamii mbalimbali za mashabiki wa soka, mechi zote za hatua ya makundi zitakazochezwa Marekani na Canada zitakuwa na tafsiri ya Lugha ya Ishara ya Marekani (ASL), huku mechi zitakazochezwa Mexico zikiwa na Lugha ya Ishara ya Mexico (LSM). Katika hatua za mtoano, mechi nyingi zitakuwa na ASL, huku LSM ikitolewa katika baadhi ya mechi zinazohusisha mataifa yanayozungumza Kihispania.
