09/11/2026
တစ်စုံတစ်ယောက် လမ်းပေါ်မှာ လဲကျနေတာတွေ့ရင် အများစုက အရင်ဆုံး ကူညီပေးဖို့ပဲ စဉ်းစားကြမှာပါ။ ဒါပေမယ့် တရုတ်နိုင်ငံမှာတော့ ကူညီပေးခဲ့တဲ့ ဆယ်ကျော်သက် မိန်းကလေး ၂ ယောက်အတွက် ဒီလိုလုပ်ပေးလိုက်တာက မမျှော်လင့်ထားတဲ့ ဥပဒေရေးရာပြဿနာတစ်ခု ဖြစ်လာခဲ့ပါတယ်။
ဒီဖြစ်ရပ်ဟာ ၂၀၂၅ ခုနှစ် မတ်လ ၁၅ ရက်နေ့က တရုတ်နိုင်ငံ Fujian ပြည်နယ်၊ Putian မြို့မှာ ဖြစ်ခဲ့တာပါ။
အသက် ၇၁ နှစ်အရွယ် အမျိုးသမီးတစ်ဦးဟာ စက်ဘီးစီးလာရင်း လမ်းကွေ့အနီးမှာ ကားတစ်စီးထွက်လာတာကို ရှောင်ဖို့ကြိုးစားရင်း လဲကျသွားခဲ့ပါတယ်။
CCTV မှတ်တမ်းတွေကို စစ်ဆေးကြည့်တဲ့အခါ ကားနဲ့ အမျိုးသမီးကြားမှာ တိုက်မိမှုမရှိခဲ့သလို၊ အဲဒီအချိန် အနီးကဖြတ်သွားတဲ့ ဆယ်ကျော်သက် ၂ ယောက်ရဲ့ လျှပ်စစ်စက်ဘီးနဲ့လည်း တိုက်မိခြင်း မရှိခဲ့ပါဘူး။
အဲဒီဆယ်ကျော်သက် ၂ ယောက်ကတော့ လမ်းပေါ်မှာ လဲကျနေတဲ့ အမျိုးသမီးကိုတွေ့တဲ့အခါ ခဏရပ်ပြီး သူမကို ထူပေးခဲ့ကြသလို လဲကျနေတဲ့ စက်ဘီးကိုလည်း ပြန်တည့်ပေးခဲ့ကြပါတယ်။
ဒါပေမယ့် နောက်ပိုင်းမှာ အမျိုးသမီးဘက်က သူမ လဲကျရတဲ့အကြောင်းရင်းဟာ ဆယ်ကျော်သက် ၂ ယောက်ရဲ့ လျှပ်စစ်စက်ဘီးက ရုတ်တရက် အနီးကိုရောက်လာတာကြောင့် လန့်ပြီး ဟန်ချက်ပျက်သွားတာလို့ ဆိုခဲ့ပါတယ်။
ယာဉ်ထိန်းရဲကလည်း ဒီဖြစ်ရပ်ကို “ထိတွေ့တိုက်မိမှုမရှိတဲ့ ယာဉ်မတော်တဆမှု” အဖြစ် သတ်မှတ်ခဲ့ပြီး စက်ဘီးစီးတဲ့ မိန်းကလေးတစ်ဦးမှာ တစ်စိတ်တစ်ပိုင်းတာဝန်ရှိတယ်လို့ သတ်မှတ်ခဲ့ပါတယ်။ နောက်တစ်ဦးကတော့ တာဝန်မရှိဘူးလို့ သတ်မှတ်ခံခဲ့ရပါတယ်။
အဲဒီနောက် အမျိုးသမီးက ဆယ်ကျော်သက် ၂ ယောက်နဲ့ သူတို့ရဲ့ အုပ်ထိန်းသူတွေထံကနေ ယွမ် ၂၂၄,၃၀၇ ကျော်၊ မြန်မာငွေ သိန်း ၁၅၀၀ ဝန်းကျင်နဲ့ညီမျှတဲ့ လျော်ကြေးငွေကို တောင်းဆိုပြီး တရာစွဲခဲ့ပါတယ်။
တောင်းဆိုမှုထဲမှာ ဆေးကုသစရိတ်၊ သူနာပြုစရိတ်၊ အာဟာရစရိတ်၊ မသန်စွမ်းမှုလျော်ကြေးနဲ့ စိတ်ပိုင်းဆိုင်ရာထိခိုက်မှုအတွက် လျော်ကြေးတွေ ပါဝင်ခဲ့ပါတယ်။
ဒီသတင်းဟာ ၂၀၂၆ ခုနှစ် ဖေဖော်ဝါရီလမှာ လူမှုကွန်ရက်ပေါ် ပျံ့နှံ့သွားပြီးနောက် “လမ်းပေါ်မှာ ဒုက္ခရောက်နေသူကို ကူညီပေးရင်တောင် ကိုယ်တိုင်ပြဿနာတက်နိုင်ပြီလား” ဆိုပြီး တရုတ်နိုင်ငံအတွင်း အငြင်းပွားမှုတွေ ပြင်းထန်လာခဲ့ပါတယ်။
ဆယ်ကျော်သက်တစ်ဦးရဲ့ မိခင်ကလည်း ဒီဖြစ်ရပ်ကြောင့် သမီးဖြစ်သူ စိတ်ပိုင်းဆိုင်ရာ ထိခိုက်မှုကြီးမားခဲ့တယ်လို့ ပြောဆိုခဲ့ပါတယ်။
ဒါပေမယ့် ဒီအမှုမှာ နောက်ဆုံးထူးခြားတဲ့အလှည့်အပြောင်းတစ်ခု ဖြစ်လာခဲ့ပါတယ်။ ၂၀၂၆ ခုနှစ် ဖေဖော်ဝါရီ ၂၁ ရက်နေ့မှာ အမျိုးသမီးဘက်က တရားစွဲဆိုမှုကို ပြန်လည်ရုပ်သိမ်းခဲ့တာကြောင့် ဖေဖော်ဝါရီ ၂၆ ရက်နေ့မှာ ပြုလုပ်ဖို့ စီစဉ်ထားတဲ့ တရားရုံးကြားနာမှုလည်း မပြုလုပ်ဖြစ်တော့ပါဘူး။ ဒါကြောင့် ယွမ် ၂၂၄,၃၀၇ ကျော်ကို ဆယ်ကျော်သက် ၂ ယောက်က ပေးလိုက်ရတာမျိုးတော့ မရှိပါဘူး။
ဒီဖြစ်ရပ်ကတော့ ကူညီပေးလိုတဲ့ စိတ်ကောင်းတစ်ခုနဲ့ ဥပဒေရေးရာအငြင်းပွားမှုတွေကြားမှာ ဘယ်လောက်အထိ ရှုပ်ထွေးနိုင်သလဲဆိုတာကို ပြသခဲ့တဲ့ ဖြစ်ရပ်တစ်ခုအဖြစ် တရုတ်နိုင်ငံမှာ အတော်လေး လူပြောများခဲ့ပါတယ်။
