05/06/2025
ਮੋਕ ਡਰਿੱਲ
#ਗੱਗਬਾਣੀ
ਸਾਡੇ ਦੇਸ਼ ਦੇ ਪ੍ਰਧਾਨ ਸੇਵਕ ਨੂੰ ਗੁਆਂਢੀ ਦੇਸ਼ ਦੇ ਪ੍ਰਧਾਨ ਸੇਵਕ ਦਾ ਫੋਨ ਆ ਗਿਆ।
"ਕੀ ਹਾਲ ਚਾਲ ਐ ਮੋਧੀ ਸਾਹਿਬ, ਹਮ ਰੁਤਬਾ ਦੀ ਸਲਾਮ ਕਬੂਲ ਕਰੋ ਜਨਾਬ!"
"ਅਜੇ ਹਾਲ ਚਾਲ ਨਾ ਪੁੱਛ ਭਰਾਵਾ, 'ਦੇਸ਼ ਧ੍ਰੋਹੀਆਂ' ਨੇ ਜਾਨ ਲੈਣੀ ਕੀਤੀ ਹੋਈ ਐ।" ਮੋਧੀ ਸਾਹਿਬ ਨੇ ਜਵਾਬ ਦਿਤਾ।
"ਜਨਾਬ-ਏ-ਅਲੀ, ਅਸਾਂ ਤੇ ਇਹ ਕਹਿਣ ਲਈ ਫੂਨ ਕੀਤਾ ਈ ਕਿ ਜਿਹੜੇ ਦੋ-ਚਾਰ ਬੰਬ ਹੈਗੇ ਨੇ, ਸੁੱਟ ਕੇ ਫਾਹਾ ਵੱਢੋ, ਕਾਹਨੂੰ ਜਾਨ ਸੁੱਕਣੇ ਪਾਈ ਐ.... ਏਧਰ ਸਾਡਾ ਘੜੀ-ਘੜੀ ਮੂਤ ਨਿੱਕਲ਼ਦਾ ਪਿਆ ਏ।"
"ਓਏ ਅੱਲਾ ਦਾ ਸ਼ੁਕਰ ਕਰੋ, ਤੁਹਾਡਾ ਕੁੱਝ ਨਾ ਕੁੱਝ ਤੇ ਨਿਕਲ਼ਦਾ ਪਿਆ ਏ, ਏਧਰ ਸਾਡਾ ਹੱਗਣਾ, ਮੂਤਣਾ ਸਭ ਕੁੱਝ ਬੰਦ ਕੀਤਾ ਪਿਆ ਏ।"
"ਕੀਹਨੇ, ਵਿਰੋਧੀ ਪਾਰਟੀਆਂ ਨੇ?'
"ਨਹੀਂ"
"ਲੋਕਾਂ ਨੇ?"
"ਨਹੀਂ"
"ਫਿਰ ਕੀਹਨੇ ਫ਼ਾਨਾ ਅਵਾਇਆ ਹੋਇਆ ਏ, ਦੱਸੋ ਤੇ ਸਹੀ?
"ਅਮਰੀਕਾ ਨੇ ਸੰਘ 'ਤੇ 'ਗੂਠਾ ਰੱਖਿਆ ਹੋਇਆ ਏ ਕਿ ਜੇ ਰਾਫੇਲ ਜਹਾਜ਼ ਫਰਾਂਸ ਤੋਂ ਖਰੀਦਣੇ ਨੇ ਬੇਸ਼ੱਕ ਖਰੀਦ ਲਈਏ ਪਰ ਅਮਰੀਕਾ ਦਾ ਦਸਵੰਧ ਦੇਣਾ ਹੀ ਪੈਣਾ ਏ।"
"ਤੂੰ ਕਿਤੇ ਇੱਟਾਂ ਪੱਥ ਕੇ ਦਸਵੰਧ ਕੱਢਣਾ ਆ? ਲੋਕਾਂ ਦੇ ਸੰਘ 'ਚ ਈ ਗੂਠਾ ਦੇਣਾ ਏ, ਇੱਕ ਦੀ ਬਜਾਏ ਭਾਵੇਂ ਤੂੰ ਦਸ ਦਸਵੰਧ ਕੱਢ ਲਵੇਂ.... ਤੇਰੇ ਦੇਸ਼ ਦੇ ਲੋਕ ਕਿਹੜਾ ਕੁਸਕਦੇ ਐ"
"ਆਹੋ ਲੋਕ ਤਾਂ ਇੱਕ ਦੂਸਰੇ ਦੀਆਂ ਰੇਹੜੀਆਂ-ਠੇਲ੍ਹੇ ਭੰਨਣ ਲਾਏ ਹੋਏ ਐ, ਪਰ ਦਸਵੰਧ ਅਪਣੇ ਮੀਡੀਆ ਨੂੰ, ਵਿਰੋਧੀ ਧਿਰਾਂ ਨੂੰ, ਸੁਪਰੀਮ ਕੋਰਟ ਦੇ ਜੱਜਾਂ ਨੂੰ ਤੇ ਫ਼ੌਜ ਦੇ ਅਫ਼ਸਰਾਂ ਨੂੰ ਵੀ ਦੇਣਾ ਪੈਣਾ ਏ ਤੇ ਅਜੇ ਵਿਰੋਧੀ ਧਿਰਾਂ ਨਾਲ਼ ਹੀ ਸੌਦਾ ਤੈਅ ਨਹੀਂ ਹੋ ਰਿਹਾ।"
"ਹੈ ਕਿਹੜੀ ਐ ਵਿਰੋਧੀ ਧਿਰ? ਸਾਰੇ ਤਾਂ ਚੱਕ-ਚੱਕ ਕੇ ਤੂੰ ਅੰਦਰ ਤਾੜ ਸੁੱਟੇ ਐ, ਜਿਹੜੇ ਬਾਹਰ ਐ ਉਹਨਾਂ ਵਾਸਤੇ ਤੇਰੀ ਈ ਡੀ ਦੇ ਪੈਟਰੋਲ ਦਾ ਤੂੰਬਾ ਲਾਉਣ ਦੀ ਲੋੜ ਐ, ਏਡੀ ਤਾਂ ਕੋਈ ਗੱਲ ਨਹੀਂ ਕਿ ਤੇਰਾ ਏਨੀ ਦੇਰ ਤੱਕ ਫਰਾਂਸ ਨਾਲ਼ ਸੌਦਾ ਅੜਿਆ ਰਹੇ, ਭਾਈਵਾਲ ਅਮਰੀਕਾ ਏਸੇ ਕੰਮ ਦਾ ਤੇ ਦਸਵੰਧ ਲੈਂਦਾ ਏ ਤੇ ਸਾਨੂੰ ਵੀ ਘੱਲਦਾ ਏ।"
"ਗੱਲ ਤਾਂ ਤੇਰੀ ਠੀਕ ਐ ਪਰ ਅਜੇ ਅਪਣੇ ਈ ਸਾਹ ਨਹੀਂ ਲੈਣ ਦੇ ਰਹੇ, ਅਜੇ ਤਾਂ ਸਵਾਲਾਂ ਨੂੰ ਦਬਾਉਣ ਅਤੇ ਉਲਝਾਉਣ ਦੇ ਨਾਲ਼-ਨਾਲ਼ ਸਵਾਲਾਂ ਦਾ ਰੁਖ਼ ਮੋੜਨ ਵਿੱਚ ਹੀ ਉਲਝੇ ਹੋਏ ਹਾਂ.... ਤੂੰ ਹੀ ਦੱਸ ਕੋਈ ਹੱਲ।"
"ਹੱਲ ਤਾਂ ਵੱਟ 'ਤੇ ਪਿਆ ਏ, ਤੂੰ ਤੇ ਆਪ ਮਾਸਟਰ ਏਂ ਏਦਾਂ ਦੇ ਹੱਲ ਕੱਢਣ ਦਾ, ਤੈਥੋਂ ਕੀ ਲੁਕਿਆ ਏ?"
"ਬੰਦਾ ਬਣ ਕੇ ਹੱਲ ਦੱਸ, ਬੁਝਾਰਤਾਂ ਨਾ ਪਾ।"
"ਹੱਲ ਇਹੋ ਐ ਕਿ ਜਿਸ ਤਰੀਕੇ ਨਾਲ਼ ਧਰਮ ਦਾ ਨਾਂ ਲੈ ਕੇ ਪਹਿਲਗਾਮ ਵਿੱਚ ਬੁੜ੍ਹਕਾਏ ਐ 25-26 ਜਣੇ, ਉਸੇ ਤਰੀਕੇ ਨੂੰ ਕਿਸੇ ਹੋਰ ਜੰਨਤ ਵਿੱਚ ਆਜ਼ਮਾਉਣਾ ਪਊ, ਹੋਰ ਏਡੀ ਕਿਹੜੀ ਗੱਲ ਐ? ਕਸ਼ਮੀਰ ਕੀ ਤੇ ਸੂਰਤ ਕੀ, ਅੰਨ੍ਹੇ ਅੱਗੇ ਮੂਰਤ ਕੀ?"
"ਗੱਲ ਤਾਂ ਤੇਰੀ ਸੋਲ਼ਾਂ ਆਨੇ ਸਹੀ ਐ ਯਾਰ, ਇਹੋ ਕਰਨਾ ਪਊ। ਕਰ ਕੁਸ਼ ਵੀਰ ਬਣ ਕੇ, ਮਿੰਣਤ ਆਲ਼ੀ ਗੱਲ ਐ ਯਾਰ.... ਬੰਦੇ ਭਾਵੇਂ ਹਜ਼ਾਰਾਂ ਮਰ ਜਾਣ, ਰਾਫ਼ੇਲ ਆਲ਼ਾ ਸੌਦਾ ਸਿਰੇ ਚੜ੍ਹਨਾ ਚਾਹੀਦਾ ਹੈ।"
"ਹੈ ਕਿਹੜੀਆਂ ਭੋਲ਼ੀਆਂ ਗੱਲਾਂ ਕਰਦਾਂ... ਘੁਮਾ ਦੇ ਵਾੱਟਸਐਪ ਯੂਨਿਵਰਸਿਟੀ ਦੀ ਚਾਬੀ।"
"ਚਾਬੀ ਤਾਂ ਮੈਂ ਘੁਮਾ ਹੀ ਦੇਊਂ, ਪਰ ਆਹ ਬੰਦੇ ਮਾਰਨ ਆਲ਼ਾ ਜੁਗਾੜ ਕਰ।"
"ਕਿਉਂ ਬਈ... ਪਾਪ ਵੀ ਮੈਂ ਖੱਟਾਂ ਤੇ ਪੁੰਨ ਵੀ ਮੈਂ ਕਰਾਂ? ਪਹਿਲਗਾਮ ਵੀ ਤਾਂ ਤੇਰੇ ਤੜੀਪਾਰ ਨੇ ਆਪੇ ਹੀ ਕਰਵਾਇਆ ਹੈ, ਦੂਸਰਾਗਾਮ ਵੀ ਆਪੇ ਸਿਰਜ ਲੈ, ਤੇਰੇ ਕੋਲ਼ ਕਾਹਦੀ ਘਾਟ ਐ, ਫ਼ੌਜ ਤੇਰੀ, ਅਫ਼ਸਰ ਤੇਰੇ, ਜੱਜ ਤੇਰੇ, ਵਕੀਲ ਤੇਰੇ, ਮੀਡੀਆ ਤੇਰਾ, ਹੋਰ ਤੇ ਹੋਰ ਵਾੱਟਸਐਪ ਯੂਨਿਵਰਸਿਟੀ ਵੀ ਤੇਰੀ। ਤੈਨੂੰ ਕਾਹਦਾ ਧੁੜਕੂ ਐ?"
"ਹੌਲ਼ੀ ਬੋਲ, ਟੈਲੀਫੋਨਾਂ ਦੇ ਵੀ ਕੰਨ ਹੁੰਦੇ ਐ, ਲੋਕੀਂ ਤਾਰਾਂ ਨੂੰ ਕੁੰਡੀਆਂ ਪਾ ਕੇ ਰੱਖਦੇ ਐ, ਕੀਤੀ ਕਰਾਈ ਖ਼ੂਹ 'ਚ ਨਾ ਪਾ ਦੇਈਂ, ਆਪੇ ਮੈਂ ਕਰੂੰ ਕੁਸ਼... ਤੂੰ ਬੱਸ ਜ਼ਿੰਮੇਵਾਰੀ ਲੈ ਲਵੀਂ, ਜਿਵੇਂ ਅੱਗੇ ਲੈਂਦਾ ਰਿਹਾ ਏਂ।"
"ਆਹੋ, ਜ਼ਿੰਮੇਵਾਰੀ ਮੈਂ ਆਪੇ ਚੱਕ ਲਊਂ, ਜ਼ਿੰਮੇਵਾਰੀ ਚੱਕਣੀ ਹੀ ਪਊ, ਜੇ ਨਾ ਚੁੱਕੀ ਤਾਂ ਤੂੰ ਖ਼ਤਰਾ ਕੀਹਦੇ ਤੋਂ ਆਖ਼ ਕੇ ਦਹਿਸ਼ਤ ਪੈਦਾ ਕਰ ਕੇ ਅਪਣੇ ਲੋਕਾਂ ਨੂੰ ਭਰੋਸੇ ਵਿੱਚ ਲਵੇਂਗਾ ਕਿ ਫ਼ਰਾਂਸ ਤੋਂ ਰਾਫ਼ੇਲ ਖਰੀਦਣੇ ਨੇ। ਰਾਫ਼ੇਲ ਖ਼ਰੀਦੇਂਗਾ ਤੇ ਅਮਰੀਕਾ ਨੂੰ ਦਸਵੰਧ ਜਾਊ, ਅਮਰੀਕਾ ਨੂੰ ਦਸਵੰਧ ਜਾਊਗਾ ਤੇ ਤਦੇ ਹੀ ਸਾਨੂੰ ਦਸਵੰਧ ਮਿਲ਼ੂ, ਤਦੇ ਹੀ ਸਾਡਾ ਚੁਲ੍ਹਾ ਭਖ਼ਦਾ ਹੋਊ। ਤੂੰ ਫ਼ਿਕਰ ਨਾ ਕਰ, ਕਾਰਵਾਈ ਪਾ ਕੇ ਮੇਰੇ ਉੱਤੇ ਸ਼ੱਕ ਜ਼ਾਹਿਰ ਕਰ ਦੇਵੀਂ, ਜ਼ਿੰਮੇਵਾਰੀ ਮੈਂ ਆਪੇ ਹੀ ਕਿਸੇ ਲੱਲੀ-ਛੱਲੀ ਤੋਂ ਚੁਕਵਾ ਲਊਂ।
"ਚੱਲ ਠੀਕ ਐ, ਮੈਂ ਕਰਦਾਂ ਤੜੀਪਾਰ ਨਾਲ਼ ਸਲਾਹ ਤੇ ਘੱਲਦਾਂ ਉਹਨੂੰ ਕਿਸੇ ਜੰਨਤ ਦਾ ਜਾਇਜ਼ਾ ਲੈਣ। ਓ ਕੇ ਬਾਏ, ਜੈ ਸ਼੍ਰੀ ਰਾਮ।"
"ਓ ਕੇ ਬਾਏ, ਖ਼ੁਦਾ ਹਾਫ਼ਿਜ਼।"
