12/12/2025
EPISODE 1
The Day My Best Friend’s Wife Called Me “Baby” By Mistake
That morning no start like trouble.
I just dey my corner, minding my business, scrolling through my phone like every normal human being wey never chop breakfast but don open social media. My guy, Chuka -> my best friend since wey we still dey wear oversized uniforms – had travelled out for work two days earlier. Meaning his wife, Amara, was at home alone.
Amara no be troublemaker. She’s the type wey dey greet everybody with smile, mind her lane, and sabi respect herself. So me and her no dey talk beyond normal “How you dey?” “I dey o” kind conversation.
But that morning?
The universe just decide to spice my destiny small.
Around 10:42am, my phone vibrate.
One message enter.
Name on the notification: “Amara (Chuka’s Wife).”
Omo, my heart no even shake. I just assumed maybe she wan ask whether I don hear from Chuka or something casual like that. So I clicked the message.
“Good morning baby… did you sleep well?”
I freeze.
I blink.
I blink again.
I even wipe my eye small to be sure say na me she text.
Because… baby?
Me?
Her husband’s best friend?
I stared at my phone like person wey dem just tell say NEPA abi PHCN or which ever don increase light tariff again.
“Baby?”
“BABY??”
My brain begin calculate sharp-sharp:
…Maybe na typo.
…Maybe autocorrect dey misbehave.
…Maybe she wan send the message to her husband.
🙆🏽♂️Or… maybe… this is how scandal starts in Nollywood movies.
Before I fit think reach finish, another message land.
“Sorry… I didn’t mean to send that one. Ignore it.”
Ignore ke?
You send me “baby” by 10:42am and you dey tell me make I ignore it like say na mosquito wey pass?🙄
But something about that “ignore it” was too quick. Too sharp. Too… suspicious.🤔
My chest com do “gbim-gbim” like drum set for church praise worship.
I typed, erased, typed again.
Because wetin I wan even reply? If I sound too serious, e go be like I dey fear. If I sound too playful, e go be like I like the thing.
Finally, I just type:
“Are you sure you’re okay?”
She didn’t reply.
Five minutes pass.
Ten minutes.
Fifteen.
Omo, suspense wan kee me.
Then gbum!
Her voice call enter.
The moment I picked, her voice come soft, gentle… almost shy.
“Ike… please don’t take that message personal. It was not meant for you.”
Her voice shake small.
But na the kain shake wey no clear whether na embarrassment or something deeper.
I no know why but I ask,
“Who you wan send am to?”
Silence.
Short.
Deep.
Heavy.
Then she say something wey scatter my whole brain:
“Don’t worry… it’s complicated.”
Complicated?
How?
Why?
For who?
Before I fit ask more, she end the call.
My body com cold.
Because one thing I know, once person say “It’s complicated,” nothing normal dey inside that matter again.
I dropped my phone slowly.
And for one quick second, I swear something inside me whisper:
“Ike… better open your eyes. This one no be ordinary mistake.”
To be continued…
Episode 2 go choke🤪
Share 👍🏾
TASK FOR YOU
If na you this kind message enter your phone from your guy wife, what’s the FIRST thing you go do?
Drop your answer in the comments. Make we reason am. 🙃🔥
