29/07/2022
HD ABO Jaal Daawud Ibsaa fi Dura taa’aan KFO Profeeseer Maraaraa Guddinaa Hoteela Ayyati Rejeensii magaalaa Finfinnee tti argamuun Mootummaa Ameeriikaatti jiila bakka bu’oota Diploomaasii gaanfa Afriikaa Kan ta’an waliin Marii geggeessan.
======================================
Hayyu Duree ABO fi Dura taa’aan KFO Profeesser Mararaa Guddinaa Guyyaa Har’aa kana waaree booda sa’a 4 irraa hanga sa’a 5:30tti, bu’uura bellama imbaasiin biyya Ameeriikaa magaalaa Finfinnee qindeesseen Hooteela Ayati Rejeensiitti “argamuun mootummaa Ameeriikaatti bakka bu’aa addaa dhimma dipiiloomaasii gaanfa Afriikaa Kan ta’an kan yeroo ammaa jila isaanii waliin Itoophiyaa daawwataa jiran Mr Mike Hammer waliin dhimma biyyatti fi ajandaa garaagaraa irratti Marii bal’aa geeggeessanii jiru . Marii kana irrattis jila dipiloomaatii gaanfa Afriikaa kana dabalatee Ms. Valerie Parry imbaasii Ameeriikaa Itoophiyaatti argamutti dipiloomaatii fi itti gaafatamtuu dhimma siyaasaa fi dinagdee akkasumas “state department “ Ameeriikaatti gaafatamummaa Kan qabduu qooda fudhattee jirti.
Marii yeroo dheeraa godhame Kanaan hoggantoonni paartiilee lachuu dhimmoota jajjaboo ta’an irratti Lolaa fi Nageenyaa, dinagdee, Marii Siyaasaa waliigalaa, hidhamtoota siyaasaa fi addatti haala Oromiyaa keessaa, haala haasawa nagaa hammatu irratti mariin godhame jira. Kanaan wal maddittis dhiibbaa addatti paartiilee kanneen kana irratti paartiin aangoo qabatee biyya bulchaa jiruu godhamaa jiru dhabbatuu qaba Kan jedhus ijoo marii kanaa ture . Haal duree tokko malees hidhamtoonni Siyaasaa hiikamuu,Mootummaan lola kallattii garaagaraan geggessaa jiru dhaabuu ,Waajjiraalee Partilee kanaa cufaman banamuu fi Paartiileen siyaasaa Kun Sochii bilisaan akka taasisan karaan jiraachuu akka qabus gafataniiru.
Hoggantoonni ABO fi KFO nagaa waaraa Oromiyaa fi biyyatti waliigalaa keessatti fiduun Kan danda’amu humnaan akka itti paartiin biyya bulchu godhaa jiru osoo hin taane nagaan bu’ee karaa nagaan marii hunda hammatee rakkoon Siyaasaa bu’uura ta’ee deebii argate qofaa dha jechuunis hubachiisan. Keessattu marii biyyooleessaa jechuun akka nagaa barbaadutti fakkessee paartiin biyya bulchu ABO fi KFO qoophixeessuudhaan sochiin godhamu bu’aa kan hin fidne ta’u akka hawaasni addunyaa hubatu jechuun kaasan.
Dipiloomaatonni kunis nagaa gaanfa Afriikaa , biyyaa Itoophiyaas ta’ee addatti Oromiyaa keessatti dhaleessuuf shoorri paartiileen Kun qaban himuun gama isaaniin nagaan akka bu’ee lammileen nagaan jiraataniif waan irraa eegamu kan godhan ta’uus himanii jiru . ABO fi KFOn Miseensonni isaanii danuun hidhaatti gidirfamaa sochii dhorkamanis akka jaarmiyaatti hojiilee gurguddoo mirga ummata qabsa’aniif hojjeechaa jiraachuu kan himan hoggantooti kun gama isaaniin gaaffii sabni Oromoo fi lammileen biyyatti qaban karaa nagaa akka furmaata argatan qaama kamuu waliin akka hojjechuuf qophii akka ta’anii fi falli tokkich biyyatti daandii nagaatti geessuu marii Siyaasaa hundaa hammate qofaa akka ta’ee dhammachuun marii isaanii golabataniiru.
Madda :Sabqunnamtii ABO irraa
Finfinnee, Adooleessa 29/2022
