09/26/2026
ਟਰੰਪ ਪ੍ਰਸ਼ਾਸਨ ਨੇ ਕਾਂਗਰਸ ਵੱਲੋਂ ਮਨਜ਼ੂਰ ਕਰੀਬ 1 ਅਰਬ ਡਾਲਰ ਦੀ ਫੰਡਿੰਗ ਰੱਦ
ਡੈਮੋਕ੍ਰੇਟਿਕ ਮੈਂਬਰ ਪੈਟੀ ਮਰੇ ਨੇ ਵੀ ਇਸ ਕਦਮ ਦੀ ਆਲੋਚਨਾ ਕੀਤੀ ਹੈ।
ਵਾਸ਼ਿੰਗਟਨ — ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਪ੍ਰਸ਼ਾਸਨ ਨੇ ਕਾਂਗਰਸ ਵੱਲੋਂ ਪਹਿਲਾਂ ਮਨਜ਼ੂਰ ਕੀਤੇ ਕਰੀਬ 1 ਅਰਬ ਡਾਲਰ ਦੇ ਸਰਕਾਰੀ ਖਰਚ ਨੂੰ ਰੱਦ ਕਰਨ ਦਾ ਐਲਾਨ ਕੀਤਾ ਹੈ। ਵ੍ਹਾਈਟ ਹਾਊਸ ਵੱਲੋਂ ਸ਼ੁੱਕਰਵਾਰ ਨੂੰ ਕੀਤੇ ਐਲਾਨ ਮੁਤਾਬਕ ਇਹ ਫੰਡ ਮੁੱਖ ਤੌਰ ’ਤੇ ਇਮੀਗ੍ਰੈਂਟ ਸੇਵਾਵਾਂ, ਸ਼ਰਨਾਰਥੀਆਂ, ਇਕੱਲੇ ਨਾਬਾਲਗਾਂ ਅਤੇ ਕੁਝ ਵਿਭਿੰਨਤਾ-ਕੇਂਦਰਿਤ ਪ੍ਰੋਗਰਾਮਾਂ ਨਾਲ ਜੁੜੇ ਹੋਏ ਸਨ।
ਟਰੰਪ ਪ੍ਰਸ਼ਾਸਨ ਦੇ Office of Management and Budget (OMB) ਨੇ ਕਿਹਾ ਹੈ ਕਿ ਇਹ ਕਟੌਤੀਆਂ ਸਰਕਾਰ ਦੇ ਉਸ ਖਰਚ ਨੂੰ ਨਿਸ਼ਾਨਾ ਬਣਾਉਂਦੀਆਂ ਹਨ ਜਿਸਨੂੰ ਪ੍ਰਸ਼ਾਸਨ “ਸਭ ਤੋਂ ਹਾਨੀਕਾਰਕ ਸਰਕਾਰੀ ਖਰਚ” ਮੰਨਦਾ ਹੈ। ਪ੍ਰਸ਼ਾਸਨ ਦਾ ਕਹਿਣਾ ਹੈ ਕਿ ਸਰਹੱਦ ’ਤੇ ਗੈਰਕਾਨੂੰਨੀ ਦਾਖ਼ਲਿਆਂ ਵਿੱਚ ਕਮੀ ਆਉਣ ਕਾਰਨ ਕੁਝ ਇਮੀਗ੍ਰੈਂਟ ਅਤੇ ਰਿਫਿਊਜੀ ਪ੍ਰੋਗਰਾਮਾਂ ਲਈ ਪਹਿਲਾਂ ਮਨਜ਼ੂਰ ਕੀਤੀ ਰਕਮ ਦੀ ਹੁਣ ਲੋੜ ਨਹੀਂ ਰਹੀ।
ਇਸ ਫੈਸਲੇ ’ਤੇ ਦੋਵੇਂ ਪਾਰਟੀਆਂ ਦੇ ਕੁਝ ਕਾਂਗਰਸੀ ਮੈਂਬਰਾਂ ਵੱਲੋਂ ਇਤਰਾਜ਼ ਵੀ ਸਾਹਮਣੇ ਆਏ ਹਨ। ਸੈਨੇਟ ਐਪ੍ਰੋਪ੍ਰੀਏਸ਼ਨਜ਼ ਕਮੇਟੀ ਦੀ ਰਿਪਬਲਿਕਨ ਚੇਅਰ ਸੂਜ਼ਨ ਕੋਲਿਨਜ਼ ਨੇ ਕਿਹਾ ਕਿ ਇਸ ਕਾਰਵਾਈ ਬਾਰੇ ਉਨ੍ਹਾਂ ਨਾਲ ਪਹਿਲਾਂ ਕੋਈ ਸਲਾਹ-ਮਸ਼ਵਰਾ ਨਹੀਂ ਕੀਤਾ ਗਿਆ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਫੰਡਿੰਗ ਸਬੰਧੀ ਫੈਸਲੇ ਕਰਨ ਦਾ ਅਧਿਕਾਰ ਕਾਂਗਰਸ ਕੋਲ ਹੈ। ਡੈਮੋਕ੍ਰੇਟਿਕ ਮੈਂਬਰ ਪੈਟੀ ਮਰੇ ਨੇ ਵੀ ਇਸ ਕਦਮ ਦੀ ਆਲੋਚਨਾ ਕੀਤੀ ਹੈ।
ਇਸ ਮਾਮਲੇ ਵਿੱਚ “ਪਾਕੇਟ ਰਿਸੀਜ਼ਨ” (Pocket Rescission) ਸ਼ਬਦ ਵੀ ਚਰਚਾ ਵਿੱਚ ਹੈ। ਅਮਰੀਕੀ Government Accountability Office (GAO) ਮੁਤਾਬਕ ਰਾਸ਼ਟਰਪਤੀ ਕਾਂਗਰਸ ਨੂੰ ਫੰਡ ਰੱਦ ਕਰਨ ਦੀ ਤਜਵੀਜ਼ ਭੇਜ ਸਕਦਾ ਹੈ, ਪਰ ਕਾਨੂੰਨ ਅਨੁਸਾਰ ਕਾਂਗਰਸ ਨੂੰ ਇਸ ’ਤੇ ਕਾਰਵਾਈ ਲਈ ਸਮਾਂ ਦਿੱਤਾ ਜਾਂਦਾ ਹੈ। GAO ਨੇ ਕਿਹਾ ਹੈ ਕਿ ਫੰਡਾਂ ਨੂੰ ਇਸ ਤਰੀਕੇ ਨਾਲ ਰੋਕਣਾ ਕਿ ਉਹ ਮਿਆਦ ਖ਼ਤਮ ਹੋਣ ਕਾਰਨ ਆਪਣੇ ਆਪ ਖਰਚ ਨਾ ਹੋ ਸਕਣ, ਕਾਨੂੰਨ ਅਨੁਸਾਰ ਮਨਜ਼ੂਰਸ਼ੁਦਾ ਪ੍ਰਕਿਰਿਆ ਨਹੀਂ ਹੈ।
ਵ੍ਹਾਈਟ ਹਾਊਸ ਵੱਲੋਂ ਦੱਸੇ ਗਏ ਹੋਰ ਫੰਡਾਂ ਵਿੱਚ ਅੰਤਰਰਾਸ਼ਟਰੀ ਸਿੱਖਿਆ ਪ੍ਰੋਗਰਾਮਾਂ ਲਈ 70 ਮਿਲੀਅਨ ਡਾਲਰ, ਸਿਹਤ ਅਤੇ ਮਨੁੱਖੀ ਸੇਵਾਵਾਂ ਨਾਲ ਸਬੰਧਤ ਖੋਜ ਗ੍ਰਾਂਟਾਂ ਲਈ 28 ਮਿਲੀਅਨ ਡਾਲਰ, ਵਿਦੇਸ਼ੀ ਦੇਸ਼ਾਂ ਨਾਲ ਜੁੜੀ 9 ਮਿਲੀਅਨ ਡਾਲਰ ਦੀ ਕਰਜ਼ਾ ਰਾਹਤ ਅਤੇ ਘੱਟਗਿਣਤੀ ਕਾਰੋਬਾਰ ਵਿਕਾਸ ਪ੍ਰੋਗਰਾਮ ਲਈ 10 ਮਿਲੀਅਨ ਡਾਲਰ ਸ਼ਾਮਲ ਹਨ।
ਇਹ ਕਦਮ ਰਾਸ਼ਟਰਪਤੀ ਅਤੇ ਕਾਂਗਰਸ ਵਿਚਕਾਰ ਸਰਕਾਰੀ ਖਰਚ ’ਤੇ ਅਧਿਕਾਰ ਨੂੰ ਲੈ ਕੇ ਚੱਲ ਰਹੀ ਵੱਡੀ ਬਹਿਸ ਦਾ ਹਿੱਸਾ ਬਣ ਗਿਆ ਹੈ।
