20/08/2025
Musharax Abdishakuur Mohamed oo ka qaybgalay StartupBREW Fargo
Fargo, North Dakota – Agoosto 20, 2025 – Musharax Abdishakuur Mohamed, oo ku tartamaya xilka Minnesota House District 4A, ayaa maanta ka qaybgalay madasha hal-abuurka ee StartupBREW Fargo, oo sanad walba lagu qabto magaalada Fargo ee gobolka North Dakota. Madashan ayaa ah mid muhiim ah oo lagu dhiirrigeliyo ganacsiyada yaryar iyo kuwa cusub ee gobolka.
Musharax Abdishakuur ayaa xusay in markii uu 2019 ku bilaabay Soma Employment Solutions, madalihii ugu horreeyay ee uu fikradihiisa ku soo bandhigay ay ahayd 1 Million Cups, oo hadda noqotay StartupBREW Fargo. Halkaa ayuu ka dhisay xiriir iyo kalsooni uu ganacsigiisu ku koray.
Musharax Abdishakuur wuxuu sheegay in StartupBREW ay tahay goob ay aasaasayaashu ku kulmaan, sheekooyinka lagu wadaago, iyo tamarta ganacsiga oo bulshada horumarisa. Waxa uu balan qaaday in aragtidaas uu ku hagi doono olohiisa, isagoo abuuri doona fursado iyo taageero loogu talagalay ganacsiyada yaryar iyo aasaasayaasha cusub ee District 4A.
Kulankan ayaa sidoo kale ahaa fursad uu Musharax Abdishakuur kula kulmay hoggaamiyeyaasha iyo saaxiibada ganacsiga, kuwaas oo ay ka mid yihiin Andrew Jason, Grand Farm Ecosystem Director, Brian Carroll, Chief Operating Officer & Co-Founder of Grand Farm, Jenny Sheets, iyo dad kale oo badan, taasoo muujinaysa muhiimadda madalaha noocan oo kale ah ee kobciya hal-abuurka iyo iskaashiga ganacsi.
Musharax Abdishakuur Mohamed ayaa ku booriyay bulshada in la sii wado dhiirrigelinta ganacsiyada yaryar, hal-abuurka, iyo fursadaha horumarineed, isaga oo aragtidiisa ku saleynaya in District 4A uu noqdo meel ay bulshada iyo ganacsiyada cusub si buuxda u kobciyaan.
Galsan TV
