18/09/2026
Dhugaa Media Voice of peace
“Tsimdoo hin beeknu; garuu tumsa keessa jirra” Ibsi WBO' kun kan dhagahame yeroo hoogganaan garichaa ol'aanaan Kumsaa Dirribaa mariif Asmaraatti imaleera jedhama jirutti
Dhugaa Media Finfinnee, Fulbaana 18, 2026:
Waraanni Bilisummaa Oromoo jedhee of-waamu fi kan Paarlaamaan mootummaa federaalaa ganna shan dura "Shanee" jechuun farraje ibsa kaleessa galgala baaseen, dhimmoota nageenyaafi siyaasa Oromiyaa fi Itoophiyaa keessatti yeroo ammaa adeemaa jiru irratti yaada isaa ibseera.
WBO' yookaan kan mootummaan ABO-Shanee jechuun waamu kun, ibsa isaa keessatti hidhattoonni garee “Fannoo Wallaggaa” jedhamuun waamaman Mootummaatu ijaaree hidhachiise jechuun himate.
Haa ta’u malee, yeroo waraanni Fannoo Wallaggaa, kun Wallaggaa bakkeewwan garaa garaatti haleellaa raawwachaa ture, sababa kanaaf haleellaa raawwatame uummata isaarra qolachuu akka dadhabe hin eerre.
Akkasumas, WBO’n (ABO-Shaneen) ibsa isaa keessatti gareen kun hanga waraanni naannoo Amaaraa eegaletti qaama milishaa mootummaa ture; booda garuu caasaa milishaa mootummaa keessaa baafamuu isaas ibsuun, garichi yeroo ammaa mootummaan hoogganamaa akka hin jirres akeekeera.
WBO’n (ABO-shaneen) ibsa isaan, gareewwan Faannoo fi “Fannoo Wallaggaa” jedhaman waliin ilaalcha siyaasaa qabaachuu isaallee haaleera.
Gareen “Fannoo Wallaggaa” jedhaman akka qaama mootummaa amma jiru mormaniitti ilaalamuu akka hin qabnes eere.
Gama biraatiin, gamtaa Tsimdoo jedhamu keessa hin jiru garuu tumsa qaamolee mootummaa federaalaa Itoophiyaa morman waliin hiriirreerra jechuun kan ibse WBO’n (Shaneen) garee Tsimdoo jedhamu hin beeku jechuun haaleera.
Haa ta’u malee, jechi Afaan Tigiriffaan 'Tsimdoo' jedhu Afaan Oromootti gaafa hiikamu 'tumsa' jechuu waan ta'eef, ilaalcha kamiin giricha waliin hariiroo hin qabnu jechuun akka ibsame ifa miti.
Dabalees, WBO’n (Shaneen) ibsa isaan, humnoota mootummaa Doktar Abiyyiin durfamu morman waliin walta’iinsa siyaasaa bal’aa fi marii xumuraa irra ga’uus ibseera.
Wallta’iinsi kun humnoonni mootummaa morman wal-loluu dhiisanii qaama uummattoota irratti xiyyeeffachuu fi waltajjii mootummaa cehumsaa, gaaffileen uummatoota biyyattii hirmaannaa isaanii keessatti itti furaman, qopheessuu irratti hundaa’as jedheera.
Akkasumas, WBO’n (Shaneen) walta’iinsi kun “walta’iinsa adeemsaa” malee waliigaltee dhimma siyaasaa ijoo irratti hundaa’e miti jechuun ibseera.
'Uummata Siivilii hidhachiisuu' yaadaa jedhurrattis yaada isaa kan eere WBO’n (ABO-Shaneen) uummanni balaa isa mudatu irraa of-ittisuuf hidhachuuf mirga qaba jechuun ibsee, mootummaan garuu uummata hidhachiisaa kan jiru akkanni of-eeguuf qofa miti jechuunis himate.
Ibsi WBO' (ABO-SHANEE) kun kan ba’e yeroo garichi Aantummaa saba isaa dabarsuun diinota seenaa Sabichaa waliin hiriireera jira jedhamee komatamaa jiruttidha.
Odeeffannoo teenna kanneen biroof liinkota armaan gadiin nu hordofaa!⬇⬇
Facebook:https://www.facebook.com/DhugaaMedia24
Telegram:https://t.me/DHUGAAMEDIA
YouTube: https://youtube.com/?si=e3oLfodkDnT4KB49
