The Kismayo Post

08/23/2026

Maxkamad federaal ah oo Mareykan ah ayaa burisay siyaasaddii maamulka Madaxweyne Donald Trump ee hakisay habaynta iyo bixinta fiisooyinka muhaajiriinta ee muwaadiniinta 75 dal, oo ay Soomaaliya ka mid tahay.

Garsoore Jeannette Vargas oo ka tirsan Maxkamadda Federaalka ee Koonfurta New York ayaa go’aanka soo saartay 21-kii Agoosto 2026, iyadoo sheegtay in siyaasaddaasi ay ahayd mid sharci-darro ah, isla markaana Xoghayaha Arrimaha Dibadda Mareykanka Marco Rubio uu ka tallaabay awoodda uu sharcigu siinayo.

Xayiraadda ayaa dhaqan gashay Janaayo 2026, waxaana lagu hakiyay habaynta fiisooyinka muhaajirnimada ee muwaadiniinta 75 dal, kuwaas oo ay ku jiraan Soomaaliya, Afghanistan, Iran, Iraq, Nigeria iyo dalal kale oo ku yaalla Afrika, Aasiya, Bariga Dhexe iyo Latin America.

Maamulka Trump ayaa xayiraadda ku sababeeyay walaac la xiriira in qaar ka mid ah dadka ka imaanaya dalalkaasi ay ku tiirsanaan karaan adeegyada iyo kaalmooyinka dowladda Mareykanka.

Hase yeeshee, Garsoore Vargas ayaa sheegtay in sharciga socdaalka Mareykanku uusan siin Xoghayaha Arrimaha Dibadda awood uu si guud ugu joojiyo fiisooyinka muhaajiriinta isagoo ku saleynaya jinsiyadda ama dalka uu qofku ka soo jeedo. Sida ay maxkamaddu sheegtay, codsiyada fiisaha waa in si gaar ah loo qiimeeyo.

Go’aanka ayaa sidoo kale saameynaya diidmooyin fiiso oo h**e loogu sameeyay siyaasaddan oo keliya, taasoo albaab u furaysa in kiisaskaas dib loo eego.

Soomaalida Mareykanka ku nool iyo qoysaskooda ayaa si gaar ah u daneynaya go’aankan, maadaama siyaasaddii h**e ay saameysay dadka doonayay inay Mareykanka ugu biiraan xubnaha qoysaskooda ama ay halkaas ugu guuraan si rasmi ah.

Si kastaba, go’aanka maxkamaddu macnaheedu ma aha in dhammaan xayiraadaha fiisaha ee saaran muwaadiniinta Soomaaliya meesha laga saaray. Waxa uu si gaar ah u burinayaa siyaasaddii hakisay habaynta fiisooyinka muhaajirnimada ee 75-ka dal.

Go’aankan ayaa noqonaya dharbaaxo kale oo dhinaca sharciga ah ku dhacday siyaasadaha socdaalka ee maamulka Madaxweyne Donald Trump, iyadoo dowladda Mareykanka ay weli awood u leedahay inay codsadayaasha ku sameyso baaritaanno amni iyo qiimeynno kale oo waafaqsan sharciga.

08/23/2026

Deynta qaranka Mareykanka ayaa markii ugu horreysay taariikhda dhaaftay $40 trillion, sida lagu sheegay xogta cusub ee Wasaaradda Maaliyadda Mareykanka. Deynta ayaa 18-kii Agoosto 2026 gaartay ku dhowaad $40.05 trillion.

Kororka deyntan waxaa sababay in muddo dheer kharashaadka dowladda ay ka bataan dakhliga canshuuraha, taasoo ku qasabtay dowladda inay sii amaahato lacag si ay u maalgeliso miisaaniyaddeeda.

Waxaa sidoo kale si weyn u kordhay kharashaadka Social Security, Medicare iyo barnaamijyada kale ee bulshada, halka dulsaarka deynta uu noqday kharash aad u weyn. Wasaaradda Maaliyadda ayaa sheegtay in bishii Luulyo 2026 kharashka adeegga deyntu gaaray qiyaastii $1.17 trillion sanad-maaliyadeedka 2026, taas oo u dhiganta 19% kharashaadka dowladda federaalka.

Deynta Mareykanka ayaa si gaar ah u korortay xilliyadii COVID-19, markii dowladda ay trillions of dollars ku bixisay taageerada dhaqaalaha, waxaana sidoo kale deynta saameeyay canshuur-dhimisyo iyo kharashaad badan oo soo maray maamulladii kala dambeeyay.

Xogta Treasury-ga waxay muujineysaa in qiyaastii $32.27 trillion ay tahay deyn ay haystaan dadweynaha iyo maalgashadayaasha, halka ku dhowaad $7.78 trillion ay tahay deyn ay hay’adaha dowladda Mareykanku isku leeyihiin.

Dhaqaale-yahannadu waxay ka digayaan in haddii farqiga u dhexeeya dakhliga iyo kharashaadka dowladda aan wax laga qaban, deyntu sii kori karto, iyadoo dulsaarka deyntuna cadaadis dheeraad ah ku saarayo miisaaniyadda Mareykanka.

08/23/2026