03/24/2025
បង្ក្រាបបទល្មើសហុំសម្រាស់មួយកន្លែង នៅចំណុចត្រសេះចោះ ភូមិកោះតាម៉ូវ ឃុំកំពង់ព្រះគគី ស្រុកបរិបូរណ៍
ខេត្តកំពង់ឆ្នាំង ៖ នៅថ្ងៃទី២៣ ខែមីនា ឆ្នាំ ២០២៥ ដោយសម្រេចឃាត់ខ្លួនមនុស្សចំនួន៥នាក់ និងឧបករណ៍ អួនហុំសម្រាស់ចំនួនមួយវង់ ។
មន្ត្រីរដ្ឋបាលជលផលកំពង់ឆ្នាំងបានសហការជាមួយកងអន្តរាគមន៍បង្ក្រាបទល្មើសនេសាទនៅផ្ទៃទន្លេសាបកងពលលេខ ៥២ យោធភូមិភាគទី៥ បានចុះបង្ក្រាបបទល្មើសហុំសម្រាស់មួយកន្លែង នៅចំណុចត្រសេះចោះ ភូមិកោះតាម៉ូវ ឃុំកំពង់ព្រះគគី ស្រុកបរិបូរណ៍ ។
លោក លី ឡា នាយខណ្ឌរដ្ឋបាលជលផលនៃមន្ទីរកសិកម្មរុក្ខាប្រមាញ់ និងនេសាទខេត្តកំពង់ឆ្នាំងបានបញ្ជាក់ថា ដោយទទួលបានបទបញ្ជាពី គណៈបញ្ជាការឯកភាពខេត្តក៏ដូចជា មន្ទីរកសិកម្ម រុក្ខាប្រមាញ់ និងនេសាទ ស្ដីពីការបង្ក្រាបបទល្មើសនេសាទដែលនៅតែបន្តកើតមានឡើងតាមរូបភាពតូចធំគ្រប់ទីកន្លែង ហើយការបង្ក្រាបចេះតែធ្វើឡើងជាបន្តបន្ទាប់ ។
មន្ត្រីរដ្ឋបាលជលផលខេត្តកំពង់ឆ្នាំងបានសហការជាមួយកងអន្តរាគមន៍បង្ក្រាបបទល្មើសនេសាទលើផ្ទៃទន្លេសាប បានចុះបង្ក្រាបបទល្មើសហ៊ុមសម្រាស់នៅចំណុចកោះត្រសេះ ក្នុងភូមិកោះតាម៉ូវ ឃុំកំពង់ព្រះគគី ស្រុកបរិបូណ៌ ដោយឃាត់ខ្លួនជនសង្ស័យចំនួន៥នាក់ កាណូតបាឡាស្មាច់ចំនួន២គ្រឿង ម៉ាស៊ីនខ្យល់២គ្រឿង និងអួន១វង់ មានបណ្តោយប្រវែង១៤០ម៉ែត្រ ទទឹង៥ម៉ែត្រ និងមានក្រឡា៣ ហ៊ុន ។
លោក លី ឡា បានបញ្ជាក់ថា ជនសង្ស័យទាំង៥នាក់រួមទាំងឧបករណ៍ល្មើសច្បាប់ ត្រូវបានបញ្ជូនទៅតុលាការ ដើម្បីចាត់ការតាមនិតិវិធីច្បាប់៕
