11/19/2025
ორგანიზაცია „ერთობის“ ოფიციალური განცხადება
ორგანიზაცია „ერთობა“ კატეგორიულად გმობს საქართველოს მთავრობის მიერ შემოთავაზებულ ინიციატივას ქართველი ემიგრანტებისთვის არჩევნებზე ხმის მიცემის შეზღუდვასთან დაკავშირებით!
ეს არ არის პროცედურული შესწორება ან ტექნიკური განახლება კანონმდებლობაში, როგორც ამას საქართველოს ხელისუფლება გვაწვდის, არამედ ეს არის მიზანმიმართული მცდელობა, რომ მილიონზე მეტ საქართველოს მოქალაქეს კონსტიტუციური უფლება და სამშობლო წაართვან და აქტიური პოლიტიკური პროცესებიდან ჩამოაშორონ.
ქართული დიასპორა სწორად იაზრებს თუ რა ფასი აქვს შორიდან სამშობლოს სიყვარულს! სამშობლოში ხმის მისაცემად ერთი ფრენა შეიძლება მათი ერთი თვის შემოსავალზე მეტი ღირდეს. ჩვენ საზღვარგარეთ ვმუშაობთ, ვსწავლობთ და ოჯახებს ვინახავთ, ვაგზავნით თანხას რაც ჩვენს ოჯახებს და შინამეურნეობებს ცოცხლად ინარჩუნებს, ასევე, ეროვნულ ეკონომიკას სუნთქვის საშუალებას აძლევს. ჩვენ საქართველოს მხარს ვუჭერდით დიდი ხნით ადრე, სანამ მთავრობა დიასპორის ჩართულობაზე შიშით დაიწყებდა ლაპარაკს.
ჩვენ წინაშეა მთავრობა, რომელიც გვეუბნება: „გამოაგზავნეთ ფული შეგვინარჩუნეთ ეკონომიკური სტაბილურობა, მაგრამ გაჩუმდით.“
ისინი არამხოლოდ ხმის მიცემის უფლებას გვართმევენ ასევე სამშობლოს ართმევენ იმ ხალხს, ვინც მას სოციალურად და ეკონომიურად კიდევ აცოცხლებს.
მილიარდობით დოლარის გზავნილების მიღება და ამავე დროს იმავე მოქალაქეებისთვის ხმის მიცემის უფლების ჩამორთმევა მორალურად არასწორი ქმედებაა. ეს პოლიტიკურად საშიშია. ეს არის ღალატი იმ ხალხის, რომლის წარმომადგენლობაზე მთავრობას პრეტენზია აქვს.
„ერთობის“ პოზიცია
მთავრობა, რომელიც ნამდვილად აფასებს თავის ხალხს, აფართოებს მათ მონაწილეობას ქვეყნის სოციალური თუ პოლიტიკური ცხოვრების ყველა ასპექტში.და არ სჯის მათ იმით რომ ბლოკავს მათთვის ხმის მიცემის უფლებას. მთავრობამ არ უნდა აქციოს გეოგრაფიული დისტანცია იარაღად.
ქართული დიასპორისთვის ხმის მიცემის შეზღუდვა:
არღვევს საქართველოს კონსტიტუციას
ეწინააღმდეგება საერთაშორისო დემოკრატიულ სტანდარტებს
ზიანს აყენებს ეროვნულ უსაფრთხოებას იმ ჯგუფის გაუცხოებით, რომელიც ქვეყანას ფინანსურ სტაბილურობას უნარჩუნებს
ძირს უთხრის საქართველოს გრძელვადიან დემოგრაფიულ და ეკონომიკურ მდგრადობას
ჩვენ ვითხოვთ:
შემოთავაზებული ინიციატივის დაუყოვნებლივ უკან გაწვევას
საზღვარგარეთ მყოფი საქართველოს მოქალაქეებისთვის ხმის მიცემის თანამედროვე მექანიზმების შემუშავებას
უსაფრთხო ელექტრონულ ან საფოსტო კენჭისყრის ვარიანტებს
საქართველოს ფარგლებს გარეთ საარჩევნო უბნების რაოდენობის გაზრდას
დიასპორის სრულ პოლიტიკურ აღიარებას , როგორც ჩვენი ერის განუყოფელი ნაწილისა და მის ჩართვას მიმდინარე პოლიტიკურ პროცესებში
თუ საქართველო სარგებელს იღებს ჩვენი შრომისგან, მაშინ საქართველომ თითოეული ემიგრნტის საარჩევნო ხმასაც პატივი უნდა სცეს!
მივმართავთ ჩვენს თანამემამულე ყველა ემიგრანტს! ხმის მიცემა ფუფუნება არ არის. ეს არის ჩვენი კონსტიტუციური უფლება გამოვხატოთ ჩვენი აზრი. ეს არის ის ზღვარი, რომელსაც ვავლებთ ვიქნებით მოქალაქეები, თუ მხოლოდ ქაღალდზე დარჩენილი “სამშობლოდან გადახვეწილი” ადამიანები! ნუ მისცემთ უფლებას, გაგაჩუმონ. თქვენი ხმა არის ის მთავარიიარაღი რითაც შეგიძლიათ ზემოქმედება მოახდინოთ საქართველოს მომავალზე.
