12/23/2025
🔻تەوقی گەردن هەر مردنە
عادل عوسمان، نووسەر
دوێنێ سێ شەیتانی بەڕێوەبەری شەڕی تورکەکان گەیشتنە دیمەشقی پایتەختی سوریای سەردەمی حکومەتی کاتیەکەی شەرع. وەک هەواڵەکان دەڵێن: ئەمریکیەکان و هەسەدەش گەیشتونەتە دیمەشق و سێ شەیتانەکەیان پایتەخت بەدەر کردووە! ئەوان بۆ ئەوە چوون، ئەو تەوقەی کە لە ملیان کردوون و هەر ڕۆژە و ساتێک توندتری دەکەنەوە بۆ ئەوەی بخنکێن، شل کەنەوە. لە قەفقاسیا و ڕوسیاوە، تەنگاوکراون، لە یۆنان و قوبرسەوە بە هاوپەیمانی لەگەڵ هێزە نوێیەکەی خۆرهەڵاتی ناوەڕاستەوە کە ئیسرائیلە بێ ڕۆڵ کراوە. لە سوریادا دابەشکاریەکی ئاشکرا لە ناو هێزەکاندا دەبینرێت. لە تورکیادا پەڕلەمان بوەتە گۆڕەپانی ویژدان بە بەردا کردنەوەی تورکەکان و دیتنی پێگەی خۆیان لە خۆرهەڵاتی ناوەڕاستدا. دابەشبوونی ناو تورکەکانیش پەتی گەردنیانی ئەوەندەی تر جەڕاندووە.
لای تورکەکان، بەدرێژەدان بە ئەقڵی کۆنی سەردەمی کۆماری یەکەم، خاڵی لاواز بۆ دەربازبوون لەو خنکاندنە! کوردەکانن. بەڵام ئێستە کورد هێزە، ڕۆڵی لە خۆرهەڵاتی ناوەڕاستی نوێدا ئەگەر چارەسەری پرسەکانی خۆرهەڵاتی ناوەڕاست نەبيت! لە دانانی بناغەی نوێی خۆرهەڵاتی ناوەڕاستدا، یەکێک لە بەردەکانی بناغەیە و دەبێت ناسنامە جیاوازەکان دانیان پێدابنرێت. ئەمە پێویستی بە کارەکتەری نوێیە! تورکەکان لەمە تێناگەن! واتە ئەقڵیان پێی ناشکێت.
ئۆجالان بۆ هێنانەوە هۆش خۆیان و جێگیرکردنی ئەو بونە لە بناغەی خۆرهەڵاتی ناوەڕاستدا، دەستپێشخەریەکی ئاشتی و کۆمەڵگەی دیموکراتیکی کرد. بەڵام تورکەکان هەروەک ڕابردوو، ویستیان بەگوێرەی خۆیان سوود لەو دەستپێشخەریە ببینن و ئامادەی قبوڵکردنی کورد و گۆڕانکاری لە خۆیاندا نەبوون. بۆیە هەوڵی ئەمجارەشیان بە ئەقڵی خۆیان دەتوانن لە ڕێگەی چەککردنی هەسەدەوە کۆتایی بە کورد بێنن و هێزی مەزنی پاراستنی گەلی کورد و گۆڕانکاریەکانی خۆرهەڵاتی ناوەڕاست ڕاگرن. بەڵام کورد و ڕێبەریەکەی هوشیارانە نیەتەکانی تورکەکان دەناسێت و هەڵیدەوەشێنێ!
بۆیە بینیمان لەدوای بۆردومانی دەبابەکانی حەمشات و عەمشات و بەکرێگیراوەکانی تورکیا بۆ گەڕەکەکانی شێخ مەقسود و ئەشرەفیە چۆن لە ماوەیەکی کورتدا دۆخەکە گۆڕاو ئاگربەست ڕاگەیەنرا. لەڕاستیدا هەم کورد هەم هاوپەیمانەکانی دەیانەوێت لە ڕێگەی گفتوگۆوە کۆتایی بە دۆخی ناوەندگەرایی سوریا بهێنن. بۆیە تورکیا لێی دەترسێت، کە دەبێت ئەویش مل بەو گۆڕانکارییانە بدات و کورد لە یاسا و دەستوری وڵات و دەوڵەتەکانی ناوچەکەدا ببێتە خاوەن ناسنامە و پێگە و کارەکتەرە نوێکانیش بەوشێوەیە دەمەشن. هەربۆیە کاتێک هەسەدە دەمەشێ، ئەرز و ئاسمان دەلەرزێ و سەرکەوتنیش هەر بۆ گەلی کوردە و پەتی ملی تورکەکانیش هەر توندتر دەبێت تا خنکان!
