11/18/2025
ကျားဖြန့်ငွေတွေ crypto နဲ့ငွေဆေးပြီးနိုင်ငံခြားပြန်ထွက်တာ အခုမှမြန်မာဗဟိုဘဏ်စာထုတ်။ Crypto wallet app ရှိသူတွေကိုဖမ်းလိုက်ပါ။
====================================
အများပြည်သူများ သတိထားမိစေရန် ခရစ်ပ်တိုငွေကြေး၏ သဘောသဘာဝအသွယ်သွယ်
Post Date : 16-11-2025
မြန်မာနိုင်ငံတော်ဗဟိုဘဏ်က ဒစ်ဂျစ်တယ်ငွေကြေးများ(ခရစ်ပ်တိုငွေကြေးအပါအဝင်)ကို Online (သို့) ကိုယ်တိုင်ရောင်းဝယ်ခြင်းကို ခွင့်ပြုထားခြင်းမရှိပါကြောင်း (၃-၅-၂၀၁၉)ရက်နေ့ သတင်းစာများတွင် ထုတ်ပြန်ကြေညာထားခဲ့ပြီး ဒစ်ဂျစ်တယ်ငွေကြေးများ (ခရစ်ပ်တို ငွေကြေး အပါအဝင်)ကို တရားဝင်ငွေကြေးအဖြစ် သတ်မှတ်ထားခြင်း မရှိသကဲ့သို့ ယင်းကို ရောင်းဝယ်လဲ လှယ်ခြင်းများအတွက် ငွေရေးကြေးရေးအဖွဲ့အစည်းများသို့ ခွင့်ပြုထားခြင်းမရှိပါကြောင်း အမိန့် ကြော်ငြာစာကိုလည်း ၂၀၂၀ ပြည့်နှစ်၊ မေလ(၁၅)ရက်နေ့တွင် ထုတ်ပြန်ခဲ့ပါသည်။ မြန်မာနိုင်ငံနည်း တူ တရုတ်နိုင်ငံ၊ အိန္ဒိယနိုင်ငံ၊ အယ်လ်ဂျီးရီးယား၊ ဘိုလီးဗီးယား၊ အီဂျစ်၊ နီပေါ၊ ပါကစ္စတန်နိုင်ငံ၊ ဗီယက်နမ်နိုင်ငံ၊ အင်ဒိုနီးရှားနိုင်ငံ၊ အန်ဂိုလာနိုင်ငံနှင့် ကိုလံဘီယာနိုင်ငံစသည့် နိုင်ငံများအနေဖြင့် လည်း ဒစ်ဂျစ်တယ်ငွေကြေးများ (ခရစ်ပ်တိုငွေကြေးအပါအဝင်)ကို တရားဝင်အသိအမှတ်မပြုထား ခြင်းမရှိပါ။ ယင်းနိုင်ငံအများစုတွင် တရားဝင်ငွေကြေးအဖြစ် အသိအမှတ်ပြုမထားသော်လည်း ဒစ်ဂျစ်တယ်ပိုင်ဆိုင်မှုအဖြစ် ခွင့်ပြုခြင်း၊ အချို့နိုင်ငံများတွင် ကုန်သွယ်မှုနှင့် ရင်းနှီးမြှုပ်နှံမှုအတွက် ခွင့်ပြုခြင်းများရှိပါသည်။ တရုတ်နိုင်ငံတွင် Crypto Currency များသည် တရားဝင်မှုမရှိသော်လည်း ဗဟိုဘဏ်ဒစ်ဂျစ်တယ် ငွေကြေးအသွင်ဆောင်သည့် (E-CNY)ကို စမ်းသပ်ဆောင်ရွက်လျက်ရှိပြီး မြန်မာနိုင်ငံတော်ဗဟိုဘဏ်အနေဖြင့်လည်း CBDC နှင့်ပတ်သက်၍ သုတေသနအဆင့် လုပ်ငန်း များကို ဆောင်ရွက်လျက်ရှိပါသည်။
Crypto ငွေကြေးများနှင့်ပတ်သက်၍ အချို့သော အစိုးရများက ပြည်သူလူထုအား တရားဝင် အသုံးပြုခြင်းမရှိစေရန် တားမြစ်ထားသည်မှန်သော်လည်း ခေတ်ကာလပြောင်းလဲတိုးတက်လာသည် နှင့်အမျှ ပြည်သူလူထုအကြားတွင် ယင်းကို စုဆောင်းခြင်း၊ ရောင်းဝယ်မှုပြုခြင်းများ တိုးတက်များပြား လာပါသည်။ တန်ဖိုးအတက်အကျများမှုအပေါ် အခြေခံ၍ အကျိုးအမြတ်များ ပိုမိုရရှိရန် မျှော်လင့်၍ ယင်း Crypto Assets များအပေါ် ရင်းနှီးမြှပ်နှံမှုပြုလုပ်သူများ များပြားလာသည့်နည်းတူ မူးယစ် ဆေးဝါး၊ လက်နက်မှောင်ခို၊ လူကုန်ကူး၊ ကျားဖြန့်၊ AML/CFT အစရှိသည့် တရားမဝင်ဒုစရိုက် လုပ်ငန်းများကလည်း ဘဏ်စာရင်းများအား အသုံးပြုရန် မလိုခြင်း၊ အခွန်တိမ်းရှောင်နိုင်ခြင်း စသည်တို့ကြောင့် ၎င်းတို့၏ ပိုင်ဆိုင်မှုများကို Cryto Assets များအဖြစ် သိမ်းဆည်းခြင်းများ ရှိလာ ခဲ့ပါသည်။
BBC Burmese ၏ (၁၆-၁၀-၂၀၂၅)ရက်နေ့ သတင်းဆောင်းပါးတွင် ကမ္ဘောဒီးယား လုပ်ငန်းရှင် မစ္စတာချန်(Mr. Chen Zhi)၏ စီးပွားရေးလုပ်ငန်းများအား ဗြိတိန်နှင့် အမေရိကန် နိုင်ငံများက ငွေကြေးခဝါချမှုနှင့် အွန်လိုင်းလိမ်လည်မှုတို့တွင် ပါဝင်မှုစွပ်စွဲချက်ဖြင့် တရားစွဲဆို ထားကာ ၎င်းတည်ထောင်ထားသည့် ပရင့်စ်လုပ်ငန်းစုပိုင်ဆိုင်မှုများကိုလည်း ရယူလွှဲပြောင်း ရောင်းချ၍မရအောင် ပိတ်ဆို့အရေးယူမှုများ ပြုလုပ်ကြောင်းဖော်ပြထားခဲ့ပါသည်။ ထို့အပြင် ကျားဖြန့်လုပ်ငန်းများပါဝင်သည့် ဒစ်ဂျစ်တယ်ငွေကြေးလိမ်လည်မှုအတွက် အမေရိကန်အစိုးရက ဒေါ်လာသန်းပေါင်း ၁၄,၀၀၀ ခန့် တန်ကြေးရှိ ဒစ်ဂျစ်တယ်ငွေကြေးဘစ်ကွိုင်များကို သိမ်းဆည်း ခဲ့ပြီး ယင်းကိစ္စရပ်သည် သမိုင်းတွင် ဘစ်ကွိုင်(Bit Coin)ကို အကြီးမားဆုံးဖမ်းဆီးနိုင်မှုနှင့် အကြီးမား ဆုံးဘဏ္ဍာရေးနှိမ်နင်းသိမ်းဆည်းနိုင်မှုဖြစ်ခဲ့ပါသည်။ အဆိုပါသတင်းကြောင့် ဘစ်ကွိုင် (Bit Coin) ဈေးကွက်သည်လည်း ခန့်မှန်းအားဖြင့် ၁၀% ခန့် ကျဆင်းခဲ့ပါသည်။
ယခင်က တရားမဝင်လုပ်ငန်းလုပ်ကိုင်သူများသည် မိမိတို့၏ ပိုင်ဆိုင်မှုကို လွတ်လပ်စွာ ရွှေ့ပြောင်းရန်နှင့် အခွန်တိမ်းရှောင်ရန်တို့အတွက် ဒစ်ဂျစ်တယ်ငွေကြေးများ (ခရစ်ပ်တိုငွေကြေး အပါအဝင်)ကို သိုလှောင်ထားရှိခဲ့သော်လည်း ယခုဖြစ်ရပ်နောက်ပိုင်းတွင် အစိုးရများက ခရစ်တို ငွေကြေးပိုင်ဆိုင်မှုများကို ရှာဖွေထိန်းချုပ်နိုင်သည်ဆိုသည့် အမြင်များရှိလာ၍ နောင်တွင် ဒုစရိုက် လုပ်ငန်းများအနေဖြင့် ခရစ်တို ငွေကြေးကိုင်တွယ်အသုံးပြုမှုများကို ပိုမိုသတိထားလုပ်ဆောင် လာနိုင်ပြီး ခရစ်တိုငွေကြေး (Bit Coin) အသုံးပြုမှုများ လျော့ကျလာနိုင်ပါသည်။
Crypto Currency ဈေးကွက်သည် ဈေးနှုန်းအလွန်အမင်းအတက်/အကျ မြန်ဆန်ခြင်း ကြောင့် ရင်းနှီးမြှပ်နှံသူများအတွက် ငွေကြေးဆုံးရှုံးနိုင်မှုများဖြစ်ပွားနိုင်ခြင်းအပြင် စည်းမျဉ်းများကြီး ကြပ်ထိန်းကျောင်းမှု နည်းခြင်း၊ Online Security ကျိုးပေါက်မှုများဖြစ်ပေါ်နိုင်ခြင်း၊ Hacking ခံရနိုင် ခြင်းများကြောင့် မိမိပိုင်ငွေကြေးများကိုလည်း ဆုံးရှုံးစေနိုင်ပါသည်။ သို့ဖြစ်ပါ၍ ပြည်သူလူထုအနေ ဖြင့် CBM မှ တရားဝင်ခွင့်မပြုထားသော Crypto Assets များ ရောင်းဝယ်ခြင်း၊ လွှဲပြောင်းခြင်း၊ သိုလှောင်၊ သိမ်းဆည်းခြင်းများ မပြုလုပ်ရေးနှင့် ဘဏ်များမှတစ်ဆင့် တရားဝင်ငွေကြေးများ လွှဲပြောင်းခြင်းကိုသာ အသုံးပြုသင့်ပါသည်။
