13/07/2025
أنا واحد المواطن بسيط من مركز جماعة سيدي عبد الله غياث، كنحب هاد المكان او الدوار او المركز اللي انا تزاديت فيه وباغي نشوفوا كايترقى وكايتقدم.
من هنا قررت نفتح صفحة باش نهضر على مشاكلنا، ونسول المسؤولين ونطالب بحقنا فالتنمية. هاذ الصوت ماشي عدو لاحد، ولكن صوت غيور على هاذ الدوار وعلى اهله.
ولكن من جهة أخرى، كاين ناس في الطريق ديالهم، بدل ما يجاوبوا على الأسئلة، ويناقشونا بالحكمة، كيبغيو يروجو كلام خاوي وكذب، خصوصاً مسؤول معروف وسط الجماعة.
هاذ المسؤول فواحد اللقاء داخل مقهى قال كلمات جارحة:
"واش أنا ݣاع اللي مبوق غادي نديها فيه."
هاذ الكلام ماشي غير قلة احترام، بل إهانة للناس اللي كتسنى التغيير.
حتى الفاعل الجمعوي اللي من المفروض يكون سبب في التقريب ما بين الناس، دخل هو الآخر فحرب كلامية ضدي، ووجه لي اتهامات ماشي صحيحة، وصل بيه الأمر يقول عليا انني "ش*ذ جنسيا" ومن هنا غادي نݣول له انني خصيم لك غذا امام الله بسبب هاذ الاتهام الباطل ماغاديش نتابعك لا قضائيا ولا اي شيء لكن بيني وبينك الله الواحد الاحد صاحب العدل الوحيد في الدنيا والآخرة.
كلشي عارف الروابط المشبوهة بين بعض الجمعيات والمسؤولين، كتخلي الناس اللي بغاو يخدمو بصدق يتعرضوا لضغوطات وإشاعات.
أنا ما جئت هنا نسيء لأي واحد، ولكن باش نوضح:
التنمية ما كتجيش بالكذب والتشويه،
ماشي مقبول نتعبروا بعبارات مهينة،
والاتهامات الشخصية الفارغة ماشي طريقة للنقاش.
غادي نبقى نطالب بحقنا، نطرح الأسئلة، ونوضح الحقيقة، ونكون صوت كل مواطن باغي الخير للجماعة ديالو.
اللي مرتاح فمسؤوليته، ما كيتخافش من النقد، وما كيديرش الإشاعات باش يسكت صوت الناس.
صفحة “Sidi ghiat news” غتبقى منصة للحق، للنقاش النظيف، وللمطالبة بالتنمية والكرامة.
فالأخير نقول:
صوت المواطن ما يمكنش يتكتم، والحق يعلو ولا يُعلى عليه.
