19/11/2025
बज्रगुरू मन्त्रजपको फाइदा>>>
ॐआहुँ बज्रगुरू पद्म सिद्धि हुँ
संसारमा हित गर्ने र सुख दिने एउटै कुरा आगम (लुङ) र अधिगम (तोक्पा) ले युक्त भएको बुद्धको धर्म नै हो । यसको विकास गर्न र लामो समयसम्म टिकाई राख्नको लागि महायान र हीनयानका दुवै त्रिपिटकमा भएका उपदेश सुनेर चिन्तन गरी अभ्यासमा उतार्नु पर्दछ । खास गरिकन संसारबाट मुक्त भएर चाँडै सर्वज्ञ बुद्धको अवस्थामा पुग्न चाहने व्यक्तिहरुले महायान भित्रको गुह्ययान तन्त्र पिटकमा बताइए अनुसार सही किसिमले इष्ट देवता –यिदम) को ध्यान र जप गर्नु पर्दछ । इष्ट देवताको ध्यान र जप गर्ने विधि विभिन्न किसिमका भए पनि अन्तिम रुपमा भन्ने हो भने सबैको उद्देश्य संसारका प्राणीहरुलाई दुःखबाट मुक्त गराउन बोधिज्ञान, प्राप्तिको विशुद्ध मार्गमा लगाउनु नै हो ।
संसारमा पाँच दोषहरु (ञीग्मा) बढेको यो कली युगमा प्राणीहरुलाई दुःखबाट बचाएर चाँडै अनुत्तर सम्यक संबोधिको मार्गतर्फ लैजानु चाहिँ गुरु रिन्पोछे, महाआचार्य वा द्वितीय बुद्ध रुपी पद्म संभवको नाम भएको मन्त्र अर्थात् बज्र गुरुको मन्त्र जप गर्दा उत्तम हुन्छ भनी बताइएको छ ।
समन्त भद्र (कुन्तु साङ्गपो) अनादि कालदेखि नै बोध(ज्ञान जागे) को अवस्थामा रहेको भए पनि प्राणीहरुलाई देखाउनको लागि धर्मकाय (छोकु) को अवस्थाबाट विचलित नभईकन पञ्च कुलका बुद्धहरुका रुपमा देखा पर्छन् । तिनीहरुबाट पनि प्राणीहरुलाई ज्ञान सिकाउनको लागि ६ लोकमा ६ मुनिहरु तथा तिसहस्र (कोटी) लोकमा तिसहस्र कोटी नै पद्मसंभव रुपी निर्माणकायहरु देखा पर्दछन् । विशेषगरी पद्मसंभव चाहिँ धर्मकाय अमिताभको काय, लोकेश्वरको वाक् र सम्पूर्ण बुद्धहरुको चित्तबाट निर्मित गुरु हो । अझ विशेष रुपमा भन्ने हो भने यो जम्बूद्वीपमा विभिन्न आठवटा मूल कृत्यहरु गरेका आठवटा नाम भएका गुरुले प्राणीहरुको हितको लागि अनगिन्ती कामहरु गरेको र गरिरहनु भएको छ ।
महापरिनिर्वाण सूत्रमा भगवान बुद्धले भन्नु भएको छ ‘म निर्वाण भएपछि तिमीहरुले पीर मान्नु पर्दैन । स्वच्छ र निर्मल जल भएको तलाउबाट म भन्दा पनि उत्तम पुरुष जन्मनेछ । यसरी भगवान बुद्धले नै उहाँ भन्दा पनि विशेष व्यक्ति जन्मनेछ’ भनी भविष्यवाणी गर्नु भएको छ ।
बुद्ध भन्दा गुरु पद्मसंभव विशेष हुनाले कारण चाहिँ भगवान बुद्धको जन्म आमाको गर्भबाट भएको थियो भने पद्मसंभवको जन्म चाहिँ अमिताभ बुद्धको चित्तको ह्री अक्षरबाट निस्केको रिश्मिले उड्डीयान देशको दक्षिण पूर्व दिशा स्थित् धनकोष अर्थात् सिन्धुसागरमा नागराज तक्षकको दरवार माथि पद्मको विशाल पत्रको केशरमा शाक्यमुनि परिनिर्वाण भएको आठ वर्षपछि काठ बाँदर वर्षको छैठौं महिनाको दशमीमा महापुरुषको लक्षण र अनुव्यंजनले युक्त रश्मिकायको रुपमा भएको थियो । चार किसिमका जन्म मध्ये सर्वोत्तम उपपादुक जन्म –आमा र बाबुको संयोग नभईकन नै पद्मको फूलबाट जन्मेको) रुपमा ज्ञानको इन्द्रेणीले बनेको अमर बज्रकाय, संसार नरित्तिउन्जेल सम्म शरीर नत्यागीकन बसी प्राणीहरुको हित गर्ने भएकाले विशिष्ट भएका हुन् । त्यस्तै भगवान बुद्धले हीनयान र महायानका उपदेशहरुलाई व्यापक रुपमा प्रसार गर्नु भए पनि गुह्यमन्त्रको उपदेश व्यापक रुपमा दिनु भएको थिएन तर पद्मसंभव गुरुले मन्त्रयानका उपदेशहरु धेरै दिनु भएको हुनाले उहाँ विशिष्ट भएको हो । तैपनि क्लेशहरु त्याग्ने र गुणहरु साक्षात्कार गर्ने कार्यमा चाहिँ बुद्ध र पद्मसंभव समान छन् ।
मगध (उग्युरछाल लुङतेन) सूत्रमा पनि ‘म यहाँबाट बितेको आठ वर्ष पछि उड्डीयानको उत्तर पश्चिम सीमानामा धनकोश तलाउको टापूमा उत्तम पुरुष जन्मने छ’ भनी भविष्यवाणी गरिएको छ । त्यस्तै लामे दोन जोग्पा र दुपा नामक तन्त्रमा पनि ‘म निर्वाण भएको आठ वर्षपछि लोकमा सर्वोत्तम मानिने पद्मसंभव नामक बुद्ध उड्डीयनमा आउनेछन् । र गुह्यमन्त्र बज्रयानको गुरु हुनेछन् भन्ने भविष्यवाणी गरि सकेको छु’ भनिएको छ । साथै सुवर्ण प्रभास सूत्रमा पनि यो पद्मसंभवले विगत, वर्तमान र भविष्यका बुद्धहरुको स्तुति गर्ने छन् भनी बताइएको छ ।
यसरी बज्र रुपी आगमहरुमा बारम्बार प्रशंसा गरिएका द्वित्तीय बुद्ध रुपी पद्मसंभवको कलीयुगका सम्पूर्ण प्राणीहरु ब्चाउने बल –शक्ति) को कार्य र करुणाको आशीर्वाद अरु बुद्धरुको भन्दा पनि शक्तिशाली हुने भएकाले मुक्ति चाहने व्यक्तिहरुले दिन रात तीन समयमा गुरु रिन्पोछे पद्मसंभवको प्रार्थना र उहाँको नाम भएको सिद्धि मन्त्रको ध्यान र जप किन नगर्ने ? उक्त सिद्धि मन्त्र जप गरेको फाइदा मनले चिताउँनै नसकिने भएकाले यो बज्र गुरुको मन्त्रलाई महान तीर्थहरु, गुम्बा, पर्वतको शिखर, ठूलो नदीको किनार, देवता राक्षस र भूतहरु बसी रहने ठाउँ वा ढुङ्गामा बसेर समय (दम्–छिम) या व्रत पालना गरेका तान्त्रिकहरु, शीला पालन गरेका भिक्षु, श्रद्धालु व्यक्तिहरु लक्षण भएका महिलाहरुले राम्रो मन (सेम्के) लिएर सय, हजार, दश हजार, कोटी, दश करोड आदि जपेमा संसारबाट रोग भोकमरी, लडाई, वाली बिग्रने, अलछिन, भूतप्रेतका नराम्रा रुपहरु सबै हट्छन् साथै ठीक समयमा राम्रोसँग पानी पर्छ । यही जीवन, अर्को जीवन वा अन्तराभव (बर्दो) मा गुरु रिन्पोछेको प्रत्यक्ष दर्शन पाइन्छ र क्रमैसँग मार्ग प्राप्त भएर शुद्ध भुवन चामर द्वीपमा विद्याधरको तहम पुग्न सकिन्छ ।
हरेक दिन सय भन्दा नघटाई जप्ने हो भने अरु व्यक्तिहरुले मन पराउँछन् र भोजन सम्पत्ति सजिलै मिल्छ । हजार वा दश हजार जपेमा अरुलाई वशमा लिन र आशीर्वाद पाउन सकिन्छ । राम्रो मन लिई श्रद्धा पूर्वक एक लाख वा करोड आदि जपेमा रोग र दोषहरु शान्त हुन्छन् तथा आयु र पुण्य बढ्छन् । देव, असुर र मानिसलाई वशमा लिन सकिन्छ । भूतप्रेत रुपी शत्रु र विघ्नहरुलाई हराउनको लागि अपार शक्ति पाई धेरै प्राणीहरुको हि तगर्न सकिन्छ ।
तीन करोड वा सात करोड आदि जप्न सकेमा तिनै कालका बुद्धहरुसँग र विशेष गरी गुरु रिन्पोछे र अभिन्न हुन सकिन्छ । उत्तम व्यक्तिलाई यही जुनीमा रश्मि देह (ज्यालु) प्राप्त हुन्छ भने मध्यम तहको व्यक्ति मृत्यु क्षणमा बुद्ध हुन सक्छ । त्यस्तै निम्न दर्जाको साधकले अन्तराभव (बर्दो) अवस्थामा गुरु रिन्पोछेको दर्शन पाउँछ र सबै दृष्यहरु श्ुद्ध भई आफ्नै ठाउँबाट मुक्त भएर चामर द्वीप (साङदोक पल्री) मा जन्म हुन्छ । तसर्थ यो बज्र गुरुको मन्त्र चार वर्गका तान्त्रिकहरुका इष्टदेव (यिदम) हरु, नौ यान, चौरासी हजार धर्म स्कन्ध, गुरु, देव, डाकिनी आदिको एक मात्र सारगर्भ हो भनी बताइएको छ ।
बज्र गुरुको मन्त्र जप्नाले यो जुनीका नराम्रा परिस्थितिहरु शान्त हुन्छन् भने चाहेका कुराहरु सजिलैसँग प्राप्त हुन्छन् । पाँच विषहरु (राग, द्वेष, मोह, ईश्र्या, घमण्ड) बाट उत्पन्न सम्पूर्ण पापहरु काटिन्छन् र ६ पारमिता (दान, शील, क्षान्ति, वीर्य ध्यान र प्रज्ञा) चाँडै पूर्ण भएर पाँच बुद्ध कायहरु प्राप्त हुन्छन् । यस्ता लाभहरुलाई शब्दमा व्यक्त गर्नै सकिन्न । संक्षेपमा भन्ने हो भने कर्म लिङपाको निधि (तेर्मा) मा बताइएको छ–बज्रगुरु मन्त्र एक पटक पढेको लाभलाई देखिने वस्तुको रुपमा ल्याउने हो भने यो संसारमा नै अट्न सक्तैन र यो मन्त्रलाई देख्ने, सुन्ने र सम्झने सबै प्राणी विद्याधर र विद्याधरी अवस्थामा पुग्ने कुरा निश्चित छ ।
त्यसैले माथि बताइए झैँ बज्रगुरुको मन्त्र जपेको लाभलाई मनले चिताउन नसकिने भएको हुनाले आज यहाँ पनि संसारबाट नष्ट हुन लागेको बुद्ध धर्म फेरि उत्थान गर्न, लोप नभएकोलाई फैलाउन र लामो समयसम्म टिकाउन सबै जातिमा भएका बुद्ध शासन धारण गर्ने कर्ताहरुको आयु बढाउन, चिताएका सबै कुराहरु सजिलैसँग पु-याउन, भिक्षु संघले शुद्धसँग शील पालन गरी तीन चक्रहरु (त्रिपिटक श्रवण र चिन्तन, गुम्बा बनाउने जस्ता कर्म र ध्यान) गरिकन समय बिताउन, सबै व्यक्तिका कुशल कर्महरुलाई बीचमा तोडाउने ग्रह, नाग, भूतराज, विघ्न बाधा, कुभलो चिताउने र दुःख दिने सबै शान्त गराउन, विश्वभरी र खासगरी नेपालमा रोग, भोकमरी लडाई शान्त बनाई आनन्द र सुखको अवस्थामा सबैलाई पु-याउन जिउँदा व्यक्तिहरुका नमिल्दा घटनाहरु शान्त गराइ चिताएको कुराहरु धर्म अनुसार पु¥याउन, मृतकहरुलाई पछिल्लो जन्ममा कुशल मार्ग प्राप्त गराउनको लागि, संक्षेपमा भन्दा सम्पूर्ण व्यक्तिका अहिलेका र अन्तिममा चिताएका उद्देश्यहरु स्वतसिद्ध पु-याउन र पुण्य तथा ज्ञान संभाररुपी दुई संभारहरु पूरा गरी दुई आवरणहरु हटेर शुद्ध भई छिटै सर्वज्ञ बुद्धको अवस्था प्राप्त गर्ने, सिद्धि मन्त्रको जप गर्ने कार्य गरिएको हुनाले धर्ममा विश्वास र श्रद्धा भएका सबै व्यक्तिहरुले बज्र गुरुको मन्त्र पाठ गर्नु होला ।
