19/08/2024
ခွေးနက်ကြီး လွှတ်လိုက်မည်
☸️☸️☸️☸️☸️☸️☸️☸️☸️☸️
☸️ညီတော်အာနန္ဒာ အရှင်မြတ်ကြီးသည်
ငါးရာ့ငါးဆယ်၊ ဒွါဒသကနိပါတ်၊
မဟာကဏှ ဇာတ်တော်၌
☸️ဘုရားအလောင်း သိကြားမင်း၏
အမိန့်အရ ခွေးနက်ကြီးအသွင် ဖန်ဆင်း၍
လူ့ပြည်သို့ ဆင်းလာခဲ့ရပေသည်။
☸️ထိုဇာတ်တော်၌ ဘုရားအလောင်းတော်သည် တာဝတိံသာ နတ်ပြည်တွင် သိကြားမင်း ဖြစ်ခဲ့၏။
☸️ညီတော်အာနန္ဒာ၏ အလောင်းအလျာသည် သိကြားမင်းထံ ခစားရသော
မာတလိနတ်သား ဖြစ်ခဲ့၏။
☸️ဘုရားအလောင်းတော်သည် ကဿပမြတ်စွာဘုရား ပွင့်ထွန်းတော်မူစဉ်က
`ဇောတိပါလ”အမည်ရသော ပုဏ္ဏားလုလင် ဖြစ်ခဲ့၍ မျိုးရိုးဇာတိနှင့် ဝေဒကျမ်းဂန် တတ်မြောက်မှုအား အကြောင်းပြုကာ
အလွန်တရာ မာန ကြီးခဲ့၍
ကဿပမြတ်စွာဘုရားကိုပင်
ရိုသေကိုင်းညွှတ်ရမှန်း မသိခဲ့ပေ။
☸️ဤကဲ့သို့ ကဿပ မြတ်စွာ ဘုရားနှင့်
ကင်းကင်းကွာကွာ နေလာခဲ့ရာမှ
ကဿပမြတ်စွာဘုရား၏ တပည့် အနာဂါမ်ပုဂ္ဂိုလ် ဃဋိကာရ အိုးထိန်းသည်၏
ကူညီစောင့်ရှောက်မှုဖြင့်
ကဿပမြတ်စွာဘုရားကို
ကိုးကွယ် ဆည်းကပ်သူ ဖြစ်လာခဲ့၏။
☸️ကဿပမြတ်စွာဘုရား
သာသနာတော်တွင်းသို့ ဝင်ရောက်ကာ
ဇောတိပါလ ရဟန်းအဖြစ်ဖြင့် ဝိနည်းတော်နှင့် အညီ လိုက်နာကျင့်သုံးလာခဲ့၏။
☸️ထိုဘဝမှ ကွယ်လွန်ပြီးနောက်
ယခုသိကြားမင်းဘဝသို့ ရောက်လာချိန်၌ ကဿပဘုရားရှင် ပရိနိဗ္ဗာန်ပြု တော်မူသွားပါပြီ။
☸️ထို့နောက် ကဿပဘုရားရှင် ထားခဲ့သော သာသနာတော်သည် တစ်စထက်တစ်စ ညှိုးမှိန် လာ၏။
☸️ရဟန်း၊ ပုဏ္ဏားတို့နှင့်တကွ
လူတန်းစား အသီးသီးသည်
မိမိတို့ စောင့်ထိန်းရသည့် ကျင့်ဝတ်သီလတို့ကို ဖောက်ဖျက်ကာ မတရားသဖြင့်
စီးပွားရှာဖွေကြရာ လူ့ဘောင်ကြီးတစ်ခုလုံး ပရမ်းပတာ ဖြစ်နေကြလေ၏။
☸️ထိုအချိန်တွင် ဗာရာဏသီမြို့တော်၌
ဥသီနက အမည်ရသော မင်းသည်
ထီးနန်းစိုးစံလျက် ရှိ၏။
☸️သို့ရာတွင် တိုင်းသူပြည်သားတို့၏ အကျင့်စာရိတ္တ ပြည့်ဝဖြူစင်ရေးကို
အားမပေးဘဲ မင်းတို့၏ စည်းစိမ်ချမ်းသာ
ခံစားရေးကိုသာ အလေးထားနေသဖြင့် တိုင်းသူပြည်သားတို့၏ အခြေအနေမှာ
နိမ့်ကျသည်ထက်နိမ့်ကျ၍ နေလေသည်။
☸️သာသနာတော်ထမ်း ရဟန်းများ၊ သာသနာတော်၏ အပြင်က ရသေ့များမှစ၍
လူတန်းစား အသီးသီးသည် ကျင့်ဝတ်သိက္ခာများ ဖောက်ဖျက်ကျူးလွန်နေကြသဖြင့်
သူတို့တစ်တွေ သေဆုံးသော်
အပါယ်လေးပါးသို့ ကျရောက်ကုန်၏။
☸️နတ်ပြည်မှာ ရှိနေသည့် နတ်သမီး၊ နတ်သားများ နတ်သက်ကြွေ၍ စုတေသွားရာတွင်
ယခင်က အသစ်အသစ်သော နတ်သမီး၊
နတ်သားများ ဥပပတ္တိ ပဋိသန္ဓေဖြင့်
ဘွားခနဲ ဘွားခနဲ ပေါ်ပေါက်လာခဲ့ ကြ၏။
☸️ယခု ကဿပမြတ်စွာဘုရား၏
သာသနာတော် နောက်ပိုင်းတွင်ကား
တာဝတိံသာနတ်ပြည်၌ နတ်သက်ကြွေတာနှင့် အသစ်တိုးတာနှင့်က မမျှမတ ဖြစ်လာ၏။
☸️နတ်သက်ကြွေ၍ စုတေသွားသော
နတ်သား၊ နတ်သမီးတို့ နေရာတွင်
အသစ် အသစ်သော နတ်သမီး၊ နတ်သားတို့
ရောက်မလာကြသဖြင့် အလွန်တရာ
သာယာစည်ပင်ခဲ့သော
တာဝတိံသာ နတ်ဘုံကြီးသည်
ခြောက်တိခြောက်သွေ့ ငြီးငွေ့ဖွယ်ရာကဲ့သို့
ဖြစ်လာရ၏
☸️ဤကဲ့သို့သော အခြေအနေကို
ဘုရားအလောင်းတော် သိကြားမင်းက
ရှုမြင်သုံးသပ်ကာ
☸️ကဿပမြတ်စွာဘုရား၏
သာသနာတော်ကို နောက်ထပ် နှစ် ၁ဝဝဝ
တည်တံ့နေနိုင်အောင် မည်သို့များ
ပြုလုပ်ရပါမည်နည်းဟု စဉ်းစား၍နေလေသည်။
☸️ထို့နောက် မကြာမီမှာပင်
ဗာရာဏသီမြို့တော်၏
အပြင်ဘက်က ကျေးရွာများတွင်
အုတ်အုတ်ကျက်ကျက် ဖြစ်လာ၏။
☸️လူကြီး၊ လူငယ်၊ ယောက်ျား၊ မိန်းမ
ဟူသမျှသည် -
☸️“ခွေးနက်ကြီး လာပြီ၊ ခွေးနက်ကြီး လာပြီ” ဟု အော်ဟစ်ကာ ထိတ်လန့်တကြား
ပြေးလွှားနေကြရ၏။
☸️ခွေးနက်ကြီးရန်က လွတ်မြောက်မည့်
နေရာသို့ အတင်းတိုးဝှေ့ ဝင်ရောက်ကာ
တုန်တုန်လှုပ်လှုပ်နှင့် ပုန်းအောင်းနေကြရ၏။
☸️တောသူတောင်သားတွေ ကြောက်မည်
ဆိုလျှင်လည်း ကြောက်လောက်ပါ၏။
☸️အသွင်သဏ္ဌာန်အရ ခွေးနက်ကြီးဟု
ဆိုကြရသော်ငြားလည်း အရွယ်အစားကတော့ ဆင်ပေါက်ကြီးလောက်ပင် ထွားကျိုင်းလှ၏။
☸️သွားစွယ်ကြီး လေးချောင်းက
ငှက်ပျောဖူးလောက် ရှိနေကြ၏။
☸️လင်းကွင်းခြမ်းလောက် ပြူးကျယ်နေသော မျက်လုံးနီနီကြီးများကလည်း
မီးတောက်မီးလျှံတွေ
ထွက်လာတော့မလောက် စူးရှလှ၏။
☸️သွားစွယ်ကြီးများထဲက
တွဲလျားကျနေသော လျှာကြီးမှာလည်း
သွေးစေး သွေးစက်တွေ စီးကျနေသကဲ့သို့ ရှိပါ၏။
☸️ဤမျှလောက် ကြောက်ဖွယ်ရာကောင်းလှသော ခွေးနက်ကြီးနှင့် ခရီးရင်ဆိုင်ဆုံမိလျှင်
အလွတ်အကျွတ် ပြေးနေရင်းကပင်
အကြောက်လွန်ကာ ခြေလှမ်း၍
မရနိုင်အောင် မှင်တက်မိနေကြရ၏။
☸️ကိုယ်ဝန်ဆောင် အမျိုးသမီးများမှာဆိုလျှင် ကြောက်စိတ် ပြင်းထန်လွန်းလှသဖြင့်
ကိုယ်ဝန်ပျက်ကျသည်အထိ
အဖြစ်ဆိုးနှင့် ကြုံကြရလေသည်။
☸️ယခုအချိန်အထိတော့ ခွေးနက်ကြီး၏
ကိုက်ဝါးစားမျိုခြင်း ခံရသူ ဟူ၍ မရှိခဲ့သေးပါ။
☸️ဤသို့ ဖြစ်ရခြင်းမှာလည်း
ခွေးနက်ကြီးနောက်က ထက်ကြပ်မကွာ
ပါလာခဲ့သော မုဆိုးကြီးကြောင့် ဖြစ်ပေသည်။
☸️ဆင်ပေါက်တမျှ ထွားကျိုင်းလှသော
ခွေးနက်ကြီးအား ထိန်းချုပ်နိုင်လောက်အောင်
မုဆိုးကြီးကလည်း ကာယဗလ ကြီးထွားလှ၏။
☸️ခေါင်းပေါ်က ဆံပင်များကို ငါးစုခွဲ၍
ငါးထုံးထုံးထား၏။
☸️ထိုဆံထုံးများ၏ အောက်ခြေတွင်
ပန်းပွင့်နီနီရဲရဲကြီးများ ထိုးစိုက်ပန်ဆင်ထား၏။
☸️သူ ဝတ်ထားသော ခါးဝတ်ပုဆိုးနှင့်
အပေါ်ရုံ ပုဆိုးတို့မှာ ဖန်ရည်ဆိုးထားသည့်
အရောင်အဆင်း ရှိပါသော်လည်း
ကြမ်းတမ်းလွန်းလှသော မုဆိုးကြီး၏
အသွင်သဏ္ဌာန် ကြောင့် ပိုမို၍
ကြောက်စရာ ကောင်းနေဘိ၏။
☸️ထိုအထဲတွင် လူ့အရပ်နှင့် အညီအမျှရှိသော လေးကြီးတွင် မြားနှင့်တကွ လေးညှို့ကို
ဆွဲတင်ထားသဖြင့် သူ့ကို စေ့စေ့
မကြည့်ရဲလောက်အောင် ခက်ထန်လှပါပေသည်
☸️သန်မာ ထွားကျိုင်းသည်နှင့်အမျှ
မျက်နှာထား ဆိုးလွန်းလှသော
မုဆိုးကြီးသည် ခွေးနက်ကြီးကို
ကြိုးငါးချောင်းဖြင့် ချည်တုပ်ထား၏။
☸️လက်နှစ်ဖက်၊ ခြေနှစ်ဖက်နှင့် လည်ပင်းတို့တွင် ကြိုးတုပ်ထားကာ ကြိုးငါးချောင်းလုံးကို
ပူး၍ ကိုင်ထား၏။
☸️ရောက်လေရာ အရပ်တွင် ခွေးနက်ကြီးက တွေ့ကရာ လူများကို
တအားကုန် ထိုးကိုက်ရန် ကြိုးစား၏။
☸️ထိုအခါ နောက်မှ ပါလာသော မုဆိုးကြီးက
ကြိုးငါးချောင်းလုံးကို ပူးကိုင်ကာ
ပိုင်ပိုင်နိုင်နိုင်ကြီး ဆွဲထားလိုက်သဖြင့်
ခွေးနက်ကြီးမှာ လျှာကြီးတန်းလန်းနှင့်
ရပ်တန့်သွားရတော့၏
(ဒုတိယပိုင်းကို ဆက်လက်ဖော်ပြပေးပါမည်။)
-ဝဏ္ဏသီရိ(ငါးရာ့ငါးဆယ်၊ ဒွါဒသကနိပါတ်၊ မဟာကဏှဇာတ်)
#ပူဇော်သူ-Kyaw Thin (16.8.24 သောကြာနေ့)
ခွေးနက်ကြီး လွှတ်လိုက်မည်အပိုင်း(၂)
☸️☸️☸️☸️☸️☸️☸️☸️☸️☸️☸️☸️☸️
☸️မုဆိုးကြီးသည် ခွေးနက်ကြီး
သွားလေရာသို့ နောက်ကလိုက်လာရင်း -
“ဒီလောကကြီး ပျက်စီးတော့မယ်၊
ဒီလောကကြီး ပျက်စီးတော့မယ်” ဟု
အော်ဟစ်လာ၏။
☸️သူ့ရုပ်သွင်နှင့် လိုက်ဖက်အောင် သူ၏
ဝမ်းခေါင်းသံကြီးကလည်း ကျောချမ်းလောက်ပါပေ၏။ ခွေးနက်ကြီးရန်ကို အပြင်မထွက်ဝံ့အောင် ကြောက်နေရသည့်အထဲမှာ မုဆိုးကြီး၏
အသံကြောင့် လူအများမှာ နေစရာမရှိအောင်
ချောက်ချား ကြရကုန်၏။
☸️ခွေးနက်ကြီးရန်နှင့် မုဆိုးကြီး၏
အသံကိုကြောက်ရွံ့ကြသဖြင့် လူအများသည် ဗာရာဏသီမြို့တော်ထဲသို့ ပြေးဝင်ကာ
မြို့တံခါးကြီးကို ပိတ်ထားကြ၏။
သို့ရာတွင် မုဆိုးကြီးနှင့် ခွေးနက်ကြီးတို့ကတော့
ဒါလောက် ကလေးနှင့် အမှုမထားကြပါ။
တစ်ဆယ့်ရှစ်တောင်မျှ မြင့်မားလှသော
မြို့ရိုးကြီးကိုပင် အလွယ်တကူ ကျော်လွှား၍
လာခဲ့ကြပေသည်။
☸️ခွေးနက်ကြီးနှင့် မုဆိုးကြီးတို့
မြို့တော်တွင်းသို့ ရောက်လာသောအခါ
တစ်မြို့လုံးပွက်ပွက်ညံသွား တော့သည်။
မြင်မြင်ကရာကို ခွေးနက်ကြီးက အတင်းလိုက်၊
သူ့နောက်က မုဆိုးကြီးကလည်း အတင်းဆွဲ၊
ဤသို့ ဆွဲရင်း ဆွဲရင်းနှင့် လိုက်လာခဲ့ရာ
ဥသီနကမင်း၏ နန်းတော်နားသို့
ရောက်လာလေသည်။
☸️ဥသီနကမင်းသည် ကြောက်လန့်တကြား အော်ဟစ်၍ ပြေးလာကြသော သူတို့ကို လေသာပြတင်းက လှမ်းမျှော်ကြည့်ရာက
ခွေးနက်ကြီးကိုပါ မြင်လိုက်ရသဖြင့်
ထိတ်လန့် တုန်လှုပ်သွားရ၏။
မိမိ၏ တိုင်းသူ ပြည်သားတို့ကို
အကာအကွယ်ပေးရန် မစီစဉ်နိုင်တော့ဘဲ ကိုယ်လွတ်ရုန်းဖို့သာ ကြိုးစားမိတော့၏။
နီးစပ်ရာ၊ လက်လှမ်းမီရာ မိဖုရားနှင့်
မောင်းမများကို အပါခေါ်ပြီးလျှင်
နန်းမြင့်ပြာသာဒ်ဆောင်ထက်သို့
တက်နေလေ တော့သည်။
☸️သို့ပါသော်လည်း ခွေးနက်ကြီး ရန်ကတော့
သူ လွတ်အောင် မပြေးနိုင်ပါ။
အများပြည်သူတို့ကမော့၍ ကြည့်ကြရသော နန်းမြင့်ပြာသာဒ်ဆောင်မှာ ခွေးနက်ကြီး၏
ရှေ့ခြေနှစ်ချောင်း ထောက်လောက်ရုံသာ
ရှိနေပါတော့သည်။
☸️ခွေးနက်ကြီးသည် ထိုလေသာပြတင်း၏ အောက်ခြေက ပြတင်းပေါက်တွင် ရှေ့လက် အစုံထောက်ကာ အားကုန်အင်ကုန် ဟောင်လိုက်၏။ ဤတွင်မှ ဥသီနကမင်းသည် မိမိပြေး၍ မလွတ်နိုင်တော့သည့် ဖြစ်အင်ကို သတိပြုမိကာ ရာဇဣန္ဒြေကို ပြန်၍ ထိန်းပြီးလျှင် ခွေးနက်ကြီးနောက်က လိုက်ပါလာသည့် မုဆိုးကြီးကို လှမ်း၍ နှုတ်ဆက်လိုသဖြင့်
☸️“အသင်မုဆိုးကြီး၊ မုဆိုးကြီးရဲ့ ခွေးနက်ကြီးက ဘာဖြစ်လို့ ဟောင်ရတာပါသလဲ”ဟု မေးလိုက်၏။
☸️ဤတွင် မုဆိုးကြီးက -
“အရှင်မင်းကြီး၊ ခွေးနက်ကြီးက
အစာစားချင်လို့ ဟောင်တာပါ ဘုရား”
ဤသို့ လျှောက်တင်လိုက်လေရာ -
☸️“အသင်မုဆိုးကြီး၊ အစာစားချင်တာ
ဆိုလို့ကတော့ ငါတို့က ကျွေးမှာပါ”
☸️ဤသို့ ပြောဆိုပြီးလျှင် မိမိနှင့်တကွ နန်းတော်သူ၊ နန်းတော်သားအားလုံး စားဖို့ ချက်ထားသော
ထမင်းနှင့် ဟင်းများကို ယူလာစေပြီးလျှင်
ခွေးနက်ကြီးရှေ့မှာ အားလုံးပုံ၍ ကျွေးကြရ၏။
လူ့တစ်ရပ်မက မြင့်မောက်နေသော ထမင်းဟင်းအပုံကြီးကို ခွေးနက်ကြီးက ဟပ်၍
စားလိုက်ရာတွင် တစ်လုတ်တည်းနှင့် ကုန်ပြီး
ဟောင်မြဲ ဟောင်ပြန်၏။
☸️ဤတွင် ဥသီနကမင်းက နန်းတော်ထဲက
ဆင်များ၊ မြင်းများအတွက် ကျိုချက်ထားသော စားဖွယ်တို့ကို သယ်၍ ကျွေးရပြန်၏။
ထိုအစားအစာများကိုလည်း ခွေးနက်ကြီးက
တစ်လုတ်တည်းနှင့် ဟပ်၍ စားလိုက်ပြီး
လျှင် ဟောင်မြဲဟောင်ပြန်၏။
ထို့နောက် ဗာရာဏသီမြို့တော်ကြီး
တစ်ခုလုံးက ချက်ထားလေသမျှ ထမင်း၊
ဟင်းအားလုံးကိုချ၍ ကျွေးပြန်တော့လည်း ရှေးနည်းအတိုင်း ဖြစ်လာရပြန်၏။
☸️ဤတွင်မှ ဥသီနကမင်းသည် ရိုးရိုးခွေးနှင့်
ရိုးရိုးမုဆိုး မဟုတ်ကြောင်းကို သဘောပေါက်ကာ
မုဆိုးကြီး ကို လှမ်း၍ စကားပြော၏။
☸️“အသင် မုဆိုးကြီး၊ သင့်ခွေးကြီးဟာ
အမွေးတွေ နက်မှောင်နေတာနဲ့အမျှ
သွားစွယ်ကြီးတွေက ဖွေးနေပါတယ်။
သူ့ကိုယ်ပေါ်မှာ ကြိုးငါးချောင်းနဲ့ ချည်ထားတဲ့
ကြိုးတွေကများ လွတ်သွားမယ် ဆိုရင်
အင်မတန် ကြောက်စရာ ကောင်းပါလိမ့်မယ်”
☸️“အရှင်မင်းကြီး၊ လူ့ဘောင်လောကကြီး
တစ်ခုလုံး ဒီထက်ဒီထက် ပျက်စီးလာမယ်
ဆိုရင်တော့ ခွေးနက်ကြီးကို
လွှတ်လိုက်ရပါလိမ့်မယ်”
☸️“ထိန်းနိုင်သလောက်တော့ ထိန်းပေးထားပါဦး အသင်မုဆိုးကြီးရယ်။
☸️ကဲ... ပြောလက်စနဲ့ ပြောပြစမ်း ပါ။
ဘယ်လို ဘယ်လို အခြေအနေမျိုးတွေ ဖြစ်ပေါ်လာရင် ခွေးနက်ကြီးကို လွှတ်လိုက်မှာလဲ”
(တတိယပိုင်းကို ဆက်လက်ဖော်ပြပေးပါမည်။)
-ဝဏ္ဏသီရိ(ငါးရာ့ငါးဆယ်၊ ဒွါဒသကနိပါတ်၊ မဟာကဏှဇာတ်)
#ပူဇော်သူ-Kyaw Thin (18.8.24 တနင်္ဂနွေနေ့)
ခွေးနက်ကြီး လွှတ်လိုက်မည်အပိုင်း(၃)
☸️☸️☸️☸️☸️☸️☸️☸️☸️☸️☸️☸️☸️
☸️“အရှင်မင်းကြီး ရွှေနားဆင်တော်မူပါ။ ကဿပဘုရားရှင်ရဲ့ သာသနာတော်မှာ
သံသရာဝဋ်က လွတ်အောင် ဆိုတဲ့ ရည်ရွယ်ချက်နဲ့ ဝင်ရောက်လာကြတဲ့ ရဟန်းတွေဟာ
အခုသာသနာတော် နောက်ပိုင်းမှာ လူဒါယကာ၊ ဒါယိကာမတွေနဲ့အပြိုင် စီးပွားရှာကုန်ကြပါပြီ။
☸️မကြာခင်မှာ သင်္ကန်းကြီးတွေ ကိုးရိုးကားရားနဲ့
လူတွေနဲ့အပြိုင် ထွန်တုံးပေါ် တက်ပြီး
လယ်ထွန်ကြပါတော့မယ်။
☸️အဲဒီအချိန်ကျရင် ခွေးနက်ကြီးကို
လွှတ်လိုက် ရပါလိမ့်မယ်။
☸️“နောက်တစ်မျိုး ရှိပါသေးတယ်ဘုရား။ ကဿပဘုရားရှင်ရဲ့ သာသနာတော် နောက်ပိုင်းမှာ သူတို့ဟာ ခေါင်းတုံးတုံးထားပြီး သင်္ကန်းတွေ ဝတ်ထားလို့သာ ရဟန်းလို့ ခေါ်ကြရပါတယ်။
အကျင့်သိက္ခာကတော့ ဘာမှ မထူးကြပါဘူး။
မကြာခင် လူတွေလိုပဲ ကာမဂုဏ်ခံစားပြီး သားတွေ၊ သမီးတွေ မွေးလာကြပါလိမ့်မယ်။
အဲဒီအချိန်ကျရင် ခွေးနက်ကြီးကို
လွှတ်လိုက်ရပါလိမ့်မယ်”
☸️“နောက်တစ်မျိုး ရှိပါသေးတယ်ဘုရား။ ကဿပဘုရားရှင်ရဲ့ သာသနာတော် အပြင်အပမှာ ရသေ့တွေ ရှိလာခဲ့ပါတယ်။
အဲဒီ ရသေ့တွေဟာလည်း တောထဲမှာ သမထကမ္မဋ္ဌာန်း စီးဖြန်းဖို့ထက် အလှူခံဖို့ကိုသာအလေးထားနေကြပါတော့တယ်။
သူတို့ဟာ အလှူခံလို့ ရလာသမျှကို
ဒကာတွေထံပြန်ပြီး အတိုးနဲ့ချေးငှားထားကြပါတယ်။ သူတို့လိုချင်လာတဲ့ အခါမှာတော့
အဲဒီငွေတွေကို မရရအောင် ဇွတ်အတင်း
တောင်းယူကြပါ လိမ့်မယ်။
အဲဒီအချိန်ကျရင် ခွေးနက်ကြီးကို
လွှတ်ပေးလိုက်ရပါလိမ့်မယ်။
☸️“နောက်တစ်မျိုး ရှိပါသေးတယ် ဘုရား။ ဗြာဟ္မဏနွယ်ဖွား ပုဏ္ဏားတို့ဟာ ဝေဒကျမ်းတို့ကို သင်ယူကြရပါတယ်၊
သာဝတ္ထိကျမ်းတို့ကို သင်ယူကြရပါတယ်၊ ယဇ်ပူဇော်ပွဲနဲ့ ပတ်သက်တဲ့ ကျမ်းဂန်တို့ကို
သင်ယူကြရပါတယ်။
ဒီကျမ်းစာများ သင်ယူရတာက
အထက်ဗြဟ္မာ့ဘုံက ဗြဟ္မာကြီးများထံ
ချဉ်းကပ်နိုင်ရေးသာ ဖြစ်ပါတယ်။
သို့ဖြစ်ပါလျက် ယဇ်ပူဇော်လိုသူတို့ထံ
အခကြေးငွေယူပြီး ယဇ်ပူဇော်ပေးတဲ့သူတွေ ပေါ်ပေါက်လာလိမ့်မယ်။
အဲဒီအချိန်ကျရင် ခွေးနက်ကြီးကို
လွှတ်ပေးလိုက်ရပါလိမ့်မယ်။
☸️“နောက်တစ်မျိုး ရှိပါသေးတယ်ဘုရား။
ကိုယ် ငယ်ငယ်ကတည်းက လူလားမြောက်တဲ့အထိ ပြုစုလုပ်ကျွေးလာခဲ့တဲ့ မိဘနှစ်ပါးတို့
အိုမင်းမစွမ်း ဖြစ်လာတဲ့အခါမှာတော့
သားတွေ၊ သမီးတွေက
ကျေးဇူးကန်းကြပါတော့တယ်။
ကျွေးနိုင် မွေးနိုင်တဲ့ အခြေအနေရှိပါလျက်နဲ့
မကျွေးမွေးဘဲ မျက်နှာလွှဲထားသူတွေ
ပေါ်လာပါ လိမ့်မယ်။
အဲဒီအချိန်ကျရင် ခွေးနက်ကြီးကို
လွှတ်ပေးလိုက်ရပါလိမ့်မယ်။
☸️“နောက်တစ်မျိုး ရှိပါသေးတယ်ဘုရား။
ကိုယ် ငယ်ငယ်တုန်းက ဘယ်လောက်ငိုငို၊ ဘယ်လောက်ဆိုးဆိုး အပြုံးမပျက်ဘဲ
ယုယချီပိုးလာခဲ့ကြတဲ့ မိဘတွေ အိုမင်းမစွမ်း
ရှိတဲ့အခါမှာ သားတွေ၊ သမီးတွေက
ခင်ဗျားကြီး ဘာမှအသုံးမကျဘူး။
ခင်ဗျားကြီး သိပ်မိုက်မဲတာပဲ စသည်ဖြင့်
ဆဲဆို ကြိမ်းမောင်းကြပါလိမ့်မယ်။
အဲဒီအချိန်ကျရင် ခွေးနက်ကြီးကို
လွှတ်ပေးလိုက်ရပါလိမ့်မယ်။
☸️“နောက်တစ်မျိုး ရှိပါသေးတယ်ဘုရား။ ကဿပဘုရားရှင်ရဲ့ သာသနာတော်
နောက်ပိုင်းမှာ လူတွေဟာ အလွန့်အလွန်
အကျင့်ပျက်လာကြပါလိမ့်မယ်။
ကိုယ့်ဆရာသမားရဲ့ မယားကိုလည်း
လေးစားရမှန်း မသိကြတော့ဘူး။
ကိုယ့်အဆွေခင်ပွန်းရဲ့ မယားကိုလည်း
သစ္စာမစောင့်ကြတော့ပါဘူး။
ဦးရီးတွေ၊ ဘထွေးတွေရဲ့ဇနီးကိုလည်း
အမိအရာ မထားတတ်ကြတော့ပါဘူး။
အဲဒီလို အချိန်ကျလာရင် ခွေးနက်ကြီးကို
လွှတ်ပေး လိုက်ရပါလိမ့်မယ်။
☸️“နောက်တစ်မျိုး ရှိပါသေးတယ်ဘုရား။ ဗြာဟ္မဏနွယ်ဖွား ပုဏ္ဏားတွေဟာ
ဝေဒကျမ်းတို့ကို လေးလေးမြတ်မြတ်
သင်ယူကျက်မှတ်ကြရပါတယ်။
အထက်ဗြဟ္မာ့ဘုံက ဗြဟ္မာကြီးတွေကို
ရည်မှန်းပြီးတော့ ယဇ် ပူဇော်ပွဲတွေ
ကျင်းပကြရပါတယ်။
အဲဒီလို အမွန်အမြတ်ထားရတဲ့ လူတွေ
ကိုယ်တိုင်က ဓား၊ လက်နက်ကိုယ်စီနဲ့
လမ်းပေါ်က စောင့်နေပြီးတော့
ဓားပြတိုက်လာကြပါလိမ့်မယ်။
အဲဒီအချိန်ကျရင် ခွေးနက်ကြီးကို
လွှတ်လိုက်ရပါ လိမ့်မယ်။
☸️“နောက်တစ်မျိုး ရှိပါသေးတယ်ဘုရား။
သူတို့ဟာ ဘဝပေးအခြေအနေအရ
အသားအရေကတော့ ဖြူစင်ကြပါပေတယ်။
သူတို့ရဲ့ လက်ရုံးကြီးတွေကလည်း ယောက်ျားပီပီ တောင့်တင်းကြပါပေတယ်။
ဒါပေမဲ့ အဲဒီလိုလူစားတွေဟာ ကိုယ်တိုင်ကတော့ ဘာတစ်ခုမှ ဖြစ်ဖြစ်မြောက်မြောက်
စီးပွားမရှာတတ်ကြပါဘူး။
ဒါပေမဲ့ ကွယ်လွန်သွားတဲ့ သူဌေးကြီးတွေရဲ့ ကျန်ရစ်တဲ့မုဆိုးမ အရွယ်ကောင်းကောင်းလေးတွေကိုတော့ တစ်ယောက်နဲ့တစ်ယောက်
အလုအယက် အရယူကြပါလိမ့်မယ်။
အဲဒီအချိန်ကျရင် ခွေးနက်ကြီးကို
လွှတ်လိုက် ရပါလိမ့်မယ်။
☸️“နောက်ဆုံးပိတ် တစ်မျိုး ရှိပါသေးတယ် ဘုရား။ ဒီလောကကြီးထဲမှာ နည်းမျိုးစုံနဲ့
လိမ်စားနေတဲ့ သူတွေ ရှိလာပါလိမ့်မယ်။
တချို့ ဗြောင်လိမ်ကြလိမ့်မယ်။
တချို့ကတော့ အတုပစ္စည်းတွေကို အစစ်အမှန်
ဆိုပြီး လိမ်ရောင်းကြလိမ့်မယ်။
အဲဒီအချိန်ကျရင် ခွေးနက်ကြီးကို
လွှတ်လိုက်ရပါလိမ့်မယ်”
ဤကဲ့သို့ လျှောက်တင်ပြီးလျှင်
မတော်မတရားသည့် အမှုတွေ ပြုကျင့်
နေသူတို့ကို ရွေးချယ်ကာ ခွေးနက်ကြီးက
ကိုက်မည် ခဲမည် တဟဲဟဲ အသံပေး၍
ခြိမ်းခြောက်သဖြင့် မင်းရင်ပြင်နှင့်
အပြည့်ရှိနေသော လူအုပ်ကြီးမှာ
ထိတ်လန့် တုန်လှုပ်နေကြရ၏။
☸️ထိုအချိန်မှာပင် ခွေးနက်ကြီးနှင့်တကွ မုဆိုးကြီးပါ ရုတ်တရက် ကွယ်ပျောက်သွားကြ၏။
ချက်ချင်းလိုပင် အထက်ကောင်းကင်၌
သိကြားမင်းနှင့် မာတလိနတ်သားတို့
ပေါ်လာကြပေသည်။
☸️ဤတွင်မှ ဥသီနက မင်းကြီးသည် စောစောတစ်ခဏတုန်းက မိမိအား လေးလေးစားစား ဘုရားထူးလာ ခဲ့သူမှာ တာဝတိံသာကို ပိုင်စိုးသည့် သိကြားမင်းကြီးကိုယ်တိုင် ဖြစ်နေ၍
ထိပ်လန့်တုန်လှုပ်သွားရ၏။
သို့ရာတွင် သိကြားမင်းက ကြောက်ရွံ့တုန်လှုပ်ခြင်း မရှိစေရန် အားပေးနှစ်သိမ့်ပြီးလျှင် –
☸️“ဥသီနက မင်းကြီး၊ ကဿပ မြတ်စွာဘုရားရှင်ရဲ့ သာသနာတော် နှစ်ထောင်ကျော်သွားပါပြီ။ သာသနာတော်နောက်ပိုင်း ရောက်လာတဲ့အခါမှာ
လူတွေရော၊ ရှင်ရဟန်းတွေပါ အကျင့်ပျက်လာကြတယ်။
ဒါကြောင့် သူတို့ကို သတိပေးဖို့ လာခဲ့ပါတယ်။ မဟုတ်မတရား ပြုကျင့်တဲ့ အမှုတွေကို တားမြစ်ရအောင်လို့ နတ်ပြည်က ဆင်းလာခဲ့ကြပါတယ်။ နောက်နောင်ခါမှာ မတော်မတရားတဲ့ အမှုတွေ
ပြုလာကြမယ် ဆိုရင်တော့ အဲဒီလူတွေဆီကို
ခွေးနက်ကြီး လွှတ်ပေးရပါလိမ့်မယ်"
☸️ဤသို့ သတိပေး ခြိမ်းခြောက်ပြီးလျှင် ကဿပမြတ်စွာဘုရား ဟောကြားတော်မူခဲ့သော အသပြာတစ်ရာ ထိုက်တန်သည့် ဓမ္မဒေသနာ ဂါထာလေးပုဒ်တို့ကို အနက်အဓိပ္ပာယ် ဖွင့်ဆိုချက်များနှင့်တကွ အကျယ်တဝင့် ဖွင့်ဆိုဟောကြား၏။
☸️ဤသို့ လူပြည်သို့ သိကြားမင်းကြီးကိုယ်တိုင် ဆင်းလာ၍ သာသနာ ပြုခဲ့သဖြင့် ကဿပမြတ်စွာဘုရား သာသနာတော်သည် ထိုအချိန်မှ နောက်နှစ်ပေါင်း တစ်ထောင်တိုင်တိုင် တည်နေနိုင်ခဲ့ပါပေသည်။
☸️ဤဇာတ်တော်ထဲက ခွေးနက်ကြီး၏
ဟောင်သံနှင့်အတူ ဝိဓူရဇာတ်တော်ထဲက
ပုဏ္ဏက ဘီလူး၏ကြုံးဝါးသံ၊ ကုသဇာတ်တော်ထဲက ကုသမင်းကြီး၏အသံ၊ ဘူရိဒတ္တ ဇာတ်တော်ထဲက သုဒဿန နဂါးမင်း၏ အသံ၊ ဤအသံလေးမျိုးတို့သည် ဇမ္ဗူဒီပါ တစ်ကျွန်းလုံးကို ရိုက်ခတ်သွားသော အသံဟူ၍ ဇာတကအဋ္ဌကထာ ဆရာကြီးက စကားချပ် ထည့်သွင်းထားပေသည်။
-ဝဏ္ဏသီရိ(ငါးရာ့ငါးဆယ်၊ ဒွါဒသကနိပါတ်၊ မဟာကဏှဇာတ်)
#ပူဇော်သူ-Kyaw Thin (19.8.24 တနင်္လာနေ့ )
