02/19/2018
Nou vini avèk yon dosye kay $9,000,000.00, li pa pase. Nou vini avèk dosye Something Special pou di se lòt la ki tiye Jij Jean Serge Joseph tandiske nou konnen jij la se nan vi**ra l' mouri. Nad marinad! Nou vini ak yon koze paspò, nou bwè gaz. Nou vini avèk dosye tire sou Radyo Kiskeya, nyanm nyanm kaka chat! Nou vini avèk dosye Clifford Brandt, nou sal kò nou. Nou kouri bri di yo vòlè eleksyon nan men nou, nou kraze eleksyon, nou lanse apèl a la gè sivil pou eleksyon pa fèt, nou refè pwòp eleksyon pa nou , nou kriye san pi rèd. Nou fomante yon istwa blanchiman lajan avèk UCREF, nou fè kanè Goud tounen kanè Dola, nou bwè dlo lanmè. Lòt la fin eli Prezidan nan pwòp eleksyon nou, li prete sèman jodi, demen nou di fò l' ale. Nou bwè klowòks pi rèd. Nou vini avèk dosye PetroCaribe, lajan ki mete nou sou moun nan wi, nou bwè asid batri pi rèd. Nou vini avèk yon rimè BIDJÈ KRIMINÈL, nou di depi yon Ayisyen soti nan peyi etranje li pile sòl Aewopò a l'ap peye 10 mil Goud. Manti! Dyare pi rèd. Pèp la tchipe nou. Karavàn Chanjman lanse baw! Nou rele anmwe, nou di se lajan k'ap blanchi, se gagòt, se grimas lòt la ap fè. Pèp la pa fè sa nan koton ba nou santi, l'ap swiv karavàn li tèt frèt. Nou chire nou pa ka koud. En fin de compte, nou lanse yon kanpay pou di, oh wi, nou pa wè poukisa lòt la ap mache achte tout materyèl sa yo. Nou di se pa materyèl ki enpòtan se avèk ki espri lòt la lanse koze karavàn nan. Bon, finalman, kisa salopa sa yo vle nan peyi a? Si l' pa achte materyèl pou fè travay yo, se avèk dan l' travay yo ap fèt? Nou anmède lespri moun twòp nan peyi sa, tonnèèè! Bay moun ki pa gen peyi de rechanj yo yon ti chans pou yo fè avni pitit yo atò. Tout pa nou yo se kanadyen, ameriken, fransè e menm dominiken. Bann ipokrit!
Ralph Laurent
