06/11/2025
Fitore historike e Dritës në Evropë
Kampionia e Kosovës në futboll ka shënuar fitore historike të enjten mbrëma.
Pas dy barazimeve në fazën e ligës në Ligën e Konferencës kundër KuPS-it dhe Omonias, Drita shënoi fitore të madhe kundër Shelbournet në Dublin të Irlandës.
Golin e fitore 1:0 e shëoi sulmuesi i krahut, Almir Ajzeraj. Ai realizoi golin e fitores në minutën e 57-të.
Gjuajtja e Ajzerajt përfunoi në rrjetë me ndihmën e një devijimi të mbrojtësit, Lewis Temple.
Drita pati edhe disa raste tjera shënimi. Në minutën e 45-të kapiteni Rron Broja qëlloi traversën. Ai gjuajti me kokë, por topi përfundoi në traversë e më pas jashtë portës së Shelbournet, që luajti me një lojtar më pak në fushë nga minuta e 17-të pas përjashtimit të James Norrisit. Futbollisti i ekipit irlandez u përjashtua me karton të kuq pas ndërhyrjes ndaj Almir Ajzerajt.
Tre minuta para se përjashtohej Norris, Shelbourne, qëlloi shtyllën. Harrye Wood e qëlloi shtyllën në tentim për të harkuar nga rivënia e këndit. Krahas shtyllës së qëlluar, Shelbourne pati rastet e saj për gol, por pa arritur t’i konkretizoj.
Me fitore, Drita është ngritur në vendin e 15-të me pesë pikë.
Drita ka fituar edhe në aspektin financiar pas fitores ndaj Shelbournet. Në xhirollogarinë e saj do t’i ketë 400 mijë euro, aq sa vlerësohet fitorja në Ligën e Konferencës. Në total pas dy barazimeve dhe fitores, Drita ka fituar 666 mijë euro nga UEFA.
Me paraqitjen në Ligën e Konferencës, Drita i kishte të garantuara 3 milionë e 170 mijë euro nga UEFA.
Ndeshjen e katërt, Drita e luan në Prishtinë më 27 nëntor kundër Shkëndijës së Tetovës.