انا تزوجت راجلي معندو تا حاجة كان خدام بلي قسم الله وصابرا كاريا بيت مع بنادم و طواليط مشروكة حاشاكم من بعد ولدت لبنية لولا دار مشروعو سهل عليه الله وبقينا غادين وكنترقعو حتا ولدت الولد التاني و الولد الثالت و سهل عليه الله ولاو عندو لفلوس نييت واخا غير كاريين مهم كاري فبلاصة زوينة و حي راقي ماعلينا هاد سيد منين دار لفلوس زااغ و عرف واحد خيتي هاديك خيتي ضاربنا على قبلها لمرة الاولى وسامحت و بلوكاها حلف ولكن دازت المدة و عاود لقيتو داوي معاها للمرة التانية و سامحت حيت معندي فين نمشي ب3 لولاد دارنا غا على قد لحال و حلف على القرآن ميبقا يهضر مع شي وحدا واخا انا عرفت من هاديك خيتي انه كان باغي يتزوج بيها و رغم ذالك سامحت حتا للبارح كنلقاه مديبلوكيها تاني وعاود هاضر معاها مشيت عندو قلت ليه صافي طلقني منين باغيها هي سير الله يسهل عليك وطلقني و هو يقوليا سيري راك مطلقة و انا لي صبرت من والو اول حاجة بغا يديرها هي يبدلني هاد سيد تخيلو معايا انا لي كنقوليه شري لحويج و انا لي وريتو تيليفون كان عندو غا تيليفون ديال ألو انا لي قلت ليه دير تيليفون كبير و انا لي وريتو و انا لي قاديتو و هذا هو جزائي مهم ماعلينا لبارح جيت لدارنا و جبت معايا ولادي بقات غا لبنت لولا معاه لي فعمرها 7 سنين مابغاتش تجي معايا
دابا اشنو ندير نمشي نرفع دعوة ولا اشنو ندير قولو ليا عافاكم را داخت بيا دنيا ضيعت 10 سنين من حياتي مع هاظ سيد غا فابور
20/08/2025
انا مخطوبة من واحد سيد هو عندو فراشة ديال الحوايج لموهيم كنت مزييرة على شي فلوس 500 درهم وطلبتها ليه ولكن هو رفض قاليا انا ماشي مسؤول عليك ففترة الخطوبة قوليها لباك هو اصلا معمرو جابليا شي هدية مني تخطبت عمرو درهم والعقد ديالنا قريب وانا تنازلت بزاف عطاني تافق مع بابا باش يعطيني 2000 درهم فصداق وغير غدي نديرو عقد نيشان بلا عرس بلا حفلة صغيرة يعني تناازلت كثر من لقياس وهو شفت فيه لبخل انه مقدرش يعطيني حتى 500b درهم اوا اش درت قررت إنني ندير قيمة لراسي عزها تعزك قلت ليه كولشي تلغا خاصك تعطيني مليون فصداق وجيب ليا خاتم غالي اقل حاجة 6000 درهم ولحوايج ودهاز وبغيت عرس يكون فلقاعة هو تصدم حطيتو امام امر لواقع وبحكم انه كيبغيني مشا كيتسلف ويتكلف باش يجمع حيث عقدنا قريب وبقات ليه فلوس لعرس مقدرش يكملهم وانا صافي بلوكيتو حيث هو بخيل واش هاد تصرف لي درت صحيح
20/08/2025
وش من حقي ندخل حكمو دابا خويا تزوج هادي شهرين ساكنين بحدهم وانا تنمشي عدهم مرة فسيمانة مشيت عدهم شهر هادا مالقيت حد بقيت واقفة حدا الباب جا خويا من الخدمة فتح ليا قلت ليه فيه هي مرتك من صبح وانا واقفة قليا عيطت ليا راها مشات عند مها اوا دخلني كلست سيدة مبغاش تجي 10 ديال ليل وهي دالعة فزناقي قلت ليه عتعلمها هكا عتطلع لك فوق ظهرك جات مع 11 ديال ليل سلمت عليا ومشات نعست رجعت عدهم سيمانا من بعد حتى حد مافدار عيط ليها نيشان قالت ليا خارجة مع صحاباتي قلت ليها راه 9 ديال ليل كاين شي مرت راجل تتخرج مع صحاباتها فهاد ساعة معجبهاش الحال قالت ليا ملي تكوني جايا علميني باش ندير بحسابي وليت نمشي نلقاها فدار ولكن خويا طالق ليها شريط بزااااف قلت نمشي عندها بلا الخميس مشيت عندها سبت ليفات لقيت غير خويا فدار قاليا مشات رحلة مع صحاباتها عترجع غدا تفقصت واش راجل قاعد وحدو فدار ومرتو مسافرة مع صحاباتها قلت ليه يا عتحكم مرتك يا مانا ختك ما نتا خويا واش بغيتي تكون ديوث وناس يدويو فك ما عجبوش الحال جات هي عيطت ليا لاغد ليه قالت ليا حشوما عليك خليتي خوك يعيط ليا ويرجعني من السفر بسبابك انا عارفة حدودي واش كتخافي نخون راجلي وقطعات ليا فوجهي قليلة الادب واش نتوما الى كنتو بلاصتي تخافو على خوكم وهدرة ناس ولالا؟ لي تيقول ليا ما شغلكش راه شغلي الالة خويا هداك ما نبغيش شي حد يهدر فيه و يقول عليه ما راجلش ومرتو دالعة فالزناقي
19/08/2025
فيلم زوين 😅
18/08/2025
طليقي كان وخا كيعاملني خايب و ندوز عليا العذاب كان حرش و كنحس براسي انثى قدامو و لكن ملي وصلنا للض---رب صافي قررت نطلق منو ، و عاوت دبا تزوجت هذا حنين و لدي الناس و كيعاملني مزيان وخا هكاك حسيت بحال الى توحشت طليقي الاول و التعامل ديالي ، هادشي ماشي بخاطري كنحاول نقاوم هاد الشعور و مقدرتش ، شي تفسير عافاكم و شنو ندير
18/08/2025
قبل 3 سنين، راجلي قالي نبيع ذهبي باش يدير عملية لوالدته، وأنا رفضت، وتو.فات أمو، والموضوع تسد.
دابا، أمي كانت محتاجة عملية ضروري، وظروف والديا ما كتسمحش نهائياً، قلت لراجلي أنني بغيت نبيع ذهبي باش ندير العملية لأمي. كنت متأكدة أنه غادي يرفض، لكن المفاجأة أنه ما رفضش. مشى معايا، بعنا الذهب، وهو زاد من جيبو المبلغ اللي ناقص، ودرنا العملية، والحمد لله نجحت.
وكانت الكلمة اللي قالها ليا: "الفلوس والذهب هادو صدقة جارية على روح الوالدة".لكن بعد هادشي، حسيت أنه تبدل معايا في المعاملة الشخصية، مع أنه ما مقصر في حتى حاجة فالدار، والحمد لله ربي رزقو من واسع فضله.
المشكل دابا، أنه كيوجد لدار ثانية، وقال لي: "هاد الدار غادي نتزوج فيها، وانتي عندك حرية الاختيار، يا تكملي معايا، يا نطلقو ونعطيك جميع حقوقك".
دابا أنا حايرة.. أش ندير؟
18/08/2025
أنا واحد البنت لي كنقول بلي ديما قلبي خارج عليا بغيت واحد الولد لدرجة بزاف و تعلقت بيه غادي يحس بيا غير لي بغا من قلبو لدرجة كبيرة تعرفت عليه فالفيس بوك بغيتو و بغاني بزاف كنبغيو بعضياتنا جا لدارنا ولكن مبغاوش مخلاوناش نتزوجو بكيت بزاف و طلبتهم ولكن بلا فائدة كتاشفت الخيانة ديالو شحال من مرة و لكن كنسمح ليه حيت كنبغيه و كنقول واخا هدشي راه حتى هو كيبغيني ماشي لخاطري مكنقدرش نتفارق معاه غير التفكير فهدشي كيخليني نحس براسي مخنوقة خيفة بزاف منلقاش لي يبغيني بحالو و لا أنا مانعاودش نبغي شي حد هدشي لي خفت منو بزاف و مؤخرا قال ليا نتزوجو و نمشيو لداركم و نقولو ليهم بلي تزوجنا معرفتش شنو ندير كنحس بلي دنيا ضلامت فعيني ماعارفاش نعيش بلا بيه معرفتش اش خاصني ندير الله يرحم الوالدين عتابروني الاخت ديالكم و نصحوني بلي كتشوفوه خير ليا
17/08/2025
رديت البال بلي بزاااف ضد فكرة قهوة خاصة بالنساء فقط
علاش زعما؟
17/08/2025
انا ساكنة مع خويا و مراتو وولدو بحكم انا كنقرا فالمدينة لساكنين فيها هما وهاد الصيف ممشيتش للدار صافي لبارح جات عندي صاحبتي من الروح للروح الله يعمرها دار صافي كومندينا الغدا احتراما لخويا و بقينا في بيتي لفوق صافي مني كانت غاديا تلاقينا مع خويا و مراتو عند الباب فالغالب كانوا خارجين من الصواب سلمات على مرت خويا بالوجه وسلمات تاعلا خويا بالوجه ومشات لدارهم ديك الساعة طلعت لبيتي شوي جات عندي مرت خويا تتعاير وتغوت وتتطعن فشرف صاحبتي طبعا مقبلتش ليها ديك الهضرة و تسابينا وداب غاهزا عليا خنافرها وتضرب فالمعاني
والمشكل هاد صاحبتي بنت تتحمق وامبوسي تشوف فخويا بحكم صاحبها اش نقول ليكم اشمنك يا زين اشمنك يا عضلات اسمعك يا طول اشمنك يالوطو بصاح لباااااااااااس عليه بالمعقول لامقارنة بخويا وهي بنت الناس و مأدبة غي حيت هي من الناس الكلاس وكدا كيسلموا بالوجه على كلشي
اشبان ليكم اش ندير مع هادي طلعات لي الدم رأيكم يهموني ❤️
16/08/2025
ماجا نعاودلكم التجربة تاعي فالزواج والطلاق
تزوجت زواج تقليدي دخلت بنية صافية غانكون زوجة مطيعة ومزيانة لاني معنديشي الوالدين ما.تو الله يرحمهم كنت مع حنايا وغاتزوجت ما.تت رحمها الله ملي ما.تت يما حنا راجلي تبدل فمرة ولا يعايرني يسبني يض.ربني بزاف وانا درويشة الراس منهزوشي صبرت بزايف المصروف ميعطينيشي مهم جواعني مزيان فكرت ومبغيتشي نولد معاه ملي كان يمشي نلخدمة كنت نتفرج فاليوتيوب نتعلم الراندة بديت نشد فالخدمة من العيالات بتخبيعة منه جمعت فلوس فجيبي ومشيت عند خالتي و دفعت نطلاق ملي وصلو الخبار كغايحم.اق فالجلسات بقا يبكي ويقولي متخلينيشي قوتلو لاش كنتي تعامل معايا خايب قالي كونت ضامنك معندك فاين دمشي معندك احد من غيري بغيت نحس برجولتي وقوتي معاك عيا يزاوك مسمحتلوشي وهانا دابا مع خالتي الحمد لله جبرت خدمة ومعاوناها وعومري نعاود نفكر فالزواج كرهني فيه كنت بنت الناس دبصح ومقدرنيشي
16/08/2025
كان ولد جيرانا كيبغيني دبصح وكيطلبني ديما للزواج وانا كنرفض وانا عقل الصغر كنتنفخ عليه جا خطبني واحد احسن منه ماديا طمعت ومشيت تزوجت لكن عشت التكرفيس كيسد عليا الدار بالساروت ممنوع الخروج عذ.بني بزاف هربت من عنده وجيت عند والديا و طلقت دابا كنشوف السيد الاول كيتنادم معايا الحال وليت كنفكر فيه كل نهار كل دقيقة معرفت نزعم نسيفط ليه فالانستغرام ولالا عافاكم نصحوني شنو ندير ندمت بزاااف فنظركم يقبل يعطيني فرصة كنتلاقاه فالزنقة كيهبط عينو هو ولد الناس مخلق ومربي معرفت شنو ندير
Be the first to know and let us send you an email when مولاتي الحادكة Moulati lhadga posts news and promotions. Your email address will not be used for any other purpose, and you can unsubscribe at any time.
