Quezon Chronos PH

03/10/2026

𝐈𝐧𝐟𝐚𝐧𝐭𝐚 𝐚𝐭 𝐂𝐚𝐛𝐮𝐲𝐚𝐨, 𝐋𝐚𝐠𝐮𝐧𝐚, 𝐧𝐚𝐠𝐬𝐚𝐧𝐢𝐛-𝐩𝐮𝐰𝐞𝐫𝐬𝐚 𝐬𝐚 𝐩𝐚𝐠𝐩𝐚𝐩𝐚𝐥𝐢𝐭𝐚𝐧 𝐧𝐠 𝐛𝐞𝐬𝐭 𝐩𝐫𝐚𝐜𝐭𝐢𝐜𝐞𝐬 𝐬𝐚 𝐥𝐨𝐤𝐚𝐥 𝐧𝐚 𝐩𝐚𝐦𝐚𝐦𝐚𝐡𝐚𝐥𝐚

Hindi kompetisyon kundi pagtutulungan at pagpapalitan ng kaalaman ang naging sentro ng LGU Benchmarking Activity ng Lokal na Pamahalaan ng Infanta sa Lungsod ng Cabuyao, Laguna noong Oktubre 1, 2026, na layong matukoy at maiangkop ang mga epektibong programa at sistema para sa mas mahusay na serbisyo publiko.

Pinangunahan ni Infanta Mayor Lord Arnel “L.A.” L. Ruanto kasama si Vice Mayor Mannie America at mga miyembro ng Sangguniang Bayan ang delegasyon ng Infanta na mainit na tinanggap ng pamahalaang lungsod ng Cabuyao sa pangunguna nina Mayor Dennis Felipe C. Hain at Vice Mayor Junjun Del Rosario Batallones.

Tinalakay sa benchmarking ang mga programa, polisiya at operational practices ng Cabuyao, partikular sa industry relations at business visitation, community outreach at extension initiatives, social welfare, at public healthcare services.

Kabilang din sa mga pinag-aralan ang mga estratehiya sa continuity planning, income generation, capacity building at values creation sa public service, na maaaring iangkop sa pangangailangan at kalagayan ng Infanta.

Binigyang-diin ni Mayor Ruanto na mahalaga ang LGU-to-LGU partnership at network governance upang matuto ang mga lokal na pamahalaan mula sa isa’t isa at maiangkop sa kanilang sariling komunidad ang mga programang napatunayang epektibo sa ibang lugar.

Ayon kay Ruanto, hindi kailangang magkaroon ng magkakaparehong laki ng resources o badyet ang mga LGU upang makinabang sa mga inobasyon ng isa’t isa. Sa halip, maaaring magbahagi ng kaalaman, teknolohiya at praktikal na solusyon na maaaring iakma sa lokal na kalagayan.

Ibinahagi rin ng alkalde ang mga programa at potensyal ng Infanta, kabilang ang pangangalaga sa likas na yaman, agrikultura at fisheries, bilang bahagi ng reciprocal learning sa pagitan ng dalawang lokal na pamahalaan.

Samantala, binigyang-diin naman ni Mayor Hain ang kahalagahan ng pakikipagtulungan sa halip na kompetisyon sa pagitan ng mga LGU.

Ayon kay Hain, may mga maaaring matutunan ang Cabuyao mula sa mga programa at best practices ng Infanta, tulad din ng mga maaaring matutunan ng Infanta mula sa Cabuyao.

Layunin ng naturang benchmarking activity na higit pang mapalakas ang ugnayan ng dalawang LGU at magsilbing daan sa patuloy na palitan ng kaalaman, karanasan at makabagong pamamaraan tungo sa mas maayos, mabilis at epektibong paghahatid ng serbisyo sa mga mamamayan.

Para sa Lokal na Pamahalaan ng Infanta, ang ganitong mga ugnayan ay bahagi ng patuloy na paghahanap ng mga pamamaraang maaaring maiangkop upang higit na mapabuti ang serbisyo at programa para sa mga Infantahin.

📸 JR Narit

03/10/2026

𝐏𝐚𝐧𝐮𝐤𝐚𝐥𝐚𝐧𝐠 𝐛𝐚𝐭𝐚𝐬 𝐩𝐚𝐫𝐚 𝐩𝐚𝐥𝐚𝐤𝐚𝐬𝐢𝐧 𝐚𝐧𝐠 𝐢𝐧𝐝𝐮𝐬𝐭𝐫𝐢𝐲𝐚 𝐧𝐠 𝐤𝐚𝐰𝐚𝐲𝐚𝐧, 𝐢𝐧𝐚𝐩𝐫𝐮𝐛𝐚𝐡𝐚𝐧 𝐧𝐠 𝐇𝐨𝐮𝐬𝐞 𝐏𝐚𝐧𝐞𝐥

Inaprubahan ng House Committee on Agriculture and Food na pinamumunuan ni Quezon 1st District Rep. Wilfrido Mark Enverga ang substitute bill na naglalayong palakasin ang industriya ng kawayan sa bansa.

Layunin ng panukala na kilalanin ang kawayan bilang parehong high-value crop at industrial crop, gayundin ang pagtatatag ng pambansang balangkas na mag-uugnay sa mga magsasaka sa mga processor, negosyo at pamilihan.

Ang substitute bill, na inaprubahan nitong Martes, ay naglalayong amyendahan at palakasin ang Republic Act No. 7900 o High-Value Crops Development Act of 1995, at gawing institutionalized ang National High-Value Crops Development and Bioeconomy Program.

Pinagsama sa panukala ang House Bill No. 11189 ni Cagayan de Oro City Rep. Rufus Rodriguez at House Bill No. 11486 ni Bukidnon 1st District Rep. Jose Manuel Alba.

Ayon kay House Speaker Faustino “Bojie” Dy III, makatutulong ang panukala upang maging mas sustainable na kabuhayan at economic activity ang industriya ng kawayan.

Kabilang sa mga iminungkahing pagbabago ang pagbuo ng bamboo development component na sasaklaw sa buong farm-to-industry ecosystem, habang magsisilbing pambansang framework ang National High-Value Crops Development and Bioeconomy Program para sa koordinadong pagpapaunlad ng mga priority high-value crop industries at value chains.

Sinabi naman ni Committee Vice Chairperson at Oriental Mindoro Rep. Arnan Panaligan na maaari itong magbukas ng karagdagang livelihood opportunities para sa mga magsasaka at rural communities, habang tinutugunan ang mga hamon gaya ng mataas na production costs, kalamidad at limitadong pamilihan.

Binigyang-diin naman ni Alba ang pangangailangan ng mas matibay na policy framework para sa industriya ng kawayan at pagpapalawak ng oportunidad sa buong value chain nito.

Samantala, iminungkahi ni ASENSO PINOY Party-list Rep. Henry Oaminal Jr. na gamitin ang bersyon sa HB 11486, partikular ang probisyon para sa siyam na miyembrong komite sa halip na 50.

Iminungkahi rin niya ang paunang pondong ₱500 milyon sa halip na ₱50 bilyon, dahil sa limitadong fiscal space matapos ang deliberasyon sa 2027 General Appropriations Act.

Bahagi ang panukalang ito ng ilang hakbang sa Kamara para mapaunlad ang bamboo industry, kabilang ang mga panukalang batas para sa paggamit ng kawayan sa climate-resilient buildings, procurement ng bamboo products at pangkalahatang development ng Philippine bamboo industry.

Source: congress.gov.ph

03/10/2026

20 𝐞𝐬𝐭𝐮𝐝𝐲𝐚𝐧𝐭𝐞 𝐬𝐚 𝐏𝐚𝐠𝐛𝐢𝐥𝐚𝐨, 𝐭𝐮𝐦𝐚𝐧𝐠𝐠𝐚𝐩 𝐧𝐠 𝐟𝐢𝐧𝐚𝐧𝐜𝐢𝐚𝐥 𝐚𝐬𝐬𝐢𝐬𝐭𝐚𝐧𝐜𝐞 𝐦𝐮𝐥𝐚 𝐀𝐛𝐨𝐢𝐭𝐢𝐳𝐏𝐨𝐰𝐞𝐫

Dalawampung high school scholars mula sa mga pampublikong paaralang sekondarya sa Pagbilao at Quezon Science High School ang tumanggap ng financial assistance sa isinagawang 2026 TLI High School Financial Assistance Turnover Ceremony noong Oktubre 1 sa Pagbilao National High School.

Layunin ng programa na makatulong sa mga iskolar sa kanilang pang-araw-araw na gastusin sa pag-aaral at maibsan ang pinansyal na pasanin ng kanilang mga pamilya.

Dumalo sa turnover ceremony na kumatawan sa AboitizPower - Therma Luzon, Inc. (TLI) sina Lou Jason Deligencia, AVP for Corporate Services, at Kirk Coronel, RSM Manager.

Kinatawan naman ng Department of Education sina Dr. Aris Barrago, Assistant Schools Division Superintendent; Edna Lorica Cabrera, Public Schools District Supervisor ng Pagbilao 1; at Catalino Luna Porta, Public Schools District Supervisor ng Pagbilao 2.

Dumalo din ang mga school head na sina Carlo Manalo Pacinos ng Pagbilao Grande Island National High School, Jennifer Ayapana ng San Miguel National High School, Mario Guevarra ng Talipan National High School, Elmer Cosico Ravina ng Pagbilao National High School, at Cynthia Cuya ng Quezon Science High School.

Ang programa ay bahagi ng patuloy na pakikipagtulungan ng AboitizPower - Therma Luzon Inc. sa komunidad ng Pagbilao at sektor ng edukasyon. (Reygan Mantilla)

📸 Rupert Vito

02/10/2026

𝐊𝐥𝐚𝐬𝐞 𝐚𝐭 𝐭𝐫𝐚𝐛𝐚𝐡𝐨 𝐬𝐚 𝐦𝐠𝐚 𝐩𝐚𝐚𝐫𝐚𝐥𝐚𝐧 𝐬𝐚 𝐈𝐧𝐟𝐚𝐧𝐭𝐚, 𝐬𝐮𝐬𝐩𝐞𝐧𝐝𝐢𝐝𝐨 𝐬𝐚 𝐎𝐤𝐭𝐮𝐛𝐫𝐞 5 𝐩𝐚𝐫𝐚 𝐬𝐚 𝐖𝐨𝐫𝐥𝐝 𝐓𝐞𝐚𝐜𝐡𝐞𝐫𝐬’ 𝐃𝐚𝐲

Suspendido ang klase at trabaho ng teaching at non-teaching personnel sa lahat ng pampubliko at pribadong paaralan sa bayan ng Infanta, Quezon sa Oktubre 5, 2026 (Lunes), bilang paggunita sa World Teachers’ Day.

Ito ay alinsunod sa Executive Order No. 46, Series of 2026 ni Infanta Mayor Lord Arnel “L.A.” L. Ruanto nitong Oktubre 2.

Saklaw ng suspensyon ang mga teaching at non-teaching personnel ng public at private elementary, secondary, tertiary at iba pang kinikilalang educational institutions sa munisipalidad.

Ayon sa kautusan, layunin nitong kilalanin at parangalan ang mahalagang ambag ng mga g**o at school personnel sa paghuhubog sa mga mag-aaral at sa pagpapaunlad ng komunidad.

Inatasan naman ang mga school head at kinauukulang awtoridad na tiyaking maayos na mapapangasiwaan ang mga essential services at agarang pangangailangan ng mga paaralan sa kabila ng suspensyon.

Nakasaad din sa kautusan na ipatutupad ito alinsunod sa mga umiiral na batas, patakaran at regulasyon ng Department of Education (DepEd), Commission on Higher Education (CHED) at iba pang kinauukulang ahensya.

02/10/2026

𝐐𝐌𝐂 𝐩𝐮𝐧𝐨 𝐧𝐚 𝐬𝐚 𝐦𝐠𝐚 𝐩𝐚𝐬𝐲𝐞𝐧𝐭𝐞, 𝐥𝐚𝐦𝐩𝐚𝐬 𝐧𝐚 𝐬𝐚 𝐢𝐭𝐢𝐧𝐚𝐤𝐝𝐚𝐧𝐠 𝐤𝐚𝐩𝐚𝐬𝐢𝐝𝐚𝐝

Naglabas ng abiso ang pamunuan ng QPHN–Quezon Medical Center (QMC) matapos umabot sa higit sa itinakdang kapasidad ang kanilang Emergency Room at mga ward o silid-pasyente.

Ayon sa QMC, kasalukuyang puno na ang kanilang mga pasilidad dahil sa dami ng mga pasyenteng nangangailangan ng atensyong medikal.

Sa kabila nito, tiniyak ng pamunuan na patuloy silang magbibigay ng serbisyo at gagawin ang lahat ng makakaya upang maalagaan ang bawat pasyente.

Gayunman, nagbabala ang ospital na maaaring magkaroon ng limitadong espasyo at ilang abala sa pagtanggap ng mga darating pang pasyente.

Humingi naman ang QMC ng pang-unawa at pakikiisa ng publiko habang hinaharap ang kasalukuyang sitwasyon, at nagpasalamat sa patuloy na tiwala ng mga mamamayan.

Source: QPHN-QMC

30/08/2026

30/08/2026

𝐌𝐚𝐲𝐨𝐫 𝐑𝐮𝐚𝐧𝐭𝐨, 𝐢𝐧𝐢𝐥𝐚𝐭𝐚𝐠 𝐚𝐧𝐠 𝐮𝐧𝐚𝐧𝐠 𝐭𝐚𝐨𝐧𝐠 𝐚𝐜𝐜𝐨𝐦𝐩𝐥𝐢𝐬𝐡𝐦𝐞𝐧𝐭; 𝐋𝐈𝐍𝐆𝐀𝐏 𝐀𝐠𝐞𝐧𝐝𝐚, 𝐭𝐚𝐦𝐩𝐨𝐤 𝐬𝐚 𝐔𝐥𝐚𝐭 𝐬𝐚 𝐁𝐚𝐲𝐚𝐧 𝟐𝟎𝟐𝟔
Ni: Reygan Mantilla

Inilatag ni Infanta Mayor Lord Arnel “L.A.” Ruanto ang mga pangunahing programa, proyekto at serbisyong naisakatuparan sa ilalim ng LINGAP Agenda ng kanyang administrasyon sa unang isang taon ng panunungkulan sa kanyang Ulat sa Bayan 2026, na ginanap noong Agosto 29 sa Northern Quezon Auditorium, Infanta, Quezon.

Binigyang-diin ni Ruanto na nakasentro ang kanyang administrasyon sa pagtatatag ng isang bukas, inklusibo at people-centered na pamahalaan, na may layuning mapabuti ang buhay ng bawat Infantahin.

Sa kanyang ulat, sinabi ng alkalde na kabilang sa pangunahing direksyon ng kanyang administrasyon ang 𝗟ocal economic development, livelihood, education, 𝗜nfrastructure and sustainable development, 𝗡ature conservation, health and wellness, 𝗚ood governance, ethical leadership, 𝗔griculture and fisheries, cultural heritage, tourism, 𝗣eace and order, disaster risk reduction management and social protection.

𝗣𝗮𝗴𝗽𝗮𝗽𝗮𝗹𝗮𝗸𝗮𝘀 𝗻𝗴 𝗹𝗼𝗸𝗮𝗹 𝗻𝗮 𝗲𝗸𝗼𝗻𝗼𝗺𝗶𝘆𝗮

Kabilang sa binigyang-diin ni Ruanto ang pagpapalakas sa mga economic enterprise ng bayan, partikular ang Infanta Commercial Center (ICC) at Fish Port.

Ayon sa ulat, umabot sa P5.06 milyon ang kita ng ICC mula Hulyo 2025 hanggang Hunyo 2026, mula sa P4.60 milyon sa kaparehong panahon noong nakaraang taon—katumbas ng 10.11% pagtaas.

Mas malaki naman ang iniulat na pagtaas sa Fish Port, mula P3.52 milyon tungo sa P7.79 milyon, o 121.63% pagtaas. Kasabay nito ang unti-unting pagsasaayos sa pisikal na pasilidad ng dalawang economic enterprise, kabilang ang paglalagay ng anti-skid matting, ilaw, parking area, CCTV, sariling water meters at dagdag na timbangan.

Inilahad din ng alkalde ang mga hakbang para maakit ang mga mamumuhunan, kabilang ang pagtatayo ng mga pasalubong center at pagpapaunlad ng mga lokal na produkto sa pamamagitan ng One Barangay, One Product.

Samantala, nakakuha ang bayan ng P7.1 milyong Sustainable Livelihood Program (SLP) support na nakinabang sa 539 benepisyaryo para sa iba't ibang lokal na industriya, kabilang ang Infantap-ong, Infantapik, Infantasin, Catmon jelly and candy, suman sa gata, alak at s**a sa sasa, at dried products.

𝗘𝗱𝘂𝗸𝗮𝘀𝘆𝗼𝗻, 𝗺𝗮𝗹𝗮𝗸𝗶𝗻𝗴 𝗽𝗿𝗮𝘆𝗼𝗿𝗶𝗱𝗮𝗱

Isa sa pinakamalaking hamon na tinukoy ni Ruanto ang kakulangan ng mga silid-aralan. Batay sa datos na kanyang iniulat, 74 classroom ang kulang sa 22 paaralan sa Infanta.

Bilang tugon, nakipagtulungan ang lokal na pamahalaan sa Department of Education, pribadong sektor at iba pang katuwang para sa konstruksyon at pagsasaayos ng mga classroom.

Kabilang dito ang renovation ng tatlong classroom sa Tongohin Elementary School, pagsasaayos ng dalawang classroom sa Binulasan Integrated School at konstruksyon ng isang classroom sa Dinahican Elementary School. Isinasagawa rin ang konstruksyon ng dalawang gusali na may walong classroom sa Infanta Central School sa tulong ng Pamahalaang Panlalawigan ng Quezon.

Malaki rin ang naging pokus sa literacy. Mula sa 11% ng mga mag-aaral na nakakabasa at nakakaunawa ayon sa grade level, iniulat na umakyat ito sa 26 porsiyento matapos ang mga reading intervention program. Kabilang dito ang Teacher Ko ang Nanay at Tatay Ko, RISE-UP, Tara, Basa! at Teach One, Each One.

Naglaan din ang pamahalaang bayan ng educational assistance na umabot sa P8.026 milyon para sa 2,209 mag-aaral, habang mahigit 10,000 school supplies na ang naipamahagi sa mga kindergarten at elementary pupils.

𝗠𝗮𝘀 𝗽𝗶𝗻𝗮𝗹𝗮𝗸𝗮𝘀 𝗻𝗮 𝘀𝗲𝗿𝗯𝗶𝘀𝘆𝗼𝗻𝗴 𝗽𝗮𝗻𝗴𝗸𝗮𝗹𝘂𝘀𝘂𝗴𝗮𝗻

Sa sektor ng kalusugan, iniulat ni Ruanto ang dagdag na dalawang ambulansya, dalawang nurse at tatlong doktor bilang bahagi ng Health Service Delivery Network Program.

Dahil dito, 12,420 residente ang napaulat na nabigyan ng medical checkup sa Municipal Health Office, habang 324 naman ang nakinabang sa libreng nurse service.

Kabilang din sa mga serbisyong inilapit sa mga residente ang medical booth sa palengke, medical checkup at random blood sugar testing para sa senior citizens, medical missions at libreng chest X-ray.

Sa ilalim naman ng Lingap Agad Assistance Program, mula Agosto 2025 hanggang Agosto 2026, mahigit P3 milyon ang nailaan para sa medical assistance ng 1,970 benepisyaryo, habang mahigit P400,000 naman ang naibigay na burial assistance sa 95 benepisyaryo.

Sa nutrisyon, 208 preschool learners na may malnutrition sa Barangay Dinahican ang nabigyan ng serbisyo sa Nutrition Caravan. Napanatili rin ng Infanta ang pagkilala bilang Highest 2026 Operation Timbang Plus Awardee, habang isinagawa na rin ang groundbreaking ng Nutribun Production Center.

𝗜𝗺𝗽𝗿𝗮𝘀𝘁𝗿𝗮𝗸𝘁𝘂𝗿𝗮 𝗮𝘁 𝗽𝗮𝗴𝘁𝗶𝘁𝗶𝗽𝗶𝗱 𝘀𝗮 𝗽𝗼𝗻𝗱𝗼

Binigyang-diin din ng alkalde ang paggamit ng construction by administration bilang paraan upang makatipid sa mga proyekto ng bayan.

Sa kanyang ipinakitang paghahambing, ang isang standard classroom na nagkakahalaga ng P3.4 milyon kapag contractor ang gumawa ay tinatayang P1.7 milyon lamang kapag administration ang nagsagawa. Sa road concreting naman, P3.1 milyon ang contractor cost kumpara sa P2.3 milyon sa administration, habang ang solar street light na P232,779 bawat set sa contractor ay nasa P92,397 naman kapag administration.

Upang mapalakas ang kakayahan ng lokal na pamahalaan na magsagawa ng sariling mga proyekto, bumili rin ito ng bagong heavy equipment kabilang ang road grader, dalawang vibratory road roller, dump truck, boom truck at manlift.

Kasama rin sa mga prayoridad ang mga solar streetlight, barangay infrastructure, pagpapahusay ng slaughterhouse at renovation ng municipal hall.

Samantala, nagpapatuloy ang konstruksyon ng bagong Infanta Municipal Hall, na sinuportahan ng mga pondong iniulat na nagmula sa mga senador at iba pang katuwang.

𝗞𝗮𝗹𝗶𝗸𝗮𝘀𝗮𝗻, 𝘁𝘂𝗿𝗶𝘀𝗺𝗼 𝗮𝘁 𝗸𝗮𝗯𝘂𝗵𝗮𝘆𝗮𝗻

Sa pangangalaga sa kapaligiran, iniulat ang 2,118.86 kilo o katumbas ng 42 sako ng basura na na-divert mula sa landfill sa pamamagitan ng Eco-Resiklo Program.

Mayroon na ring dalawang garbage compactor at isang garbage truck, habang ipinatupad ang Infantahin Bayanihan Day tuwing Sabado. Umabot na sa 6,165 volunteers ang lumahok sa ika-61 Sabadong Bayanihan.

Itinatag din ang Bantay Quarry and Mining Council of Infanta upang maprotektahan ang mga lugar na malapit sa flood control projects, d**e at iba pang infrastructure projects.

Sa turismo, iniulat na umabot sa 1,353,434 tourist arrivals noong 2025, habang nakapagtala na ng 857,628 arrivals mula Enero hanggang Hunyo 2026.

Tumaas din ang M**F collection mula P552,052 noong Hulyo 2024–Hunyo 2025 tungo sa P1.87 milyon noong Hulyo 2025–Hunyo 2026.

𝗚𝗼𝗼𝗱 𝗴𝗼𝘃𝗲𝗿𝗻𝗮𝗻𝗰𝗲 𝗮𝘁 𝘁𝗿𝗮𝗻𝘀𝗽𝗮𝗿𝗲𝗻𝗰𝘆

Sa pamamahala, iniulat ni Ruanto ang pagpapatupad ng mga polisiya laban sa katiwalian, drug-free workplace, human resource reforms at capacity-building para sa mga kawani ng lokal na pamahalaan.

Kabilang dito ang EO No. 11 o Zero Tolerance Policy on Corruption, EO No. 10 para sa Drug-Free Workplace, at iba pang hakbang upang mapahusay ang organizational structure at serbisyo publiko.

Nakuha rin ng Infanta ang Seal of Good Financial Housekeeping 2025 mula sa Department of the Interior and Local Government, na ayon sa ulat ay patunay ng pagsunod ng bayan sa transparency, accountability at wastong paggamit ng pondo ng bayan.

𝗠𝗮𝘀 𝗽𝗶𝗻𝗮𝗶𝗴𝘁𝗶𝗻𝗴 𝗻𝗮 𝘀𝗲𝗴𝘂𝗿𝗶𝗱𝗮𝗱 𝗮𝘁 𝗱𝗶𝘀𝗮𝘀𝘁𝗲𝗿 𝗽𝗿𝗲𝗽𝗮𝗿𝗲𝗱𝗻𝗲𝘀𝘀

Sa peace and order, iniulat ng Infanta Police ang 100% crime clearance efficiency at 93.50% crime solution efficiency mula Setyembre 1, 2025 hanggang Agosto 26, 2026.

Ayon din sa ulat, 34 sa 36 barangay ng Infanta ang drug-cleared na hanggang Agosto 2026.

Pinalakas din ang paggamit ng digital platforms para sa public safety at mabilis na pagtugon sa reklamo at emergency. Sa Watch Safe App, naitala ang 1,485 medical emergencies at 504 vehicular accidents mula nang ilunsad ito.

Sa disaster preparedness naman, isinagawa ang Barangay Resilience and Innovation Through Empowerment (BRITE) training at inihahanda ang installation ng rain accumulation, heat index at flood monitoring sensors.

𝗦𝗲𝗿𝗯𝗶𝘀𝘆𝗼 𝗽𝗮𝗿𝗮 𝘀𝗮 𝗺𝗴𝗮 𝘀𝗲𝗸𝘁𝗼𝗿

Binigyang-pansin din sa ulat ang mga programa para sa persons with disabilities, children with special needs, senior citizens at kabataan.

Sa 10-araw na Pedya Kamp Summer Camp, nasa 200 children with special needs ang nakasama, habang 4,669 libreng cake naman ang naipamahagi sa senior citizens mula nang ipatupad ang programa noong Enero.

Inilunsad din ang Local Youth Leaders program upang mabigyan ng pagkakataon ang mga kabataan na matuto tungkol sa pamamahala at pamumuno sa lokal na pamahalaan.

Sa pagtatapos ng kanyang ulat, kinilala ni Ruanto na marami pang hamon at pagkukulang ang kailangang tugunan ngunit iginiit niyang hindi tumigil ang kanyang administrasyon sa paghahanap ng solusyon.

Aniya, ang progreso ng Infanta ay hindi bunga ng iisang tao kundi resulta ng pagtutulungan ng pamahalaan at mamamayan. Binigyang-diin din niya na hindi pa tapos ang kwento ng Infanta at marami pang proyekto, suliranin at pangarap ang kailangang harapin at isakatuparan sa mga susunod na taon.

30/07/2026

21 𝐦𝐚𝐧𝐠𝐢𝐧𝐠𝐢𝐬𝐝𝐚 𝐚𝐫𝐞𝐬𝐭𝐚𝐝𝐨 𝐬𝐚 𝐏𝐨𝐥𝐢𝐥𝐥𝐨 𝐝𝐚𝐡𝐢𝐥 𝐬𝐚 𝐢𝐥𝐢𝐠𝐚𝐥 𝐧𝐚 𝐩𝐚𝐧𝐠𝐢𝐧𝐠𝐢𝐬𝐝𝐚 𝐠𝐚𝐦𝐢𝐭 𝐚𝐧𝐠 “𝐁𝐮𝐥𝐢-𝐁𝐮𝐥𝐢”

Arestado ang 21 katao matapos mahuling nagsasagawa umano ng iligal na pangingisda gamit ang ipinagbabawal na “Buli-Buli” o modified Danish seine sa karagatang sakop ng Balesin Island sa municipal waters ng Polillo, Quezon.

Ayon sa ulat ng Polillo Municipal Police Station sa pamumuno ni Officer-in-Charge Police Captain Jojo J. Pangilinan, nagsagawa ng magkasanib na operasyon ang pulisya at Bantay Dagat kung saan naharang ang isang komersyal na bangkang pangisda na walang rehistro, opisyal na marka, at kulay abo at kahel habang aktibong nangingisda sa nasabing lugar.

Nahaharap ang kapitan ng bangka na si Micheal Ebañes Madera at master fisherman na si Elezar Alerta Tero sa ilang kasong paglabag sa Republic Act No. 8550 o Philippine Fisheries Code of 1998, na inamyendahan ng Republic Act No. 10654. Kabilang sa mga inihahandang reklamo ang pangingisda sa municipal waters nang walang kaukulang awtorisasyon, paggamit ng ipinagbabawal at mapanirang kagamitan sa pangingisda, paglabag sa mga regulasyon sa fishing gear at vessel monitoring, iligal na pagkuha ng yamang-dagat, at operasyon ng sasakyang pandagat nang walang kinakailangang permit at lisensya.

Dahil wala ring rehistro at opisyal na pagkakakilanlan ang bangka, maaari ring maharap ang may-ari nito sa karagdagang administratibo at legal na pananagutan mula sa Maritime Industry Authority (MARINA) at Philippine Coast Guard (PCG) dahil sa paglabag sa mga regulasyon sa pagpaparehistro at kaligtasan ng sasakyang pandagat.

Samantala, ang 19 na tripulante ay sinita dahil sa paglabag sa Municipal Ordinance No. 196-2025 ng Polillo na nagtatakda ng mga patakaran sa pangingisda sa municipal waters. Dinala sila sa Office of the Municipal Treasurer at isinangguni sa Municipal Environment and Natural Resources Office (MENRO) ng Polillo para sa kaukulang administratibong proseso at pagpapataw ng multa.

Tinatayang aabot sa ₱3.65 milyon ang kabuuang halaga ng mga nakumpiskang ebidensya. Kabilang dito ang komersyal na bangkang ginamit sa iligal na pangingisda, diesel engine, makina, fishing nets, mga pabigat, iba pang kagamitan, at humigit-kumulang 1,200 kilo ng iba’t ibang uri ng isda na nakalagay sa 48 styrofoam boxes.

Nananatili sa kustodiya ng pulisya sina Madera at Tero habang hinihintay ang inquest proceedings, habang isinailalim naman sa pangangalaga ng MENRO Polillo ang nakumpiskang bangka at mga kagamitan.

Binigyang-diin ni MENRO Polillo Romel Calzado na mahigpit na ipinatutupad ng lokal na pamahalaan ang kampanya laban sa mapanirang uri ng pangingisda upang mapangalagaan ang yamang-dagat at kabuhayan ng mga lehitimong mangingisda.

Ayon kay Calzado, ito na ang ikaanim na “Buli-Buli” vessel na nahuli ng pinagsanib na pwersa ng Bantay Dagat, Philippine National Police (PNP), Armed Forces of the Philippines (AFP), at Bureau of Fisheries and Aquatic Resources (BFAR) sa loob lamang ng mahigit isang taon, bilang patunay ng pinaigting na kampanya laban sa iligal na pangingisda sa bayan ng Polillo.

Source: Kasama ng Kalikasan

30/07/2026

𝐏𝐚𝐧𝐢𝐛𝐚𝐠𝐨𝐧𝐠 𝐁𝐫𝐚𝐧𝐜𝐡 𝐧𝐠 𝐅𝐥𝐚𝐯𝐨𝐫𝐬 𝐨𝐟 𝐐𝐮𝐞𝐳𝐨𝐧, 𝐁𝐢𝐧𝐮𝐤𝐬𝐚𝐧 𝐬𝐚 𝐋𝐮𝐜𝐞𝐧𝐚

Mas pinalawak pa ang pagsusulong ng mga lokal na produkto at kabuhayan ng mga Quezonian sa opisyal na pagbubukas ng “Pasalubong at Kape by Flavors of Quezon” nitong Huwebes, Hulyo 30, sa Centrio Lifestyle Center sa Diversion Road, Barangay Domoit, Lungsod ng Lucena.

Pinangunahan ng mag-asawang sina O’Neil at Mhae Villasin ang pormal na pagbubukas ng panibagong sangay, na magsisilbing sentro ng mga de-kalidad na produktong gawa ng mga lokal na magsasaka, artisan, at mga micro, small, and medium enterprises (MSMEs) sa lalawigan. Layunin din nitong higit pang maipakilala ang mayamang kultura, tradisyon, at pagkakakilanlan ng Quezon sa mas maraming mamimili.

Tampok sa “Pasalubong at Kape by Flavors of Quezon” ang iba’t ibang lokal na pagkain, pasalubong, inumin, at iba pang produktong sumasalamin sa kasanayan at likas na yaman ng lalawigan.

Bukod sa pagiging pasalubong center, mayroon din itong coffee shop kung saan maaaring malasap ng mga mamimili ang mga produktong ipinagmamalaki ng Quezon sa isang komportable at kaaya-ayang kapaligiran.

Ayon kay Villasin, ang pagbubukas ng bagong tindahan ay hindi lamang pagpapalawak ng kanilang negosyo kundi bahagi ng kanilang adhikain na maihatid ang pinakamahusay na produktong Quezon sa mas maraming Pilipino.

Aniya, layunin din nitong patuloy na suportahan ang mga lokal na producer, magsasaka, at maliliit na negosyante sa pamamagitan ng pagbibigay sa kanila ng mas malawak na pamilihan para sa kanilang mga produkto.

Sa pamamagitan ng bagong sangay, inaasahang mas mapapalawak pa ang promosyon ng mga produktong Quezon at mabibigyan ng karagdagang oportunidad ang mga lokal na negosyante na maipakilala ang kanilang mga likha sa mas maraming mamimili at turista.

Nagpakita rin ng suporta sa pagbubukas si Project Development Officer III Lawrence Joseph Velasco ng Pamahalaang Panlalawigan ng Quezon, kasama ang mga kinatawan mula sa Department of Trade and Industry (DTI)-Quezon, Pamahalaang Panlungsod ng Lucena, at ilang lokal na MSMEs. (Reygan Mantilla)

29/07/2026

𝐌𝐚𝐠𝐧𝐢𝐭𝐮𝐝𝐞 5.6 𝐧𝐚 𝐥𝐢𝐧𝐝𝐨𝐥, 𝐲𝐮𝐦𝐚𝐧𝐢𝐠 𝐬𝐚 𝐤𝐚𝐫𝐚𝐠𝐚𝐭𝐚𝐧 𝐧𝐠 𝐉𝐨𝐦𝐚𝐥𝐢𝐠, 𝐐𝐮𝐞𝐳𝐨𝐧

Isang magnitude 5.6 na lindol ang naitala sa karagatan sa hilagang-silangang bahagi ng Jomalig, Quezon, alas-10:11 ng gabi ng Miyerkules, Hulyo 29.

Ayon sa Philippine Institute of Volcanology and Seismology (PHIVOLCS), tectonic ang pinagmulan ng pagyanig at may lalim na 10 kilometro, na ang sentro ay nasa 93 kilometro hilaga 36° silangan ng Jomalig.

Batay sa Earthquake Information No. 1 ng PHIVOLCS, nakaranas ng Intensity III ang Quezon City bilang reported intensity. Samantala, naitala naman ang Instrumental Intensity III sa mga bayan ng Jose Panganiban at Mercedes sa Camarines Norte, gayundin sa Guinayangan at Infanta sa Quezon.

Naitala rin ang Instrumental Intensity II sa Ragay, Lungsod ng Iriga, Pili, Sipocot, at Sagnay sa Camarines Sur.

Ayon sa PHIVOLCS, wala umanong inaasahang malaking pinsala dulot ng naturang lindol. Gayunman, nagbabala ang ahensya na maaaring makaranas ng mga aftershock o kasunod na pagyanig sa mga susunod na oras o araw kaya pinapayuhan ang publiko na manatiling alerto at sundin ang mga alituntunin sa earthquake preparedness.

Source: PHIVOLCS