Cherry News - ချယ်ရီ သတင်းစဉ် (2026)

03/01/2026

ဗိုလ်ချုပ်ပန်းခြံကို လူနေဆိုင်ခန်းတွဲဆောက်လုပ်ရန် တောင်ကြီးစည်ပင်က စီစဉ်နေ .......................
ခမ်းသားငေါဝ်း
ဇန်နဝါရီ ၃၊၂၀၂၆

တောင်ကြီးမြို့ ဗိုလ်ချုပ်ပန်းခြံကို လူနေဆိုင်ခန်းတွဲများ ဆောက်လုပ်ရန် တောင်ကြီးစည်ပင်က စီစဉ်နေကြောင်းစုံစမ်း သိရှိရသည်။

ရှမ်းပြည်နယ်တောင်ပိုင်း တောင်ကြီးမြို့အများပြည်သူအပန်းဖြေရန် တစ်နေရာသာကျန်ရှိသည့် ဗိုလ် ချုပ် ပန်းခြံကို လူနေဆိုင်ခန်းတွဲများဆောက်လုပ် ရန် ပြီးခဲ့သည့် ၂၀၂၅ ခုနှစ်နိုဝင်ဘာ ၅ ရက်နေ့က ဆောက်လုပ်ခွင့်ရရှိရန် ပြည်နယ်အစိုးရကို စာတင်ထားကြောင်းသိရသည်။

‘’ မိန်းလမ်းပေါ်မှာရှိတဲ့ တောင်ကြီးမြို့ရဲ့အထင်ကရ နေရာလဲဖြစ်တယ်။ အများပြည်သူ အပန်းဖြေတဲ့နေရာလဲ ဖြစ်တယ်လေ။ ဘယ်လိုမှမဖြစ်သင့်ဘူး။ စည်ပင်နဲ့ ခရိုနီပေါင်းပြီး စားကွက်ဖန်တာပဲပေါ့။ အများပြည်သူအတွက် ဘာအကျိုးမှ ဖြစ်လာမှာမဟုတ်တဲ့ Project လေ” ဟု တောင်ကြီးဒေသခံပြည်သူတစ်ဦးက ခမ်းသားငေါဝ်းကို ပြောသည်။

ဗိုလ်ချုပ်ပန်းခြံအတွင်း အဆောက်အဦ ဆောက် လုပ်ရေးလုပ်ငန်းများကို စည်ပင်နှင့်ရှမ်းချယ်ရီတောင်တန်း ဆောက်လုပ်ရေးကုမ္ပဏီက အကျိုးတူပူးပေါင်းလုပ်ဆောင်ရန်ဖြစ်ကြောင်းသိရသည်။

နောက်ထပ်တောင်ကြီးဒေသခံတစ်ဦးကလည်း’’ ဗိုလ်ချုပ်ပုံရိပ်နဲ့ပတ်သက်တာမှန်သမျ ဖျောက်ဖျက်ချင်နေတာလေ သူတောင်းစားတွေက အခုလော လော ဆယ်ဆိုရင်လူတိုင်းအဆင့်အတန်းတိုင်း အနားယူအပန်း ဖြေနိုင်တာ ဗိုလ်ချုပ်ပန်းခြံတစ်ခုပဲကျန်တော့တာလေ ကျန်တဲ့နေရာတွေကပိုက်ဆံပေးမှဝင်လို့ရတာလေ အခုလိုအဆောက်အဦးတွေဆောက်လိုက်ရင် ပုံမှန်လူတန်းစားတွေ အနားယူဖို့နေရာပျောက်သလို လေကောင်းလေသန့်ပါပျောက်ကုန်မှာ နောက်ပြီး အမှတ်တရအဖြစ်မြင်နေရတဲ့ စိမ်းစိမ်းဆိုဆို နေရာလေးပါ မရှိတော့ဘူးဖြစ်ကုန်မှာ’’ဟုခမ်းသားငေါဝ်းကိုပြောသည်။

လူနေဆိုင်ခန်းတွဲဆောက်လုပ်မည့်အစီစဉ်ကို ပြည်သူလူထုမှသိရှိခြင်းမရှိပဲ ခေတ်ပျက်ကာလကို အခွင့်ကောင်းယူပြီး စည်ပင်က လုပ်စားနေကြောင်း ဒေသခံကဆိုဝေဖန်ပြောဆိုကြသည်။

တောင်ကြီးဗိုလ်ချုပ်ပန်းခြံအတွင်းတွင် ၈၈ အရေးအခင်းလှုပ်ရှားမှု သမိုင်းမှတ်တိုင်အဖြစ် ကျောက် တိုင်စိုက်ထူထားခြင်းလည်းရှိသည်။

တောင်ကြီးမြို့တွင် အထင်ကရနေရာများဖြစ်သည့် မြကန်သာပန်းခြံ၊ ကြိုးတံတားပန်းခြံများတွင် အများပြည်သူ လွတ်လွတ်လပ်လပ် အပန်းဖြေရန်ခက်ခဲသွားပြီဖြစ်ပြီး လက်ရှိ ဗိုလ်ချုပ်ပန်းခြံကိုလည်း ထိုသို့လုပ်ဆောင်မည်ကို ဒေသခံများက စိုးရိမ်ကြသည်။

me

#ဗိုလ်ချုပ်ပန်းခြံ

#စည်ပင်

ခမ်းသားငေါဝ်း Telegram ကြည့်ရန်
https://t.me/thepeoplevoicePaO
youtube channel ကြည့်ရန်
www.youtube.com/
website ကြည့်ရန်
https://mm.thepeoplevoicepaoh.com/
Tiktok ကြည့်ရန်
www.tiktok.com/

31/12/2025

တောင်ကြီးတွင် ပျောက်ဆုံး ၉ တန်းကျောင်းသား အလောင်းသာ ပြန်တွေ့

မဲခေါင်၊ ဒီဇင်ဘာ ၃၁

ရှမ်းပြည်တောင်ပိုင်း၊ တောင်ကြီးမြို့တွင် အပြင်သွားရာမှ ပျောက်ဆုံးသွားသည့် အထက - ၄ မှ ကိုး တန်း ကျောင်းသားအား ၆ ရက်အကြာ၌ သေဆုံးလျက်သား ပြန်လည် တွေ့ရှိကြောင်း ဒေသခံများထံမှ သိရသည်။

ဘုရားဖြူ ရပ်ကွက်တွင် နေထိုင်သည့် အသက် ၁၆ နှစ်အရွယ် မောင်အနဂ္ဂရဲထက်သည် ဒီဇင်ဘာ ၂၄ ရက်တွင် အပြင်သို့ ဆိုင်ကယ်ဖြင့် ထွက်သွားရာမှ နေအိမ်သို့ ပြန်မရောက်လာဘဲ ပျောက်ဆုံးသွားခဲ့ပြီး ယမန်နေ့ ဒီဇင်ဘာ ၃၀ ရက်တွင်မှ အလောင်း ပြန်တွေ့ရခြင်း ဖြစ်သည်။

“မနေ့ကမှ မင်္ဂလာဦး သဲကျင်းရေကန်ထဲမှာ ပြန်တွေ့တာ။ ပြုတ်ကျတာလား အသတ်ခံရတာလား သေချာ မသိရသေးဘူး။ ဆိုင်ကယ်လည်း ပြန်မတွေ့ရသေးဘူး။ အဲ့ကြောင့် အသတ်ခံရတာလားလို့ သံသယလည်း ရှိကြတာပေါ့နော်”ဟု တောင်ကြီး ဒေသခံတစ်ဦးက ပြောသည်။

သေဆုံးသူ မောင်အနဂ္ဂရဲထက်၏ နာရေးကို ယနေ့တွင် ပြုလုပ်ခဲ့သည်။

“ကလေးက ငယ်ငယ်လေး ကျောင်းသားပဲလေနော်၊ ဆိုင်ကယ် ယူရင်တောင်မှ လူကို မလုပ်သင့်ဘူးလေဗျာ။ မိသားစုနဲ့ ထပ်တူ အမှုမှန် ပေါ်စေချင်တယ်”ဟု ဘုရားဖြူရပ်ကွက် ဒေသခံတစ်ဦးက ပြောသည်။

“တူလေး ပြန်တွေ့ပါပြီ အသက်ပါ မလာတော့ပါဘူး။ ဆုတောင်းလည်း မပြည့်ခဲ့ပါဘူး။ ဘုရားဖြူ အပေါ်ဘက် ချောက်ထဲမှာ ပြန်တွေ့ပါတယ်” ဟု သေဆုံးသူ၏ မိသားစုဝင်တစ်ဦးက လူမှုကွန်ရက်တွင် ရေးသားထားသည်။

အလောင်းပြန်တွေ့စဥ်တွင် ဆိုင်ကယ် ရှိတော့သဖြင့် ချောက်ထဲကျ၍ သေဆုံးရခြင်းမဟုတ်ဘဲ ဆိုင်ကယ်ယူပြီး လူသတ်ခံရသည့် အနေအထားဟု ဒေသခံများက ပြောသည်။

တောင်ကြီးမြို့သည် စစ်တပ်က အာဏာသိမ်းပြီး နောက်ပိုင်း တရားဥပဒေစိုးမှု ကင်းမဲ့နေပြီး လုယက်ခြင်း ဆိုင် ကယ်၊ ကားများပျောက်ဆုံးခြင်း မကြာခဏ ဖြစ်ပွားနေသည်။

ပြီးခဲ့သည့် ဒီဇင်ဘာ ၂၆ ရက်တွင်လည်း တောင် ကြီးမြို့၊ ဂနိုင်ရွေးတွင် သင်္ကန်းဝတ် အယောင်ဆောင်တစ်ဦးက အမျိုးသမီးတစ်ဦး၏ ကားကို ၂ တောင်ကျော် ရှည်သည့် ဓားရှည်ကိုင်ပြီး တားသဖြင့် ပြည်သူများ ဝိုင်းဝန်း ဖမ်းဆီးခဲ့ရသေးသည်။

#တောင်ကြီး
#ပျောက်ဆုံး
#ကျောင်းသား
#ပြန်တွေ့

30/12/2025

တောင်ကြီးမြို့ လမ်းမပေါ်တွင်စည်းကမ်းမဲ့ အမှိုက်ပစ်ချမှုများ ဆက်လက်များနေသဖြင့် မြို့အလှထိခိုက်နေ..............................................

ခမ်းသားငေါဝ်း
ဒီဇင်ဘာ ၃၀၊ ၂၀၂၅

တောင်ကြီးမြို့ လမ်းမပေါ်တွင် ကားမောင်းသူအချို့၏ စည်းကမ်းမဲ့ အမှိုက်ပစ်ချမှုများကို ဆက်လက်မြင်တွေနေခြင်းအား ဒေသခံများ မကျေနပ်မှုမြှင့်တက် နေကြောင်းသိရသည်။

ရှမ်းပြည်နယ်တောင်ပိုင်း တောင်ကြီးမြို့အတွင်း လမ်းမများပေါ်တွင် ကားစီးရင်း အမှိုက်များ ပစ်ချသည့် အလေ့အကျင့်များကြောင့် သန့်ရှင်းရေးနှင့် မြို့အလှအပ ထိခိုက်လာနေကြောင်း တောင်ကြီးမြို့ ဒေသခံများက စိုးရိမ်နေကြသည်။

"စည်းကမ်းမရှိကြဘူး။ အဓိကကတော့ လမ်းပေါ်မှာ ညစ်ပတ်လာတာပါ။ လမ်းဘေးတွေမှာ တကူးတကာ အမှိုက်သိမ်း‌ ပေးတဲ့သူမရှိဘူး။ စည်ပင်ဝန်ထမ်းတွေ ရှိပေမယ့် လူအများကြီး သွားလာတဲ့နေရာနဲ့ အမှိုက်ပုံးရှိတဲ့နေရာတွေကိုပဲ အများအားဖြင့် ရှင်းပေးနိုင်တာပါ" ဟု ဒေသခံတစ်ဦးက ပြောသည်။

ထိုကဲ့သို့ ကားပေါ်မှ တစ်ရှူး၊ ရေသန့်ဗူးခွံ၊ အချိုရည်ဗူးများသာမက ကွမ်းတံတွေးထုပ်များကိုပါ လမ်းပေါ်သို့ ပစ်ချနေကြကြောင်း၊ အချို့အခြေအနေများတွင် စည်းကမ်းမဲ့စွာပစ်ချခြင်းကြောင့် အနောက်မှ လမ်းသွားလမ်းလာများကို ထိခိုက်နိုင်သည့် အန္တရာယ်များပါ ဖြစ်ပေါ်နေကြောင်း ၄င်းကဆက်ပြောသည်။

"နေ့တိုင်းလိုလို သွားလာတဲ့အချိန်တိုင်း ကား‌‌သမား တွေ ကားပေါ်ကနေတစ်ရှူးပစ်လိုက်၊ အမှိုက်ပစ်လိုက်၊ ရေသန့်ဗူးပစ်လိုက်တာတွေကို တွေ့နေရပါတယ်" ဟု မြို့ခံတစ်ဦးက ဆိုသည်။

တောင်ကြီးမြို့အတွင်း ဂေါက်ကွင်းအနီး မီးသတ်ဌာနအနီးရှိ တောင်ကြားလမ်းဘေးတွင် ယခင်က အမှိုက်မရှိခဲ့သည့် နေရာများတွင် လူအချို့က အမှိုက်များကို လာရောက်ပစ်ခြင်းကြောင်း အမှိုက်ပုံ အဖြစ် ဖြစ်နေကြောင်းသိရသည်။

အဆိုပါနေရာအနီးတွင် ချယ်ရီပန်းများ ပွင့်လန်းနေသော်လည်း အမှိုက်များ ပုံထားခြင်းကြောင့် မြင်ကွင်းအလှအပ ထိခိုက်နေသည်ဟု ဆိုကြသည်။

ထို့အပြင် အိမ်စီးကားများဖြင့် အမှိုက်ကို လမ်းဘေးအမှိုက်ပုံးများသို့ တကူးတကာ လာရောက်ပစ်ချနေကြပြီး အနောက်မြို့ပတ်လမ်းအနီးရှိ အမှိုက်ကန်များကို အသုံးပြုနိုင်သော်လည်း လမ်းဘေးသို့ပင် စည်းကမ်းမဲ့စွာ ပစ်ချနေကြခြင်းဖြစ်ကြောင်း သိရသည်။

ရှမ်းပြည်နယ်တောင်ပိုင်း မြို့တော်ဖြစ်သော တောင်ကြီးမြို့သည် NLD အစိုးရလက်ထက်တွင် အာဆီယံအဆင့် အသန့်ရှင်းဆုံး မြို့တော်ဆု ရရှိခဲ့သော်လည်း လက်ရှိကာလတွင် အမှိုက်ခွန်အဆမတန် ကောက်ခံနေမှုများကြောင့် စည်းကမ်းမဲ့ အမှိုက်ပစ်ချမှုများ ပိုမိုများပြားလာနေကြောင်း သိရှိရသည်။

PPV0013
Photo - Popular Paoh Stars
me
me
me engaged
#သဘာဝပတ်ဝန်းကျင်
#တောင်ကြီးမြို့
#လမ်းမပေါ်
#ကားမောင်းသူအချို့၏စည်းကမ်းမဲ့အမှိုက်ပစ်ချမှု

https://t.me/thepeoplevoicePaO
youtube channel ကြည့်ရန်
www.youtube.com/
website ကြည့်ရန်
https://www.thepeoplevoicepaoh.com/
Tiktok ကြည့်ရန်
www.tiktok.com/

30/12/2025

ပင်လောင်း - ဖယ်ခုံ နယ်စပ်တိုက်ပွဲတွင် ရွာခံများကို PNO ရှေ့တန်း လွှတ်နေ

မဲခေါင်၊ ဒီဇင်ဘာ ၃၀

ပင်လောင်း - ဖယ်ခုံနယ်စပ်၌ ယခု ရက်ပိုင်းအတွင်း တိုက်ပွဲများဖြစ်နေပြီး ရွာခံများကို ပအိုဝ်းပြည်သူ့စစ် - PNO က စစ်ဝတ်စုံနှင့် သေနတ်များပေးပြီး ရှေ့တန်းလွှတ်နေကြောင်း ဒေသခံများထံမှ သိရသည်။

ရှမ်းပြည်တောင်ပိုင်း၊ ပင်လောင်း - ဖယ်ခုံ နယ်စပ်ရှိ တောင်စလုံးကျေးရွာနှင့် ဘောရန်ကျေးရွာ အနီးတစ်ဝိုက်တွင် ဒီဇင်ဘာ ၂၅ ရက်မှစပြီး PNO တပ်နှင့် ကရင်နီတော်လှန်ရေး တပ်ပေါင်းစုများအကြား တိုက်ပွဲပြင်းထန်နေကြောင်း ဒေသခံများထံမှ သိရသည်။

"တိုက်ပွဲဖြစ်နေတယ်၊ အစက PNO က ကိုယ့်ရွာ လုံခြုံရေးအတွက်ပဲ ပြန်စောင့်ရမယ်ဆိုပြီး ရွာသားကို သူတို့ တပ်ထဲကို အတင်းဝင်ခိုင်းတာ။ ခုတိုက်ပွဲဖြစ်မှ လက်နက်တွေပေးပြီး ရှေ့တန်းတက်ခိုင်းတာ။ တချို့ ရွာသားဆို စစ်သင်တန်းတောင် မတက်ဖူးဘူး "ဟု ဒေသခံ ရွာသားတစ်ဦးက မဲခေါင်သို့ ပြောသည်။

ရှေ့တန်း သွားရသူများသည် နမ်းနိန်း၊ လုံးပျဉ်၊ တောင်မဲသင်း ဒေသခံများ ဖြစ်ကြပြီး တစ်ရွာ လူငယ် ၁၀ ဦး သွားရကာ စေလွှတ်လိုက်သည့် ဒီဇင်ဘာ ၂၅ ရက် ကတည်းက အဆက်အသွယ်မရကြောင်း ၎င်းက ဆက်ပြောသည်။

တိုက်ပွဲအတွင်း PNO ဖက် အကျအဆုံး များကြောင်း သတင်းကြားရပြီး ရှေ့တန်းသွားရသူများနှင့် အဆက်အသွယ်လည်း မရသောကြောင့် ကျန်ခဲ့သော မိသားစုနှင့် ရွာသားများက စိုးရိမ်နေကြကြောင်း ဒေသခံများက ပြောသည်။

တောင်မဲသင်း၊ နမ်းနိန်း၊ ‌လုံးပျဉ် ကျေးရွာများသည် ပြီးခဲ့သည့် ၂၀၂၃ ခုနှစ်တွင် တိုက်ပွဲပြင်းထန်စွာ ဖြစ်ပွားပြီး ၂ နှစ်ကျော် စစ်ဘေးတိမ်းရှောင်ခဲ့ရပြီးနောက် နေရပ်ပြန်လာ‌နေထိုင်သည်မှာ သုံးလဝန်းကျင်သာ ရှိသေးကြောင်း ဒေသခံများထံမှ သိရသည်။

#ပင်လောင်း
#ဖယ်ခုံ
#တိုက်ပွဲ
#ရှေ့တန်း

30/12/2025

ပင်လောင်း၊ တခါးယာဉ်ရွာတွင် ကျည်ဖိုး တစ်အိမ် ၅ သိန်း PNO ကောက်

မဲခေါင်၊ ဒီဇင်ဘာ ၃၀

ရှမ်းပြည်တောင်ပိုင်း၊ ပင်လောင်းမြို့နယ်၊ လိန်းညာကျေးရွာအုပ်စု၊ တခါးယာဉ်ရွာတွင် PNO ပြည်သူ့စစ်က ကျည်ဆံဖိုးဟုဆိုကာ တစ်အိမ် ကျပ် ၅ သိန်း ကောက်ခံ‌နေကြောင်း ဒေသခံများထံမှ သိရသည်။

ယင်းငွေကို ဒီဇင်ဘာ ပထမပတ်တွင် ကောက်ခံပြီး လကုန်တွင် အပြီးထည့်ခိုင်းသဖြင့် အခက်အခဲဖြစ်နေကြောင်း ဒေသခံများက ပြောသည်။

"ငွေတအားကောက်တာ။ ကောက်တဲ့ ပမာဏကလည်း နည်းတာမဟုတ်ဘူး၊ ၅ သိန်းဆိုတာ ပြည်သူတွေအတွက် အရမ်းများတဲ့ ပမာဏဖြစ်တယ်။ ပြည်သူတွေက စားဖို့‌တောင် အနိုင်နိုင် လုပ်စားရတာ၊ ပြည်သူကို မစာမနာ ငွေအများကြီး ကောက်ရက်ကြတယ်။ ထည့်နိုင်တဲ့သူလည်း ထည့်ပြီးပြီ၊ မထည့်နိုင်သေးတဲ့ လူလည်းများတယ်။ တချို့ကျ ပိုက်ဆံကို အတိုးယူပြီး ထည့်ကြတယ်။ တချို့ကျ ရှိတဲ့ပစ္စည်းတွေ ရောင်းချပြီး ထည့်ရတယ်"ဟု ရွာခံတစ်ဦးက မဲခေါင်သို့ ပြောသည်။

မထည့်နိုင်သူများကို ရွာသူကြီး၊ ဆယ်အိမ်ခေါင်းများက တစ်အိမ်တက်၊ တစ်အိမ်ဆင်းပြီး လိုက်ကောက်နေပြီး အမျိုးမျိုးလည်း ခြိမ်းခြောက် ပြောဆိုနေကြောင်း ၎င်းက ဆက်ပြောသည်။

တခါးယာဉ်ရွာတွင် စစ်စရိတ်အပြင် ပြီးခဲ့သည့်လများတွင် ဒရုန်းဖိုး၊ ကားဖိုး၊ စစ်သားဝတ်စုံဖိုး၊ ဖိနပ်ဖိုး စသည့် ခေါင်းစဉ် အမျိုးမျိုးတပ်ပြီး လစဉ် သိန်းဂဏန်း ကောက်ခံနေကြောင်း ဒေသခံများက ပြောသည်။

တခါးယာဉ်ရွာသည် တိုက်ပွဲ ဖြစ်ပွားခဲ့သည့် ဆောင်းပြောင်း ကျေးရွာနှင့် ကပ်ရပ်ရှိပြီး ကျေးရွာရှိ လူငယ် အားလုံးလည်း PNO တပ်သားအဖြစ် ဝင်ခဲ့ရကြောင်း ဒေသခံများက ဆိုသည်။

နမ်းနိန်း၊ တောင်မဲသင်း၊ တောင်စလုံးဖက် တိုက်ပွဲ ဖြစ်ပွားသည့် အချိန်တွင်လည်း တခါးယာဉ်ရွာတွင် PNO တပ်များက လက်နက်ကြီး အထိုင်ချ ပစ်ခတ်နေသည့်အပြင် ‌ရွာခံများ၏ နေအိမ်ထဲလည်း ဝင်ရောက် နေထိုင်လျက် ရှိကြောင်း ၎င်းတို့က ပြောသည်။

#ပင်လောင်း
#တခါးယာဉ်
#ကျည်ဖိုး

30/12/2025

ပင်လောင်းတွင် နှင်းရိုက်ပြီး ငရုတ် ဧက ၂ ထောင်‌နီးပါး ပျက်စီး

မဲခေါင်၊ ဒီဇင်ဘာ ၃၀

ရှမ်းပြည်တောင်ပိုင်း၊ ပင်လောင်းမြို့နယ်နှင့် ပေါင်းလောင်းဒေသ၌ တောင်သူများ စိုက်ပျိုးထားသော ကုလားအော် ငရုတ်သီးခြံများသည် နှင်းရိုက်ခြင်းကြောင့် ဧက ၂ ထောင်နီးပါး ပျက်စီးခဲ့ကြောင်း ဒေသခံများထံမှ သိရသည်။

ပင်းလောင်းမြို့နယ်တွင် ဒီဇင်ဘာ ပထမပတ်ကတည်းက နှင်းကျနေပြီး နှင်းရည်ထိခြင်းကြောင့် ငရုတ်ပင် သေသွားခြင်း၊ အသီးဖြူသွားခြင်း၊ အသီးကြွေသွားခြင်းတို့နှင့် ကြုံနေရကြောင်း ဒေသခံများက ပြောသည်။

" ဒီနှစ်က နှင်းကျများတယ်။ အရမ်းလည်း အေးတယ်။ အရင်နှစ်က အမြင့်ပိုင်းဆို နှင်းမရောက်ဘူး။ ခုနှစ်က နှင်းမကျဖူးတဲ့ တောင်ပေါ် တွေအထိပါ ရောက်တာ။ နှင်းမရောက်ဘူး ထင်ပြီး ငရုတ်သီး စိုက်ထားတဲ့ နေရာတွေပါ နှင်းကျနေတော့ ခြံအများကြီးပဲ ပျက်စီးသွားတယ်။ နှင်းရည်ထိပြီဆို ငရုတ်သီးပင်က ချက်ချင်းပဲ ညှိုးပြီး ခြောက်သွား တယ်။ အသီးတွေလည်း ဖြူကုန်တယ်။"ဟု တောင်သူတစ်ဦးက မဲခေါင်သို့ ပြောသည်။

ပြီးခဲ့သည့်နှစ်တွင် ကုလားအော်ငရုတ်သီး နေလှန်းပြီးသား တစ်ပိဿာ ၅ သောင်းကျပ် ရရှိသော်လည်း ယခုနှစ်တွင် ၂ သောင်းဝန်းကျင်သာ ရှိကြောင်း တောင်သူတစ်ဦးက ပြောသည်။

"ဒီနှစ်က ဈေးမရှိဘူး။ အရင်နှစ်ဆို ငရုတ်သီး ၂ ပိဿာလောက်ရောင်းရင် ဆန်တစ်အိတ်ရပြီး ခုနှစ်က ၅ ပိဿာလောက်ရောင်းမှ ဆန်တစ်အိတ်ရတာ။ ကုန်ဈေးနှုန်းလည်း ကြီးတယ် ဆန်တစ်အိတ်ကို တစ်သိန်းတောင် ရှိတယ်။ ငရုတ်သီး ပျက်စီးသွားတာ တစ်ဖက်၊ ဈေးမရှိတာ တစ်ဖက်နဲ့ဆို‌တော့ တောင်သူတွေ စားဝတ်နေရေး ခက်ခဲကြတယ် အဆင်မပြေကြဘူး"ဟု အခြား တောင်သူတစ်ဦးက မဲခေါင်သို့ ပြောသည်။

ပင်လောင်းမြို့နယ်တွင် နန်းပန်းကျေးရွာ၊ ဇာဂကျေးရွာ၊ တောင်ထီဗွာကျေးရွာ၊ ရင်းမှီးကျေးရွာ၊ နောင်ပီးကျေးရွာ၊ ဥ‌ဆောင်ကျေးရွာနှင့် ပေါင်းလောင်း‌ဒေသတို့တွင် ကုလားအော်ငရုတ် အများဆုံး စိုက်ပျိုးကြကြောင်း ဒေသခံ များထံမှ သိရသည်။

#ပင်လောင်း
#နှင်းရိုက်
#ငရုတ်
#ပျက်စီး

28/12/2025

တောင်ကြီးတွင် မဲစာရင်းပါသူ ၁၇၅၀၀၀ ကျော် (၄၈ ရာခိုင်နှုန်း) မဲလာမပေး

မဲခေါင်၊ ဒီဇင်ဘာ ၂၈

အတုအယောင်ရွေးကောက်ပွဲဟု နိုင်ငံတကာက သတ်မှတ်သည့် စစ်ကောင်စီ၏ ရွေးကောက်ပွဲပထမပိုင်းတွင် တောင်ကြီးမြို့ရှိ မဲစာရင်းပါသူ ၁၇၅၀၀၀ (တစ်သိန်း၇သောင်း၅ထောင်) ကျော်မှာ မဲလာမပေးခဲ့ကြောင်း မဲခေါင်သတင်းဌာနက စုံစမ်းသိရသည်။

တောင်ကြီးမြို့နယ်အတွင်း မဲစာရင်းပါသူ ဦးရေမှာ ၃၅၉၇၀၀ ကျော်ရှိသည့်အနက် ၁၈၄၇၀၀ ကျော်သာ မဲပေးကြပြီး ၁၇၅၀၀၀ ကျော်မှာ မဲလာမပေးခြင်းဖြစ်သည့်အတွက် မဲစာရင်းပါသူ ၄၈ ရာခိုင်နှုန်းခန့်မှာ မဲလာမပေးခြင်းဖြစ်သည်။

အချို့မဲစာရင်းတွင် မပါသည့်အတွက် မဲမပေးရသူအရေအတွက်မှာလည်း ထောင်ဂဏန်းရှိကြောင်းသိရသည်။

တောင်ကြီးမြို့မှ မဲရုံများကို နံနက် ၆နာရီမှာ ည ၇နာရီအထိ ဖွင့်လှစ်ထားကြောင်း သိရသည်။

ရှမ်းပြည်အတွင်းရှိ အခြားမြို့နယ်များတွင်လည်း မဲပေးသူနည်းပါးသည့်အတွက် မဲရုံများမှ တစ်နာရီခြားတစ်ခါ မဲလာပေးရန် ဆော်ဩနေကြောင်း ဒေသခံများက ပြောသည်။

စစ်ကောင်စီမှာ ရွေးကောက်ပွဲကို မဖြစ်ဖြစ်အောင် လုပ်ယူသော်လည်း နိုင်ငံရေးအင်အားစုများ အားလုံးမပါဝင်ခြင်း၊ လူထုခေါင်းဆောင် ဒေါ်အောင်ဆန်းစုကြည်အပါအဝင် မတရားအကျဉ်းချခံထားရသည့် နိုင်ငံရေးအကျဉ်းသားများ အများအပြားရှိနေခြင်း၊ နိုင်ငံအနှံတွင် ရွာမီးရှို့၊ လေကြောင်းဗုံးကြဲမှုများ ပြုလုပ်နေခြင်းကြောင့် နိုင်ငံတကာက အတုအယောင် ရွေးကောက်ပွဲဟု သတ်မှတ်ထားခြင်းဖြစ်သည်။

#တောင်ကြီး
#အတုအယောင်ရွေးကောက်ပွဲ
#မဲစာရင်း

28/12/2025

Cherry blossoms are blooming again—
Soft pink, just as I remember.
They lean toward the wind,
Unaware I am far away.

I do not walk beneath them now,
Yet my heart still knows the path.
From a distance,
I love my home quietly,
Like blossoms falling
Into someone else’s winter.

ချယ်ရီပန်းတွေက အရင်အတိုင်း
အေးဆေးတည် ငြိမ်စွာ ဖူးပွင့်နေဆဲပဲ..
ငါအဝေးတနေရာ ရောက်နေတယ်ဆိုတာ
သူတို့ မသိကြပါဘူး..

အခုတော့
ချယ်ရီပန်းပင်တွေအောက်မှာ မရပ်နိုင်တော့ပေမယ့်..
စိတ်ထဲမှာတော့
ချယ်ရီလမ်း လေးကို မမေ့ဘူး..

တပါးသူရဲ့ ဆောင်းရက်တွေထဲမှာ
ချယ်ရီပန်းတွေ ဖူးပွင့်နေချိန်
ငါကတော့
ဝေးဝေးကနေ
ဇာတိမြေကို
တိတ်တဆိတ် ချစ်နေဆဲ…

Photo Credit - ချစ်ခင်လေးစားရသောအစ်ကိုတစ်ယောက်

#ချယ်ရီပန်း #ချယ်ရီပန်းမခူးရ
#ချယ်ရီပန်းအကိုင်းခက်များမချိုးရ
#ချယ်ရီပင်လေးတွေကိုချစ်ကြမယ်
#တောင်ကြီးမြို့
#တောင်ကြီးသူ
#သဘာ၀ပတ်၀န်းကျင်ထိန်းသိမ်းကြမယ်
#သဘာ၀ပတ်၀န်းကျင်ကိုကာကွယ်ကြမယ်

27/12/2025

နမ့်စန်တွင် ဆိုင်ကယ်သူခိုးကို ပြည်သူများ ဝိုင်းဖမ်း

မဲခေါင်၊ ဒီဇင်ဘာ ၂၇

ရှမ်းပြည်တောင်ပိုင်း၊ နမ့်စန်မြို့နယ်၊ (၃) ရပ်ကွက်တွင် ဆိုင်ကယ် သူခိုးတစ်ဦးအား ရပ်ကွက်နေ ပြည်သူများက ဝိုင်းဝန်း ဖမ်းဆီးနိုင်ခဲ့ကြောင်း သတင်းရင်းမြစ်များထံမှ သိရသည်။

ဒီဇင်ဘာ ၂၅ ရက်တွင် ၎င်းက ရပ်ကွက်နေသူတစ်ဦး၏ ဆိုင်ကယ်ကို ခိုးယူပြီး‌ မောင်းနှင်ထွက်ပြေးစဉ် ရပ်ကွက်နေသူများက ဝိုင်းဝန်း ဖမ်းဆီးလိုက်ခြင်း ဖြစ်ကြောင်း သိရသည်။

“မနက်ကတည်းက ဆိုင်ကယ်မှာ ရစ်သီရစ်သီလုပ်ပြီး ကြည့်နေတာ။ ပြီးတော့ ဆိုင်ကယ် ဇက်သော့ချိုးပြီး မောင်းပြေးတဲ့အချိန် ပိုင်ရှင်ကအော်လို့ ရပ်ကွက်ကလူတွေ ဝိုင်းဖမ်းလိုက်တာဗျ”ဟု နမ့်စန်ဒေသခံတစ်ဦးက ပြောသည်။

လက်ရှိတွင် ဖမ်းမိသည့် ဆိုင်ကယ်သူခိုးကို ရဲလက် အပ်လိုက်ပြီဟု ဒေသခံ သတင်းရင်းမြစ်က ပြောသည်။

“ဆိုင်ကယ်သူခိုးကို ဖမ်းမိတော့ သူခိုးက ရဲလက်မအပ်ပါနဲ့၊ မကြိုက်ရင် နောက်မလာပါဘူးတဲ့ အဲလို ပြောသေးတယ်ဗျ။ သူခိုးကို ဖမ်းမိပေမယ့် ရိုက်လည်းမရိုက်ဘူး ကြိုးနဲ့လည်း မချည်ဘူး။ ဖမ်းပြီး ရဲကို ခေါ်အပ်လိုက်တယ်။ နမ့်စန်မှာ ဆိုင်ကယ်က ခဏခဏ ပျောက်နေတယ်၊ ကျနော့ဆိုင်ကယ်လည်း ပျောက်တာ ၂ လပဲ ရှိသေးတယ်ဗျ။ ကျွန်တော်တို့ ရပ်ကွက်မှာကိုပဲ ပျောက်တာ အစီး ၂၀ ကျော်ပြီ”ဟု နမ့်စန်မြို့ခံတစ်ဦးက ပြောသည်။

စစ်အာဏာ သိမ်းပြီးနောက် ရှမ်းပြည်တွင် ခိုးဆိုး လုယက်မှုများ ယခင်ထက် ပိုများပြားလာကာ အချို့သူခိုးများက အဖွဲ့လိုက်လှုပ်ရှားပြီး ဆိုင်ကယ်များသာမက ကားများကိုပါ ခိုးယူနေကြသည်။

#နမ့်စန်
#ဆိုင်ကယ်သူခိုး
#ပြည်သူများ
#ဝိုင်းဖမ်း

27/12/2025

PNO ရွာလုံးကျွတ် မီးရှို့ခဲ့သည့် လီဆူ တိုင်းရင်းသားကျေးရွာ ပြန်တည်ထောင်ခွင့် မရသေး

မဲခေါင် ၊ ဒီဇင်ဘာ ၂၇

စစ်ကောင်စီ လက်အောက်ခံ PNO ပြည်သူ့စစ်က ရွာလုံးကျွတ် မီးရှို့ ဖျက်ဆီးလိုက်သည့် လီဆူ တိုင်းရင်းသားများ နေထိုင်သော တောင်စိန်ကျေးရွာအား ယနေ့အထိ ပြန်လည် တည်ထောင်ခွင့် မရသေးကြောင်း သတင်းရင်းမြစ်များထံမှ သိရသည်။

ညောင်ရွှေမြို့နယ်၊ ဘန်းပြင်ကျေးရွာအုပ်စု၊ တောင်းစိန်ကျေးရွာကို ၂၀၂၄ ခုနှစ်၊ ဖေဖော်ဝါရီတွင် PNO က သစ္စာဖောက်များ၏ ကျေးရွာဟု စွပ်စွဲကာ ရွာလုံးကျွတ် မီးရှို့ဖျက်ဆီးခဲ့ခြင်း ဖြစ်သည်။

လီဆူ တိုင်းရင်းသားများသာ နေထိုင်သည့် အိမ်ခြေ ၃၀ ခန့်သာရှိသော ယင်းကျေးရွာသည် ပြောင်းစိုက်ခြင်းနှင့် ဆန်အရက် ချက်ခြင်းဖြင့်သာ အသက်မွေးဝမ်းကြောင်း ပြုနေသည့် ရွာဖြစ်သည်။

“တချိုက ရွာကို ပြန်တည်ထောင်ချင်တယ်၊ PNO တွေက ခွင့်မပြုဘူး။ ရွာထဲမှာ အကောင်းတိုင်း ကျန်တာဆိုလို့ စာသင်ကျောင်းပဲ ရှိတော့တယ်။ ကျန်တဲ့အိမ်တွေကို သူတို့ အကုန်လုံးမီးရှို့ကုန်တယ်၊ ပစ္စည်းတွေလည်း PNO တွေ အကုန်လုံးယူသွားတယ်။ ကျနော်တို့ရွာကို သစ္စာဖောက်ရွာတဲ့ PDF တွေကို ကူမတိုက်လို့တဲ့ ကျွန်တော်တို့က လူနည်းစုလေးပါဗျာ။ PDF တွေနဲ့လည်း အဆက်အသွယ်မရှိဘူး။ ရွာမှာက ပညာတတ်တွေလည်း မရှိဘူး။ ပြောင်းစိုက်၊ ဝက်မွေး၊ ဆန်အရက် ချက်ရောင်းတာပဲ သိတဲ့သူတွေပါ”ဟု တောင်စိန် ဒေသခံတစ်ဦးက ပြောသည်။

ယင်းကျေးရွာသည် တိုက်ပွဲ ဖြစ်ပွားဖူးသည့် နေရာလည်း မဟုတ်သကဲ့သို့ တိုက်ပွဲဧရိယာအတွင်းရှိ ကျေးရွာလည်း မဟုတ်ပေ။

သို့သော် PNO ကောက်ခံသည့် ဆက်ကြေးများကို အပြည့်အဝ မထည့်နိုင်သဖြင့် ရွာဖျက်ဆီးခံရခြင်း ဖြစ်ကြောင်း နောက်ထပ် ဒေသခံတစ်ဦးက ပြောသည်။

“ရွာကဆင်းရဲတော့ သူတို့ အခွန်ကောက်တာကို တစ်ခါတလေမှာ အပြည့်မထည့်နိုင်တာ ရှိတယ်။ အဲ့ဒါကို အငြိုးဖွဲ့ပြီး သစ္စာဖောက်တယ်တို့ PDF ကို အားပေးတယ်တို့ စွပ်စွဲပြီး ဖျက်ဆီးလိုက်တာလေ။ ရှမ်းရွာ၊ ပအိုဝ်းရွာ တွေဆို ရွာပျက်တဲ့အထိ သူတို့မလုပ်ရဲဘူး။ အခုက လီဆူရွာဆိုတော့ သူတို့ကို ပြန်မလှန်နိုင်မှန်း သိတော့ ဖျက်ဆီးလိုက်တာ နေမှာပေါ့”ဟု အခြား ဒေသခံတစ်ဦးကလည်း ဆိုသည်။

တောင်စိန်ကျေးရွာသည် ဆင်းရဲနွမ်းပါးသည့် ရွာဖြစ်သည့်အပြင် ပညာတတ် ဘွဲ့ရလည်းတစ်ဦးမှ မရှိကြောင်း PNO စွပ်စွဲသကဲ့သို့ တော်လှန်ရေးတွင် ပါဝင်နေသူလည်း တစ်ဦးမှ မရှိသည့်အပြင် တစ်ရွာလုံး ဝက်မွေး၊ ပြောင်းစိုက်၊ အရက်ချက်ခြင်းသာ လုပ်တတ်သူများ ဖြစ်ကြောင်း ၎င်းက ပြောသည်။

PNO က ယင်းကျေးရွာကို ဖျက်ဆီးလိုက်သဖြင့် ဒေသခံ လီဆူ တိုင်းရင်းသားများသည် အခြားဒေသရှိ လီဆူ ကျေးရွာများ၊ တောင်ကြီးနှင့် ဖယ်ခုံဘက်သို့ တကွဲတပြားစီ ထွက်ပြေး ခိုလှုံခဲ့ရသည်မှာ ယနေ့ထိတိုင်ဖြစ် သည်။

#ရွာလုံးကျွတ်
#မီးရှို့
#လီဆူ

27/12/2025

ဟိုပုံးဈေးတွင် ဖုန်းလုသည့် အမျိုးသမီးတစ်ဦးအား ဈေးသည်များ ဝိုင်းဖမ်းသော်လည်း စည်ပင် ပြန်လွှတ်ပေး

မဲခေါင်၊ ဒီဇင်ဘာ ၂၇

ရှမ်းပြည်တောင်ပိုင်း၊ ဟိုပုံးမြို့ဈေးတွင် ဖုန်းလုသော အမျိုးသမီးတစ်ဦးကို ဈေးသည်များက ဝိုင်းဖမ်းပေးခဲ့သော် လည်း စည်ပင်က လာခေါ်ပြီး ပြန်လွှတ်ပေးခဲ့ကြောင်း ဒေသခံများထံမှ သိရသည်။

ဒီဇင်ဘာ ၂၃ ရက် တွင် ယင်းအမျိုးသမီးသည် ဟိုပုံးဈေးထဲတွင် ၂ ကြိမ် ဖုန်းလုယက်ပြီး ဒုတိယအကြိမ်တွင် ဈေး သည်များက ဝိုင်းဖမ်းမိခြင်းဖြစ်ကြောင်း ဆိုသည်။

"ပထမတစ်ခေါက်က ကလေးငယ် လက်ထဲလုပြေးတာ ဒုတိယတစ်ခေါက်ကျ ဈေးလာသူရဲ့ ဖုန်းကို လုပြေးတော့ လုခံရသူလည်း အော်ပြီး ဈေးသည်တွေ ဝိုင်းဖမ်းတာ။ ဖုန်းလုတဲ့သူက အမျိုးသမီးနော်၊ အသက် ၅ နှစ် ဝန်း ကျင် ကလေးတစ်ယောက်လည်း ပါ‌သေးတယ်။ အရမ်းရဲတင်းတာ ဟိုပုံးဘက်က လူလည်း မဟုတ် ဘူး"ဟု မျက်မြင်တစ်ဦးက မဲခေါင်သို့ ပြောသည်။

ယင်းအမျိုးသမီးကို ဟိုပုံးစည်ပင်က လာရောက်ခေါ် ဆောင်သွားပြီး အရေးမယူဘဲ ပြန်လွှတ်ပေးခြင်းကြောင့် မြို့ ခံများက ဝေဖန်နေကြသည်။

ဟိုပုံးမြို့နယ်တွင် စစ်အာဏာသိမ်းပြီးနောက် ခိုးဆိုး လုယက်မှုများ မကြာခဏ ဖြစ်နေကြောင်း ဒေသခံများက ပြောသည်။

#ဟိုပုံး
#ဖုန်းလု
#အမျိုးသမီး
#စည်ပင်
#ပြန်လွှတ်

26/12/2025

တရုတ်မှ အာလူးကို လာဘ်စားပြီး သွင်းခွင့်ပြုသဖြင့် ရှမ်းတောင်ထွက် အာလူးဈေးမရ

မဲခေါင်၊ ဒီဇင်ဘာ ၂၆

တရုတ်ပြည်မှ တင်ပို့လာသော အာလူးများကို ရပ်စောက်မြို့နယ်ရှိ စစ်ကောင်စီနှင့် လက်နက်ကိုင် စစ်ဆေးရေးဂိတ်များက လာဘ်စားပြီး တင်သွင်းခွင့်ပြုနေသဖြင့် ရှမ်းတောင်ထွက် အားလူးများ ဈေးမရဘဲ ဖြစ်နေကြောင်း သတင်းရင်းမြစ်များထံမှ သိရသည်။

ယခု ဒီဇင်ဘာလအတွင်း ရပ်စောက်မြို့နယ်တွင် တရုတ်မှ ဝင်လာသော စီးရေဆယ်ချီသည့် အားလူးကားများကို ဂိတ်များက တားဆီးသော်လည်း လာဘ်စားပြီး ပြန်လွှတ်ပေးခဲ့ကြောင်း ဒေသခံများက ပြောသည်။

"တရုတ်အာလူး တွဲကားအပြည့်နဲ့ ရပ်စောက်ဘက် ခုအရက်ပိုင်း ဆယ်စီးမက ဝင်လာတယ်။ စစ်ဆေးရေးဂိတ်တွေကလည်း တားပြီး လာဘ်ငွေနဲ့ ပြန်လွှတ်ကြတာပဲ။ အဲဒီ အာလူးကားတွေ PNO ဂိတ်တွေမှာ တားခံရမှာစိုးလို့ ဂိတ်ကျော်တဲ့အထိ အောင်ပန်းဘက် ရောက်တဲ့အထိ SSPP တပ်သားတွေက လိုက်ပို့ပေးတာ။ "ဟု သတင်းရင်းမြစ်တစ်ဦးက မဲခေါင်သို့ ပြောသည်။

ပြည်တွင်းတွင် အာလူးအသစ် ပေါ်ချိန် ရှမ်းပြည်စစ်ကောင်စီ အနေဖြင့် တရုတ်ဘက်မှ တရားမဝင် အာလူး တင်သွင်းလာခြင်းကို ထိန်းကျောင်းပေးရန်နှင့် ဈေးကွက်သစ် ရှာပေးရန် လိုအပ်ကြောင်းလည်း ရှမ်းတောင်ရှိ တောင်သူများက တောင်းဆိုသည်။

"တရုတ်ပြည်ဘက်က ကျမတို့ထက် ထွက်ရှိချိန် စောတယ်၊ ပြီးတော့ ဥကြီးတယ်။ ဈေးလည်းချိုတယ်၊ ကျမတို့ ဘက်ကျတော့ သူတို့ဘက်ထက် ပိုသေးတယ်၊ ဒါတွေ မယှဉ်နိုင်ဘူးပေါ့။ ခုတော့ ပိုက်ဆံလိုတဲ့ တောင်သူက အရှုံးနဲ့ ရောင်းရတယ်။ တချို့ကျတော့ ဈေးရှိမှာစောင့်ရင်း သိုလှောင်ထားကြတယ်"ဟု တောင်သူတစ်ဦး က မဲခေါင်သို့ ပြောသည်။

အလားတူပင် တရုတ်ပြည်မှ ဝင်လာသော ကြက်သွန်ဖြူတွဲကား များစွာကိုလည်း ရပ်စောက်ဂိတ်ရှိ စစ်သားများက ပိုက်ဆံယူပြီး လွှတ်ပေး‌နေကြောင်း သတင်းရင်းမြစ်များထံမှ သိရသည်။

ယခုနှစ်တွင် သွင်းအားစု အဆမတန်စျေးတက်ပြီး အရင်းနှီးကြီးကာ အာလူးပေါ်ချိန်တွင် စျေးမရရှိခြင်းကြောင့် တောင်သူများ အရှုံးဖြင့်သာ ရင်ဆိုင်နေရကြောင်း ဒေသခံများက‌ ပြောသည်။

ယခင်နှစ်တွင် အာလူးတစ်ပိဿာ ၆ ထာင်၊ ၇ ထောင်ကျပ် အထိရရှိသော်လည်း ယခုနှစ်တွင် ၂ ထာင်ကျပ် ဝန်းကျင်သာရှိကြောင်း အောင်ပန်းကုန်စိမ်းဒိုင်မှ သိရသည်။

#တရုတ်
#အာလူး
#လာဘ်စား
#ရှမ်းတောင်

Cherry News - ချယ်ရီ သတင်းစဉ်

03/01/2026

31/12/2025

30/12/2025

30/12/2025

30/12/2025

30/12/2025

28/12/2025

28/12/2025

27/12/2025

27/12/2025

27/12/2025

26/12/2025

Address

Website

Alerts

Shortcuts

Share