17/11/2024
ၵႃးလုၵ်ႉတီႈပွႆးႁူင်းၾႆးမိၼ်တူၼ်ႈတီးပွၵ်ႈႁိူၼ်း မိူဝ်းပဵၼ်ၽေးၵိုင်ႉၵၢင်ႉ လုတၢႆ 3 ၵေႃႉ
16/ 11/ 2024
ဝၼ်းထီႈ 16/ 11/ 2024 မိူဝ်ႈၼႆႉ ယၢမ်းၵၢင်ၼႂ်ၸဝ်ႉ ၵႃးလမ်းၼိုင်ႈ ဢၼ်ၵႂႃႇတူၺ်းပွႆးႁူင်းၾႆးမိၼ်တီႈဝဵင်းတူၼ်ႈတီးေသ ပွၵ်ႈမိူဝ်းၶိုၼ်း ၼၼ်ႉ ၵႂႃႇၽႃႇၺႃ းၵႃးလူင် ဢၼ်ၵိုတ်းဝႆႉႁိမ်းတၢင်းလႄႈ ၼၢင်းယိင်း 3 ၵေႃႉ ဢၼ်ၶီႇမႃးၼိူဝ်ၵႃး လႆႈလုသဵင်ႈၵႂႃႇ ၼႆယဝ်ႉ ။
ၵူၼ်းၼႂ်းပိုၼ်ႉတီႈ လၢတ်ႈၵႂႃႇတီႈၶၢဝ်ႇ တီႇဝီႇပီႇဝႃႈ - မိူဝ်ႈၼႆႉယၢမ်းၵၢင်ၼႂ်မွၵ်ႈ 3 မူင်း ပဵၼ် ၽေးၵိုင်ႉၵၢင်ႉၵႃးၽႃႇ တီႈၽၢႆႆႇၼိူဝ်ၽၵ်းတူၵိၵ်ႉ တပ်ႉ ဢွင်ႇသပေႇ 222 ။ ၵူၼ်းဢၼ်ၶီႇမႃးၸွမ်းၵႃး Canter မီး 10 ၵေႃႉ ။ ၼႂ်းၼၼ်ႉ တႃႇၵေႃႉၼိုင်ႈ တၢႆထင်တီႈသေ ထႅင်ႈ 9 ၵေႃႉ လႆႈတိူဝ်ႉမၢတ်ႇၸဵပ်းႁႅင်း ။ မိူဝ်ႈၵႂႃႇထိုင်တီႈႁူင်းယႃသမ်ႉ လုၵႂႃႇထႅင်ႈ 2 ၵေႃႉ ။
ဢၼ်လုတၢႆၼၼ်ႉ ပဵၼ်ၼၢင်းယိင်းတင်း 3 ၵေႃႉ ဢႃယုမီးမွၵ်ႈ 25 ပီႊ ၸိုဝ်ႈႁွင်ႉ ၼၢင်းဝိၼ်းယီႇ ၊ ၼၢင်းထူး ႄလႈ ၼၢင်းၸၼ်ႇတႃႇဢွင်ႇ ယူႇဝၢၼ်ႈသူၺ်ႇပူင်ႇတႃႇ ဝဵင်းလွၵ်ႉၸွၵ်ႇ ။
ဢူၺ်းၵေႃႉၶဝ်ၵေႃႉၼိုင်ႈလၢတ်ႈဝႃႈ - “ မိူဝ်ႈၵႂႃႇတႄႉ ပဵၼ်တႃႇသိူဝ်းၸႂ် ၊ မိူဝ်ႈမႃးၶိုၼ်းတႄႉ ပဵၼ်ၶၢဝ်းတၢင်းပွၵ်ႈလိုၼ်းသုတ်းၶဝ်ပႅတ်ႈ ၊ ယိၼ်းမွင်ၸႂ် ၼႃႇ ၼႆယဝ်ႉ ။
ၽၢႆႇၸွႆႈထႅမ်ၵူၼ်းထူပ်းၽေးၶဝ်ၵေႃႈလၢတ်ႈဝႃႈ ၼႂ်းၵႃႈဢၼ်မၢတ်ႇၸဵပ်းၼၼ်ႉၵေႃႈ တႃႇ 4 ၵေႃႉၼၼ်ႉ ၶႂ်ႈၼႃႇႁႅင်းဝႆႉ ၊ လီမႆႈၸႂ် ၊ တေႃႈလဵဝ်တႄႉ တိုၵ်ႉယူတ်းယႃယူႇ ၼႆယဝ်ႉ ။
ၵူၼ်းၼႂ်းပိုၼ်ႉတီႈလၢတ်ႈဝႃႈ တီႈပွႆးႁူင်းၾႆးမိၼ် လိူၼ်သိပ်းသွင် ဝဵင်းတူၼ်ႈတီးၼႆႉ ယင်းမီးထႅင်ႈ ၽေးၵိုင်ႉၵၢင်ႉ လူတ်ႉၶိူင်ႈသႅင်ႇႄၵႇ ၊ လူတ်ႉ ၵႃးသေဢမ်ႇၵႃး မၢင်ၸိူဝ်း ၽိတ်းၽႅၵ်ႇမေႃးႄမးမင်ႁူဝ်ၵၼ် ၊ ၵမ်ႈၽွင်ႈသမ်ႉ ၵူၼ်းၽိုတ်ႉၵၼ်ၼႃႇလႄႈ ဢဝ်မဝ်းလူမ်ႉၵႂႃႇၵေႃႈမီး ၊ ဢၼ်ၶႆႇၾႆးတီႈႁူင်းၾႆးမိၼ် သဵၼ်ၽူင်ႉသႂ်ႇလႄႈ မၢတ်ႇၸဵပ်းၵေႃႈမီး ၊ ၵူၼ်းမၢတ်ႇၸဵပ်းၽွင်းပွႆးၼႆႉ ဢမ်ႇယွမ်း 70 ၼႆယဝ်ႉ ။
Source # DVB
Photo # DVB
![ႁၢင်ႈၽၢင်ႁိူၼ်းတႆးဝၢၼ်ႈၼွၵ်ႈၼႃးပၢင်ႇဢွၼ်ႇမိူင်းၸိုင်ႈတႆး========photo from-jao sirithamma[ၸဝ်ႈဝဵင်းဢိၼ်း]](https://img4.medioq.com/751/722/579864857517221.jpg)
