24/07/2025
कोशीमा २६ हजार किलोग्राम गाँजा वरामद,१७ लाख गाँजाको बोट नष्ट ,
कोशीमा २६ हजार किलोग्राम लागूऔषध गाँजा वरामद गरेको छ। आर्थिक बर्ष २०८१/०८२ मा २६ हजार ७०५ किलोग्राम भन्दा बढी लागूऔषध गाँजा वरामद गरेको जनाएको छ।
प्रहरीले चेकजाँचमा कडाई गरेकै कारण बिरामी बोक्ने एम्बुलेन्स, नक्कली सरकारी नम्बर प्लेट लगाएको सवारी साधन, तरकारी बोक्ने गाडी, मोटरसाईकल लगायत साना ठुला सवारी साधनमा लुकाएर र कोशी नदीमा पानीमा बगाएर तथा जमिन मुनी गाडेर लुकाई छिपाई गरिने लागू औषध गाँजाको ओसार पसार, कारोवार समेतलाई बिशेष सुचना तथा अनुसन्धानको आधारमा बरामद गर्न सफल भएको कोशी प्रदेश प्रहरी कार्यालय बिराटनगरले जनाएको छ ।
बढ्दो लागू औषध गाँजाको ओसारपसार तथा वेचबिखनलाई नियन्त्रण गर्न आक्रमकरुपमा परिचालन भएको प्रहरी टोलीले यस आर्थिक बर्षमा जिल्ला प्रहरी कार्यालय सुनसरीले १२ हजार ३७५ किलो ९२९ ग्राम, जिल्ला प्रहरी कार्यालय मोरङले ६ हजार ६५० किलो ४०० ग्राम, जिल्ला प्रहरी कार्यालय धनकुटाले ४ हजार १९४ किलो ३०० ग्राम, जिल्ला प्रहरी कार्यालय उदयपुरले १ हजार ८१० किलो ४८४ ग्राम वरामद गरेको कोशी प्रदेश प्रहरी प्रवक्ता तथा प्रहरी उपरीक्षक दिपक पोखरेलले जानकारी दिए।
प्रवक्ता तथा प्रहरी उपरीक्षक पोखरेलका अनुसार जिल्ला प्रहरी कार्यालय झापाले १ हजार ६५१ किलो २८२ ग्राम सहित बिभिन्न प्रहरी कार्यालयबाट परिचालित प्रहरी टोलीले जम्मा २६ हजार ७०५ किलो ५३८ ग्राम ९७ मि.ग्राम गाँजा बरामद गरेको छ भने बेचबिखन तथा ओसार पसारमा संलग्न रहेका १ सय ६५ जना पुरुष र २४ जना महिला सहित ओसार पसारमा प्रयोग भएको ३१ वटा चारपाङ्ग्रे सवारी साधन र ७५ वटा दुईपाङ्ग्रे सवारी साधन नियन्त्रणमा लिएको छ ।
यस्तै,खेतबारीमा आफै उम्रेका तथा लगाएको गाँजाको बोट तथा बेर्नाहरु नष्ट गर्ने क्रममा जिल्ला प्रहरी कार्यालय धनकुटाले १२ लाख ५९ हजार बोट तथा बेर्ना, भोजपुरले २८ लाख ४६ हजार बोट तथा बेर्ना, उदयपुरले १६ लाख ८ हजार ५ सय बोट तथा बेर्ना, सोलुले २९ हजार ७ सय बोट तथा बेर्ना, खोटाङले २६ हजार २ सय बोट तथा बेर्ना सहित बिभिन्न प्रहरी कार्यालयबाट परिचालित प्रहरी टोलीले जम्मा २ हजार ४ सय ६४ रोपनी क्षेत्रफलमा लगाएको १७ लाख ७२ हजार भन्दा बढी गाँजाको बोट तथा बेर्नाहरु नष्ट गरेको प्रहरीले सार्वजनिक गरेको बार्षिक प्रतिवेदनमा उल्लेख गरिएको छ।
प्रहरीले कोशी प्रदेशमा लागूऔषध गाँजाको प्रयोग, बेचबिखन, ओसारपसारलाई नियन्त्रण गर्न तथा ओसारपसारमा संलग्न व्यक्तिहरुलाई कडाईका साथ कानूनी दायरामा ल्याउदै आएको छ । लागू औषध गाँजाको ओसार पसार,वेचविखन तथा गाँजाको बोट र बेर्ना नष्ट गर्ने कार्यमा प्रहरीलाई साथ र सहयोग प्रदान गर्न हुन तथा त्यस्ता कार्य भए गरेको थाहा पाएमा नजिकको प्रहरी तथा प्रहरी कन्टोलको नम्वर १०० मा फोन गरी सूचना दिन पनि अनुरोध गरेको छ।
