01/07/2025
မြန်မာဖုန်းနံပါတ်တွေကို Google အတည်ပြုကုဒ် ချမပေးတော့ပေမယ့် Google Service တွေ ပုံမှန်အတိုင်းအသုံးပြုနိုင်
ဇူလိုင် ၁ - ၂ဝ၂၅
KKO(VOM)
မြန်မာဖုန်းနံပါတ်တွေဆီ Google ကနေ အတည်ပြုကုဒ်မချပေးတော့ပေမယ့် ယခင်အကောင့်ဟောင်းတွေနဲ့ Google Service တွေကိုပုံမှန်အတိုင်းအသုံးပြုလို့ရမယ်လို့ မြန်မာ နိုင်ငံသားအိုင်တီပညာရှင်တွေက ပြောပါတယ်။
ပြီးခဲ့တဲ့ရက်ပိုင်းတွေကစလို့ လူမှုကွန်ရက်အွန်လိုင်းပေါ်မှာ မြန်မာဖုန်းနံပါတ်တွေဆီ Google ကနေ အတည်ပြုကုဒ်မချပေးတော့ဘူးဆိုတဲ့ သတင်းတွေထွက်ပေါ်လို့လာခဲ့တာဖြစ်ပါတယ်။
"တချို့ဖုန်းတွေမှာ Google ကုဒ်တွေမကျတော့တာမှန်ပါတယ်။ဟိုတလောတုန်းက တော့ရသေးတယ်၊ဒါပေမဲ့ ယခင်အကောင့်ဟောင်းတွေနဲ့ Google Service တွေကိုအခုအချိန်အထိ မြန်မာမှာအသုံးပြုလို့ရနေပါသေးတယ်"လို့ မြန်မာနိုင်ငံသားအိုင်တီပညာရှင်တယောက်က VOM ကို ပြောပါတယ်။
Google ကနေ(Verification Codes)တွေ ပို့တာကို ရပ်ဆိုင်းလိုက်ပြီဆိုတဲ့သတင်းနဲ့ ဒီလိုဖြစ်ရတာက မြန်မာနိုင်ငံရဲ့လက်ရှိဆက်သွယ်ရေးဆိုင်ရာကန့်သတ်ချက်တွေကြောင့်ဖြစ်နိုင်တယ်ဆိုတယ်လို့ လေ့လာသုံးသပ်သူတွေက ဆိုပါတယ်။
လက်ရှိမှာ ဒီလိုသတင်းတွေထွက်ပေါ်နေပေမယ့် ယနေ့အချိန်ထိ ယခင်ကတည်းကဖွင့်လှစ်ထားတဲ့ Google အကောင့်တွေ Google နဲ့ဆိုင်တဲ့ App တွေ (ဥပမာ- Gmail, Google Maps, YouTube, Google Drive)တွေကိုဆက်လက်အသုံးပြုလို့ရနေသေးတယ်လို့ Google User တွေက ပြောပါတယ်။
"ဟိုတရက်က ရုံးလုပ်ငန်းအတွက် အသုံးပြုဖို့ Email အကောင့်အသစ်တခုဖွင့်တာရပါတယ်။ဖုန်းနံပါတ်နဲ့ ဖွင့်တာတော့မဟုတ်ပါဘူး။အရင်က Mail နဲ့ပဲဖွင့်တာပါ။အကောင့်ဖွင့်ရတာလည်းအရင်လိုပဲပါပဲ။ဘာ Error မှမရှိပါဘူး၊ရပါတယ်"လို့ ရန်ကုန်မြို့မှာ နေထိုင်တဲ့ကုမ္ပဏီဝန်ထမ်းတယောက်က ပြောပြပါတယ်။
အိုင်တီပညာရှင်အချို့ကတော့ မိမိတို့ရဲ့ Google Account တွေကိုသေချာလုံခြုံအောင်ထားဖို့ဆိုပါက Backup Codes ဒါမှမဟုတ် Authenticator App တွေကို ပြင်ဆင်ထားဖို့အရေး ကြီးပြီး လက်ရှိအသုံးပြုနေတဲ့ Google App တွေကတော့ အင်တာနက်ရှိနေသရွေ့ဆက်လက်အသုံးပြုနိုင်မှာဖြစ်တယ်လို့ အကြံပြုပြောကြားထားကြပါတယ်။
ဒါအပြင် မြန်မာဖုန်းနံပါတ်တွေဆီ Google ကနေ အတည်ပြုကုဒ်မချပေးတော့ပါက အသုံးပြုသူ User တွေလုပ်ဆောင်ရမယ့် နည်းလမ်းနဲ့ နည်းပညာတွေကိုလည်း မြန်မာနိုင်ငံသား အိုင်တီပညာရှင်တွေက (Facebook,TikTok)အစရှိတဲ့ လူမှုကွန်ရက်တွေပေါ်မှာမျှဝေပေးနေကြတာကိုလည်းတွေ့ရပါတယ်။
"ဒါကသိပ်စိတ်ပူစရာတော့မရှိပါဘူး။ကုဒ်မကျတော့တဲ့ အတွက် Google တွေ Login ပြန်ဝင်တဲ့နေရာမှာတော့ခက်သွားတယ်။မြန်မာဖုန်း SIM ကတ်တွေကိုကုဒ်မကျတော့ပေမယ့် Email တွေကိုတော့ Google ကနေကုဒ်တွေပို့ပေးနေသေးတယ်။ရနေသေးတယ်"လို့ Google User တယောက်က ပြောပါတယ်။
မြန်မာဖုန်းနံပါတ်တွေဆီ Google ကနေ အတည်ပြုကုဒ်မချပေးတော့တဲ့အတွက် Google အကောင့်တွေကို အသုံးပြုသူတွေအနေနဲ့ မိမိတို့အကောင့်တွေကို ဂရုတစိုက်နဲ့ ထိမ်းသိမ်းဖို့လိုတယ်လို့လည်း အိုင်တီပညာ ရှင်အချို့က အကြံပြုထားကြပါတယ်။
ဒါအပြင် မြန်မာဖုန်းနံပါတ်တွေဆီ Google ကနေ အတည်ပြုကုဒ်မချပေးတော့သည့်တိုင်အောင် မြန်မာ နိုင်ငံအတွင်းမှာ နိုင်ငံခြားဖုန်းကတ် SIM 2 Fly ကဒ်တွေကိုထည့်သွင်းပြီး Google အကောင့်အသစ်တွေကိုဖွင့်လှစ်ကာ SMS ကုဒ်တွေကျလာအောင်ပြုလုပ်နိုင်တယ်လို့လည်း ဆိုပါတယ်။
"SIM 2 Fly ကဒ်တွေကိုသုံးပြီး SMS ကုတ်တွေရယူလို့ရပါတယ်။သူကပြည်တွင်းမှာဖုန်းပြောလို့ မရပေမယ့် SMS အတွက်တော့သုံးလို့ရပါတယ်"လို့ မြန်မာနိုင်ငံသားတယောက်က သူရဲ့အတွေ့အကြုံကို ပြောပြပါတယ်။
Wikipedia ရဲ့ အချက်အလက်တွေအရ ၂၀၂၅ ခုနှစ်၊ဇွန်လအထိ ကမ္ဘာတဝှမ်းမှာ Gmail အသုံးပြုသူ ၁.၈ ဘီလီယံရှိနေပြီး ဒါဟာ ကမ္ဘာ့လူဦး ရေရဲ့ ၃ဝ ရာခိုင်နှုန်းခန့်ဖြစ်တယ်လို့ ဆိုထားပါတယ်။
"အခုမြန်မာမှာ Google အကောင့်တွေဖွင့်လို့ရပေမယ့်၊ခဏလေးနဲ့ ပြန်ပိတ်သွားတာမျိုးတွေရှိတယ်။ရှိပြီးသား Gmail အကောင့်တွေကိုသေချာထိန်းသိမ်းထားသင့်ပါတယ်"လို့ မြန်မာနိုင်ငံသား Google User တယောက်က ထပ်မံပြောပြပါတယ်။
တချို့ဖုန်းတွေမှာတော့ Google Playstore တွေကို သုံးလို့မရတဲ့ ပြဿနာဖြစ်နေပြီး ဒီလိုဖြစ်ပေါ် လာပါက Network Signal စစ်ဆေးတာတွေ အပါအဝင် AirPlane Mode အဖွင့် အပိတ်ပြုလုပ်ခြင်းနဲ့ SMS ကုဒ်တွေကိုရရှိနိုင်တယ်လို့ အိုင်တီကျွမ်းကျင်ပညာရှင်တွေက အကြံပြုထားပါတယ်။
"Network Signal မရရင်လည်း SMS မရနိုင်ဘူး။နောက် AirPlane Mode ကိုဖွင့်ပြီး ပြန်ပိတ်ပေးဖို့လိုတယ်။ဒါက Signal ကိုပြန်လည်ရရှိစေတတ်တယ်။တကယ်လို့ Google Code မကျရင် SIM ကတ််ကိုထုတ်ပြီး ပြန်တပ်ပေးတာ ဖုန်းကို Restart လုပ်တာတွေလုပ်ဖို့လိုပါတယ်။Message Settings တွေကိုစစ်ဆေးဖို့လိုတယ်။ဖေ့ဘွတ်စ်မှာကုဒ်မကျဘူးဆိုရင်လည်းဖေ့ဘွတ်စ် Settings ထဲက Code Generator ထဲမှာ၀င်ရောက်ကြည့်ရှုနိုင်ပါတယ်"လို့ အိုင်တီ ပညာရှင်တယောက်က အကြံပြုထားပါတယ်။
အချက်အလက်တွေအရ မြန်မာဖုန်းနံပါတ်တွေဆီ Google ကနေ အတည်ပြုကုဒ်မချပေး တော့ဘူးဆိုတာကို Google ဘက်ကတရား၀င်ထုတ်ပြန်ထားခြင်းမျိုးတော့မရှိသေးပါဘူး။
မြန်မာမှာ Gmail, YouTube, Google Drive စတဲ့ App များကို မကြာသေးခင်အချိန်ထိ အသုံးပြုနေရခြင်းဟာ Google Services ရပ်ထားတယ်ဆိုတာ မမှန်ကြောင်းသက်သေဖြစ်နိုင်တယ်လို့လေ့လာသုံးသပ်သူတွေက ပြောပါတယ်။
တကယ်လို့ Google ကုဒ် မရတာဟာ သုံးစွဲသူတွေရဲ့ ဖုန်း Signal, Telecom Side issues, VPN, Google security restrictions, Spam filtering စတဲ့ အခြားအကြောင်းအရင်းတွေကြောင့်ဖြစ်နိုင်သလို အခုအချိန်မှာမြန်မာဖုန်းနံပါတ်တွေနဲ့ Google ကုဒ်မရတာဟာ တချို့သက်ဆိုင်ရာ Telecom ဖုန်းအော်ပရေတာတွေရဲ့ မူဝါဒနဲ့သာ သက်ဆိုင်နိုင်တယ်လို့လေ့လာသုံးသပ်သူတွေက ဆိုပါတယ်။
သို့သော်လည်း အိုင်တီပညာရှင်တွေကတော့ Google က မြန်မာဖုန်း SIM တွေအတွက် Google ကုဒ်တွေပိတ်လိုက်ပေမယ့် စိတ်ပူစရာမလိုဘဲ ဒီအတွက် ဖြေရှင်းနည်းတွေများစွာရှိတယ်လို့ အကြံပြုပြောကြားထားပါတယ်။
"Google Authenticator ကို ချိတ်ဆက်ထားပီး 2 Step Verification Code ကိုတောင်းယူနိုင်ပါတယ်။Facebook ကိုလဲ Google Authenticator မှာ Setup လုပ်ထားနိုင်ပါတယ်"လို့ မြန်မာနိုင်ငံသားအိုင်တီပညာရှင်တယောက်က အကြံပြုထားပါတယ်။
Photo - Google
VOM
