Story & Poem Paradise

17/09/2025

16/09/2025

16/09/2025

15/09/2025

09/09/2025

09/09/2025

09/09/2025

04/09/2025

04/09/2025

03/09/2025

30/08/2025

ညမင်္ဂလာ (Movie Review)

ဦးစွာ Mirror Images မှ Review များကို အစဉ်တစိုက်စောင့်မျှော်နေခဲ့ကြသော ပရိသတ်များကို ကျေးဇူး အထူးတင်ရှိကြောင်းပြောချင်ပါတယ်။

ညမင်္ဂလာဆိုတဲ့ နာမည်ကို ဘာကြောင့်ပေးထားသလဲ ဆိုတာ ဇာတ်လမ်းရဲ့အဆုံးထိ ကြည့်ပြီးချိန်မှကောင်းမွန်စွာ သဘောပေါက်လိုက်ရပါတယ်။ ဇာတ်လမ်းရဲ့ Main ကျောရိုးနဲ့ Title ကလိုက်ဖက်လှပါတယ်။

ပထမဆုံး ချီးကျူးချင်တာက ဒါရိုက်တာ ဒီဒီထက်အောင်ပါ၊ သူ့အနေနဲ့ ဇာတ်ညွှန်းရေးဆရာက နေ ဒါရိုက်တာအဖြစ် ပထမဆုံးပွဲဦးထွက်ရုပ်ရှင်မှာ တင် အောင်မှတ်ကျော်ပြီး ဂုဏ်ထူးထွက်ခဲ့တယ်လို့တောင် သတ်မှတ်လို့ရပါတယ်။ တချို့နေရာတွေမှာ လက်မှတ်တွေ ဝယ်မရတဲ့အထိ ပေါက်သွားတာ တကယ်ဝမ်းသာဂုဏ်ယူစရာပါ။ ပွဲဦးထွက်မှာတင် ထိပ်တန်းသရုပ်ဆောင် နေတိုးနဲ့ စိုးမြတ်သူဇာတို့လို အနုပညာကဝေနှစ်ဦးကို ကောင်းကောင်း Control လုပ်ပြီး လိုချင်တဲ့အတိုင်း စိတ်ကြိုက်ပုံဖော်နိုင်ခဲ့ တယ်လို့ ချီးကျူးချင်ပါတယ်။

နေတိုးကတော့ ထိပ်တန်းမင်းသားတလက် ပီသစွာ ကာရိုက်တာနှစ်မျိုးစလုံးကို လုံးဝမတူညီအောင် လုပ်သွားခဲ့တာတွေ့ရပါတယ်။ ကြောက်ရွံတဲ့ အချိန်မှာ ကြောက်ရွံတဲ့အမူအရာပုံစံ၊ တည်ငြိမ်တဲ့ ကာရိုက်တာ မျက်နှာပြောင်တဲ့ကာရိုက်တာ နှစ်မျိုးကို ကွဲလွဲအောင် သရုပ်ဆောင်သွားနိုင်တာ တွေ့ရပါတယ်။ အကယ်ဒမီအတွက် ပြောပါဆိုရင် ဒီကားနဲ့တော့ မမှန်းပါဘူး။ မှန်းလို့ရတဲ့ ကားအမျိုးအစားမဟုတ်သလို ဒီထက်ပိုမှန်းလို့ကောင်းမယ့် ရုပ်ရှင်ကားတွေလာဦးမှာမို့ မမှန်းတော့တာပါ။

စိုးမြတ်သူဇာကတော့ အနုပညာကဝေမကြီး ပီသစွာ လုံးဝ အပီချသွားတာပါ။ ဘာလို့ ဒီလိုအိမ်ဖော်ကာရိုက်တာမျိုးကို လုပ်သလဲ ရုပ်ရှင်ကြည့်ပြီးတဲ့ အချိန်မှာ ကောင်းကောင်းနားလည်လိုက်သလို လက်ရှိတန်းနဲ့ အသက်အရွယ်အရ လုပ်မယ့် သူတခြားမရှိတာကြောင့် သူမှလွဲ၍အခြားမရှိဟု တွေးမိတဲ့အထိပါ။ ဇာတ်ပို့တွေထဲကလည်း တချို့လုပ်နိုင်တဲ့သူရှိတယ်ဆိုပေမယ့် ရုပ်ရှင်ကားတကားမှာ ဝိတ်လည်းလိုအပ်တာကြောင့်ပါ။

ရွှေသမီးကတော့ ဇာတ်ဆောင်လို့ ပြောဖို့ပါတဲ့ အခန်း နည်းပေမယ့် ပါတဲ့အခန်းတွေမှာ အရမ်းလုပ်ကွက် ရပါတယ်။ ဆိုက်ကိုဆန်ဆန်ပုံစံနဲ့ နှုတ်ခမ်းတောင့်နဲ့ မျက်နှာကို ဆွဲတဲ့အခန်း၊ သတ်သေမယ့်အခန်းနဲ့ နေတိုးကို ခြောက်လှန့်ရတဲ့အခန်းတွေက တကယ်ထိမိလှပါတယ်။ လက်ရှိမင်းသမီးတွေ ထဲ မှာ Silent Acting နဲ့ Psycho Character ပီပြင်သူအဖြစ် သတ်မှတ်လို့တောင် ရနေပါပြီ။ ဇာတ်ပို့နဲ့သာ တင်မယ်ဆိုရင် ဆန်ကာတင် တစ်ကွက် ပါကောင်းပါလာနိုင်ပါတယ်။

ရတနာဗိုကတော့ ဒီကားမှာ အမျိုးသမီး ဇာတ်ဆောင်လို့ ပြောလို့ရပြီး အခန်းများပေမယ့် လုပ်ကွက်ကြီးကြီးမားမား ရှိမနေပါဘူး။သို့ပေမယ့်လည်း ပါတဲ့အခန်းတိုင်းကို တာဝန်ကျေကျေနဲ့ သရုပ်ဆောင်သွားနိုင်တာကို တွေ့ရပါ တယ်။

ထူးထူးခြားခြား ချီးကျူးချင်မိတာက ယမုံမြင့်မြတ်ပါ။ သရဲဝင်ပူးတဲအခန်းတွေဆို အသစ်လို့ မထင်ရလောက်အောင် အပီအပြင် လုပ်သွားနိုင်တာတွေ့ရပါတယ်။ အလားအလာ အများကြီး ရှိတဲ့ သရုပ်ဆောင်သစ်တစ်ယောက်လို့လည်း မှတ်ချက်ပေးချင်ပါတယ်။

ဆင်မနဲ့ မိုခမ်းကလည်း ပါတဲ့နေရာကို တာဝန်ကျေကျေနဲ့ သရုပ်ဆောင်ပြီး ဇာတ်ကို ပို့ပေးသွားကြပါတယ်။

အောင်မြင့်မြတ်ရဲ့ ညမင်္ဂလာဇာတ်ဝင်တေးက အင်မတန်မှ လိုက်ဖက်လှပြီး တချို့အခန်းတွေဆို စိမ့်ပြီး ကြက်သီးပါထခဲ့မိပါတယ်။

ဇာတ်လမ်းကတော်တော်လေး သဘောကျပါတယ်။ ဆန်းတယ် သစ်တယ် ကြည့်လို့ကောင်းတယ်။ မိ မိသဘောဆန္ဒအရမကြိုက်တဲ့ အချက်တွေကိုပြောပါဆိုရင် ဟာသဖောက်လွန်းတာပါ။ သရဲကားမှာ အမြဲကြောက်မနေရအောင် ဟာသလေးတွေ နှောပြီး ထည့်တာ ကောင်းပါတယ်။ သို့ပေမယ့် လိုတာထက်ပိုပြီး ဟာသနှောလွန်းတယ်လို့ မြင်မိပါတယ်။ သရဲကားကြည့်ပြီး ကြောက်ချင်တဲ့ ပရိသတ်က ကြောက်လန့်နေရတုန်းမှာဘဲ ဟာသဖောက်ချလိုက်တော့ Horror Vibes ပျောက်ပျောက်သွားပြီး ဇာတ်ကို ပေါ့သွားတယ်လို့ မြင်ပါတယ်။ ဥပမာတွေ ထုတ်ပြရရင် နေတိုးက ရွှေသမီးအမှတ်နဲ့ လုပ်လိုက်ရင်း ရတနာဗို ဖြစ်ဖြစ်နေလို့ ရယ်ရတာ၊ ဆင်မသရဲပူးပြီး ကနေလို့ ရယ်ရတာတွေက တကယ်ပေါ့သွားတယ်လို့မြင်ရပါတယ်။ တစ်မိသားစုလုံး သရဲပူးချိန် ယမုံမြင့်မြတ်က အိုက်တင်တွေနဲ့ အပီသယ်ပြီး နံရံကို ခေါင်းနဲ့ ဆောင့်လို ဝိုးဝါးဖြစ်နေတုန်း ဆင်မက သရဲပူးလို့ ကနေတော့ ထင်သလောက် မရောက်တော့တာမျိုးတွေဖြစ်တယ်လို့မြင်ပါတယ်။ သရဲကားကြည့်တဲ့ ပရိသတ်တော်တော်များများက ကြောက်လန့်ခြင်းဆိုတဲ့ရသကို ခံစားချင်ကြတာမို့ ဟာသဖောက်တာတချို့ လျှော့စေချင်မိတာပါ။ အပြုသဘောနဲ့ မိမိဖြစ်စေချင်တဲ့ဆန္ဒကို ပြောခြင်းသာဖြစ်ပါတယ်။

ပုံမှန်ဆိုရင်တော့ ဒီလို မြန်မာကြိုက်မဟုတ်တဲ့ ရုပ်ရှင်တွေ ရိုက်ရတာဟာ အရမ်း စွန့်စားလွန်းရာကျပါတယ်။ သို့ပေမယ့် ဒီလိုစွန့်စားမှုမရှိဘဲနဲ့ ရုပ်ရှင်အနုပညာဟာ တိုးတက်မလာနိုင်ပါဘူး။ တခါလာလည်း ဟာသ ၊ တခါလာလည်း ဒရာမာ လုပ်နေလို့ မရသလို ပုံစံ မတူရသမတူတဲ့ ရုပ်ရှင်တွေကို ပရိသတ်တွေကို မြည်းစမ်းခွင့်ပေးသင့်ပါတယ်။ ရုပ်ရှင်ကြည့်ပရိသတ်တွေက အသစ်အဆန်းတွေကို တောင့်တပြီး Quality ရှိတဲ့ကားတွေကို မျှော်နေချိန်မှာ ညမင်္ဂလာကတော့ ရေငတ်တုန်းရေတွင်းထဲကျ ဆိုသလို အချိန်ကိုက် ရုံတင်ခဲ့လို့လည်း အောင်မြင်တာဖြစ်ပြီး အမှန်တကယ်လည်း ကြိုးပမ်းအားထုတ်ထားလို့သာ အောင်မြင်တာလို့ပဲ ပြောချင်ပါတယ်။

ဒီကားရဲ့ အားအသာဆုံးအချက်ကတော့ Pre Production ကောင်းကောင်းလုပ်ထားတဲ့ အချက်ပါပဲ။ ဒါကြောင့်လည်း Qualityရှိပြီး အောင်မြင်တဲ့ ရုပ်ရှင်တစ်ကားဖြစ်လာတာပါ။

အကယ်ဒမီအနေနဲ့ ပြောရရင် သရုပ်ဆောင်ဆုမှာ စိုးမြတ်သူဇာနဲ့ အတတ်ပညာပိုင်းဆိုင်ရာဆုတွေ မျှော်မှန်းလို့ရနိုင်တယ်လို့ မြင်မိပါတယ်။

ပေးရတဲ့ လက်မှတ်ဖိုးနဲ့ တန်တဲ့ရုပ်ရှင်ကားတစ်ကားဖြစ်ပြီး မကြည့်ရသေးရင် သွားကြည့်ဖို့ အတွက်လည်း အကြံပြုချင်ပါတယ်။

Mirror Images Page မှလည်း တင်တဲ့ရုပ်ရှင်ကားတိုင်းကို Review ရေးမှာ မဟုတ်ပေမယ့် တကယ်ကောင်းတဲ့ ရုပ်ရှင်ကားများကို အခကြေးငွေကင်းပြီး ဘက်လိုက်မှုကင်းသော၊ စေတနာ ဖြင့်ဝေဖန်ထောက်ပြသုံးသပ်ချက်များ ပါတဲ့ Review များ ကို ဆက်လက်ပြီး ကြိုးစားတင်ဆက်သွားပါမယ်။

ညမင်္ဂလာ ရုပ်ရှင်ဇာတ်ကားကြီး အဖွဲ့သားများလည်း အောင်မြင်ပါစေကြောင်း ဆုမွန်ကောင်းတောင်းလျက်

စေတနာမွန်ဖြင့်

Mirror Images ( စစ်မှန်သော အနုပညာပုံရိပ်များ)