Jamal Abu Al-Ruz

12/11/2020

يا اهلا وسهلا اشتقنالكم 🤗🤗
غبنا عنكم عشان موسم الزيت والزيتون وعصرنا زيتوناتنا وطلع الزيت ما شاء الله عليه 🌿.
و دعنا الحر ⁦🌡️⁩🔥و رحبنا بالبرد⁦⛈️⁩⁦❄️⁩ ولو الجو شد حيله بشوية منلبس صوف وبلايز .
والبرد بدو دفا والدفا بدو حرارة والحرارة من الشطة 🌶️🌶️🌶️🌶️.
عالسريع عالسوق عالفلفل عالبهارات العراقية النادرة عزيت الزيتون.
وسيحت احلى شطة وبعدين عالطنجرة🍲.
طلعت شطتنا لما تاكلها مش حتقدر تغمض عينيك لأنهم راح يطلعوا من الحرارة والحرارة من الدفا ما بعد الشطة.

كيف نوكلها 🙄 ؟
مع الخبز الصاج ندهنه بالشطة مع الجبنة مع الزعتر . أو الشطة مع العسل🐝🍯.
لا تنسو العسل من منحلتنا فخامة ورقي.
أو ع الحمص والفول أو ع الصواني.

ع المشاوي ولا تنسو أعشاب المشاوي تبعتنا .
أو مع السلطة أو مع الاكل كله .
الشطة بتجمع منتجاتنا خلي اكلك دافي وجوك كله دافي وحنان
والحنان بده ألفة . والألفة بده حرارة والحرارة من الشطة.
لا تنسو هاي العبارات جربوا شطتنا واتدفوا وصحتين .
😘😘😘

24/10/2020

24/10/2020

يا اهلا وسهلا 🤗
كل أسبوع منحكي الصيف خلص ☀️ ومنحضر ملابس شتوية استعدادا للبرد ❄️🌧 وبيجي الأسبوع اللي بعده ولا الصيف 🥵 لساته جالس والدنيا دفا الحمد لله عشان هيك فكرت استغل هالدفا واعمل مخلل خيار 🥒 ومخللنا غير منضيف عليه ثوم 🧄 كامل مش مفروم وليمون 🍋 قطع وفلفل 🌶 كامل أيضا وعشان لساته الجو دافي راح يتخلل الخيار بسرعة والنتيجة طلعت ولا احلى ولا اروع من هيك مخلل 🤤 لأنه استغلينا كل شي بالمخلل حتى المي تبعة المخلل وإذا بدكم تسألوا كيف نسوي فيها منجيب شوية مي من المخلل مع شوية قطع الليمون 🍋 مع كم فص ثوم 🧄 من اللي حطيناهم مع الفلفل 🌶 برضه اللي حطيناه وعالخلاط منحصل على أحسن وازكى تتبيلة للحمص للفول 😍 لكل اشي لأن الثوم اعطى الفلفل والفلفل أعطى الخيار والليمون اخذ من الفلفل وكله اخذ وأعطى من الثاني والحياة اخذ وعطى 😂 ولما تعمل مخلل خيار اتذكر القاعدة ولتكون استفدت من المخلل اللي عملته لآخر قطرة وخلي اكلك يوخذ ويعطي مع بعضه وصحتين 🥰🥰

ولاتنسوا أعشاب المشاوي 🍗تبعتنا إذا خلطتها مع التتبيلة اللي سويناها واكلتها مع المشاوي 🍗والصواني🥘 والهمبرجر 🍔والفلافل 🧆راح ينقلب عندك مفهوم الاكل كل اللي منسويه بوخذ وبعطي مع بعضه لا تنسوا هاي القاعدة ( صحتين وخذ وأعطي مع اكلك ) 😂😍

#العالوك #المسرات #عمان #الزرقاء #جرش #إربد #عجلون #شفبدران #بيرين

26/09/2020

يا اهلا وسهلا 😁😁
نحن نقيم بمنطقة العالوك وهي منطقة ريفية جميلة جدًا بجغرافيتها وجوّها وناسها وهذا ما استدعانا نفكر بمشروعنا المستقبلي 😄.
لأن #العالوك أصبحت منطقة سياحية وهذا واضح جدًا أيام العطل الأسبوعية والرسمية والصيفية ،فالناس تأتي إلى العالوك وتجلس تحت أشجارها من الغابات والاحراش بالمنطقة طيلة اليوم وبعضهم ينبسطوا بالاستراحات المنتشرة 🥳، لذا فكرنا بفكرة غير تقليدية أن نستغل أرضنا بتهيئتها من حيث الزراعة وتربية الدجاج والبط والحمام البلدي🐔🐣🐤 ومتطلبات الطبخ التراثي باستعمال الحطب والفحم وعمل مظلات وجلسات جميلة .
ولتكون مناسبة لأن يستريح السياح فيها ويجلسون بين أشجار الأرض ويستمتعون بوقتهم وفي جو من الخصوصية حيث نخطط نستقبل فقط عائلة واحدة أو اثنتين
بحيث تكون كل عائلة منفصلة ، واحدة في اول الأرض والأخرى بآخرها🤗
وكل مجموعة تستفيد مما تكلمنا عنه بتهيئة الأرض ونقدم الأكلات التراثية والحلويات الأردنية التراثية .
وبدأنا بتجربة الأكلات التراثية من الرؤوس والكرشات والكوارع والكبسة والمقلوية والمنسف ، وكله على الحطب.
بالإضافة إلى السلطات وفتة الحمص والاكل المحمر وراح أفرجيكم الصور عشان تتذكرنا لما نعمل وننتهي من مشروعنا اللي اتكلمنا عنه .
وللكلام بقية . انتظرونا راح انظل معاكم ولا تنسوا أعشاب المشاوي تبعتنا واعشاب الشاي والمربى وشراب الورد والعسل كله راح تجربوه معانا بمشورعنا الجديد.
راح ياخذ وقت لكن هينا معاكم وراح ننبسط مع بعض بالأشياء اللي منعملها مرة ثانية ظلكم مذكرينها لأن أن شاء الله راح تكون بين أيديكم وصحتين وعافية ويا اهلا وسهلا .
😍😍🤗🤗

19/09/2020

يا اهلا وسهلا 🤗🤗
المرة الماضية اتكلمنا عن الدالية العنب 🍇🍇 وكيف أن الشجرة هذه نستفيد منها سواء ورقها ☘️ واغصانها وثمر العنب .
اليوم راح نتكلم عن جارتها شجرة التين.
عنا شجرة تين ما شاء الله كبيرة والحمد لله ثمر التين أكلنا منه وشبعنا وكان احلى فاكهة للضيافة ،وبعدين نهدي منه للحج والحجة البركة واصحابنا ونسايبنا ⁦😃😃.
والعصافير وابو زريقي 🐦🐦 أكلوا منها بكثرة وحكالي جارنا الحبيب ابو إياد أن العصافير اللي أكلوا منا هم راح يزيحوني للجنة من الأجر والثواب بإذن الله.
وبعد كل هذا بحمد الله ظل كمية من الثمر فكرت ايش نعمل كمان ان تركنا التين على الشجرة راح يتساقط وراح يلم دبابير وراح يكون هدر وحرام هدر النعمة.
فكرت احسن شي اعمل مربى، وعلى طول جمعت التين وعملت احلى مربى تين مربى لذيذ جدا ولون زاهي يفتح النفس .
واضفت عليه سمسم ولوز طلع أُبهة.
وبعد ذلك صار عنا مربى تين ومقبلين على الخريف والشتا بكون فطورنا كله طاقة وصحة لا لون ولا مادة حافظة ولا نكهة اصطناعية، طعم طبيعي ومفيد لكل أفراد العيلة .
بعدين ممكن أن يكون مصدر دخل تبيع منه لأصحاب والاقارب وكمان المجتمع .
وهيك زاد حبي وقربي لشجرة التين هذا، التين نستفيد منه من اول حبة لآخر حبة وزيادة على ذلك الأجر والثواب والصدقات من ما أكله الناس والعصافير .
شجرة التين بتخلي الكل مبسوط والعصافير بتظلها اتغرد واتغني ،ازرع تينة بجنب الدالية وعيش المرح مع العصافير اللي راح تدخلنا الجنة بإذن الله .
😍😍😁

05/09/2020

يا اهلا وسهلا 🤗🤗🤗
غبنا عنكم من العيد الأضحى وما فيه من اللحمة والمشاوي وروس الخرفان والمناسف والكبسة واستعملنا أعشاب المشاوي.
شوفوا الصور غبنا عنكم من هذيك الايام للآن السبب هالشجرة العجيبة (الدالية) العنب. 🍇
كل ما في هالشجرة يستخدم الحمد لله لقطنا ورق العنب . ⁦☘️⁩⁦☘️⁩
وعملنا ورق محشي ويالنجي وبعنا الحمدلله منه وفرزنا لاستعمال بعد الموسم .
وبعدين أكلنا عنب أخضر واسود حب وعملنا عصير عنب وشربناه وقدمناه ضيافة ولا اروع وعملنا من العصير اسكيمو ( ذاكرين قبل ٤٥ سنة لما كانت تنباع الاسكمو ودرادو بعرباية البوظة) سألني اللي جالس جنبي كيف نعمل الاسكيمو 🤔؟
بسيطة اتحط عصير العنب بكاسة واتحط ملعقة بالكأس واتحط الكاسة بالفريز⁦❄️⁩⁦❄️⁩ .
وبعد ما تجمد حرك المعلقة يمين ويسار بتطلع قالب اسكمو ولا اروع وإذا ماجمد صار نص نص ممكن بصير سلش تأكله بالملعفة وبعدين.
وبنعمل من العصير دبس العنب ولا احسن ولا اروع من هيك ، دبس عالفطور ممكن ناكل الدبس مع الطحينة أو السمن أو الزبدة أو زيت الزيتون🫒🫒🫒.
وممكن انحط كمية قليلة من الدبس بكباية ماء وانحط بقية الكباية ماء بارد لتحصل على أروع عصير منعش 😋😋 حتى عيدان الدالية مع التقليم بعد ما تجف وتيبس انلمها ونستخدمها لتوليع النار 🔥🔥.
النار اللي نطبخ عليها ونعمل كل ما نشتهيه من الطبخ "ولا تنسوا الأعشاب تبعتنا بالأكل". شايفين ليش اتاخرنا خلي كل واحد منا يزرع دالية ببيته وينبسط بهالنعمة وانخلي كل حياتنا عنب عنب. 🍇🍇🍇🍇

29/07/2020

يا اهلا وسهلا بعد بكرة عيد الأضحى كل عام وانتم بخير وصحة وسلامة 🤗🤗..
وزي ما انتوا عارفين الجمعة والسبت والأحد والاثنين كله ذبح الأضاحي. والاضاحي معناته لحوم أغنام وبقر وجمال 🐪🐄🐑🐏 .
واللحوم معناته توزيع عالاقارب والجيران والناس وانتو كمان .
وهيك بتعم اللحوم على الجميع 😋😋 .
واللحوم معناته مشاوي وصواني وطبايخ ونفخ ومناسف 🍗🍗
هذا كله منعطره ومنزبطه ونتبله بالأعشاب تبعتنا 🌱🌿🍃
هذا اللي بدنا نوصله نحكيلكم لا تنسوا الأعشاب تبعتنا تبعة المشاوي.
ذاكرين 🤨🤨!!
تمام ذاكرين😁😁 !!
بس سوينا جديد أعشاب المشاوي الحارة وهاي جديده جربها مع اللحوم اللي عندك وجربها وشوف الدنيا شو بتصير معك .
صحتين وكلوا وانبسطوا وأكثروا من الاكل اللحمة كثيرة هالايام 😁 .
لاتنسو اعشابنا بتعطر الاكل

بتلاقوا منتجاتنا عند بقالة السلامات شارع الأردن قرب مطعم قصر الجبل.
ما بتوه المكان وفي جلسات مجانية وطاولات وكراسي مجانية وقهوة على كيفك
كمان كرابيج حلب .
وانت رايح وجاي شارع الأردن ميل ريحلك شوي واجلس انت واللي معك خذولكم كم كربوج حلب وقهوة ومي واتسهل 😃
بس لا تنسى تشتري الأعشاب تبعتنا وخلطة الشاي عشان اتمخمخ .
ايام عطلة جاية مافي مشكلة ظلك رايح جاي شارع الاردن وميل علينا برضه الجلسة مجانا ويا اهلا وسهلا .
انسيت احكيلكم عندهم معمول شغل بيت ب ٣ دينارالكيلو .اطلبوا وانبسط بس لا تنسو تحسبوا حسابكم بدينارين عشان علبة الأعشاب تبعتنا 🤗🤗🤗🤗🤗.

24/07/2020

اليوم تذكرت انو انسينا مخلل القطع🌶🥕 وجينا عليه شوي وانسيناه يوم ما كان يزين أكلنا وننبسط بأشكاله وألوانه وان كان معانا دايما بدي اليوم ارجع الذكريات الحلوة😋 معاه ما بصير اللي عملنا فيه من اول هرسة نسيناه وقبل ما ارجع الذكريات لازم احل أهم مشاكله .
لما نروح عالمطم منكون ميتين من الجوع 🤤خاصة لما نقطع مشوار طويل عشان نوصل لهالمطعم ، اول ما نجلس عالطاولة بجيبولنا صحن فيه كم حبة زيتون وشوية مخلل🥒 وقرن فلفل🌶 وخبز سخن🥖🥖 احنا على طول مندق بصحن المخلل والزيتون وعشان مالح منظل نشرب مي كاسة ورى كاسة لما ننتفخ😞 .
ولما يجي الطلب بتكون معدتنا مليانة مي وما مناكل من الطلب الا شوي بس .
وصلت الفكرة .. صح وصلت !! تمام 😁.
المشكلة الملح بالمخلل ، خاصة بالصيف☀️🔥🔥 منصير نهرب منه شفتو شو صار فينا بالمطعم مَضيناها شرب مي🌊🌊 ، بدنا ناكل مناسف. ومشاوي كبسات .
بعد التفكير بدي اسوي مخلل من غير ملح . من غير ملح اه من غير ملح 🧐!!
بقرش🤨 اه بقرش!! مش مهتري🤨 اه مش مهتري !! زاكي🤨 اه زاكي !!
نفس الطعم 🤨أكيد نفس الطعم .
طب خلصنا عاد هات دينارين وخذلك مرتبان بدي أظل اجاوبك اه. اه. اه المرتبان الفارغ حقه نص ليرة، وبعدين محفوظ طبيعيا لا مواد حافظة ولا نكهات😋 .
انبسط وخليك تاكل مخلل ولا تشرب مي وراه ، وخليك تأكله مع الطلب اللي طالبه ولا تستعجل باكله قبل الطلب اصبر بصير يشهي مع اكل الطلب صبرت ساعات مش قادر تصبر دقايق ، منحكيلك بشهي مع الاكل !! بشهي !!
وانتو ايش بتستنوا على طول حولوا المخلل بدون ملح .
ملح قليل عالاخر ما حدا يسأل جاوبنا بنعم على كل سؤال حتى بالصيام باشتغل معكم . وانبسطوا باكلكم وبرحلاتكم ، خلي عبوة المخلل ابو ملح خفيف بتصير القصة مخلل واكل بدل مخلل ومي .
صحتين واتهنوا🤗🤗 ولا تنسوا المخلل ابو ملح خفيف بخلي دمنا خفيف وأممير🤗🤗🤗 .

#العالوك #المسرات #عمان #الزرقاء #جرش #إربد #عجلون #شفابدران

19/07/2020

يا اهلا وسهلا 🤗🤗
بالأمس عملنا مخلل مهروس 🌶🥕 وانبسطنا وحلينا كل مشاكلنا مع المخلل يوم ما كان قطع وخلينا سندويشة مدهنة اللي بدو يملاها باللي يحبه 🥰

ذاكرين شو عملنا باعشاب المشاوي ☘️🌿🌱 يوم زدنا عليها ليمون 🍋 وثوم وزيت وفلفل 🌶 وصرنا انطفى فيها المشاوي وعملناها مع الخبز 🥖 اللي تحت المشاوي ذاكرين 🧐 (ممتاز ذاكرين) 👍😁
اليوم بدنا نعمل نفس الخطوات مع المخلل 🥕🌶المهروس الدهن لا تستنى حط كمية مخلل مهروس و شوية ثوم حسب الرغبة وشوية ليمون 🍋 وإذا كان المخلل بدون شطة 🌶 حط شوية شطة وزيت زيتون واخلطهم مع بعض باطلع عندك احلى والذ صوص بتاكله 🤤😋 مع أي أكلة تخطر عبالك حتى لو بدك تخلطه مع كبسة ، مقلوبة ، صواني ، ايدامات ، ويا سلام لو انك تحط عليه أعشاب 🌱☘️🌿 تبعتنا راح يكون من الاخر
الايام موسم ملوخية عالسريع عملنا اليوم ملوخية وأعملنا ما جاء أعلاه طعم طلع خيالي 😋🤤
اللي بالصورة هاي حصة ابنا حسني حبينا 🥰 أندللـه ونسيه المخلل القطع والحبة الكاملة
ايش بستنوا 🤔 اتخيلوا واتمنوا 🤩🤩 واطبخوا وانسوا المخلل القطع والحبة الكاملة 🥕🌶
ولما اتخلصوا طبختكم ادللوا بالخصوص الجديد
ولا تستنوا زي لؤي لسا ما جرب المخلل المهروس عيشوا الدلال معنا 🥰🥰
لا تروحوا خليكم معنا 🤗🤗

#العالوك #المسرات #عمان #الزرقاء #جرش #إربد #عجلون #شفابدران

17/07/2020

يا اهلا وسهلا 🤗🤗
إلى عشاق المخلل 😋😋وبعتبروه مكون اساسي في اكلهم عالفطور 🍞🥚والغدا 🍲 والعشا🍽.
حاسس بمعاناتهم إذا في سندويشة فلافل 🥙 بتلاقي قطعة المخلل تقفز من السندويشة وتسقط 😩
وإذا في سندويشة كودو 🌯 المخللة شرحة طويلة من اول قضمة تنسحب من السندويشة🥺.
وإذا في همبرجر🍔🍟 ٤ قطع مخلل موجودة وبصير لقمة اه ولقمة لا😢 .
واللي بدو مخلل مشكل 🥒🥕🥬 🌶 مثل العصير المشكل 🍹 بطلع كل صنف لحال مش ممزوج🙁 . طب بعدين الحل ايش🤷‍♂️🤷‍♀️😨 ؟
لقينا الحل بالمخلل المهروس 😁 مخلل دهن 😀 من اول السندويشة لاخرها تنبسط بأحلى طعم 😋😋😋.
وبعدين اللي بدو مشكل فالمخلل المهروس الدهن يمزج كل المكونات 🤯 ويعزف احلى نغم 🎼🎻وانت تاكل .
بعدين ممكن تزين فيه الصحن كتتبيلة للفول والحمص أو مع الإدام .
أو مع المحاشي. أو مع اكلات الرز. 🍛🍗
وبعدين ادلل بدك اياه مع ثوم أو بدون أو بدك اياه عادي او حار .
( يا سلام مع الشطة لا تنسوا بصير 2 في 1) أو أي نكهة أو لون🌶🌶🌶🌶.
أسرع ولا تفوت معزوفة مخللنا 🎹🎻🎻 وخلينا نغني مع بعض مخللنا غيييير 🎼

هاي دهنا السندويشة والباقي عليكم تملوها باللي بتحبوه 😋صحتين واتهنوا🤗🤗

09/07/2020

أهلا وسهلا 🤗🤗

الحمد لله المدة الي فاتت أكلنا واتحلينا وثقلنا عالغدا 😁 أيام الجمعة واللمة وكثرنا من الحال وزدنا عليها بودرة الورد وزادتها حلاوة 😋😋
بعدين حكيت الي معانا باللمة ايش رأيكم نشرب شاي ☕️ نمسح الي فات ونبدا من أول وجديد 🤔🤔،،، الكل أجمع يا سلااام عليك جبتها 🤩،،، سألت الأول 🧔 شو بتحب معه " بالنعناع " الثاني 🧔 " بالميرمية " الأخت الي معانا 🧕" بالبابونج " الحجة البركة 👵" بالزعتر "
طب هيك بدنا نسوي أربع أباريق أو أكثر هذا غير الوقت لما نخلص البريق الثاني بكون الأول برد ❄️،،، بعدين أحسن شي اسوي أعشاب الشاي بترضي كل الأذواق بالفعل سويت أعشاب الشاي وحطيتها مع الشاي وقدمتها للجميع وسألتهم كيف 🧐؟؟! الكل أجمع يا سلاااام عليك 😍 ( لسا مفيش عنا غير هالتعبير منكرره مش مشكلة ما علينا 😅 ) بعدين شجعتهم بحب الإطراء كل واحد حكالي زي ما طلبت وأكثر روعة 🤤😋

أعشاب الشاي تبعتنا بتلبي جميع الأذواق فقط اطلب وبرمج حاسة الذوق واشرب الشاي ☕️ مع أعشابنا بتحصل عالمطلوب وأكثر 🌿🍃💐 ،،، لازم تحصلوا عليها
عفكرة ابني الكبير 👨 وصل متأخر ( زي الي بالفيلم محسن جا متأخر 😂 ) والسريع حكى بدي الشاي بالزهورات 💐💐 عالسريع أعطيناه كاسة شرب وانبسط 🤤 وما قدر يعبر حكينالكم وصل متأخر 🤣 ،، اشربوا وعبروا ولا تتأخروا زي حسني 😉😉

#العالوك #المسرات #عمان #الزرقاء #جرش #إربد #عجلون #شفابدران

06/07/2020

اهلا وسهلا 🤗🤗
المكدوس الي سميناه 3 في 1 ( بالجوز واللبنة والمخلل ) وعشان المنتج مميز سويناه بزيت الزيتون طعم قمة الروعة 😋😋 خيالي مع الفطور حمص وفول
بيجي من الاخر 😍 عالغدا مقبلات مع بامية ، فصوليا ، صواني كفتة واذا بدك تختم غذاءك بفول بتكونه المكدوس الي سويناه بجعل أحلامك سعيدة 😋😍
أسرع واشتري المكدوس بالجوز واللبنة والمخلل وحقق أحلامك 🤩🤩
ولا تنسى مكدوسنا غييييييير 💪
#العالوك #المسرات #عمان #الزرقاء #جرش #إربد #عجلون #شفابدران

04/07/2020

يا اهلا وسهلا
في اكلات تحتاج تفرغ يوم كامل (خاصة إذا كانت شعبية وخاصة إذا كانت بلدية. وخاصة اليوم عطلة السبت وخاصة إذا جاءت هدية من صديق وخاصة إذا كانت رأس خروف وخاصة إذا مع ورق العنب والكوسا المحشي ورأس الخروف مستوي عالاخر وخاصة وخاصة وخاصة.)
كثير من الخصائص بهالموضوع انا على طول أخذت حصتي ( الراس المستوي عالاخر،،، ذاكرين لاتنسو خليكم معنا)
وحطيتو بالفرن الطوب الأحمر ورشيت عليه أعشاب المشاوي تبعتنا وعملت كبسة وحطيت الراس المشوي فوقها طلع أكلة من الاخر تستحق التفرغ
أعطوا الاكلات اهتمامكم واضيفوا عليها أعشاب المشاوي تبعتنا واعطوها الوقت الكافي لاكلها واتفرغولها وصحتين
اتذكرت ,,, السلطة حطيت عليها أعشاب السلطة واللبن حطيت صحن من اللي اتكلمنا عنه مع المخيض والأعشاب

اعشابنا وين ما اتزتها بتيجيك واقفة

#العالوك #المسرات #عمان #الزرقاء #جرش #إربد #عجلون #شفابدران

03/07/2020

يا اهلا وسهلا 🤗🤗
في صديق عزيز وغالي علينا طلب منا مكدوس من غير جوز بسبب إحدى قريباته الصغار معهم حساسية القمح والمكسرات تتعبهم 🤧😷( الله يعطيهم الصحة والعافية ) وعملت إله المطلوب وبعدين فكرت 🤔 شعور إني آكل مكدوس المحشو جوز لازم يوقف هالشعور واعمل شغلة بالمكدوس من غير جوز اتباهى فيه على اللي بالجوز فعملت مكدوس باللبنة وكانت المفاجأة قمة في الطعم حققت الغرض وزيادة 😍😋
بعدين عشت روح التحدي وعملت مكدوس بالجوز واللبنة وطعم طلع مش معقول وبعدين سمينا المنتج الجديد مكدوس 2 في 1 يعني القهوة والشامبو 2 في 1 مش أحسن منا 😒
لسا شعور التحدي مستمر 💪 عملنا مكدوس بالجوز واللبنة والمخلل سميناه مكدوس 3 في 1 ولأنه مخصوص على قد التحدي عملنا بزيت الزيتون ما زال التحدي مستمر وبقوة وبتهور كنت بدي أعمل مكدوس أزيد عليه الفلافل بس خليت الفلافل على المشتري 😅
أصدقائنا وعملائنا الكرام عيشو تحدي المكدوس وبكفي صحون عالسفرة إن شاء الله غدا بكون الي تكلمنا عنه معبأ وجاهز للبيع خلينا نتحدى ونكون مميزين ولا نخلي أبو جوز يتباهى علينا 😠

ولا تنسوا شوية فلافل لتكتمل الصورة ولا تنسوووووا مكدوسنا غيييير وراح تشوفوا 😋😋😋

#العالوك #المسرات #عمان #الزرقاء #جرش #إربد #عجلون #شفابدران

29/06/2020

يا اهلا وسهلا 🤗🤗
راح نرجع إلى العسل تبعنا ( ذاكرين من منحلتنا ومرعى مزرعتنا والورد والازهار) 🌹🍯
( ممتاز ذاكرين) 😍
وحكينا يومها على وصفة اللبنة الأردنية البلدية مع العسل (جربتوها ولا لسا) 🤔🤔
( ااااه في ناس لسا) طب خلي يومكم عسل وجربوا ها اليوم وافطروا اليوم وكل يوم منها وخليها وجبة أساسية الكم وللأولاد عشان يصيروا حلوين وأممير زي اولادنا حسني وحسام 🥰

#العالوك #المسرات #عمان #الزرقاء #جرش #إربد #عجلون #شفابدران

28/06/2020

يا أهلا وسهلا 🤗

بالأمس الساعة 11 ليلا دق الباب وإلا بصديقنا العزيز ANas ShdeFat ومعه كيس من الورد الجوري 🌹أحضره بعد دعوتي للأصدقاء بحاجتنا للورد الجوري ، ومع مزيدا من المشاعر الجياشة والاحترام المتبادل وفي هذا الموقف بادلته تلك المشاعر بأن أحضرت له بودرة الورد المحلاة 🌹🌷 فارتفعت المشاعر لأعلى مستوى حينها قال لي أنت عملت أعشاب للحمة والمشاوي والصواني والكفتة والسمك طب ألا يوجد أعشاب للأكلات الخفيفة ؟؟ كلمته عالسريع إن شاء الله غدا سأعلن عن أعشاب ( عجة البيض وقلاية البندورة وتتبيلة الحمص والفول وغيرها من الخفايف ) عندها أطمن وغادر واختفى في حلكة اليل
نمت واستيقظت وعملت أعشاب العجة 😋 جربوها من عنا وعيشوا اللحظات كلها مشاعر 😍

#العالوك #المسرات #عمان #الزرقاء #جرش #إربد #عجلون #شفابدران

26/06/2020

يا أهلا وسهلا 🤗

سمعنا من الأرصاد الجوية أن نثقل اللبس لأن الجو بليل راح يكون بارد 🥶

ففكرنا نودع الربيع والأجواء الباردة بأكلة سمك 🐟عملنا مقلوبة سمك وسمك مشوي عالفحم وطبعا مافي أحسن من أعشاب السمك تبعتنا 😋

بس تحط ملح وبعدين تتبل بأعشاب السمك وتكمل

سويناها واتمنينا تكونوا معنا تشاركونا وتتذوقوا كيف صار الطعم المعطر 😋

لا تنسوا تحطوا بصحن شوية زيت زيتون وشوية ثوم وعصير الليمون وأعشاب السمك تبعتنا تخلطهم واطفي فيهم السمك المشوي وخليك دايما تحلق بالدرجة الأولى

انتظرونا لسا عندنا كثير 😉
#العالوك #المسرات #عمان #الزرقاء #جرش #إربد #عجلون #شفابدران