GO Cotabato (2025)

16/09/2025

PAMAHALAANG PANLALAWIGAN, NAGPAMAHAGI NG BINHI SA 206 MAGSASAKA SA BANISLIAN

Muling pinagtibay ng Pamahalaang Panlalawigan sa pamumuno ni Gov. Emmylou “Lala” J. Taliño-Mendoza ang suporta sa sektor ng agrikultura sa pamamagitan ng pamamahagi ng certified rice at GM corn seeds sa 206 magsasaka ng bayan noong Setyembre 16, 2025 sa Municipal Grandstand.

Ang nasabing aktibidad ay bahagi ng Food Production Program ng Office of the Provincial Agriculturist (OPAg), kung saan umabot sa P719,900.00 ang kabuuang halaga ng ipinamahaging binhi. Layunin nitong mapagaan ang gastusin ng mga magsasaka at mapataas ang kanilang produksyon bilang bahagi ng pagtitiyak sa seguridad sa pagkain sa lalawigan.

Dumalo sa aktibidad si IPMR/Ex-Officio Board Member Arsenio Ampalid bilang kinatawan ni Gov. Taliño-Mendoza, kasama ang iba pang mga opisyal at panauhin.

Source: Provincial Government of Cotabato

12/09/2025

NEGOSYONG HANDOG NG SLP, IPINAGKALOOB SA MVA BENEPISYARYO NG MAGPET AT PRES. ROXAS

Ipinagkaloob ngayong Setyembre 12, 2025, ang mga negosyong pinondohan sa ilalim ng Sustainable Livelihood Program (SLP) ng Department of Social Welfare and Development (DSWD) sa mga miyembro ng asosasyon mula sa bayan ng Magpet at Pres. Roxas.

Kabilang sa mga proyektong ibinahagi ay ang bigasan supply para sa Doles Magtimbayayong SLP Association (Magpet), New Cebu Bigasan SLPA at Amarah SLPA (Pres. Roxas), native chicken production para sa Labu-o Manokan SLPA, tilapia production para sa Laban Poblacion at Mabuhay Raiser SLPA, at cull chicken buy and sell para sa Poblacion Chicken Buy and Sell SLPA.

Ang nasabing programa ay bahagi ng layunin ng administrasyon ni Pangulong Ferdinand R. Marcos, Jr., katuwang ang DSWD sa pangunguna ni Secretary Rex Gatchalian at Regional Director Loreto V. Cabaya, Jr., at ang pamahalaang panlalawigan sa ilalim ni Gov. Emmylou "Lala" J. Taliño-Mendoza na bigyang oportunidad ang mga mamamayan na magkaroon ng sariling kabuhayan.

Dumalo sa ribbon cutting at opening ceremony sina Provincial IP Mandatory Representative Arsenio M. Ampalid, PCL Provincial President Atty. Bblou Brizuela Benjamin, mga kinatawan ng DSWD XII, barangay officials, at iba pang panauhin.

Source: Provincial Government of Cotabato

01/09/2025

M'LANG, KAMPEON SA KALIVUGAN FESTIVAL STREET DANCING COMPETITION 2025

Wagi ang bayan ng M’lang sa Kalivungan Festival Street Dancing Competition 2025 matapos nitong masungkit ang kampeonato at ang grand prize na P1 milyon. Tampok sa kanilang pagtatanghal ang makukulay na kasuotan, kahanga-hangang koreograpiya, at makabagbag-damdaming kwento ng hamon at tagumpay ng kanilang komunidad.

Nasungkit din ng M’lang ang mga special awards na Best in Street Parade, Best in Musicality, at Best in Costume na may kabuuang premyong P300,000.

Pumangalawa ang bayan ng Aleosan na nakatanggap ng P700,000 bilang 1st Runner-Up, habang 2nd Runner-Up naman ang Pikit na tumanggap ng P500,000. Tig-P100,000 consolation prize naman ang natanggap ng Banisilan, Kabacan, Libungan, at Carmen. Lahat ng kalahok ay binigyan din ng tig-P100,000 participation premium.

Idinaos ang makulay na parada sa Provincial Capitol Grounds at sinundan ng grand showdown sa Provincial Grandstand bilang bahagi ng pagdiriwang ng ika-111 anibersaryo ng Lalawigan ng Cotabato noong Setyembre 1, 2025.

Ayon kay Governor Emmylou “Lala” J. Taliño-Mendoza, ang Kalivungan Festival ay patunay ng masiglang kultura at pagkakaisa ng mga Cotabateño, at patuloy na magsisilbing inspirasyon sa pagpapaunlad ng tradisyon at sining sa lalawigan.

Source: Provincial Government of Cotabato

30/08/2025

CHAMPIONSHIP GAMES NG GOVERNOR LALA BASKETBALL TOURNAMENT, GAGANAPIN NA SA AGOSTO 31

Itinakda na ang Championship Games ng Governor Emmylou “Lala” J. Taliño-Mendoza Basketball Tournament sa darating na Agosto 31, 2025, sa Provincial Gymnasium, Amas, Kidapawan City.

Tampok sa nasabing paligsahan ang apat na pangunahing kategorya: Open Commercial, Under 18, Inter-LGU, at 40-Up. Magtatagisan ng galing ang mga natatanging koponan mula sa iba't ibang panig ng lalawigan para sa inaasam na titulo ng kampeon.

Inaasahan ang matitinding laban na puno ng liksi, diskarte, at husay sa larangan ng basketball. Inaanyayahan ang publiko na saksihan ang nasabing kaganapan at suportahan ang mga koponang Cotabateño sa isa na namang makasaysayang bakbakan sa hard court.

Source: Provincial Government of Cotabato

28/08/2025

MASAYANG MUSIKAHAN TAMPOK SA IKATLONG GABI NG KALIVUGAN NIGHTS SA COTABATO

Isang masaya at makulay na musikahan ang tumampok sa ikatlong gabi ng "Kalivungan Nights" ngayong Huwebes, Agosto 28, 2025, sa Provincial Capitol Pavilion, Amas, Kidapawan City, bilang bahagi ng pagdiriwang ng ika-111 anibersaryo ng lalawigan ng Cotabato.

Personal na dinaluhan ni Governor Emmylou "Lala" J. Taliño-Mendoza ang aktibidad, kasama ang mga lokal na opisyal mula sa bayan ng Kabacan sa pangunguna ni Mayor Evangeline P. Guzman. Masigla ring nakihalubilo at nagpa-picture ang gobernadora sa mga bisitang nagmula sa iba’t ibang bahagi ng lalawigan.

Nagpaabot ng pasasalamat si Governor Taliño-Mendoza sa mga Cotabateño sa kanilang patuloy na suporta sa mga programang inihanda ng pamahalaang panlalawigan para sa makabuluhang pagdiriwang.

Kabilang din sa mga dumalo sina 3rd District Representative Ma. Alana Samantha Taliño Santos, PCL Cotabato Chapter President Atty. Bblou Brizuela Benjamin, at mga miyembro ng Provincial Advisory Council (PAC) na sina Former RD Amalia J. Datukan at Kalivungan Festival Director Rene P. Villarico.

Source: Provincial Government of Cotabato

26/08/2025

MASAYANG MIDSAYAP, TAMPOK SA HALAD AT SINUGBA FESTIVALS

Muling sumisilay ang kasiyahan sa bayan ng Midsayap sa isinagawang “Masayang Midsayap” na tampok ang Halad at Sinugba Festivals. Layunin ng selebrasyon na ipamalas ang mayamang kultura, produkto, at likas na yaman ng bayan.

Ipinagmamalaki sa nasabing pagdiriwang ang mga lokal na produkto gaya ng mushroom crackers, taro crunch, kamote at banana chips, macaroni chicharon, pritong mani, tikoy, pilipit, yema candy, coco delight, dried mango, mulberry jam, calamansi juice, at mango puree. Tampok rin ang mga inuming pampainit tulad ng tableya, dark chocolate drink with peppermint, turmeric at mangosteen tonic, salabat, at mulberry wine.

Ibinida rin ang sariwang ani gaya ng adlai, black rice, red rice, NSIC RC 628 rice, gulay at prutas, pati na rin ang mga makukulay na Tinukib at Inaul crafts na sumasalamin sa mayamang kultura ng Midsayap.

Sa temang “Feel the joy here, sa Masayang Midsayap,” hinihikayat ang publiko na saksihan at makibahagi sa makulay at masaganang selebrasyon ng bayan.

Source: Provincial Government of Cotabato

21/08/2025

KAPATAWARAN AT PAGKAKAAYOS, NANGIBABAW SA NANGYARING KAGULUHAN SA BARANGAY ROSARY HEIGHTS 4

Personal na tinungo ni Mayor Bruce Matabalao ang Barangay Rosary Heights 4 matapos dumulog sa lokal na pamahalaan ang mga residente upang masolusyunan ang naganap na kaguluhan.

Pinakinggan ng alkalde ang pahayag ng bawat panig, na kalaunan ay nauwi sa pagpapatawad at pagkakaayos. Nangako si Jumel Abrasado na higit na paiiralin ang pasensya, lalawakan ang pang-unawa, at iiwasan ang pananakit, kasabay ng kanyang taos-pusong paghingi ng tawad kay Al Denzil Abdul.

Sa kabilang banda, nangako rin si Abdul na susunod sa mga patakaran ng barangay at ng lokal na pamahalaan. Ayon pa sa kanyang pamilya, mas nararapat na ituwid sa tamang paraan ang mga lumalabag kaysa saktan.

Batay sa ulat, nagsimula ang kaguluhan nang mahuli si Abdul na naninigarilyo sa pampublikong lugar, taliwas sa mahigpit na No Smoking/Vaping Policy na ipinatutupad ng Barangay Rosary Heights 4.

Source: Cotabato City Government

19/08/2025

CONGRATULATIONS TO THE WINNERS OF THE QUIZ BEE COMPETITION IN CELEBRATION OF THE LINGGO NG KABATAAN 2025

Bilang bahagi ng makabuluhang pagdiriwang ng Linggo ng Kabataan 2025, matagumpay na isinagawa ang Quiz Bee Competition na nagbigay-daan upang maipakita ang talino, husay, at galing ng ating mga kabataan mula sa iba’t ibang paaralan.

Narito ang mga nagwagi:

🏆 Champion: Notre Dame - RVM College of Cotabato
🥇 1st Place: Pilot Provincial Science High School and Technology
🥈 2nd Place: Coland System Technology, Inc.

Isang malaking pagbati at pagpupugay sa lahat ng kalahok na patuloy na nagbibigay-inspirasyon at nagsisilbing huwaran ng katalinuhan at dedikasyon ng kabataang Cotabateño.

Source: Cotabato City Government

16/08/2025

AGRI PARA SA LAHAT, PAGKAIN SASAPAT: CITY AGRICULTURIST, NANGUNA SA DEMO FARM SA COTABATO CITY

Pinangunahan ng Office of the City Agriculturist, kasama ang mga magsasaka mula sa Mother Barangay Tamontaka, ang pagtatanim at pagpapakita ng tamang pamamaraan ng pagpapayabong ng RC 438 early-maturing variety seeds sa isang 7,000 sq.m. rice demonstration site.

Layunin ng inisyatiba na maipamahagi ang tamang farming practices at paggamit ng climate-resilient seeds, bilang pagpapatuloy ng programang Climate-Smart Farmer’s Field School (CSFFS) na isinagawa noong 2024 kasama ang Conservation International – Philippines at MAFAR.

Source: Cotabato City Government

08/08/2025

PWDS SA MIDSAYAP, PINALAKAS SA PAMAMAGITAN NG VEGETABLE PRODUCTION TRAINING

TINGNAN: Patuloy ang pamahalaang panlalawigan sa pangunguna ni Governor Emmylou “Lala” Taliño-Mendoza sa pagbibigay ng pag-asa at oportunidad sa mga Persons with Disabilities (PWDs) sa pamamagitan ng mga programang nakasentro sa kanilang kapakanan.

Kabilang dito ang isinagawang Training on Vegetable Production ng Office of the Provincial Agriculturist (OPAg) sa pamumuno ni Engr. Elena E. Ragonton, katuwang si FITS Manager Engr. Allen Ray Villanueva, nitong Agosto 8 sa Mega Market Event Center. Lumahok dito ang mga miyembro ng Federation of Differently-Abled Persons o “Persons with Dreams” ng bayan.

Bilang resource speaker, ibinahagi ni Provincial Vegetable Coordinator Charlie P. Pabellan ang mga kaalaman sa sustenableng pagtatanim ng gulay sa bakuran upang magbigay ng karagdagang kita at suportahan ang food security. Namahagi rin ng IEC materials at binhing “7 in 1 Pinakbet pack” upang masimulan ng mga kalahok ang kanilang produksyon.

Source: Provincial Government of Cotabato

05/08/2025

CONSULTATIVE MEETING PARA SA LIBRENG WIFI PROJECT, ISINAGAWA SA COTABATO CITY

Nagsagawa ng consultative meeting ang mga opisyal mula sa 37 barangay ng lungsod kaugnay ng implementasyon ng Wide Internet Connectivity Project ng Bangsamoro Information and Communications Technology Office (BICTO) para sa libreng WIFI sa mga komunidad.

Dumalo sa pagpupulong sina BICTO Executive Director II Jonathan Mantikayan, Councilor Faidz Edzla (Chairman, Committee on Communication and Digitalization), Councilor Nasrudin “Kap Jonas” Mohammad (committee member), at mga City Councilor Bai Shalimar Candao, Guiadzuri Andong Midtimbang, at Mohammad Ali Mangelen.

Source: Cotabato City Government

03/08/2025

INTEGRATED HEALTH AWARENESS, ISINAGAWA SA ARAKAN; 28 BARANGAY, PINARANGALAN

TINGNAN:Isinagawa ng Integrated Provincial Health Office (IPHO) ang Integrated Health Awareness (IHA) noong Agosto 1, 2025 sa Arakan Super Health Center bilang bahagi ng kampanya para sa mas malawak na kaalaman sa kalusugan.

Tinalakay sa aktibidad ang mga isyu ukol sa STI, HIV/AIDS, at teenage pregnancy. Bilang pagkilala, 28 barangay ang ginawaran ng Certificate of Adolescent Friendly Health Facility (Level 1) matapos pumasa sa pamantayan. Umabot sa 11 indibidwal ang sumailalim sa HIV at syphilis tests, habang 160 adolescent kits ang naipamahagi.

Pinangunahan ito ni Dr. Eva C. Rabaya ng IPHO at dinaluhan ng mga lokal na opisyal at kinatawan ng DOH.

Source: Provincial Government of Cotabato

GO Cotabato