19/08/2024
كريتي سيارة ودرتي بها كسيدة 😱
! قرا باش تستافد
بالنسبة للناس لي كيكريو السيارة وكيحطو شيك ضمانة ! للتذكير داك الشيك ضمانة ماشي قانوني و لي شدو ارتكب جريمة عقوبتها السجن لكلا الطرفين (جنحة حيازة شيك على سبيل الضمانة)، لكن كيفاش تحمي راسك !!!
أولا ضروري تسول مول الوكالة إينا نوع من التأمين داير واش “tous risques” ولا عادي، لا ماكانش “tous risques” حاول ما تكريش من عندو حيت غادي تولي في مشاكل أنت في غنا عنها..
ثانيا متكريش السيارات الغالية ولا لي عاطية للعين أو جديدة لأنها ماشي في صالحك.. كيفاش ! حيت فاش غدير كسيدة غتنقام غالية فالإصلاح يعني نتا غتخلص كثر .
ختار وحدة على قد الحال أمارش باش حتى إلى طرات شي حاجة المصاريف غتكون أقل و غتخلص أقل.
“فاش كدير كسيدة مول كراء السيارات راه داير تأمين على الطموبيل إذن غتعوضو الشركة، لكن لا يعني أنك ماغتخلص والو ،لأن التأمين ماغيعوضوش 💯فـ💯، نتا غتخلص واحد الفرق لي هو 10% أو 5% لي باقي كتسما “Franchise “،باش مول الوكالة يرجع لو رزقو كامل لي خسر عليها باش تصايبات مايمكنش يتعوض بـ 90% مثلا و 10% يخلصها من جيبو لأنه كراها ليك و نتا لي درتي كسيدة.
دابا موالين وكالات كراء السيارات آش كيديرو !
كاين فيهم نصابة ولقاو لي ما عارفش القانون و كينصب عليك، مثلا الخسائر كاملة 4 ديال المليون، كتعوضو شركة التأمين بـ 3 ديال المليون (سقف التعويض) و كيقولك تانتا خلص ليا 3 ديال المليون تعويض.. وهكا كيصدق ضارب 6 ديال المليون و الخسائر أصلا كلها قيمتها غير 4 ديال المليون.. صدق مصاوب طموبيلتو كيما كانت و ربح 2 دالمليون من الفوق (نصب).
ولا مبغيتش تخلصهالو كيكتب فالشيك لي عندو خاوي 3 ديال المليون و كيدير فيه التاريخ و نتا ديجا سانيه و كيدفعو للبنكة، في حالة كان عندك الرصيد كيتقطع ليك، ماكانش كتقيد عليك إصدار شيك بدون رصيد و تمشي للمحكمة و كتحكم عليك بالحبس زائد غرامة وخا دبر على الفلوس وتخلص مول الشيك باش تعتق راسك زعما، لكن غدوز الحبس و تخلص الغرامة، لأنك درتي جريمة ثابتة فحقك وهي إصدار شيك بدون رصيد، عاد خلص خونا ولا كاع ماتخصلو لأنه ماكيبقاش عندك موشكيل معاه، كيولي مع المخزن.”
دابا نرجعو للقالب ديال التاريخ فالشيك..
التاريخ فالشيك ولا درتيه نهار عطيتيه ليه، و بقا يستفزك بيه لأنه غالبا ماكيدفعوش حيت لا دفعو نتا غدوز الحبس و تخلص غرامة للمحكمة و هو ما يربح والو معاك..
من جهة أخرى، ديما خصك تعرف شركة التأمين واش عوضت مول الوكالة ولا لا و شحال عوضاتو باش نتا تخلص غا الفرق لي غيكون قليل لي هو 10 % من الخسائر، وكاين شي خسائر نتا ماخصكش تخلصها، أصلا علاش داير التأمين، وفي حالات مثلا كنتي سكران أو حرقتي الضوء الأحمر و درتي كسيدة راه نتا عندك فيها المسؤولية إذن خصك تخلص 10 %.
ومتنساش ! الخسائر كيقيمها خبير ماشي ميكانيسان عندو كراج هو لي كيديك عندو حيت عشيرو، بان ليك داكشي مبالغ فيه قلو نجيبو خبير.
درت كسيدة مرحبا شحال ديال الخسائر، شحال عوضاتك شركة التأمين، شحال جا فحقي نعطيهلك و نبينا عليه السلام..
لا قريتي هادشي راه عمرك تقولب وعمر ينصب عليك شي واحد😉
بارطاجيو المساج يوصل للناس
منقول
