News of Kerala (2025)

25/07/2025

*📡 News of Kerala
📃✍
25.07.2025

റോട്ടറി ക്ളബ് ഓഫ് മണ്ണാറശാലയുടെ 2025-26 വർഷത്തെ ഭാരവാഹികൾ ചുമതലയേൽക്കുന്നു.

ഹരിപ്പാട് :- റോട്ടറി ക്ളബ് ഓഫ് മണ്ണാറശാലയുടെ 2025-26 വർഷത്തെ ഭാരവാഹികൾ ചുമതലയേൽക്കുന്നു. ജൂലൈ 27 ഞായറാഴ്ച വൈകിട്ട് 7 ന് ഹരിപ്പാട് ഡാണാപ്പടി ചോയ്സ് പ്ലാസ ഓഡിറ്റോറിയത്തിൽ വച്ചാണ് ചടങ്ങ്. റോട്ടറി ഡിസ്ട്രിക്ട് 3211 ഗവർണർ ഡോ മീര ജോൺ ഉദ്ഘാടനം നിർവഹിക്കും. ഹരിപ്പാട് എം എൽ എ രമേശ് ചെന്നിത്തല, സോൺ 22 അസിസ്റ്റന്റ് ഗവർണർ മായ സുരേഷ് എന്നിവർ സംസാരിക്കും. ഭാരവാഹികളായി സോണി എ സാമുവൽ (പ്രസിഡന്റ്),
കെ ജെ ജിതേഷ് (സെക്രട്ടറി), എസ് സതീഷ് (ട്രഷറർ) എന്നിവർ ചുമതലയേൽക്കും. തദവസരത്തിൽ റൈസ് ആൻഡ് ഷൈൻ, എഐ ഇൻ ഫോക്കസ്, ജനനി, ഗിഫ്റ്റ് ഓഫ് വിഷൻ ആൻഡ് സ്മൈൽ, ജാഗ്രത, സ്പാർകിൽ എന്നീ ക്ളബ് പദ്ധതികൾക്കും, റോട്ടറി ജില്ല പദ്ധതിയായ ഓപ്പോളിൻറെ ഭാഗമായി വിദ്യ, ആശ, നിർമല, ജനനി, ഭൂമിക എന്ന പരിപാടികൾക്കും തുടക്കം കുറിക്കും. കഴിഞ്ഞ 7 വർഷമായി ഹരിപ്പാട് പ്രദേശത്ത് ആരോഗ്യ, വിദ്യാഭ്യാസ, സ്ത്രീ ശാക്തീകരണം, യുവജന ശാക്തീകരണം, പരിസ്ഥിതി സംരക്ഷണം, സംരംഭകത്വം തുടങ്ങിയ സാമൂഹിക സേവനങ്ങളിൽ സജീവമായി ഇടപെടുന്ന ക്ളബാണ് റോട്ടറി ക്ളബ് ഓഫ് മണ്ണാറശാല.

പത്രസമ്മേളനത്തിൽ പ്രസിഡന്റ് സോണി എ സാമുവൽ, സെക്രട്ടറി കെ ജെ ജിതേഷ്, പി എ ജി ബി രവികുമാർ, പി എ ജി സുരേഷ് ഭവാനി എന്നിവർ പങ്കെടുത്തു.

25/07/2025

*📡 News of Kerala
📃✍
25.07.2025

എസ് എസ് എഫ് ആലപ്പുഴ ജില്ലാ സാഹിത്യോത്സവം ആരംഭിച്ചു.

ഹരിപ്പാട് : എസ് എസ് എഫ് ആലപ്പുഴ ജില്ലാ സാഹിത്യോത്സവ് ഡാണപ്പടി റീൻ പാലസിൽ ഓഡിറ്റോറിയത്തിൽ ആരംഭിച്ചു. ജില്ലയിലെ 7 ഡിവിഷനുകളിൽ നിന്നും 1000 ത്തിലേറെ കലാപ്രതിഭകൾ സാഹിത്യോത്സവിൽ മാറ്റുരക്കും. നിശബ്ദ വിലാപങ്ങളുടെ അടിത്തട്ട് എന്ന പ്രമേയത്തിലാണ് സാഹിത്യോത്സവം സംഘടിപ്പിച്ചിരിക്കുന്നത്. ശനിയാഴ്‌ച വൈകുന്നേരം നടക്കുന്ന ഉദ്ഘാടന സംഗമത്തിൽ എസ് എസ് എഫ് സംസ്ഥാന എക്‌സിക്യൂട്ടീവ് അംഗം യുസുഫ് സഖാഫി മുത്തേടം പ്രമേയേ പ്രഭാഷണം നടത്തും, മുൻ പ്രതിപക്ഷ നേതാവ് രമേശ് ചെന്നിത്തല മുഖ്യാതിഥിയാകും. മുസ്‌തഫ പി എറക്കൽ മുഖ്യപ്രഭാഷണം നടത്തും , നാട്ടൊരുക്കം പ്രാദേശിക പ്രതിസന്ധികൾ പരിഹാരങ്ങൾ എന്ന വിഷയത്തിൽ നടക്കുന്ന ചർച്ചാ സംഗമത്തിൽ ഡോ എ പി പ്രവീൺ, സുജീഷ്, അനസ് ശാമിൽ ഇർഫാനി എന്നിവർ സംബന്ധിക്കും, ഞായർ വൈകുന്നേരം സാഹിത്യോത്സവ് സമാപന സംഗമം കേന്ദ്ര മുശാവറ അംഗം ത്വാഹ മുസ്ലിയാർ കായംകുളം ഉദ്ഘാടനം ചെയ്യും

23/07/2025

📡 News of Kerala
ഹരിപ്പാട് പ്രസ്ക്ലബ്ബ് പ്രസിദ്ധികരണം
📃✍
23.07.2025

റോട്ടറി ക്ലബ് ഹരിപ്പാട് പുതിയ പ്രസിഡന്റിന്റെ സ്ഥാനാരോഹണവും സാമൂഹ്യ സേവന പരിപാടികളുടെ ഉദ്ഘാടനവും.

ഹരിപ്പാട് : പ്രദേശത്തെ ഏറ്റവും പഴക്കമുള്ളതും, സേവനപരിപാടികളിലൂടെ 5-സ്റ്റാർ ക്ലബ്ബായി റോട്ടറി ജില്ലാ 3211 ൽ അംഗീകാരം ലഭിച്ചതൂമായ, ഹരിപ്പാട് റോട്ടറി ക്ലബ്ബിനെ, 2025-26 റോട്ടറി വർഷം നയിക്കുവാൻ 37ാമത് പ്രസിഡന്റായി റോട്ടേറിയൻ ജി അരുണ്‍ നാഥ് സ്ഥാനാരോഹിതനാകുന്നു. സ്ഥാനാരോഹണ ചടങ്ങ് 2025 ജൂലൈ 26 ശനിയാഴ്ച രാത്രി 7.30ന് ക്ലബ് ഹാളിൽ വെച്ച് നടക്കും. ചടങ്ങിൽ നിലവിലെ പ്രസിഡന്റ് റോട്ടേറിയൻ ബീന ജയപ്രകാശ്, ജി അരുണ്‍ നാഥിനെ കോളണിയിച്ചു കൊണ്ട് ഹരിപ്പാട് റോട്ടറി ക്ലബ്ബിൻറെ 37 മത് പ്രസിഡണ്ടായി സ്ഥാനാരോഹിതനാക്കും. പുതിയ സെക്രട്ടറിയായി റോട്ടേറിയൻ സുനിൽ ദേവാനന്ദ്, ട്രഷററായി റോട്ടേറിയൻ അയ്യപ്പൻ കൈപ്പള്ളിൽ എന്നിവരും, മറ്റു ഭാരവാഹികളെയും ഔപചാരികമായി താനാരോഹണം നടത്തും. പാറശ്ശാല മുതൽ ചേർത്തല വരെയുള്ള അഞ്ച് റവന്യൂ ജില്ലകൾ ഉൾപ്പെടുന്ന റോട്ടറി ജില്ലാ 3211 ൻ്റെ ഡിസ്ട്രിക്ട് ഗവണർ റോട്ടേറിയൻ ഡോ ടിന ആന്റണിയുടെ നേതൃത്വത്തിൽ ഈ വർഷം വനിതാ ശാക്തീകരണത്തെ മുൻനിർത്തിയുള്ള "ഓപ്പോൾ" എന്ന പദ്ധതിയാണ് പ്രധാനമായി നടപ്പിലാക്കുന്നത്. ഇതിൽ ഉൾപ്പെടുന്ന 7 ഉപപദ്ധതികൾ
അഭയ- സുരക്ഷിത താമസം, വിദ്യ - വിദ്യാഭ്യാസ സഹായം,
ആശ – ആരോഗ്യ സംരക്ഷണം,
നിർമ്മല – ശുദ്ധജലവും, ശൗചാലയങ്ങളും
ശ്രേയ – തൊഴിലഭ്യാസ പരിശീലനം,
ജനനി – മാതൃ ശിശു സംരക്ഷണം,
ഭൂമിക – പരിസ്ഥിതി സംരക്ഷണം,
സ്ഥാനാരോഹണച്ചടങ്ങിനു ശേഷം ഹരിപ്പാട് റോട്ടറി ക്ലബ് ഏഴു പദ്ധതികളും ഉദ്ഘാടനം ചെയ്യുന്നു. അഭയ പദ്ധതിയുടെ ഭാഗമായി മഹാദേവികാട് പ്രദേശത്ത് ദുരിതത്തിൽ കഴിയുന്ന, രണ്ടു കുട്ടികളോടെയുള്ള കുടുംബത്തിന് സുരക്ഷിതമായ താമസ സൗകര്യം ഉണ്ടാക്കാൻ അരവിന്ദ് എൻജിനീയറിംഗ് വർക്സ് എന്ന സ്ഥാപനത്തിന് വർക്ക്ഓർഡർ നൽകും.
വിദ്യ: സാമ്പത്തികമായി പിന്നോക്കം നിൽക്കുന്ന വിദ്യാർത്ഥിയ്ക്ക് വിദ്യാഭ്യാസ സഹായം നൽകുന്നത് വഴി ഈ പദ്ധതി ഉദ്ഘാടനം ചെയ്യുന്നു. ആശ: കരുവാറ്റ ഗ്രാമ പഞ്ചായത്തുമായി ധാരണാ പത്രം ഒപ്പുവെച്ച്, പഞ്ചായത്തിനെ മെൻസ്ട്രുറൽ പാഡ് രഹിതമായി പ്രഖ്യാപിക്കാൻ വേണ്ടിയുള്ള മെൻസ്ട്രുറൽ കപ്പുകളുടെ വിതരണ പദ്ധതിക്ക് തുടക്കം കുറിക്കും. മൊബൈൽ മാമോഗ്രാം സ്ക്രീനിംഗ് ക്യാമ്പ് ഹരിപ്പാട് സംഘടിപ്പിക്കും. നിർമ്മല പദ്ധതിയുടെ ഉദ്ഘാടനം ഹരിപ്പാട് ഗവണ്മെന്റ് ബോയ്സ് ഹൈസ്കൂളിലെ പെൺകുട്ടികളുടെ ടോയ്ലറ്റ് ബ്ലോക്കുകളുടെ നവീകരണത്തിനായുള്ള വർക്ക് ഓർഡർ നൽകി നിർവഹിക്കുന്നതാണ്. ശ്രേയ പദ്ധതി ഉദ്ഘാടനം ചെന്നിത്തലയിലെ ബോസ് ക്യാരി ബാഗ്സുമായി ധാരണാ പത്രം കൈമാറി നിർവഹിക്കപ്പെടും. മുട്ടം സ്വാന്തനം പകൽവീട്ടിലെ മുതിർന്ന സ്ത്രീകളെ പേപ്പർ ബാഗ് നിർമ്മാണത്തിൽ പരിശീലിപ്പിക്കുകയും അതിലൂടെ അവർക്കൊരു വരുമാനമാർഗം ഉണ്ടാക്കുകയും ചെയ്യും. ജനനി പദ്ധതിയുടെ ഉദ്ഘാടനം ഹരിപ്പാട് റെയിൽവേ സ്റ്റേഷനിൽ ഒരു മുലയൂട്ടൽ കേന്ദ്രം സ്ഥാപിക്കാനുള്ള വർക്ക് ഓർഡർ നൽകി നിർവഹിക്കും. ഭൂമിക പദ്ധതിയുടെ ഉദ്ഘാടനം എസ് എൻ സെൻട്രൽ സ്കൂൾ കാമ്പസിൽ വൃക്ഷതൈകൾ നട്ടുപിടിപ്പിക്കൽ പദ്ധതിക്ക്
സ്കൂളുമായി ധാരണാ പത്രം കൈമാറി നിർവഹിക്കുന്നതാണ്.
പദ്ധതികളിലൂടെ റോട്ടറി ക്ലബ് ഹരിപ്പാട് സമൂഹത്തിനോട് ഉള്ള പ്രതിബദ്ധത പ്രകടിപ്പിക്കുകയും, സ്ത്രീ ശാക്തീകരണത്തിനുള്ള ഇടപെടലുകൾ ശക്തമാക്കുകയും ചെയ്യും. 2020-21 മുതൽ ഹരിപ്പാട് ഹുദ ട്രസ്റ്റ്‌ ആശുപത്രിയിൽ ക്ലബ്‌ നടത്തി വരുന്ന സൗജന്യ ഡയലിസിസ് പദ്ധതി പ്രകാരം ഇപ്പോൾ ആഴ്ചയിൽ 4 സൗജന്യ ഡയലിസിസ് നിർധനരായ രോഗികൾക്ക് നൽകി വരുന്നു. അപേക്ഷകളുടെ ബാഹുല്യം കണക്കിലെടുത്തു ഒരു പുതിയ ഗ്ലോബൽ ഗ്രാന്റ് പദ്ധതി കൂടി ക്ലബ്‌ നടപ്പിലാക്കുകയാണ്. ഇതുപ്രകാരം ഡാനപ്പടി കെയർ ക്രാഫ്റ്റ് ആശുപത്രിയിൽ രണ്ടും തട്ടാരമ്പലം ശ്രീകണ്ഠപുരം ഹോസ്പിറ്റലിൽ ഒന്നും വീതം പുതിയ ഡയലിസിസ് മെഷീനുകൾ നൽകുകയാണ്
ഇതു ഉടൻ തന്നെ പ്രവർത്തനം തുടങ്ങുമ്പോൾ പുതിയ 12 രോഗികൾക്ക് കൂടി ആഴ്ചയിൽ ഓരോ ഡയലിസിസ് സൗജന്യമായി നൽകാൻ കഴിയുന്നതാണ്. കഷ്ടത അനുഭവിക്കുന്ന നിർധന രോഗികൾക്ക് ഇതു വലിയ സഹായം ആകുമെന്നതിൽ സംശയം ഒന്നുമില്ല.
കൂടുതൽ വിവരങ്ങൾക്ക് ദയവായി ബന്ധപ്പെടുക:
അരുണ്‍ നാഥ്, പ്രസിഡന്റ് –ഫോൺ 949-568-6726
പ്രൊഫ. സബരിനാഥ് കെ, സർവീസ് പ്രൊജക്റ്റ് ഡയറക്ടർ ഫോൺ: 9447094120

23/07/2025

📡 News of Kerala
ഹരിപ്പാട് പ്രസ്ക്ലബ്ബ് പ്രസിദ്ധികരണം
📃✍
23.07.2025

പുസ്ത‌ക പ്രകാശനം,
സാഹിത്യ സദസ്സ്, കവിയരങ്ങ്

ഹരിപ്പാട് : പുസ്ത‌ക പ്രകാശനം, സാഹിത്യ സദസ്സ്, കവിയരങ്ങ് എന്നിവ വ്യാഴം ഉച്ചയ്ക്ക് 2 ന് അലംകൃത ആഡിറ്റോറിയത്തിൽ (ഉത്സവ് ഹോട്ടൽ ഒന്നാം നില) നടക്കുമെന്ന് നങ്ങ്യാർകുളങ്ങര ടി കെ എം എം കോളേജിലെ 1981-83 ലെ പൂർവ്വ വിദ്യാർത്ഥി കൂട്ടായ്മ ഭാരവാഹികൾ വാർത്താ സമ്മേളനത്തിൽ അറിയിച്ചു. ആർ സോമരാജന്റെ കേളി കൊട്ടോടെയാണ് പരിപാടികൾ ആരംഭിക്കുന്നത്.
കൂട്ടായ്മയിലെ അംഗമായ
ശ്രീകുമാരി രചിച്ച പവിഴമല്ലിയുടെ പ്രണയഗീതങ്ങൾ എന്ന പുസ്തകത്തിന്റെ പ്രകാശനം റിട്ട ഡി ജി പി ഡോ ജേക്കബ് തോമസ് ഐ പി എസ് നിർവ്വഹിക്കും. പ്രശസ്ത കവി കുരീപ്പുഴ ശ്രീകുമാർ
പുസ്‌തകം ഏറ്റുവാങ്ങും. ചേപ്പാട് രാജേന്ദ്രൻ അദ്ധ്യക്ഷനാകും നോവലിസ്റ്റ് കെ കെ സുധാകരൻ, ഡോ സജിത്ത് ഏവൂരേത്ത്, അമിത്ത് ഡേവിഡ്, സുരേഷ് മണ്ണാറശ്ശാല, ഹരികുമാർ ഇളയിടത്ത്, രഞ്ജിത്ത്,
കെ ലത, ശ്രീകുമാരി, വി രജനീഷ് സംസാരിക്കും. തുടർന്ന് നടക്കുന്ന കവിയരങ്ങിൽ കരുവാറ്റ കെ എം പങ്കജാക്ഷൻ അധ്യക്ഷനാകും. വാർത്താ സമ്മേളനത്തിൽ ചേപ്പാട് രാജേന്ദ്രൻ, കെ ലത, ശ്രീകുമാരി, ആർ സോമരാജൻ, സാഹിദ് പി എസ്, സതീഷ് കുമാർ കെ പി എന്നിവർ പങ്കെടുത്തു.

11/07/2025

📡 News of kerala
📃✍
10.07.2025

അനധികൃതമായി നടക്കുന്ന മണൽക്കൊളളയ്ക്കെതിരെ സിപിഐ എം പ്രക്ഷോഭത്തിലേക്ക്.

ഹരിപ്പാട് :- അഞ്ചരവർഷമായി അനധികൃതമായി നടക്കുന്ന മണൽക്കൊളളയ്ക്കെതിരെ സിപിഐ എം ചെറുതന പഞ്ചായത്ത് കമ്മിറ്റി പ്രക്ഷോഭത്തിലേക്ക് നീങ്ങുന്നുവെന്ന് സിപിഐ എം ചെറുതന പഞ്ചായത്ത് കമ്മിറ്റി ഭാരവാഹികൾ പത്രസമ്മേളനത്തിൽ അറിയിച്ചു. 2018 ൽ പ്രളയത്തിന് ശേഷം വെള്ളപ്പൊക്കം തടയുവാൻ തോട്ടപ്പള്ളി സ്പിൽവേ ചാനലിൽ അടിഞ്ഞ് കൂടിയിരിക്കുന്ന ചെളിയും മണലും നീക്കം ചെയ്യുന്നതിനായി സർക്കാർ നാല് മാസക്കാലത്തേയ്ക്ക് 11/02/2020 ൽ കരാർ നൽകുകയുണ്ടായി. ഈ നാല് മാസക്കാലവും പാണ്ടി പാലത്തിന് സമീപം നിന്ന് മണൽ എടുക്കുകയുണ്ടായി. വീയപുരം തുരുത്തേൽ മുതൽ കുറിച്ചിക്കൽ വരെയുള്ള ഭാഗത്തെ ചെളിയും മണലും നീക്കം ചെയ്യുന്നതിനായിരുന്നു കരാറെങ്കിലും അവിടെ ഒരു പ്രവൃത്തിയും ചെയ്യാതെ ഒരു പ്രദേശത്ത് മാത്രമാണ് മണലൂററ് നടത്തിയത്. ഇവിടെ നിന്നും ലഭിക്കുന്നത് മാർക്കറ്റിൽ ഉയർന്ന വില ലഭിക്കുന്ന സിലിക്ക മണലാണ്. 18/06/2020 വരെയായിരുന്നു ഈ കരാറിന്റെ കാലാവധിയെങ്കിലും ഇറിഗേഷൻ വകുപ്പിലെ ഉദ്യോഗസ്ഥരും മണൽ മാഫിയയും ചേർന്ന് ചേർന്ന് നിശ്ചിത അളവിലുള്ള മണൽ എടുക്കുവാൻ കഴിഞ്ഞില്ല എന്ന് തെറ്റായ വിവരങ്ങൾ നൽകി കരാർ കാലാവധി നീട്ടി നീട്ടി കൊണ്ടു പോകുകയാണ് ചെയ്തത്. ആദ്യം ഘട്ടത്തിൽ ചില ഉദ്യോഗസ്ഥർ വെട്ടുകുളഞ്ഞിയിൽ എത്തിയിരുന്നു. ഇപ്പോൾ മണൽ എങ്ങോട്ടാണ് കൊണ്ടു പോകുന്നത് എന്ന് പോലും ആർക്കും അറിയില്ല. ഓരോ ദിവസവും എത്ര മണൽ കൊണ്ടു പോകുന്നു എന്ന കണക്ക് പോലും ലഭ്യമല്ല. ജങ്കാറുകളിലും വാഹനങ്ങളിലുമൊക്കെയായി ഒരു പരിശോധനയും ഒരു കണക്കുമില്ലാതെ പല സ്ഥലങ്ങളിലേക്ക് മണൽ കടത്തുകയാണ്. ഈ പ്രദേശത്ത് നിന്നും 1,16,894 എം ക്യൂബ് മണ്ണ് നീക്കം ചെയ്യാനുണ്ടെന്നാണ് ഇറിഗേഷൻ വകുപ്പ് പറയുന്നത്. ഈ അഞ്ചര വർഷക്കാലത്തിനുളളിൽ 36,331 എം ക്യൂബ് മണ്ണ് മാത്രമേ നീക്കം ചെയ്തിട്ടുള്ളൂ എന്നാണ് പറയുന്നത്. ഒരു എം ക്യൂബ് മണ്ണിന് 380 രൂപയാണ് സർക്കാരിലേക്ക് അടയ്ക്കേണ്ടത്. ഒരു ദിവസം15 മുതൽ 20 വരെ എം ക്യൂബ് മണൽ കയറ്റുന്ന 20-25 ലോറികൾ പോകുന്നുണ്ട്. അതായത് കുറഞ്ഞത് 300 മുതൽ 500 വരെ എം ക്യൂബ് മണൽ കൊണ്ടുപോകുന്നുണ്ട്. അപ്പോൾ കുറഞ്ഞത് 3 മുതൽ 5 ലക്ഷം എം ക്യൂബ് മണൽ കൊണ്ടുപോയിട്ടുണ്ട്. ഏറ്റവും കുറഞ്ഞത് 2,65,000 എം ക്യൂബ് മണലെങ്കിലും സർക്കാരിന് പണമടയ്ക്കാതെ കടത്തിയിട്ടുണ്ട്. 10 കോടിയുടെ തട്ടിപ്പാണ് നടത്തിയിരിക്കുന്നത്. ഇവരുടെ മണലൂററിൻറെ ഫലമായി 50 ഓളം കുടുംബങ്ങൾ താമസിക്കുന്ന മുടീക്കുഴി ദ്വീപ് മഴ സമയത്ത് പൂർണ്ണമായും ഒഴുകി പോകുന്ന നിലയിലാണ്. പാലേലിൽ കിഴക്ക് വശം ഒററവേലി പാടശേഖരത്തിൻറെ ബണ്ടിനും, 40 ഓളം കുടുംബങ്ങൾ താമസിക്കുന്ന സംരക്ഷണ ഭിത്തി ഇല്ലാത്ത കൊടുവത്തുംകുളം ഭാഗത്ത് ബണ്ട് ഇടിഞ്ഞ് താഴുന്നതിനും മണലൂററ് കാരണമാണ്. പെരുമാങ്കര, മാതിരം പളളി പ്രദേശങ്ങളിൽ കൃഷി ചെയ്തുവരുന്ന തേവേരി തണ്ടപ്ര പാടശേഖരത്തിൻറെ ബണ്ടും തകരുകയാണ്. ചെറുതനയിൽ ഒരു പ്രദേശത്തെ മുഴുവനായി നശിപ്പിക്കുന്ന ഡ്രഡ്ജിംഗ് അവസാനിപ്പിക്കണം, കരാർ കാലാവധി നീട്ടി കൊടുക്കാൻ പാടില്ല, മണൽ കടത്ത് മൂലം തകർന്ന ആയാപറമ്പ് - കുററിയിൽ മുക്ക് റോഡ് പുനർനിർമ്മിക്കണം എന്നീ ആവശ്യങ്ങൾ ഉന്നയിച്ച് സിപിഐ എം ചെറുതന പഞ്ചായത്ത് കമ്മിറ്റിയുടെ നേതൃത്വത്തിൽ പാണ്ടിയിൽ വച്ച് ജൂലൈ 18 ന് രാവിലെ ബഹുജന പ്രക്ഷോഭം സംഘടിപ്പിക്കുന്നു. പത്രസമ്മേളനത്തിൽ സിപിഐ എം ജില്ല കമ്മിറ്റി അംഗം ശ്രീകുമാർ ഉണ്ണിത്താൻ, ഹരിപ്പാട് ഏരിയ കമ്മിറ്റി സെക്രട്ടറി സി പ്രസാദ്, ഏരിയ കമ്മിറ്റി അംഗം ആർ രാജേഷ്, എൽസി സെക്രട്ടറി പി ജി ശശി എന്നിവർ പങ്കെടുത്തു.

18/06/2025

ഹരിപ്പാട് ഗവ :മോഡൽ ബോയ്സ് ഹയർ സെക്കൻഡറി സ്‌കൂളിൽ പ്ലസ് വൺ പ്രവേശനോത്സവം വരവേൽപ്പ് 2025 സംഘടിപ്പിച്ചു. ചടങ്ങിൽ സ്കൂൾ പ്രിൻസിപ്പാൾ ജയശ്രീ എ സ്വാഗതം ആശംസിച്ചു. പി ടി എ പ്രസിഡന്റ് ബി കൃഷ്ണകുമാർ അദ്ധ്യക്ഷത വഹിച്ച ചടങ്ങിൽ ഹരിപ്പാട് നഗരസഭ വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ എസ് കൃഷ്ണകുമാർ മുഖ്യപ്രഭാഷണം നടത്തി. നറുക്കെടുപ്പിലൂടെ തിരഞ്ഞെടുക്കപ്പെട്ട പ്ലസ് വൺ പ്രതിനിധികളായ രണ്ട് വിദ്യാർഥികൾ പ്രവേശനോത്സവത്തിന്റെ ഉദ്ഘാടനം നിർവഹിച്ചു. വാർഡ് കൗൺസിലർ വൃന്ദ എസ് കുമാർ, എസ് എം സി ചെയർമാൻ അനിൽകുമാർ, പി ടി എ അംഗങ്ങളായ വിക്രമൻ പിള്ള സുധീഷ് എന്നിവർ നവാഗതർക്ക് ആശംസകൾ അർപ്പിച്ചു. പ്ലസ് ടൂ, പ്ലസ് വൺ പരീക്ഷകളിൽ ഉന്നതവിജയം നേടിയവർക്ക് പുരസ്‌കാര വിതരണവും അനുമോദനവും ചടങ്ങിൽ സംഘടിപ്പിച്ചു. തുടർന്ന് രക്ഷിതാക്കൾക്കായി ലഹരിവിരുദ്ധ ബോധവത്കരണ ക്ലാസുകൾ എൻ എസ് എസ് കോർഡിനേറ്റർ ജസീന്ത, സൗഹൃദാ കോർഡിനേറ്റർ ദൃശ്യ എന്നിവർ നയിച്ചു. സ്റ്റാഫ് സെക്രട്ടറി സിന്ധു പി നായർ ചടങ്ങിൽ കൃതജ്ഞത അർപ്പിച്ചു.

14/06/2025

നാഷണൽ ഹൈവേ വികസനത്തിൻ്റെ ഭാഗമായി നങ്ങ്യാർകുളങ്ങര ജംഗ്ഷനിൽ അനുഭവപ്പെടുന്ന യാത്രാ ദുരിതം പരിഹരിക്കുക, ഡി വൈ എഫ് ഐ ചിങ്ങോലി നാലാം യൂണിറ്റ് സമ്മേളനം

ഹരിപ്പാട : നാഷണൽ ഹൈവേ വികസനത്തിൻ്റെ ഭാഗമായി നങ്ങ്യാർകുളങ്ങര ജംഗ്ഷനിൽ അനുഭവപ്പെടുന്ന യാത്രാ ദുരിതം പരിഹരിക്കണമെന്ന് ഡി വൈ എഫ് ഐ നാലാം യൂണിറ്റ് സമ്മേളനം പ്രമേയത്തിലൂടെ ആവശ്യപ്പെട്ടു. മഴക്കാലം ആരംഭിച്ചതോടെ കാൽനട യാത്രക്കാർക്കുപോലും സഞ്ചരിക്കാൻ കഴിയാത്ത അവസ്ഥയാണ്. നൂറ് കണക്കിന് വിദ്യാർത്ഥികൾ ഉൾപ്പെടെ കടന്നുപോകുന്ന നാഷണൽ ഹൈവേയിലെ പ്രധാന ജംഗ്ഷനിൽ അടിയന്തരമായി ടാറ് ചെയ്ത് മെച്ചപ്പെടുത്താൻ ദേശീയപാതാ അതോറിറ്റിയും കരാറുകാരനും അടിയന്തിര നടപടി സ്വീകരിക്കണമെന്ന് സമ്മേളനം ആവശ്യപ്പെട്ടു . സംഘടനാ സമ്മേളനങ്ങളുടെ ഭാഗമായി ചിങ്ങോലി മേഖലയിലെ നാലാം യൂണിറ്റ് സമ്മേളനം കാർത്തികപ്പള്ളി ബ്ലോക്ക് കമ്മിറ്റി പ്രസിഡൻ്റ് ആർ രഞ്ചിത്ത് ഉദ്ഘാടനം ചെയ്തു. മേഖലാ പ്രസിഡൻ്റ് മിഥിൻ കൃഷ്ണ, സെക്രട്ടറി കെ സിനുനാഥ്, വിപിന ചന്ദ്രൻ കെആർ, അഖിൽ വി, അക്ബർ ബാദുഷ, എം മുനീറ, സോബി ബി, എസ് സന്ദീപ് എന്നിവർ സംസാരിച്ചു. ഭാരവാഹികൾ ആയി അഞ്ചന ദീപക് (പ്രസിഡൻ്റ്), ഡി ദീപു (സെക്രട്ടറി), അനീഷ് ജോസ് (വൈസ് പ്രസിഡൻ്റ്), അർജുൻ കെ (ജോ .സെക്രട്ടറി) എന്നിവരെ തിരഞ്ഞെടുത്തു. യൂണിറ്റ് സമ്മേളനത്തിൻ്റെ ഭാഗമായ പൊതു സമ്മേളനം ജൂൺ 15 വൈകിട്ട് 5 മണിക്ക് കയർ ഫെഡ് ചെയർമാൻ ടി കെ ദേവകുമാർ പൊതു സമ്മേളനം ഉദ്ഘാടനം ചെയ്യും. മുതുകുളം ബ്ലോക്ക് പഞ്ചായത്ത് പ്രസിഡന്റ് ഡി അംബുജാക്ഷി ടീച്ചർ +2, എസ് എസ് എൽ സി പരീക്ഷയിൽ മികച്ച വിജയം നേടിയ പ്രതിഭകളെ ആദരിയ്ക്കും, മുതുകുളം ബ്ലോക്ക് പഞ്ചായത്ത് വൈസ് പ്രസിഡന്റ് ജി ഉണ്ണികൃഷ്ണൻ പഠനോപകരണ വിതരണം നിർവഹിയ്ക്കും, ഡി വൈ എഫ് ഐ മേഖലാ സെക്രട്ടറി കെ സിനുനാഥ് മുതിർന്നവരെ ആദരിയ്ക്കും പ്രസിഡൻ്റ് മിഥിൻ കൃഷ്ണ ഹരിത കർമ സേനാംഗങ്ങളെ ആദരിയ്ക്കും, സി പി ഐ എം നാലാം ബ്രാഞ്ച് സെക്രട്ടറി ബിനു ഡി തൊഴിലുറപ്പ് തൊഴിലാളികൾക്ക് റെയിൻ കോട്ട് വിതരണം ഉൽഘാടനം ചെയ്യും വിപിനചന്ദ്രൻ കെ ആർ ലഹരി വിരുദ്ധ പ്രതിജ്ഞ നൽകും. എ എം നൗഷാദ്, സുധി സുകുമാരൻ, അശ്വതി തുളസി, എസ് സന്ദീപ്, അഖിൽ ജയൻ, ജയേഷ് എം, മിഥുൻമോഹൻ, പി വിജയൻ, അർജുൻ കെ, ആർ ബിജു എന്നിവർ ആശംസകൾ അർപ്പിക്കും.

15/05/2025

കാർത്തികപ്പള്ളി: പാലിന് ഇൻസെറ്റിവ് വിതരണം ചെയ്തു. ക്ഷീര സംഘങ്ങളിൽ മാർച്ച് മാസം അളന്ന പാലിന് ആണ് മിൽമ ലിറ്ററിന് 4 രൂപ ഇൻസെൻ്റീവ് നൽകിയത്. ചിങ്ങോലി കിഴക്ക് ക്ഷീരോൽപാദക സഹകരണം സംഘത്തിൽ സംഘം പ്രസിഡൻ്റ് ബി കൃഷ്ണകുമാർ ക്ഷീര കർഷകൻ എസ് രാമചന്ദ്രന് നൽകി വിതരണ ഉൽഘാടനം നിർവഹിച്ചു. മാർച്ച് മാസത്തിൽ പാൽ അളന്ന കർഷകർക്ക് മിൽമ നൽകിയ 28469 രൂപയും സൊസൈറ്റി നൽകിയ 6981 രൂപയും ചേർത്ത് 28 കർഷകർക്ക് 8862 ലിറ്റർ പാലിന് 35450 രൂപ വിതരണം ചെയ്തു. ഡി ആനന്ദവല്ലി അദ്ധ്യക്ഷത വഹിച്ച യോഗത്തിൽ കെ ശിവദാസൻ, എസ് രാജൂ, അജ്ഞലി ചന്ദ്രൻ, വീ ഗീവർഗ്ഗീസ്, രവിന്ദ്രനാഥപണിക്കർ എന്നിവർ സംസാരിച്ചു.

10/05/2025

📡 News of Kerala
📃✍
09.05.2025

ഹരിപ്പാട്:മുതുകുളം ബ്ലോക്ക് പഞ്ചായത്ത് നടപ്പിലാക്കിക്കൊണ്ടിരിക്കുന്ന എ ബി സി പദ്ധതിയെ പറ്റി തെറ്റായ വാർത്തകളാണ് വരുന്നതെന്ന് ബ്ലോക്ക് പഞ്ചായത്ത് പ്രസിഡന്റ് അംബുജാക്ഷി ടീച്ചർ വാർത്താ സമ്മേളനത്തിൽ അറിയിച്ചു.

2023-24 ൽ എ ബി സി പദ്ധതിക്കായി പ്രോജക്ട് ഏറ്റെടുക്കുകയും, മുതുകുളം ബ്ലോക്ക് പഞ്ചായത്ത്, മുതുകുളം ബ്ലോക്ക് പഞ്ചായത്ത് പരിധിയിലെ ഗ്രാമ പഞ്ചായത്തുകൾ, കായംകുളം മുനിസിപ്പാലിറ്റി എന്നിവരുടെ സഹായത്തോടെ 30/08/2024-ൽ സ്പിൽ ഓവർ ആക്കി, 20 സെൻ്റ് ഭൂമി വാങ്ങുകയും ചെയ്തു. ഭൂമി വാങ്ങിയതിന് 20,87,015/- രൂപ ചെലവഴിച്ചു. ഭൂമി വാങ്ങുന്നതിന് വേണ്ടി പത്തിയൂർ, മുതുകുളം, ദേവികുളങ്ങര, കണ്ടല്ലൂർ, ചിങ്ങോലി, കൃഷ്ണപുരം, ചേപ്പാട് എന്നീ പഞ്ചായത്തുകളും, കായംകുളം മുനിസിപ്പാലിറ്റിയും ചേർന്ന് 19,00,000/- രൂപയാണ് നല്കിയിട്ടുള്ളത്.
ആറാട്ടുപുഴ ഗ്രാമപഞ്ചായത്ത് വിഹിതം തന്നിരുന്നില്ല. തുടർന്ന് ഈ സ്ഥലത്ത് കെട്ടിടം, കേജ്, ചുറ്റുമതിൽ എന്നിവയുടെ നിർമ്മാണത്തിനായി അസി. എക്സിക്യൂട്ടീവ് എൻജിനീയർ നിർവ്വഹണ ഉദ്യോഗസ്ഥനായി പ്രോജക്ട് ഏറ്റെടുക്കുകയും, പ്ലാൻ തയ്യാറാക്കി ജില്ലാ മൃഗസംരക്ഷണ ഓഫീസറിൽ നിന്നും അംഗീകാരം വാങ്ങി തുടർ നടപടിയിലേക്ക് നീങ്ങിയപ്പോൾ ജില്ലാ പ്ലാനിംഗ് ഓഫീസിൽ നിന്നും 20/12/2024ൽ ഹരിപ്പാട് ബ്ലോക്ക് പഞ്ചായത്തിനെ നിർവ്വഹണ സ്ഥാപനമായി നിശ്ചയിച്ചതിനെ തുടർന്ന് ആയതിൻ്റെ നിജസ്ഥിതി ആവശ്യപ്പെടുകയും പിന്നീട് മുതുകുളം ബ്ലോക്ക് പഞ്ചായത്തിനെ തന്നെ നിർവ്വഹണ സ്ഥാപനമായി 27/01/2025 ൽ നിശ്ചയിച്ചതായി 13/02/2025 ൽ ജില്ലാ പ്ലാനിംഗ് ഓഫീസർ അറിയിക്കുകയും ചെയ്തു. കെട്ടിടത്തിനും അനുബന്ധ സൗകര്യങ്ങൾക്കുമായി 2024-25 -ൽ ഏറ്റെടുത്ത പദ്ധതിക്ക് ഏകദേശം ഒന്നര കോടിയോളം രൂപ ചെലവ് പ്രതിക്ഷിയ്ക്കുന്നു. ആറാട്ടുപുഴ, ഉൾപ്പടെയുള്ള മുതുകുളം ബ്ലോക്ക് പഞ്ചായത്ത് പരിധിയിലെ പഞ്ചായത്തുകളും കായംകുളം നഗരസഭ, ഹരിപ്പാട് ബ്ലോക്ക് പരിധിയിൽപ്പെട്ട പഞ്ചായത്തുകൾ, ഹരിപ്പാട് നഗരസഭ ഇവയെല്ലാം കൂടി ചേർന്ന് 42,59,459/- രൂപയാണ് കെട്ടിട നിർമ്മാണത്തിനും അനുബന്ധ സൗകര്യങ്ങൾക്കുമായി മുതുകുളം ബ്ലോക്ക് പഞ്ചായത്തിന് നാളിതുവരെ നല്കിയിട്ടുള്ളത്. പദ്ധതി നടപ്പിലാക്കുന്നതിനായി ക്ഷണിച്ച പദ്ധതിയുടെ ഡി പി ആർ ടെണ്ടറിൽ ആരും പങ്കെടുക്കാതിരുന്നതിനാൽ പി എം സി വഴി ടെണ്ടർ ക്ഷണിക്കുകയും, സിൽക്ക് ടെണ്ടർ സമർപ്പിക്കുകയും അവർ വഴി തുടർ പ്രവർത്തനങ്ങൾ നടത്തുന്നതിന് തീരുമാനിക്കുകയും ചെയ്തു. എ ബി സി പദ്ധതിയുമായി ബന്ധപ്പെട്ട് കായംകുളം മുനിസിപ്പാലിറ്റിയിൽ നിന്നും 2023-24 -ൽ ₹ 2,00,000/- രൂപയും 2024-25 -ൽ ₹ 5,50,000/- രൂപയും മാത്രമാണ് നൽകിയിട്ടുള്ളത്. മുതുകുളം ബ്ലോക്ക് പഞ്ചായത്ത് എ ബി സി പദ്ധതിയുടെ നടത്തിപ്പിനുള്ള നടപടികളുമായി മുന്നോട്ട് പോകുകയാണ്. പദ്ധതി അട്ടിമറിക്കാനുള്ള യാതൊരു ശ്രമവും മുതുകുളം ബ്ലോക്ക് പഞ്ചായത്തിന്റെ ഭാഗത്തു നിന്നും ഉണ്ടായിട്ടില്ലാത്തതാണ്.

എ ബി സി പദ്ധതിയുടെ നടത്തിപ്പ് ബ്ലോക്ക് പഞ്ചായത്തിന്റെ ഉത്തരവാദിത്തമായി നിശ്ചയിച്ചിട്ടുണ്ടെങ്കിലും ആലപ്പുഴ ജില്ലയിൽ മറ്റൊരു ബ്ലോക്ക് പഞ്ചായത്തും എ ബി സി പദ്ധതിക്കായി സ്ഥലം കണ്ടെത്തുകയോ, തുടർപ്രവർത്തനങ്ങളോ
ചെയ്തിട്ടില്ലാത്തതുമാകുന്നു. കണിച്ചുകുളങ്ങരയിൽ ജില്ലാപഞ്ചായത്ത് ഏറ്റെടുത്ത സെന്ററിൻ്റെ പ്രവർത്തനമാണ് ആരംഭിച്ചിട്ടുള്ളത്. മുതുകുളം ബ്ലോക്ക് പഞ്ചായത്ത് സ്വന്തം നിലയിൽ പദ്ധതി ഏറ്റെടുത്തതിനെ തുടർന്നാണ് കായംകുളം നഗരസഭ, ഹരിപ്പാട് ബ്ലോക്ക് പഞ്ചായത്ത്, ഹരിപ്പാട് നഗരസഭ, എന്നിവയെക്കൂടി ഡി പി സി യോഗം ഉൾപ്പെടുത്തിയിട്ടുള്ളത്.

08/05/2025 ലെ പ്രമുഖ ദിനപ്പത്രത്തിൽ മുതുകുളം ബ്ലോക്ക് പഞ്ചായത്ത് എ ബി സി പദ്ധതിയെ അട്ടിമറിക്കുന്നുവെന്നും കായംകുളം നഗരസഭ കഴിഞ്ഞ നാല് വർഷങ്ങളിലായി പ്രതിവർഷം ₹ 5,00,000/- രൂപ വീതം എ ബി സി പദ്ധതിക്കായി മുതുകുളം ബ്ലോക്ക് പഞ്ചായത്തിന് നൽകുന്നുവെന്നും, ഒരു രൂപ പോലും ബ്ലോക്ക് പഞ്ചായത്ത് ഇതുവരെ ചെലവഴിച്ചിട്ടില്ലെന്നും തെറ്റായ വാർത്ത നൽകിയിരിക്കുന്നു. എന്നാൽ കായംകുളം നഗരസഭ കഴിഞ്ഞ രണ്ട് വർഷങ്ങളിലായി ₹ 7,50,000/- രൂപ മാത്രമാണ് ബ്ലോക്ക് പഞ്ചായത്തിന് നൽകിയിട്ടുള്ളതെന്നും ബ്ലോക്ക് പഞ്ചായത്തും കായംകുളം നഗരസഭയും, കൂടാതെ ബ്ലോക്ക് പരിധിയിലെ എട്ട് ഗ്രാമപഞ്ചായത്തുകളും ഹരിപ്പാട് ബ്ലോക്ക് പരിധിയിലെ ഏഴ് ഗ്രാമപഞ്ചായത്തുകളും, ഹരിപ്പാട് നഗരസഭ എന്നിവയും പദ്ധതിയിൽ ഉൾപ്പെട്ടിട്ടുള്ളതാണെന്നും വസ്തു വാങ്ങുന്നതിനായി ₹ 20,87,015/- രൂപ ചെലവഴിച്ചിട്ടുള്ളതാണെന്നും തുടർ നടപടികൾ നടന്നു വരുന്നതാണെന്നും ആയതിനാൽ തെറ്റായി നൽകിയ വാർത്ത പിൻവലിക്കണമെന്നും മുതുകുളം ബ്ലോക്ക് പഞ്ചായത്ത് പ്രസിഡന്റ് അംബുജാക്ഷി ടീച്ചർ വാർത്താ സമ്മേളനത്തിൽ ആവശ്യപ്പെട്ടു. വൈസ് പ്രസിഡന്റ്
ജി ഉണ്ണികൃഷ്ണൻ, ആരോഗ്യ - വിദ്യാഭ്യാസ സ്റ്റാൻറ്റിംഗ് കമ്മറ്റി ചെയർപേഴ്സൺ മണി വിശ്വനാഥ്, വികസന സ്റ്റാന്റിംഗ് കമ്മറ്റി ചെയർപേഴ്സൺ എം ജനുഷ, ക്ഷേമകാര്യ സ്റ്റാന്റിംഗ്കമ്മറ്റി ചെയർപേഴ്സൺ ഗീത ശ്രീജി എന്നിവരും വാർത്താ സമ്മേളനത്തിൽ പങ്കെടുത്തു.

26/03/2025

കെ എസ് ഈ ബി കരാർ തൊഴിലാളികൾ കെ എസ് ഈ ബി മാവേലിക്കര ഡിവിഷൻ ഓഫീസിലേക്ക് മാർച്ചും ധർണയും നടത്തി.

മാവേലിക്കര: കേരള സ്റ്റേറ്റ് ഇലക്ട്രിസിറ്റി ബോർഡ് കോൺട്രാക്‌ട് വർക്കേഴ്‌സ് അസോസ്സിയേഷൻ (സി.ഐ.ടി.യു ) വിൻ്റെ നേതൃത്തത്തിൽ കരാർ തൊഴിലാളികൾ മാവേലിക്കര ഡിവിഷൻ ഓഫീസിലേക്ക് മാർച്ചും ധർണയും നടത്തി. ധർണ്ണ സി ഐ ടി യു മാവേലിക്കര ഏരിയ സെക്രട്ടറി എസ് അനിരുദ്ധൻ ഉദ്ഘാടനം ചെയ്തു. കെ എസ് ഈ ബി കോൺട്രാക്റ്റ് വർക്കേഴ്സ് അസോസിയേഷൻ (സി ഐ റ്റി യു) ഡിവിഷൻ കമ്മിറ്റി അംഗം റ്റി ലാൽജി അദ്ധ്യക്ഷത വഹിച്ച യോഗത്തിൽ ജില്ലാ സെക്രട്ടറി അനു കോയിക്കൽ, ബി കൃഷ്ണകുമാർ, റെനി പി തോമസ്സ് എന്നിവർ സംസാരിച്ചു. ടി ഒ ഡി മീറ്റർ റീഡിംഗിന് മാന്യമായ വേതനം അനുവദിക്കുക, ടേൺ കീ വർക്കുകൾ നിർത്തലാക്കി പെറ്റി കോൺട്രാക്‌ട് തൊഴിലാളികൾക്ക് ജോലി ഉറപ്പാക്കുക, എല്ലാ ദിവസ വേതന തൊഴിലാളികളുടേയും വേതനം വർദ്ധിപ്പിക്കുക, ജനറേഷൻ മേഖലയിൽ അനുവദിച്ച 15% വേതന വർദ്ധനവ് എല്ലാ തൊഴിലാളി കൾക്കും നൽകുക, വർക്കർമാർക്ക് അനുവദിച്ച 850 രൂപ എല്ലാ മേഖലയിലുമുള്ള വർക്കർമാർക്കും നൽകുക, പെറ്റി കോൺട്രാക്‌ട് ബില്ലുകൾക്ക് യഥാസമയം തുക അനുവദിക്കുക. കൂലി നിശ്ചയിക്കാതെ ജോലി അടിച്ചേൽപ്പിക്കുന്ന മാനേജ്മെൻ്റ് നടപടികൾ അവസാനിപ്പിക്കുക, ലേബർ ഡേറ്റാ പ്രകാരം വേതനം വർദ്ധിപ്പിക്കുമ്പോൾ പണിയെടുക്കുന്ന എല്ലാ വിഭാഗം തൊഴിലാളികളേയും ലിസ്റ്റിൽ ഉൾപ്പെടുത്തുക, കരാർ തൊഴിലാളികൾക്ക് ലൈസൻസ് ഏർപ്പെടുത്താനുള്ള നീക്കം അവസാനിപ്പിക, ബില്ലുകൾ യഥാസമയം മാറി നൽകുക തുടങ്ങി നിരവധി ആവശ്യങ്ങൾ ഉന്നയിച്ചാണ് കരാർ തൊഴിലാളികൾ പ്രക്ഷോഭം നടത്തുന്നത്.

26/03/2025

📡 News of Kerala
📃✍
26.03.2025

എൽ ഡി എഫ് കൗൺസിലർമാർ നഗരസഭയെ അപകീർത്തിപ്പെടുത്തുന്നതിനും വികസന പ്രവർത്തനങ്ങൾ തടസ്സപ്പെടുത്തുവാനും ശ്രമിക്കുന്നു എന്ന ചെയർമാന്റെ പ്രസ്താവന അപലപനീയവും പ്രതിഷേധാർഹവുമാണന്ന് ഹരിപ്പാട് നഗരസഭയിലെ എൽ ഡി എഫ് ജനപ്രതിനിധികൾ വർത്താ സമ്മേളനത്തിൽ അറിയിച്ചു.

കോൺഗ്രസ്സിലെയും യു ഡി എഫ് ലെയും ഗ്രൂപ്പ് വഴക്കും തമ്മിലടിയും മൂലം പദ്ധതി നടത്തിപ്പിൽ ശ്രദ്ധിക്കാൻ ഭരണകക്ഷിയ്ക്ക് കഴിയുന്നില്ല. 2020-2021 മുതൽ 2023-2024 വരെ സംസ്ഥാന സർക്കാർ നൽകിയ പദ്ധതിവിഹിതം ലാപ്‌സ് ആക്കുന്നതിൽ കോൺഗ്രസ്സ് ഭരണസമിതി മത്സരിക്കുകയാണ്. 2020-2021 മുതൽ 2021-2022 വരെ 4 കോടി രൂപയും 2023-2024 ൽ 2 കോടി രൂപയും പദ്ധതി വിഹിതം ഉപയോഗിച്ച് റോഡ് വികസനം ഉൾപ്പെടെ നടത്താതെ ലാപ്സ് ആക്കി ഹരിപ്പാട്ടെ ജനങ്ങളെ ദുരിതത്തിലാക്കുകയാണ് ഭരണസമിതി ചെയ്‌തത്. ഇത് ചൂണ്ടിക്കാട്ടി തിരുത്തുവാൻ ആവശ്യപ്പെട്ടതാണ് ഇടത് കൗൺസിലർമാർ ചെയ്‌ത കുറ്റമായി ചൂണ്ടികാണിക്കുന്നത്. നിലവിൽ മാർച്ച് 31 ന് പൂർത്തീകരിക്കേണ്ട റോഡ് വർക്കുകൾ മാർച്ച് 18 ന് ടെണ്ടർ നടപടികൾ പൂർത്തീകരിച്ച് മാർച്ച് 26 ന് ടെണ്ടർ ഓപ്പൺ ചെയ്യുകയും ചെയ്തിട്ടുള്ളത്. ഇതിന്മേൽ തുടർ നടപടികളും സാങ്കേതിക പ്രശ്‌നങ്ങളും പരിഹരിച്ച് പദ്ധതി നടത്തിപ്പി ലേക്കെത്താൻ കുറഞ്ഞത് രണ്ടാഴ്‌ച വേണമെന്നിരിക്കെ ഈ പദ്ധതികൾ എങ്ങനെ പൂർത്തീകരിക്കാൻ കഴിയുമെന്ന് ചോദ്യം ചെയ്ത‌താണ് ഉത്തരവാദിത്വപ്പെട്ട എൽ ഡി എഫ് കൗൺസിലർമാർ ചെയ്തത്. എൽ ഡി എഫ് ഒരു തരത്തിലുള്ള വികസനത്തിനും നാളിതുവരെ ഒരു തടസ്സവും സൃഷ്‌ടിച്ചിട്ടില്ല.

നിലവിൽ ഉയർന്നുവന്ന പ്രധാന വിഷയം 30-12-2024 ൽ ഹരിപ്പാട് നഗരസഭയിൽ കൂടിയ അടിയന്തിര യോഗത്തിൽ കൗൺസിൽ യോഗം എടുത്തു നൽകിയ തീരുമാനത്തിൽ അജണ്ടയിൽ ഉൾപ്പെടാത്ത വിഷയം സപ്ലിമെൻ്ററി അജണ്ടയായി കൃത്രിമ രേഖ കാണിച്ച് 4 അജണ്ട ഉണ്ടായിരുന്ന അജണ്ടകളെ 7 അജണ്ടകൾ ആക്കി അതിൽ 7-ാം അജണ്ടയിൽ 2-ാം നമ്പർ തീരുമാനമായി കൃത്രിമമായി പദ്ധതി ഭേദഗതി കൂട്ടിച്ചേർത്ത് കൃത്രിമ തീരുമാനങ്ങളെടുക്കുകയും സെക്രട്ടറിയുടെ സഹായത്തോടെ ചെയർമാൻ വിഷയങ്ങൾ കൗൺസിൽ അംഗീകരിച്ച അജണ്ടയുടെ തീരുമാനത്തിൻ്റെ കൂടെ കൂട്ടിചേർത്തു ചെയർമാനും ചെയർമാൻ്റെ ഇഷ്‌ടക്കാരായ 3 പേർക്കും പദ്ധതിവിഹിതം വീതംവെച്ചു നൽകുകയുമുണ്ടായി. കൗൺസിൽ തീരുമാനം പലതവണ എൽ ഡി എഫ് അംഗങ്ങൾ ആവശ്യപ്പെട്ടിട്ടും ലഭ്യമാക്കിയില്ല. ചട്ടപ്രകാരം കൗൺസിൽ യോഗം കഴിഞ്ഞ് 48 മണിക്കൂറിനുള്ളിൽ സാധാരണ യോഗങ്ങളുടെ മിനിട്ട്സ് തയ്യാറാക്കി ജനപ്രതിനിധികൾക്കും നോട്ടീസ് ബോർഡിലും പ്രദർശിപ്പിക്കേണ്ടതാണെന്നിരിക്കെ അടിയന്തിര കൗൺസിലിന്റെ അന്നേദിവസത്തെ കൗൺസിൽ തീരുമാനം 20-02-2025 ലാണ് ലഭ്യമായത്. എന്നാൽ ലഭ്യമായി 48 മണിക്കൂറിനുള്ളിൽ തന്നെ ഇത്തരമൊരു ചർച്ച കൗൺസിലിൽ ഉണ്ടായിട്ടില്ലെന്നും ടി അജണ്ടമേൽ നടത്തിയ തീരുമാനങ്ങൾ വ്യാജമായി കൂട്ടിച്ചേർത്തതാണെന്നും ആരോപിച്ച് മുൻസിപ്പൽ ചട്ടപ്രകാരം എൽ ഡി എഫ് അംഗങ്ങൾ വിയോജനം രേഖപ്പെടുത്തിയിട്ടുള്ളതുമാണ്. വിഷയം തൊട്ടടുത്ത ദിവസം 22-02-2025 ൽ കൂടിയ വികസന സ്റ്റാൻ്റിങ്ങ് കമ്മിറ്റിയോഗത്തിൽ യു ഡി എഫ് അംഗമായ സ്റ്റാൻ്റിങ്ങ് കമ്മിറ്റി ചെയർമാൻ വിനു ആർ നാഥും യു ഡി എഫ് അംഗങ്ങളായ വൃന്ദ എസ് കുമാറും ശ്രീജാകുമാരിയും മെയിൻ്റനൻസ് ഗ്രാൻ്റ് ഫണ്ട് വന്ന വിവരം ഞങ്ങൾ അറിഞ്ഞില്ലെന്നും ആയതിനാൽ അത് ക്യാൻസൽ ചെയ്‌ത്‌ പുതിയതായി പദ്ധതി നടത്തണമെന്നും അഭിപ്രായം പറഞ്ഞിട്ടുള്ളതാണ്. വിഷയം മുൻസിപ്പൽ കംപ്ലയിൻ്റ് അതോറിറ്റികളിൽ നൽകുകയും നിയമപരമായ നടപടികൾക്കായി 13-03-2025 ൽ പോലീസിനെ സമീപിക്കുകയും ചെയ്‌തിട്ടുള്ളതാണ്. പോലീസ് നിയപ്രകാരം പ്രാധമിക അന്വേഷണം നടത്തി മൊഴികളെടുത്ത് രേഖകൾ പരിശോധിച്ച് കുറ്റം നിലനിൽക്കുമെന്ന് ബോധ്യപ്പെട്ടതിനാൽ 22-03-2025 ൽ എഫ് ഐ ആർ രജിസ്റ്റർ ചെയ്ത്‌ നിയമനടപടികൾ ആരംഭിച്ചിട്ടുള്ളതാണ്. ഇടതുപക്ഷത്തെ 10 കൗൺസിലറന്മാരുടെ പരാതിയുടെ അടിസ്ഥാനത്തിലാണ് വിഷയത്തിൽ നിയമനടപടികൾ ആരംഭിച്ചിട്ടുള്ളത്. ഇതിനെയാണ് ചെയർമാനും സെക്രട്ടറിയും മറ്റൊരു തരത്തിൽ തെറ്റദ്ധരിപ്പിക്കുവാൻ ശ്രമിക്കുന്നത്.
ഇതിനെല്ലാം സഹായമായി നഗരസഭയിലെ കൗൺസിൽ ക്ലർക്ക് ശ്രീകുമാറും കൂട്ടുനിൽക്കുന്നു. ശ്രീകുമാർ കൗൺസിൽ ക്ലർക്ക് ആയതിനുശേഷം ഒട്ടനവധി തീരുമാനങ്ങൾ കൃത്രിമമായി കൂട്ടിചേർക്കുകയും കൗൺസിൽ യോഗങ്ങളിൽ ജനപ്രതിനിധികൾ പറയുന്ന അഭിപ്രായങ്ങൾ പലതും രേഖപ്പെടു ത്താതിരിക്കുന്നതിനെ തുടർന്ന് എൽ ഡി എഫ് അംഗങ്ങളും ഭരണകക്ഷി അംഗങ്ങളും ഒട്ടനവധി വിയോജനങ്ങൾ രേഖപ്പെടുത്തുകയും ചെയ്തിട്ടുള്ളതാണ്. ഇത് ചെയർമാനെ സഹായിക്കുവാൻ വേണ്ടി ചെയ്തിട്ടുള്ളതാണെന്നാണ് ഞങ്ങളുടെ ആരോപണം.

14-03-2025 ൽ കൂടിയ അടിയന്തിര കൗൺസിൽ മിനിട്ട്സിൽ പകർപ്പ് ലഭിച്ചപ്പോൾ കൗൺസിൽ അജണ്ടയിൽ നടന്ന വോട്ടെടുപ്പിൽ 3 എൽ. ഡി എഫ് കൗൺസിലർമാർ ഭരണസമിതിയ്ക്ക് അനുകൂലമായി വോട്ട് രേഖപ്പെടുത്തിയതായി വ്യാജമായി എഴുതി ചേർത്തതിനെ തുടർന്ന് സെക്രട്ടറിയെ ഉപരോധിക്കുകയും കള്ളതീരുമാനങ്ങൾ തിരുത്തണമെന്ന് ആവശ്യപ്പെട്ട് സെക്രട്ടറി കൗൺസിൽ ക്ലർക്കിനെ വിളിച്ചുവരുത്തി തെറ്റ് ചൂണ്ടികാണിക്കുകയും എൽ ഡി എഫ് കൗൺസിലർമാർ പറയുന്ന അഭിപ്രായങ്ങൾ രേഖപ്പെടുത്താതെ തെറ്റായി തീരുമാനങ്ങൾ എഴുതിചേർക്കുന്ന ക്ലാർക്കിനെ മാറ്റണമെന്ന് ആവശ്യപ്പെട്ടപ്പോൾ നിങ്ങൾ പറയുന്നതെല്ലാം ഒന്നും എനിക്ക് എഴുതാൻ പറ്റത്തില്ല എന്നും ചെയർമാൻ പറയുന്നത് മാത്രമേ എനിക്ക് എഴുതാൻ പറ്റത്തുള്ളു എന്ന ധിക്കാരപരമായ മറുപടി ആണ് ശ്രീകുമാർ പറഞ്ഞത്. ചെയർമാനല്ല നിങ്ങൾക്ക് ശമ്പളം തരുന്നത് സർക്കാരാണ് ശമ്പളം തരുന്നത് ജനങ്ങൾക്കുവേണ്ടിയാണ് ഞങ്ങൾ സംസാരിക്കുന്നത് എന്ന് പറയുകയുണ്ടായി. തുടർന്ന് സെക്രട്ടറി രേഖാമൂലം മിനിട്ട്സിൽ തിരുത്തൽ വരുത്തി നൽകാമെന്ന് കാണിച്ച് സെക്രട്ടറി ഒപ്പും സീലും ചെയ്‌ത്‌ ഞങ്ങൾക്ക് രേഖ നൽകിയിട്ടുള്ളതാണ്. പിന്നീട് കൗൺസിൽ ക്ലർക്കിനെ ജാതിപറഞ്ഞ് ആക്ഷേപിച്ചു എന്ന് മറ്റും പറഞ്ഞ് എൽ ഡി എഫ് കൗൺസിലർമാരായ അഡ്വ: രാജേഷ്, അനസ് എ നസിം എന്നിവർക്കെതിരെ വ്യാജപരാതി നൽകിയതായി മാധ്യമങ്ങളിൽ നിന്നും അറിയുവാൻ സാധിച്ചിട്ടുള്ളതാണ്. അങ്ങനെ ഒരു സംഭവമേ ഉണ്ടായിട്ടില്ലാത്തതും ഇടതുപക്ഷ കൗൺസിലർമാർ ജാതിയോ മതമോ ഒന്നും തന്നെ മനസ്സിൽ പേറി നടക്കുന്നവരല്ല. ആരോപിക്കപ്പെടുന്ന ഉദ്യോഗസ്ഥന്റെ ജാതിയോ മതമോ ഒന്നും തന്നെ അറിയില്ല. മുൻസിപ്പൽ ചെയർമാനായ കെ കെ രാമകൃഷ്ണനും സെക്രട്ടറി ഷെമീർ മുഹമ്മദിനും എതിരെയുള്ള ക്രിമിനൽ കേസ് പിൻ വലിപ്പിക്കുന്നതിനുവേണ്ടിയാണ് ഇടതുപക്ഷ കൗൺസിലർമാർക്കെതിരെ വ്യാജ പരാതി നൽകിയിട്ടുള്ളത്. അതിനെതിരെ ശക്തമായ നിലപാട് എൽ. ഡി എഫ് പാർലമെന്ററി പാർട്ടി സ്വീകരിക്കുന്നതാണ്. വാർത്താ സമ്മേളനത്തിൽ എൽ ഡി എഫ് കൗൺസി ലറൻമാരായ എസ് കൃഷ്ണകുമാർ, എസ് രാധാമണി, വിനോദിനി പി, ആർ രാജേഷ്, ബിജു മോഹൻ, ഈപ്പൻ ജോൺ, എസ് സുജ, സജിനി സുരേന്ദ്രൻ എന്നിവർ പങ്കെടുത്തു.

28/01/2025

📡 News of Kerala
📃✍
28.01.2025

ഓൺലൈൻ ട്രെഡിങ് തട്ടിപ്പ്, കാർത്തികപള്ളി സ്വദേശിയ്ക്ക് 6 ലക്ഷം രൂപ നഷ്ടപ്പെട്ടു.

ഹരിപ്പാട്. ഓൺലൈനായി ഷെയർ ട്രേഡിങ് നടത്തി ലാഭവിഹിതം നൽകാമെന്ന് പറഞ്ഞു 6 ലക്ഷം രൂപ തട്ടിച്ചതായി പരാതി. കാർത്തികപ്പള്ളി പുതുക്കുണ്ടം സ്വദേശി അലക്സാണ്ടർ തോമസിന്റെ 6 ലക്ഷം രൂപയാണ് നഷ്ടമായത്. കഴിഞ്ഞ നവംബർ 24ന് ഇൻസ്റ്റഗ്രാമിൽ ഓൺലൈൻ ട്രേഡിംഗിന്റെ പരസ്യം കണ്ടു ലിങ്ക് വഴി ആദ്യം അവരുടെ വാട്സ്ആപ്പ് ഗ്രൂപ്പിൽ അംഗമാവുകയായിരുന്നു. തുടർന്ന് അലക്സാണ്ടറിന് ട്രേഡിങ് വഴിപണം ലഭിക്കുകയും ചെയ്തു. കൂടുതൽ പണം ട്രേഡിങ്ങിൽ നിക്ഷേപിക്കണമെങ്കിൽ അവരുടെ അക്കൗണ്ട് വഴി ട്രേഡ് ചെയ്യണമെന്നും 300 ശതമാനം വരെ ലാഭം നൽകാമെന്നും വാഗ്ദാനം ചെയ്തു. ഇതേ തുടർന്ന് ഡിസംബർ 23 നു 17000 രൂപ നിക്ഷേപിച്ചു. പിന്നീട് ഇവരുടെ പല അക്കൗണ്ടുകളിൽ ആയി 619803 രൂപ നിക്ഷേപിച്ചു. ജനുവരി 16 ആയപ്പോൾ ലാഭം 22 ലക്ഷം രൂപ ആയി. പണം പിൻവലിക്കാൻ ശ്രമിച്ചപ്പോൾ ഇൻകം ടാക്സ് അടച്ചാൽ മാത്രമേ കഴിയൂ എന്ന് മെസ്സേജ് വന്നു. ഇതിൽ സംശയം തോന്നിയ അലക്സാണ്ടർ സെബിയുടെ ഹെൽപ് ലൈനിൽ വിളിച്ച് അന്വേഷിച്ചപ്പോൾ ആണ് തട്ടിപ്പ് ആണെന്ന് മനസ്സിലായത്. അക്കൗണ്ട് നമ്പറുകൾ അല്ലാതെ കമ്പനിയെ പറ്റി മറ്റൊന്നും അലക്സാണ്ടർ അറിയുകയില്ല . സംഭവമായി ബന്ധപ്പെട്ട ഹരിപ്പാട് പോലീസിൽ പരാതി നൽകി.

News of Kerala

25/07/2025

25/07/2025

23/07/2025

23/07/2025

11/07/2025

18/06/2025

14/06/2025

15/05/2025

10/05/2025

26/03/2025

26/03/2025

28/01/2025

Address

Website

Alerts

Contact The Business

Shortcuts

Share