Karenni's Voice (2025)

08/08/2023

ကရင်နီရောက်ကျောင်းသားသမဂ္ဂမျိုးဆက်များ အင်အားစုက ပြုလုပ်တဲ့ ရှစ်လေးလုံး အထိမ်းအမှတ်ပုံရိပ်များ။
- ဩဂုတ် ၈ ရက် ၂၀၂၃။

ဒီကနေ့ (ဩဂုတ် ၈ ရက်) မှာ ကရင်နီရောက် ကျောင်းသားသမဂ္ဂမျိုးဆက်များအင်အားစုက ရှစ်လေးလုံး လူထုတော်လှန်ရေး ၃၅ နှစ်ပြည့် အထိမ်းအမှတ် "မပြီးဆုံးသေးတဲ့ ရှစ်လေးလုံး" အခမ်းအနားကို ကရင်နီပြည်နယ် တနေရာ စစ်ရှောင်စခန်းတခုမှာ ပြုလုပ်ခဲ့ပါတယ်။

"အဓိက ရည်ရွယ်ချက်ကတော့ သမိုင်းမမေ့ဖို့ပါပဲ၊ ပြီးတော့ ခေတ်အဆက်ဆက် ဒီတော်လှန်ဝန်ကို ဆက်ထမ်းကြဖို့ပါ" လို့ သမဂ္ဂ ရဲဘော်တဦးက ပြောခဲ့ပါတယ်။

အခမ်းအနားတွင်း ရှစ်လေးလုံးသမိုင်းကြောင်း ပြောခြင်း၊ သ၀ဏ်လွှာအသီးသီးဖတ်ခြင်း၊ ကဗျာရွတ်ခြင်း နဲ့ တော်လှန်သီချင်းများသီဆိုခြင်းတို့ကို ပြုလုပ်ခဲ့ပြီး စစ်ရှောင်စခန်းတွင်း နေ့လည်စာဧည့်ခံခင်းခြင်းတို့လည်း ပါဝင်ပါတယ်။

- Karenni's Voice (People's Radio Myanmar)
Photo - Karenni's Voice

05/08/2023

ဒီးမော့ဆိုနဲ့ ဖရူဆိုကို လမ်းကြောင်းပေါက်နိုင်အောင် စစ်ကောင်စီက စစ်ကြောင်းထိုးနေတာကြောင့် KNDFက ရွာလမ်းပိုင်းအချို့ကို အရပ်သားများအသုံးပြုခွင့် ကန့်သတ်ထား
▪️ဩဂုတ် ၅ ရက်၊ ၂၀၂၃။

ဒီးမော့ဆို-ဖရူဆို လမ်းမကြီးတလျောက်မှာ စစ်ကောင်စီက ဖရူဆိုဘက်ကို ဦးတည်ပြီး စစ်ကြောင်းထိုးလာတာကြောင့် ကရင်နီပူးပေါင်းတပ်ဖွဲ့များနဲ့ တိုက်ပွဲဖြစ်ပွားနေပြီး ဒေါညင်းခူ-ထီးပေါဆို လမ်းပိုင်းကို အရပ်သားများ အသုံးမပြုကြဖို့ KNDF က သတိပေးထုတ်ပြန်ထားပါတယ်။ ဖရူဆိုမှတဆင့် အခြားစစ်မျက်နှာတွေကို အင်အားဖြည့်နိုင်ဖို့ စစ်ကောင်စီက အခုလိုလုပ်ဆောင်တာ ဖြစ်တယ်လို့ KNDF ဗဟိုပြန်ကြားရေးတာဝန်ခံက သုံးသပ်ပါတယ်။

"အဓိကကတော့ ဒီးမော့ဆိုနဲ့ ဖရူဆိုကို လမ်းကြောင်းပေါက်အောင် စစ်ကြောင်းထိုးတာ ဖြစ်တယ်ပေါ့နော်။ ဖရူဆိုကို ထောက်ပို့ယာဉ်တန်းတွေ ဖြတ်သွားနိုင်ဖို့၊ လူသူလက်နက် ဖြည့်တင်းနိုင်ဖို့ စစ်ကြောင်းထိုးနေတာလို့ ပြောချင်ပါတယ်။ အဲဒီကနေ တဆင့် အခြားစစ်မျက်နှာတွေပေါ့ ဘောလခဲတို့ ဖရူဆိုတို့ဘက်ကို စစ်မျက်နှာဖွင့်နိုင်ဖို့ စစ်ကြောင်းထိုးနိုင်ဖို့ လုပ်နေတယ်လို့ သုံးသပ်ရတယ်ခင်ဗျ။" လို့ KNDF ဗဟိုပြန်ကြားရေးတာဝန်ခံက Karenni's Voice ကို ပြောပြပါတယ်။

စစ်ကောင်စီ စစ်ကြောင်းထိုးလာတဲ့ ဩဂုတ် ၂ ရက်က ဒီးမော့ဆိုအရှေ့ခြမ်း တိုက်ပွဲမှာ ကရင်နီတပ်မတော် တပ်ရင်း ၅ ရဲ့ ဒုဗိုလ်တဦးဖြစ်သူ ခူးလီရယ် ကျဆုံးခဲ့တယ်လို့ တပ်ရင်း ၅ က ထုတ်ပြန်ထားပါတယ်။ စစ်ကောင်စီရဲ့ စစ်ကြောင်းတွေကြောင့် အရပ်သားများကို မထိခိုက်စေဖို့ လမ်းအသုံးပြုခွင့်ကို ကန့်သတ်ထားတယ်လို့ KNDF ဗဟိုပြန်ကြားရေးထံက သိရပါတယ်။

"လမ်းမကြီးတလျောက်ကတော့ ဟိုးအရင် တိုက်ပွဲတွေဖြစ်ကတည်းက ပိတ်ထားတာကျပြီ၊ ကြားထဲမှာ စစ်ကောင်စီတပ်တွေလည်းရှိတော့ ထိခိုက်မှုတွေ အချိန်မရွေးဖြစ်နိုင်လို့ မသုံးကြတော့တာ။ အခုကတော့ ထီးပေါဆိုနဲ့ ဒေါကူးခူနားက ရွာချင်းဆက် လမ်းပိုင်းလေးတခုကိုပါ မသုံးတော့ဖို့ မေတ္တာရပ်ခံတာပါ" လို့ KNDF ပြန်ကြားရေးတာဝန်ခံက ပြောပြပါတယ်။

ယနေ့ (ဩဂုတ် ၅ ရက်) ညနေအချိန်ထိ ထီးပေါဆို ရွာတဝိုက် လက်နက်ကြီး လက်နက်ငယ်ပစ်ခတ်သံများကြားရပြီး တိုက်ပွဲဖြစ်ပွားနေဆဲ ဖြစ်တယ်လို့ ဒေသခံတဦးထံက သိရပါတယ်။

▪️Karenni's Voice (People's Radio Myanmar)
Photo - KNDF

05/08/2023

ဇူလိုင်လရဲ့ တိုက်ပွဲအချက်အလက်များ KNDF ထုတ်ပြန်၊ စစ်ကောင်စီတပ်သား ၈၄ ဦးသေဆုံးကာ ၃ ဦးကိုဖမ်းမိ။
- ဩဂုတ် ၅ ရက် ၂၀၂၃။

ဇူလိုင်လအတွင်း ကရင်နီဒေသတဝှမ်းမှာ ပါဝင်တိုက်ခိုက်ခဲ့တဲ့ တိုက်ပွဲအချက်အလက်များကို KNDF က ဒီကနေ့ (ဩဂုတ် ၅ ရက်) မှာ ထုတ်ပြန်ထားပါတယ်။ တလတာအတွင်း ဖားဆောင်း မယ်စဲ့၊ ဘောလခဲ ရွာသစ်၊ မိုးဗြဲ လွိုင်ကော် နဲ့ ယာဒို စစ်မြေပြင်တို့မှာ တိုက်ပွဲပိုင်း ၃၃ ကြိမ် ရှိခဲ့တယ်လို့ သိရပါတယ်။ တိုက်ပွဲတွေအတွင်းမှာ စစ်ကောင်စီ တပ်သား ၈၄ ဦးသေဆုံးခဲ့ပြီး လက်နက်ငယ် ၈ လက်နဲ့ ခဲယမ်းများ သိမ်းဆည်းရမ်ကာ စစ်သုံ့ပန်း ၃ ဦးကိုလည်း ဖမ်းဆီးရမိခဲ့တယ်လို့ KNDF သတင်းနဲ့ပြန်ကြားရေးထံကသိရပါတယ်။

"စစ်သုံ့ပန်းတွေကတော့ သူတို့ရဲ့ တပ်စခန်းတွေ၊ သူတို့ရဲ့ pose (တပ်စွဲရာနေရာ) တွေကို ထားခဲ့ပြီးတော့ ထွက်ပြေးလာတဲ့သူတွေကို ဖမ်းမိထားတာပါ၊ ဘယ်တိုက်ပွဲ ဘယ်ဒေသကလဲဆိုတာတွေတော့ အသေးစိတ်ပြောလို့ မရသေးပါဘူး" လို့ KNDF သတင်းနဲ့ပြန်ကြားရေး တာဝန်ရှိသူက Karenni's Voice ကို ပြောပါတယ်။

တလအတွင်း စစ်ကောင်စီရဲ့ လေကြောင်းတိုက်ခိုက်မှု ၄၂ ကြိမ်ရှိခဲ့ပြီး လေကြောင်းတိုက်ခိုက်တာအပါအဝင် လက်နက်ကြီး ၊ လက်နက်ငယ်များနဲ့ ပစ်ခတ်သတ်ဖြတ်မှုကြောင့် သေဆုံးရသူ အရပ်သား ၁၂ ဦး သေဆုံးခဲ့ပါတယ်။ ဇူလိုင်တလအတွင်း တိုက်ပွဲတွေမှာ KNDF ရဲဘော် ၂ ဦး ကျဆုံးခဲ့တယ်လို့လည်း ထုတ်ပြန်ချက်မှာ ပါရှိပါတယ်။

- Karenni's Voice (People's Radio Myanmar)
Photo - KNDF

04/08/2023

ကရင်နီဒေသတွင်းက အင်တာနက်မရတဲ့နေရာများကို သတင်းစာစောင်ဖြန့်ဝေခြင်း။
ရုန်း (We Struggle) Issue 7/ August
◾ဩဂုတ် ၄ ရက် ၂၀၂၃။

စစ်အာဏာသိမ်းပြီးနောက်ပိုင်း ကရင်နီဒေသတွင်းက နေရာတော်တော်များများဟာ ဖုန်းလိုင်း၊ အင်တာနက်လိုင်းများ ဖြတ်တောက်ခံထားရတာ ယနေ့အထိပဲ ဖြစ်ပါတယ်။ ဒေသတွင်းက လူထုနဲ့ စစ်ရှောင်ပြည်သူအများစုဟာ ဆက်သွယ်ရေးအခက်အခဲများ ကြုံရဲ့အပြင် သတင်းအမှောင်ချခံထားရတဲ့ အခြေအနေကိုလည်း တွေ့ကြုံနေရပါတယ်။

"ရုန်း" (We struggle) စာစောင်ဟာ ကရင်နီပြည်နယ်အတွင်းက အင်တာနက်ဖြတ်တောက်ခံထားရတဲ့ ဒေသများမှာ နေထိုင်တဲ့သူတွေအတွက် သတင်းအချက်အလက် ရရှိနိုင်ရေး ရည်ရွယ်ပြီး ထုတ်ဝေတာ ဖြစ်ပါတယ်။ ကျမတို့အဖွဲ့သားတွေအနေနဲ့ ယခုစာစောင်ကို လစဥ် ထုတ်ဝေပြီး စစ်ရှောင်စခန်းတွေ၊ စျေးဆိုင်တွေနဲ့ အခြားအင်တာနက်မရတဲ့ နေရာများမှာ ဖြန့်ဝေထားဖို့ ရည်ရွယ်ပါတယ်။

ဇူလိုင်လအတွင်းက တိုက်ပွဲအခြေအနေများ၊ စစ်ရာဇဝတ်မှုကြောင့် အရပ်သားသေဆုံးမှုများ၊ လေကြောင်းတိုက်ခိုက်မှုများ အပါအ၀င် အခြား အကြောင်းအရာများကို ယခုစာစောင်အတွင်း ဖတ်ရမှာဖြစ်ပါတယ်။

"ရုန်း" (We struggle) လစဥ် စာစောင်ကို မနက်ဖြန်က စတင်ပြီး ဒီးမော့ဆိုအနောက်ခြမ်းက အင်တာနက်မရတဲ့ စစ်ရှောင်စခန်းများနဲ့ စျေးဆိုင်များ၊ ဆက်လက်ပြီး ကရင်နီဒေသတွင်းက စစ်ရှောင်များကို စားဝတ်နေရေး၊ ပညာရေး နဲ့ ကျန်းမာရေးစောင့်ရှောက်မှု လှည့်လည်ဆောင်ရွက်ပေးနေတဲ့ အဖွဲ့များဖြစ်တဲ့ KHAI ၊ JFK၊ မြို့နယ်ပညာရေးဘုတ်အဖွဲ့ နဲ့ mobile ဆေးအဖွဲ့တို့က တဆင့် ဖြန့်ဝေသွားပါမယ်။

ကျမတို့အနေနဲ့ လက်လှမ်းမမှီတဲ့ စစ်ရှောင်စခန်းများ ရှိပါက page messenger ကို ဆက်သွယ်နိုင်သလို ကူညီဖြန့်ဝေလိုပါကလည်း မူရင်း PDF file ကို မျှဝေသွားပါမယ်။

-Karenni's Voice (People's Radio Myanmar)
#ရုန်း #စာစောင်

03/08/2023

ဇူလိုင်လအတွင်း စစ်ရာဇဝတ်မှုများကြောင့် ကရင်နီဒေသရှိ အရပ်သားထိခိုက် သေဆုံးမှုများ
▪️Karenni's Voice (People's Radio Myanmar)

အရပ်သားသေဆုံးမှုများ

ဇူလိုင် ၁ ရက်မှ ၃၁ ရက်အထိ တလတာအတွင်း ကရင်နီပြည်နယ်မှာ စစ်ရာဇဝတ်မှုများကြောင့် အရပ်သား ၈ ဦး သေဆုံး ခဲ့ပြီး အချိန်မှီဆေးကုသမှုမရတာကြောင့် သက်ကြီးရွယ်အို ၂ ဦး သေဆုံးခဲ့ပါတယ်။ စစ်ရာဇဝတ်မှုများအတွင်း စစ်ကောင်စီရဲ့ လေကြောင်းတိုက်ခိုက်မှုကြောင့် အရပ်သား ၂ ဦး၊ စစ်ကောင်စီရဲ့ လက်နက်ကြီးပစ်ခတ်မှုကြောင့် အရပ်သား ၃ ဦး၊ ပစ်ခတ်သတ်ဖြတ်ခံရတာကြောင့် အရပ်သား ၃ ဦး သေဆုံးခဲ့ပါတယ်။ သေဆုံးသူများအနက် အသက်မပြည့်သေးသူ ၁ ဦး၊ အမျိုးသမီး ၃ ဦး၊ အမျိုးသား ၄ ဦး ပါဝင်ပါတယ်။ အချက်အလက် အသေးစိတ်ကို ဇယားမှာ ကြည့်နိုင်ပါတယ်။

အရပ်သား ထိခိုက်မှုများ

၂၀၂၃ ခုနှစ်၊ ဇူလိုင် ၁ ရက်မှ ၃၁ ရက်အထိ တလအတွင်း ကရင်နီဒေသမှာ စစ်ရာဇဝတ်မှုများကြောင့် အရပ်သား ၁၄ ဦး ထိခိုက်ဒဏ်ရာရရှိခဲ့ပါတယ်။ စစ်ကောင်စီရဲ့ လက်နက်ကြီးကြောင့် အရပ်သား ၇ ဦး၊ လေကြောင်းတိုက်ခိုက်မှုကြောင့် အရပ်သား ၇ ဦး ထိခိုက်ဒဏ်ရာရခဲ့တာပါ။ ထိခိုက်ဒဏ်ရာရသူများအနက် အမျိုးသား ၁၀ ဦး၊ အမျိုးသမီး ၂ ဦး၊ အသက်မပြည့်သေးတဲ့ ကလေးငယ် ၂ ဦး ပါဝင်ပါတယ်။

ယခုဖော်ပြခဲ့သော အချက်အလက်များမှာ Karenni's Voice ရဲ့ မြေပြင်သတင်းရရှိမှုများ၊ သတင်းမီဒီယာများရဲ့ ဖော်ပြချက်များနဲ့ အရပ်ဘက်အဖွဲ့အစည်းများ၊ တပ်ရင်းတပ်ဖွဲ့များရဲ့ ထုတ်ပြန်ချက်များကို ကိုးကားဖော်ပြထားတာပါ။ မြေပြင်မှာ ယခုထက် အရေအတွက်အားဖြင့် ပိုများနိုင်ပါတယ်။

▪️ဩဂုတ် ၃ ရက်၊ ၂၀၂၃။

Telegram - https://t.me/karennivoice/465

23/07/2023

မိုးဗြဲ-လွိုင်ကော်လမ်းမ တလျောက် တိုက်ပွဲများအတွင်း လက်နက်ကြီးကြောင့် အရပ်သား ၂ ဦးသေဆုံးပြီး စစ်ကောင်စီက ရွာသားများကို လူသားဒိုင်းအသုံးပြုခဲ့ကြောင်း ဒေသခံများပြော။
▪️ဇူလိုင် ၂၃ ရက်၊ ၂၀၂၃။

မိုးဗြဲ-လွိုင်ကော်လမ်းမ တလျောက် စစ်ကောင်စီရဲ့ စစ်ကြောင်းများနဲ့ ကရင်နီကာကွယ်ရေး ပူးပေါင်းတပ်များ ပဒါးညေးကျေးရွာအနီး ဇူလိုင် ၂၀ ရက်က တိုက်ပွဲဖြစ်ခဲ့တယ်လို့ ဒေသခံများထံက သိရသလို ကန်းကျိုင်းရွာနဲ့ ဆောင်ကန်း(ရှမ်း)ရွာမှာ ဒီကနေ့ ဇူလိုင် ၂၁ ရက်အထိ ၃ ရက်ဆက် တိုက်ပွဲဆက်လက်ပြင်းထန်နေတယ်လို့ ဖယ်ခုံပြည်သူ့ကာကွယ်ရေးတပ် ဗိုလ်တထောင်တပ်ခွဲက သတင်းထုတ်ပြန်ထားပါတယ်။

ဇူလိုင် ၂၀ ရက် မနက်ပိုင်းက စတင်ပြီး လွိုင်ကော်အမြောက်တပ်က လက်နက်ကြီးများနဲ့ ပစ်ခတ်ကာ ညနေအချိန်မှာ တိုက်ပွဲပြင်းထန်ခဲ့ကြောင်း ဒေသခံဦးက ပြောပြပါတယ်။ တိုက်ပွဲအတွင်း အမျိုးသမီး ၁ ဦး၊ သက်လတ်ပိုင်း အမျိုးသားတဦးနဲ့ ၁၆ နှစ်အရွယ်အမျိုးသားတဦးတို့ လက်နက်ကြီး ထိမှန်ဒဏ်ရာရှိခဲ့တယ်လို့ သိရပါတယ်။

" ၃ ယောက်ထိသွားတယ်။ ဆေးရုံပို့တဲ့ လမ်းမှာ ၁၆ နှစ်သားတယောက် ဆေးရုံပို့တဲ့လမ်းမှာ ဆုံးသွားတယ်။ ရွာသားတွေက ပြောင်းဖူးပွဲရုံထဲ ပြေး၀င်ပုန်းတာ စကစတွေ့တော့ အဲ့အထဲ၀င်လာပါတယ်။ အဲ့မှာ ရှိတဲ့ပြည်သူတွေ ရှေ့မှာနေခိုင်းပြီး လှမ်းပစ်ပါတယ်။ နှစ်ဖက်ပစ်ခတ်မူကြောင့် ပြည်သူတွေက မှောက်အိပ်နေရတယ်။ ခုတော့ အဲဒီလို လူသားတံတိုင်း အလုပ်ခံရတဲ့သူတွေ ပြန်တော့ လွတ်လာကြပြီ။" လို့ လူသားဒိုင်း အသုံးပြုခံရတဲ့ ဖြစ်စဉ်ကို မျက်မြင်ကြုံတွေ့ခဲ့ရတဲ့ ပဒါးညေးရွာ ဒေသခံတဦးက Karenni's Voice ကို ပြောပါတယ်။

လွိုင်ကော်အခြေစိုက် လူမှုကူညီရေးအသင်းတခု ဖြစ်တဲ့ ရွှေလွိုင်ကော်ပရဟိတအသင်းကလည်း လက်နက်ကြီးထိမှန်တာကြောင့် အသက် ၆၈ နှစ်အရွယ် ဒေါ်နန်းဦး ထိခိုက်ဒဏ်ရာရခဲ့သလို အသက် ၁၆ နှစ်အရွယ် ခွန်းတီးငဲ အသက်ဆုံးရှူံးခဲ့တယ်လို့ သတင်းထုတ်ပြန်ထားပါတယ်။

ဇူလိုင် ၂၁ ရက်နဲ့ ၂၂ ရက်တွေမှာလည်း တပ်မ ၅၅ အပါအဝင် အင်အား ၁၀၀ ခန့် စစ်ကြောင်းထိုးလာတာကြောင့် ယနေ့အထိ ၃ ရက်ဆက် တိုက်ပွဲပြင်းထန်ခဲ့တယ်လို့ ဖယ်ခုံပြည်သူ့ကာကွယ်ရေးတပ် ဗိုလ်တထောင်တပ်ခွဲရဲ့ ပြန်ကြားရေးတာဝန်ရှိသူထံက သိရပါတယ်။

"အင်အားက ၁၀၀ ဝန်းကျင်လောက်ရှိတယ်။ မိုးဗြဲမြို့ထဲက တပ်စွဲထားတဲ့ သူတို့တပ်တွေဆီ စစ်ကူလာတဲ့သဘောပါ။ ဒီနေ့နဲ့ဆို တိုက်ပွဲဖြစ်တာ ၃ ရက်ရှိပြီ။ ဒီနေ့ညနေ တိုက်ပွဲမှာ စစ်ကောင်စီဘက်က လက်နက်ကြီးနဲ့ အဆက်မပြတ်ပစ်တာကြောင့် ကျတော်တို့ ရဲဘော် ၂ ယောက် မစိုးရိမ်ရ ဒဏ်ရာရခဲ့ပြီး ကျတော်တို့ ရှေ့ဆက်မတိုးခဲ့ရဘူး။" လို့ ဗိုလ်တထောင် တပ်ခွဲရဲ့ ပြန်ကြားရေးတာဝန်ရှိသူက ပြောပြပါတယ်။

ယမန်နေ့က စစ်ကောင်စီက အမျိုးသား ၂ ဦး စီးနင်းလာတဲ့ Light truck တစီးကို ပစ်ခတ်ဖမ်းဆီးခဲ့တယ်လို့ သိရပါတယ်။ အဆိုပါ အမျိုးသား ၂ ဦးကတော့ အသက်အန္တရာယ်မစိုးရိမ်ရပေမဲ့ ဒဏ်ရာအချို့နဲ့အတူ ယနေ့မှာ ပြန်လည်လွတ်မြောက်လာပြီး စီးနင်းလာတဲ့ Light truck ကိုတော့ စစ်ကောင်စီက သိမ်းယူထားတယ်လို့ ဗိုလ်တထောင်တပ်ခွဲက ပြောပြပါတယ်။

ဇူလိုင် ၂၃ ရက်မှာ မိုးဗြဲအရှေ့ခြမ်း (--)ရွာအတွင်း ကျေးရွာ ဒေသခံ၂ ဦး လက်နက်ကြီးထိမှန်တာကြောင့် ဒဏ်ရာအသေးစားများ ရရှိခဲ့ပြီး ဆေးကုသခဲ့ရတယ်လို့ ဆက်လက်ပြောပြပါတယ်။ ယမန့်နေ့ (ဇူလိုင် ၂၂ ရက်) နေ့လည်ပိုင်းမှာလည်း စစ်ကောင်စီက ပစ်ခတ်တဲ့ လက်နက်ကြီးကြောင့် သက်ကြီးပိုင်း အမျိုးသမီးတဦး နှလုံးရပ်တန့် အသက်ဆုံးရှူံးခဲ့ရတယ်လို့ သိရပါတယ်။

"မနေ့နေ့လည်လောက်က ဆုံးတာပါ။ မိုးဗြဲအရှေ့ဘက်က (--) ရွာမှာပါ။ လက်နက်ကြီးတော့ မထိသွားပေမဲ့ အဲဒီအသံကြောင့် လန့်ပြီးဆုံးသွားတာ၊ ဒီနေ့ပဲ သဂြိုလ်ပြီးပါတယ်" လို့ ဗိုလ်တထောင် တပ်ခွဲရဲ့ ပြန်ကြားရေးတာဝန်ရှိသူက ပြောပြပါတယ်။

ယခုအခါ အင်အားဖြည့်တင်းလာတဲ့ စစ်ကောင်စီတပ်တွေဟာ ဆောင်ကန်း(ရှမ်း)ရွာမှ ဆောင်ကမ်း(ကယား)ရွာကို ဆုတ်ခွာသွားတယ်လို့ ဆိုပါတယ်။

မေ ၂၇ ရက်က စတင်ပြီး စစ်ကောင်စီဟာ သယ်ယူပို့ဆောင်ရေးအတွက် အရေးပါတဲ့ မိုးဗြဲ-ပီကင်းလမ်းနဲ့ ပြည်ထောင်စု လမ်းမကြီးတလျောက် စိုးမိုးနိုင်ဖို့ စစ်ကြောင်းထိုးလာခဲ့ပါတယ်။ မေလနဲ့ ဇွန်လအတွင်းမှာ မိုးဗြဲမြို့အတွင်း ဝင်ရောက်တပ်စွဲထားတဲ့ စစ်ကောင်စီရဲ့ လက်နက်ကြီး၊ လက်နက်ငယ် ပစ်ခတ်မှုတွေကြောင့် အရပ်သား ၂၃ ဦး ထက်မနည်း သေဆုံးခဲ့သလို ယခု ဇူလိုင် ၁၅ ရက်ကလည်း အသက် ၇၂ နှစ်အရွယ် အမျိုးသမီးတဦးကို ထပ်မံ ပစ်ခတ်သတ်ဖြတ်ခဲ့ပါသေးတယ်။

▪️Karenni's Voice (People's Radio Myanmar)
Photo - ဗိုလ်တထောင်တပ်ခွဲ
တိုက်ပွဲဖြစ်ပွားရာ နေရာများ

Telegram - https://t.me/karennivoice/495

22/07/2023

ဖားဆောင်းမြို့နယ်အတွင်း တိုက်ပွဲဖြစ်ပွားပြီး စစ်ကောင်စီက ကျေးရွာများကို မီးရှို့နေကြောင်း ဖားဆောင်း PDF ထုတ်ပြန်
▪️ဇူလိုင် ၂၂ ရက်၊ ၂၀၂၃။

ယမန်နေ့ (ဇူလိုင် ၂၁ ရက်)က စပြီး ဖားဆောင်းမြို့နယ် ကျောက်ပဲညိုရွာနဲ့ ဝမ်အောင်းရွာများကို စစ်ကောင်စီက စစ်ကြောင်းထိုး ဝင်ရောက်လာတာကြောင့် ဒေသခံကာကွယ်ရေးပူးပေါင်းတပ်ဖွဲ့များနဲ့ တိုက်ပွဲပြင်းထန်ခဲ့တယ်လို့ ဖားဆောင်းပြည်သူ့ကာကွယ်ရေးတပ်က သတင်းထုတ်ပြန်ထားပါတယ်။ ယမန်နေ့ မနက် ၆:၀၀ အချိန်က တိုက်ပွဲစတင်ခဲ့ပြီး ယနေ့ထိလည်း ဆက်လက်တိုက်ပွဲပြင်းထန်ကာ စစ်ကောင်စီက ယနေ့နေ့လည်မှာ ကျောက်ပဲညိုရွာအနီးကို လေကြောင်းက တိုက်ခိုက်ခဲ့တယ်လို့ သိရပါတယ်။

အဲဒီအပြင် ကျောက်ပဲညိုနဲ့ ဝမ်အောင်း(ရှမ်း) ရွာတို့ကို မီးရှို့ဖျက်စီးခဲ့တယ်လို့ ဖားဆောင်းပြည်သူ့ကာကွယ်ရေးတပ် ပြန်ကြားရေးတာဝန်ရှိသူထံက သိရပါတယ်။ ကျေးရွာဒေသခံအများစုဟာ ယခင်လ တိုက်ပွဲများ ပြင်းထန်စဉ်ကပင် နေရပ်စွန့်ခွာခဲ့ကြပြီး ယခုက ကျန်ရှိသူများလည်း ထပ်မံတိမ်းရှောင်ကုန်ကြကြောင်း သိရပါတယ်။

"ရွာတွေ မီးရှို့ခံရတာဟုတ်တယ်ဗျ။ လူတွေလည်း ရွေ့ကုန်ကြပြီ။ ဒေသခံတွေ ထိခိုက်မှု ရှိတယ်လို့တော့ အခုထိတော့ မကြားမိသေးဘူး။" လို့ ဖားဆောင်းပြည်သူ့ကာကွယ်ရေးတပ်ရဲ့ ပြန်ကြားရေးတာဝန်ရှိသူက ပြောပါတယ်။

စစ်ကြောင်းထိုးလာတဲ့ စစ်ကောင်စီတပ်များကို ဖားဆောင်းပြည်သူကာကွယ်ရေးတပ်၊ ဘောလခဲပြည်သူ့ကာကွယ်ရေးတပ်၊ ကရင်နီလူမျိုးပေါင်းစုံလွတ်မြောက်ရေးတပ်ဦး၊ ကရင်နီအမျိုးသားများကာကွယ်ရေးတပ် တပ်ရင်း ၂၀ နဲ့ ကရင်နီတော်လှန်ရေးတပ်ပေါင်းစုတို့က ပူးပေါင်းခုခံခဲ့တယ်လို့ သိရပါတယ်။ တိုက်ပွဲအတွင်း နှစ်ဖက်တပ်ဖွဲ့များရဲ့ ထိခိုက်ကျဆုံးမှုတွေကိုတော့ အတိအကျ မသိရသေးပါဘူး။

ယခုတိုက်ပွဲဟာ ကျောက်ပဲညိုရွာအတွင်း တလတိတိအကြာမှာ ထပ်မံဖြစ်ပွားခဲ့တဲ့ တိုက်ပွဲ ဖြစ်ပါတယ်။ ယခင်လ ဇွန် ၂၁ ရက်မှာလည်း သံလွင်တံတားအရှေ့ခြမ်း အခြေစိုက် စစ်ကောင်စီတပ်များနဲ့ တပ်မ ၄၄ တို့ ကျောက်ပဲညိုရွာကို စစ်ကြောင်းထိုးဖို့ ကြိုးစားတာကြောင့် ဒေသခံကာကွယ်ရေးတပ်များ ပူးပေါင်းတိုက်ခိုက်ခဲ့တာကြောင့် စစ်ကောင်စီတပ်များ သံလွင်တံတားအရှေ့ခြမ်းကို ပြန်လည်ဆုတ်ခွာသွားခဲ့ပါတယ်။ အဲဒီအချိန်တည်းက ကျောက်ပဲညိုရွာ၊ ဝမ်းအောင်း(ရှမ်း)ရွာနဲ့ ဝမ်အောင်း(ကယား)ရွာတို့က ဒေသခံအများစုဟာ နေရပ်စွန့်ခွာထွက်ပြေးခဲ့ကြရပါတယ်။

▪️Karenni's Voice (People's Radio Myanmar)
Video - ဖားဆောင်းပြည်သူ့ကာကွယ်ရေးတပ်

Telegram - https://t.me/karennivoice/493

21/07/2023

စစ်ကောင်စီကလေယာဥ်နဲ့ ဗုံးကြဲတိုက်ခိုက်လို့ ဝါသောခိုကျေးရွာက နေအိမ်အလုံး ၃၀ ထိခိုက်ပျက်စီး
**************
ဇူလိုင်လ ၂၁ ရက်၊ ၂၀၂၃ ခုနှစ်

ကရင်ပြည်နယ်၊ သံတောင်ကြီးမြို့မြောက်ပိုင်းရှိ ဝါသောခိုကျေးရွာကို စစ်ကောင်စီတပ်က လေယာဥ်နဲ့ဗုံးကြဲတိုက်ခိုက်ခဲ့တာကြောင့် ကျေးရွာအတွင်းက နေအိမ် အလုံး ၃၀ ဝန်းကျင် ထိခိုက်ပျက်စီးခဲ့တယ်လို့ ဒေသခံတွေထံမှသိရပါတယ်။

ဇူလိုင်လ ၁၈ ရက်နေ့ မနက် ၉ နာရီအချိန်ကနေစတင်ကာ ဝါသောခိုကျေးရွာကိုလေယာဥ်နဲ့ ၃ ကြိမ် ဗုံးကြဲ တိုက်ခိုက်ခဲ့တာကြောင့် နေအိမ် ၃၀ ဝန်းကျင်ထိခိုက်ပျက်စီးခဲ့တဲ့အပြင် နှစ်ဖက်တိုက်ပွဲများ ဖြစ်ပွားခဲ့တယ်လို့ ဒေသခံအမျိုးသားတစ်ဦးကပြောပါတယ်။

"လေယာဥ်နဲ့ ၃ ခါပစ်တော့ အိမ် ၃၀ ကျော်ကျော်လောက်ပျက်စီးသွားတယ် ၉ နာရီကနေ ၁၀ နာရီထိ ၁ နာရီ ကျော်ကျော်လောက်လာဝဲသွားတယ် နောက်အဲ့ဒီမှာလည်း အပြန်အလှန်ပစ်ခတ်ကြတာ အကြီးအကျယ်ပဲ ရွာထဲတော့ပြန်မဝင်ရဲသေးဘူးအခုထိ ရွာသားတွေဆိုလည်း အိမ်မှာ တစ်ယောက်မှ မကပ်တော့ဘူး ရွာသူရွာသားတွေကျတော့ထိခိုက်တာတွေမရှိပါဘူး အပြန်အလှန်ပစ်တာတော့ ၈ နာရီ လောက်ကစပြီး နေ့လည် ၁ နာရီလောက်ထိတိုက်ပွဲကကြာတယ် ဒီနေ့တော့ငြိမ်နေတယ်” လို့ သူကပြောပါတယ်။

အခုလို စစ်ကောင်စီတပ်ဘက်မှ လေယာဥ်နဲ့ဗုံးကြဲတိုက်ခိုက်တာ၊ လက်နက်ကြီးတွေနဲ့ ကျေးရွာတွေအတွင်းကိုပစ်ခတ်တာ၊ စစ်ကောင်စီတပ်နဲ့ KNLA ပူးပေါင်းတပ်ဖွဲ့တို့ နှစ်ဖက်တိုက်ပွဲတွေ ပြင်ထန်းနေတာကြောင့် ယာဒို၊ ကလေထ၊ ပရယ်စို၊ ဝါသောခို စတဲ့ကျေးရွာ ၄ ရွာက ဒေသခံ ၂၂၀၀ ကျော်လောက်ဟာ နီးစပ်ရာ တောတောင်တွေမှာ နေထိုင်နေရပြီး စာသောက်ရေးအတွက် ခက်ခဲလာတယ်လို့ သူကဆက်ပြောပါတယ်။

"ရွာတွေအကုန်လုံးကစစ်ရှောင်ကြီးပဲ ရှောင်နေတာတစ်ပတ်လောက်တော့ရှိပြီ ဟို့အရှေ့ အင်္ဂါနေ့ကတည်းက အဲ့ဒီမှာစဖြစ်တော့ ရွာသားတွေကအကုန်လုံးရှောင်ထားပြီးသား ကျောက်ကြား၊ တောထဲတွေမှာ တဲတွေထိုးပြီးတော့သွားနေနေကြတာလေ အစားအစာတွေကျတော့လည်း အခက်အခဲတွေရှိတာပေါ့ စားဝတ်နေရေး၊ ဆေး နောက်အဲ့ဒီကြားထဲမှာလည်း မီးဖွားတဲ့သူလဲရှိတယ်”လို့ သူကပြောပါတယ်။

ဒါ့အပြင် အခုလိုတိုက်ပွဲတွေ နေ့တိုင်းနီးပါးဖြစ်ပွားနေတာကြောင့် စစ်ကောင်စီတပ်ဘက်မှလည်း စစ်အင်အားတိုးချဲ့တာတွေလုပ်ဆောင်နေပြီး နောက်ပိုင်းမှာလည်း နှစ်ဖက်တိုက်ပွဲအခြေနေ ပိုမိုပြင်းထန်လာနိုင်တယ်လို့ Thaw Thi Kho ရဲ့ပြန်ကြားရေးတာဝန်ခံတစ်ဦးကပြောပါတယ်။

ကရင်ပြည်နယ်အတွင်း KNLA ပူးပေါင်းတပ်ဖွဲ့တွေနဲ့ စစ်ကောင်စီတပ်တို့ နှစ်ဖက်တိုက်ပွဲ ပြင်းထန်နေတာဟာ သံတောင်မြို့တစ်ခုထဲမဟုတ်ပဲ မြဝတီမြို့၊ ကော့ကရိတ်မြို့၊ ကျုံဒိုးမြို့၊ ကြားအင်းဆိပ်ကြီးမြို့နဲ့ ဖာပွန်မြို့ဘက်တွေမှာပါနှစ်ဖက်တိုက်ပွဲပြင်းထန်နေတာလည်းဖြစ်ပါတယ်။

သတင်း - နော်ဖူးဖူး
ဓါတ်ပုံ - CJ
Phar Si Than(People's Radio Myanmar)

20/07/2023

မိုးဗြဲမြို့တွင်း တပ်စွဲထားတဲ့ စစ်ကောင်စီတွေက အရပ်သားများကို ပစ်ခတ်သတ်ဖြတ်မှုများ ဆက်လက်ဖြစ်ပေါ်နေ။
▪️ဇူလိုင် ၂၀ ရက်၊ ၂၀၂၃။

မိုးဗြဲမြို့အတွင်း မေ ၂၇ ရက်က စတင်ပြီး ဝင်ရောက်တပ်စွဲနေတဲ့ စစ်ကောင်စီတပ်များဟာ ယခင်လများကဲ့သို့ပဲ ဇူလိုင်လအတွင်းမှာလည်း မြို့အတွင်း ဖြတ်သန်းသွားလာသူ အရပ်သားများကို ပစ်ခတ်နေတယ်လို့ မိုးဗြဲမြို့ ဒေသခံများထံက သိရပါတယ်။ ယခုလအတွင်း အမျိုးသမီး ၁ ဦး ထိခိုက်ဒဏ်ရာရပြီး အမျိုးသမီးတဦး ပစ်ခတ်ခံရလို့ သေဆုံးခဲ့ပါတယ်။

ဇူလိုင် ၁၅ ရက်က မိုးဗြဲမြို့ စည်ကား ၁ ရပ်ကွက်အတွင်းနေအိမ်ဆီ ရိက္ခာပြန်ယူတဲ့ သားအမိ ၂ ဦးကို စစ်ကောင်စီက တပ်စွဲထားတဲ့ ဘုန်းကြီးကျောင်းအတွင်းမှ ပစ်ခတ်ခဲ့တာကြောင့် အမေဖြစ်သူ အသက် ၇၂ နှစ်အရွယ် အမျိုးသမီးသေဆုံးခဲ့ရတယ်လို့ သိရပါတယ်။

"အပစ်ခံရတဲ့ ရက်မတိုင်ခင် ရှေ့တရက်ကမှ အဲ့မနက်ပိုင်းမှာ သူ့သမီးက အိမ်ခဏပြန်ပြီး ပစ္စည်းသယ်တယ်၊ အဲ့တာနဲ့ သွားလို့ရသေးတယ်ထင်ပြီး အဲ့ဒီ အမျိုးသမီးက နောက်တနေ့ကျ သူ့သမီးနဲ့ ဆန်လိုက်သယ်မယ်ဆိုပြီး လိုက်သွားတာ၊ သားအမိနှစ်ယောက် တွန်းလည်းလေးနဲ့၊ သူ့သမီးက ရှေ့ကဆွဲတယ် သူက နောက်ကတွန်းတာပေါ့၊ အဲ့လို ဆန်သယ်ပြီး ပြန်အထွက်မှာ ပစ်ခံရတာ၊ နေရာက ဘေးမဲ့ကျောင်းနဲ့ နှစ်လမ်းကျော်လောက်မှာပဲ၊ မိခင်က အဲ့ဒီနေရာမှာပဲ ပွဲချင်းပြီး သေဆုံးသွားတာ၊ သမီးဖြစ်သူကတော့ လွတ်မြောက်သွားတယ်။" လို့ မိုးဗြဲမြို့ဒေသခံတဦးက Karenni's Voice ကို ပြောပါတယ်။

စစ်ကောင်စီဟာ မေ ၂၇ ရက်နေ့က စပြီး ယခုအထိ မိုးဗြဲမြို့အတွင်းမှာ အင်အား ၃၀၀ ထက်မနည်းနဲ့ တပ်စွဲထားခဲ့ပါတယ်။ ယခင်လက လင်္ကာရကျောင်းဝန်းအတွင်း တပ်စွဲထားတဲ့ တပ်များကတော့ ကျောင်းဝန်းအတွင်းက ထွက်ခွာသွားပြီး လဂျီနန်းပဲနဲ့ လွယ်ဝိုင်းအနီးမှာ ပြောင်းရွေ့တပ်စွဲနေကြတယ်လို့ သိရပါတယ်။ အရင်လကဲ့သို့ပဲ အရပ်သားများကို စစ်ကောင်စီတပ်များက ပစ်ခတ်မှုတွေ ဆက်ရှိနေပြီး အမျိုးသမီးတဦး မသေဆုံးခင်ကလည်း ပစ်ခတ်မှုကြောင့် အသက် ၄၀ ကျော်အရွယ် အမျိုးသမီးတဦး ထိခိုက်ဒဏ်ရာရခဲ့သေးတယ်လို့ ဒေသခံက ပြောပါတယ်။

"ဒီအမျိုးသမီးမတိုင်ခင် အရင်တရက်ကလည်း အဲ့လိုပဲ ပစ်ခတ်ခံရတာရှိတယ်၊ အသက် ၄၀ ဝန်းကျင် အမျိုးသမီးတယောက်ပဲ၊ သူက တောင်ယာက ပြန်လာတဲ့အချိန် ပစ်ခတ်ခံရတာပေါ့၊ ကံကောင်းလို့ ဘာမှမဖြစ်ဘဲ အသက်ရှင်တာ၊ စစ်တပ်က နေရာအနှံတပ်စွဲလိုက် မစွဲလိုက်လုပ်နေတော့ တောင်ယာလုပ်တဲ့သူတွေလည်း ဘယ်မှာတပ်စွဲမှန်း မသိနိုင်တော့ဘူးလေ အဲ့တာနဲ့ ရှေ့ရက်ကသွားလို့ရတယ်ဆိုပြီး အဲ့နေရာထပ်သွားပြီး အပစ်ခံရတာမျိုးတွေ ရှိလာတာပေါ့" လို့ မိုးဗြဲဒေသခံတဦးက Karenni's Voice ကို ပြောပြပါတယ်။

မေ ၂၇ ရက်က စတင်ပြီး စစ်ကောင်စီရဲ့ တပ်မ ၆၆၊ တပ်မ ၃၃ လက်အောက်ခံတပ်များနဲ့ Kayan National Guard-KNG ပြည်သူ့စစ်များ အင်အား ၃၀၀ နီးပါးနဲ့ မိုးဗြဲမြို့ကို ထိုးစစ်ဆင်လာတယ်။ အဲဒီနောက် စစ်ကောင်စီဟာ မိုးဗြဲမြို့လင်္ကာရဘုန်းကြီးကျောင်း၊ လယ်တီကျောင်းနဲ့ ဘေးမဲ့ကျောင်းတို့မှာ တပ်စွဲခဲ့ပါတယ်။ ဘုန်းကြီးကျောင်းများအတွင်း တပ်စွဲထားတဲ့ စစ်ကောင်စီရဲ့ ပစ်ခတ်မှုနဲ့ လက်နက်ကြီးများကြောင့် ယနေ့အထိ အရပ်သား ၂၂ ဦးထက်မနည်း သေဆုံးခဲ့တယ်လို့ MBPDF ထံက သိရပါတယ်။ မေ ၂၇ ရက်က စပြီး မိုးဗြဲမှာ အရပ်သား ၂၆ ဦး ထက်မနည်း စစ်ကောင်စီရဲ့ လက်ချက်ကြောင့် သေဆုံးခဲ့ရတယ်လို့ Free Burma Rangers အဖွဲ့က ထုတ်ပြန်ထားပါတယ်။ Karenni's Voice အနေနဲ့ အရပ်သားရုပ်အလောင်းများကို သယ်ယူသင်္ဂြိုဟ်ခဲ့ရသူများ၊ ဒေသခံများနဲ့ ကာကွယ်ရေးတပ်ဖွဲ့များကို တွေ့ဆုံပြီး သေဆုံးသူ အရပ်သား ၂၀ ဦးရဲ့ အချက်အလက် အသေးစိတ်ကို စုဆောင်းနိုင်ခဲ့ပါတယ်။

▪️Karenni's Voice (People's Radio Myanmar)
Photo - A.S/ Karenni's Voice
ဇွန်လအတွင်းတွေ့မြင်ရတဲ့ မိုးဗြဲမြို့အတွင်းက စစ်ဘေးရှောင်ပြည်သူများ

17/07/2023

ရွာသစ်မှ နေရပ်စွန့်ခွာထွက်ပြေးရသူများအနက် ပင်ပန်းမှုဒဏ်နဲ့ ထိတ်လန့်မှုတို့ကြောင့် သက်ကြီးရွယ်အို ၂ ဦး အသက်ဆုံးရှုံး။
▪️ဇူလိုင် ၁၇ ရက်၊ ၂၀၂၃။

ဇွန် ၂၄ ရက်က စတင်ပြီး ဘောလခဲမြို့နယ် ရွာသစ်မှ နေရပ်စွန့်ခွာထွက်ပြေးလာရသူများအနက် ပင်ပန်းမှုဒဏ်ကြောင့် သက်ကြီးပိုင်းအမျိုးသားတဦးနဲ့ ထိတ်လန့်မှုဒဏ်ကြောင့် သက်ကြီးပိုင်း အမျိုးသမီးတဦးတို့ အသက်ဆုံးရှူံးခဲ့ရကြောင်း နေရပ်စွန့်ခွာရသူများထံက သိရပါတယ်။

စစ်ကောင်စီတပ်တွေ ရွာသစ်ကို ဝင်ရောက်လာချိန်က စတင်ပြီး ရေလမ်းကြောင်းကို အသုံးပြုကာ ၃ ရက်တိတိ ထွက်ပြေးတိမ်းရှောင်ခဲ့ရတယ်လို့ သိရပါတယ်။ အဲဒီနောက် စစ်ကောင်စီရဲ့ လေကြောင်းဒဏ်က ကင်းဝေးဖို့ လူသွားလမ်းပင်မရှိတဲ့ တောတောင်ထဲ ယာယီတဲများ ဆောက်လုပ်နေထိုင်ခဲ့ကြပါတယ်။ အသက် ၇၂ နှစ်အရွယ် အမျိုးသားဟာ ရောဂါအခံမရှိ ဖျားနာခြင်းမရှိဘဲ သူနေထိုင်ရာ ယာယီတဲမှာပဲ ဇွန် ၆ ရက် မနက်ပိုင်းမှာ ရုတ်တရက် ဆုံးပါးသွားတယ်လို့ သိရပါတယ်။

"အမောလွန်ပြီး၊ အမောဆို့ပြီး ဆုံးတယ်လို့ ပြောရမှာပဲ။ ဦးလေးက ဘာရောဂါအခံမှ မရှိဘူး။ အဲဒီမနက်မှာ သူ မီးလှုံသေးတယ်။ ပြီးတော့ သူ ညောင်းတယ် ကိုက်ခဲနေတယ်ပြောပြီး သူ့အမျိုးသမီးကို နှိပ်ခိုင်းတယ်။ နှိပ်ပေးပြီး ခဏနေတော့ ဆုံးသွားတယ်။" လို့ ရွာသစ်ရဲ့ ကတ်သလစ်ကျောင်းထိုင်ဆရာတော်က Karenni's Voice ကို ပြောပြပါတယ်။

အသက်ဆုံးရှုံးခဲ့တဲ့ အဆိုပါ အမျိုးသားကို နေရပ်စွန့်ခွာသူများ ပုန်းရှောင်ရာ တောတွင်းတနေရာမှာပဲ မြှုပ်နှံသင်္ဂြိုဟ်ခဲ့ရတယ်လို့ ကျောင်းတိုင်ဆရာတော်က ဆက်လက်ပြောပြခဲ့ပါတယ်။

လက်ရှိပုန်းအောင်းနေတဲ့ နေရာကို မရောက်ခင် သံလွင်မြစ်ကမ်းနံဘေး ပုန်းရှောင်နေစဉ်က စစ်ကောင်စီရဲ့ တိုက်လေယာဉ်များ ပုန်းရှောင်ရာနေရာအနီး နီးကပ်စွာ ပျံဝဲခဲ့တာကြောင့် အသက် ၇၈ နှစ်အရွယ် အမျိုးသမီးတဦး ထိတ်လန့်ကာ လဲကျမေ့မြောပြီးနောက် ဆယ်ရက်ခန့်အကြာမှာ ကွယ်လွန်ခဲ့တဲ့လို့ ကွယ်လွန်သူရဲ့ သားတော်စပ်သူထံက သိရပါတယ်။

"လေယာဉ်သံတွေကြားတော့ ပြေးလာကြတဲ့ သူတွေလည်း အကုန်ရုတ်ရုတ်သဲသဲ ဖြစ်ကုန်ကြတယ်လေ။ အဲဒီမှာ အမေလည်း လဲကျသွားတယ်။ မနှစ်ကတည်းက ချော်လဲထားလို့ သူ့ညာခြေထောက်ကလည်း သိပ်မကောင်းဘူး။ အကြောသေသလိုဖြစ်နေတာ၊ သတိရလာပြီးနောက်ပိုင်း ထမင်းလည်းမစား ရေလည်းမသောက်တော့ဘူး။" လို့ သားတော်စပ်သူက Karenni's Voice ကို ပြောပြပါတယ်။

ညာခြေထောက်တဘက် မလှုပ်ရှားနိုင်တာကြောင့် ရွာသစ်မှ စွန့်ခွာရစဉ် အဘွားအိုကို သားဖြစ်သူနဲ့ ၎င်းရဲ့ သူငယ်ချင်းက ထမ်းစင်နဲ့ သယ်ဆောင်လာခဲ့ရတယ်လို့ သိရပါတယ်။ အဘွားအိုဟာ တိုက်လေယာဉ်များကြောင့် ထိတ်လန့်မေ့မြောပြီးနောက် အစားအစာ မစား၊ ရေမသောက်တော့ဘဲ ဇူလိုင် ၈ ရက် ညနေ ၃:၄၅ အချိန်မှာ ကွယ်လွန်ခဲ့ပါတယ်။

"ဒီနေရာမှာ ကျမတို့ရောက်လာမှ လူရှိတာလေ၊ အရင်က တောချည်းပဲ။ ဆေးရုံဆေးခန်းလည်းမရှိ၊ ဆေးလည်းမရှိဘူး။ ဆုံးသွားတဲ့ အချိန်မှာ ကျမ ရိက္ခာသွားသယ်နေတာ။ ခြောက်နာရီလောက် တောင်တက်တောင်ဆင်း လျောက်ရတာ။ လူက အရမ်းမောပြီး ပင်ပန်းနေတဲ့အချိန် လမ်းမှာတွေ့တဲ့ ရွာက ကလေးက ပြောပြတော့ ငိုတောင်မငိုနိုင်တော့ဘူး။" လို့ ကွယ်လွန်သူအမျိုးသမီးရဲ့ ချွေးမတော်စပ်သူက ပြောပြပါတယ်။

ရွာသစ်မှ နေရပ်စွန့်ခွာ ထွက်ပြေးရသူများဟာ ယခုအခါ လေကြောင်းရန်က ကင်းဝေးမယ်လို့ ၎င်းတို့ ယူဆတဲ့ တောတောင်များအကြား ပုန်းအောင်းနေရပြီး ဆန်နဲ့ ရိက္ခာခြောက်များအတွက် ခြေလျင် တညအိပ်ခရီးဖြင့်သာ သယ်ယူနိုင်တဲ့ လမ်းကြောင်းတခုသာရှိနေပါတယ်။ ဇွန် ၂၄ ရက်စတင်ပြီး စစ်ကောင်စီဟာ ရွာသစ်ကျေးရွာအတွင်း လေကြောင်းမှ ဗုံးကြဲတိုက်ခိုက်ကာ စစ်ကြောင်းထိုးဝင်ရောက်လာတာကြောင့် ရွာလုံးကျွတ် ထွက်ပြေးတိမ်းရှောင်ခဲ့ရတာပါ။ ယခုအခါ လူဦးရေ ၅၃၀ နီးပါးဟာ တောတောင်များအတွင်း ခိုအောင်းနေထိုင်ပြီး ဆေးဝါးနဲ့ရိက္ခာများ ခက်ခဲမှုကို ရင်ဆိုင်နေရပါတယ်။

▪️Karenni's Voice (People's Radio Myanmar)
Photo - A.S/Karenni's Voice၊ A.N/Karenni's Voice

Telegram - https://t.me/karennivoice/487

16/07/2023

စစ်ကောင်စီရဲ့ ထောက်ပို့ယာဉ်ကို ခြုံခိုတိုက်ခိုက်၊ ငါးကြင်းမှီးတလက် အပါအဝင် လက်နက်များ သိမ်းဆည်းရမိ
▪️Karenni's Voice

ဖယ်ခုံမြို့နယ် ခေါင်အိစစ်မျက်နှာမှာ ဖယ်ခုံထောက်ပို့တပ်က ထွက်ခွာလာတဲ့ စစ်ကောင်စီယာဉ်တန်းကို ခြုံခိုတိုက်ခိုက်ခဲ့တာကြောင့် စစ်ကောင်စီတပ်ဖွဲ့ဝင် ၄ ဦး သေဆုံးပြီး ၂ ဦး ဒဏ်ရာရကာ လက်နက်ခဲယမ်းများ သိမ်းဆည်းရမိတယ်လို့ ကရင်နီတော်လှန်ရေးတပ်ပေါင်းစု-KRU ထံက သိရပါတယ်။ ဇူလိုင် ၉ ရက် ည ၈:၀၀ အချိန်ခန့်မှာ တိုက်ပွဲဖြစ်ပွားခဲ့တာ ဖြစ်ပြီး အမှတ် ၁၀၀၈ ခြေမြန်တပ်ရင်း၊ ဖယ်ခုံ ပြည်သူ့ကာကွယ်ရေးတပ် အမှတ် ၁၀၀၅ တပ်ရင်း၊ ရှမ်းပြည်တောင်ဒေသခံတော်လှန်ရေးတပ်ပေါင်းစု-SSLRU၊ နေပြည်တော် ပ.က.ဖနဲ့ KRU တို့ ပူးပေါင်းတိုက်ခိုက်ခဲ့ကြတာပါ။

"ခေါင်အိတို့ စက်တော်တို့မှာ သူတို့တပ်တွေ ဖြန့်ထားတာ ရှိတော့ အဲဒီတပ်တွေကို ရိက္ခာ၊ လက်နက်တွေလာပို့ရင်း လူလည်းချိန်းတာ ဖြစ်မယ်။ ကားပေါ်မှာ လူ ၇ ယောက်နဲ့ ဆန်တွေ လက်နက်တွေပါတာပေါ့။ မိုင်းကွဲသွားတာနဲ့ ကျတော်တို့ ဝိုင်းပစ်ကြတာ။ ၄ ယောက်သေတယ်၊ နှစ်ယောက်ထိသွားပြီး နောက်တယောက်က ကျတော်တို့ကို ၇၉ နဲ့ ပြန်ပစ်ရင်း ပြေးသွားတယ်။ လက်နက်ကြီးတွေလည်း ကျလာတော့ သူတို့စစ်ကူတွေ မလာခင် ကျတော်တို့ သယ်လို့ရသမျှသယ် ကားကိုမီးရှို့ပြီး ပြန်ဆုတ်ခဲ့တာ" လို့ KRU ရဲ့ ပြန်ကြားရေးတာဝန်ရှိသူက Karenni's Voice ကို ပြောပြပါတယ်။

တိုက်ပွဲအတွင်း MA1တလက်၊စက်လက်(ငါးကြင်းမြီး)တလက်၊ ၆၀မမ ကျည် ၁၆ လုံး၊မိုင်း ၁ လုံး နဲ့ ရိက္ခာပစ္စည်းများ သိမ်းဆည်းရမိပါတယ်။

မတ် ၁၁ ရက် စပြီး ပင်လောင်းနဲ့ ဖယ်ခုံနယ်စပ်တလျောက် စစ်ကောင်စီက အင်အား ၃၀၀ ခန့်နဲ့ စစ်ကြောင်းထိုးလာတဲ့ကြောင့် ခေါင်အိ၊ တောင်စလုံး၊ မြောက်စလုံး၊ တောင်မဲသင်း၊ လုံးပျဉ်၊ ပင်ပုံ၊ နမ့်နိန်း စတဲ့ ကျေးရွာများက ဒေသခံ ၄,၀၀၀ ထက်မနည်း နေရပ်စွန့်ခွာထွက်ပြေးခဲ့ရပါတယ်။ စစ်ကောင်စီတပ်များဟာ ဧပြီလအတွင်း တောင်မဲသင်းကို ဆုတ်ခွာသွားခဲ့ပြီး မေလအတွင်းမှာတော့ စက်တော်ရွာနဲ့ ခေါင်အိတို့မှာ ဆက်လက်တပ်စွဲကာ ဒေသခံကာကွယ်ရေးတပ်များနဲ့ ယနေ့အထိ တိုက်ပွဲများ ပြင်းထန်လျက်ရှိပါတယ်။

▪️ဇူလိုင် ၁၆ ရက်၊ ၂၀၂၃။
Photo - KRU

16/07/2023

ဇွန်လထုတ် ရုန်းစာစောင်ဖြန့်ဝေခြင်း။

ရုန်း (We Struggle) ရဲ့ Issue 6 ဖြစ်တဲ့ ဇွန်လထုတ် စာစောင်ကို စစ်ရှောင်စခန်းများနဲ့ စာသင်ကျောင်းများမှာ ဖြန့်ဝေခဲ့ပါတယ်။

ဇွန်လအတွင်း တိုက်ပွဲအခြေအနေများ၊ စစ်ရာဇဝတ်မှုကြောင့် အရပ်သားသေဆုံးမှုများ၊ လေကြောင်းတိုက်ခိုက်မှုများ၊ နေအိမ်ပျက်စီးမှုများနဲ့ အခြား အကြောင်းအရာများကို ယခုစာစောင်အတွင်း ဖတ်ရမှာဖြစ်ပါတယ်။

ဆက်လက်ပြီး ကရင်နီဒေသတွင်းက စစ်ရှောင်များကို စားဝတ်နေရေး၊ ပညာရေး နဲ့ ကျန်းမာရေးစောင့်ရှောက်မှု လှည့်လည်ဆောင်ရွက်ပေးနေတဲ့ အဖွဲ့များဖြစ်တဲ့ KHAI ၊ JFK၊ မြို့နယ်ပညာရေးဘုတ်အဖွဲ့ နဲ့ mobile ဆေးအဖွဲ့တို့က တဆင့် ဖြန့်ဝေသွားပါမယ်။

ကျမတို့အနေနဲ့ လက်လှမ်းမမှီတဲ့ စစ်ရှောင်စခန်းများ ရှိပါက page messenger ကို ဆက်သွယ်ပြီး ယခုစာစောင်ကို ရယူနိုင်သလို ကူညီဖြန့်ဝေလိုပါကလည်း မူရင်း PDF file ကို မျှဝေသွားပါမယ်။

- Karenni's Voice (People's Radio Myanmar)

Photo - Karenni's Voice

Karenni's Voice

08/08/2023

05/08/2023

05/08/2023

04/08/2023

03/08/2023

23/07/2023

22/07/2023

21/07/2023

20/07/2023

17/07/2023

16/07/2023

16/07/2023

Address

Website

Alerts

Contact The Business

Shortcuts

Share