16/09/2025
အဲ့နေရဲ့ညဖက်တုန်းက မီးပုံဘေးမှာ ထိုင်ရင်း ဘာမဟုတ် ညာမဟုတ် ကျနော်ထပြောလိုက်တဲ့စကားကြောင့် ဘဲကြီးတွေ ခဏတွေဝေသွားတယ်
ဖုန်တွေ အလူးလူး နဲ့ မျက်နှာတွေပေါ်မှာ စဉ်းစားမှုပုံရိပ်တွေ ဖြတ်ပြေးနေကြတာများ
(ဘဲကြီးတွေဟာ အသက် ၂၀ကျော်ကနေ ၄၀ထိအသီးသီးရှိကြပြီး ကျနော်ကတော့အငယ်ဆုံး၁၇ပါ)
“ခင်ဗျားတို့ အခုလိုဒုက္ခတွေခံစားနေရတဲ့အချိန် အမေကလွဲ ဘယ်အမျိုးသမီး ကိုသတိအရဆုံးလဲ” ဆိုတဲ့ အဓိပ္ပာယ် ရတဲ့မေးခွန်းလေးသက်သက်ပါပဲ။
ဒါပေမဲ့ မိုင်ပေါင်းများစွာဝေးကွာနေမှုတွေ၊ မသေချာမရေရာမှုတွေ၊ ရှုပ်ထွေးနေတဲ့ အလွမ်းချည်မျှင်ပေါင်းများစွာက မေးခွန်းကို ပိုမိုလေးနက်သွားအောင် အသက်သွင်းပေးလိုက်သလိုပင် ။
မီးပုံဘေးက လူတိုင်းရဲ့မျက်နှာမှာ မတူညီတဲ့အမျိုးသမီးတဦးစီနဲ့ အတိတ်ကအမှတ်တရနေ့ရက်ပေါင်းများစွာ ရောင်ပြန်ဟပ်သွားတာကို ကျနော်အထင်းသားမြင်လိုက်ရတယ်
သူတို့ဟာ ဒီနေရာမှာ မရှိတော့ဘဲ အတိတ်တွေဆီ ခရီးလွှင့်နေပြီဖြစ်ကြောင်းလည်း ကျနော်စိတ်ထဲကနေ ကောက်ချက်ချလိုက်တယ်
ဟော.. တယောက်တော့ ပါးစပ်လှုပ်ဖို့ဟန်ပြင်နေပြီ
ထိုနေ့က မီးပုံဘေးမှာ အန်ကျထွက်လာတဲ့ စကားလုံးပေါင်းကလည်းမြောက်များစွာ
အချစ်အတွက် ရူးမိုက်ခဲ့တုန်းက အခြေအနေက ယခုလက်ရှိ တောကြီးမျက်မဲထဲ သေနတ်က််ိုင်ကင်းစောင့်ရတာထက် ကို ပိုမိုခက်ခဲခဲ့ကြောင်း ပြောပြနေလိုက်ကြတာများ ရယ်သံတွေတောင်လွှမ်းသွားသေးတယ်
အဲ့ဒီ့နေ့မှာပဲ အမျိုးသမီးတိုင်းဟာ လှပကြောင်း ကျနော်လက်ခံသွားတယ်
ဘဲကြီးတွေ သူတို့ရဲ့ အမျိုးသမီးကိုယ်စီကို အလှဖော် ကြူးရင့်ကြတာများဗျာ
အလှဆုံးမိန်းမတွေများ ရွေးယူထားကြလားမသိဘူး
သဲတွေ၊ ရွီံ့တွေ ပေကြံနေတဲ့ သူတို့မျက်နှာတွေ နဲ့မှမလိုက်လို့တောင် မဆီမဆိုင် စိတ်ထဲကတွေးမိလိုက်သေးတယ်
“ချစ်တယ်” ဆိုတဲ့ စကားလုံးအတွက် တိုက်ပွဲအလီလီဆင်နွှဲပြီး ဘယ်လိုဘယ်ပုံတိုက်ယူခဲ့ကြရကြောင်း၊
အချစ်အတွက်ဘသူပိုရဲရင့်ခဲ့ကြောင်း အကြိတ်အနယ် ဆွေးနွေးပြီးတဲ့အခါ အချစ်သူရဲကောင်းတွေအကုန်ငြိမ်ကျသွားတယ်
သူတို့ဟာ သူတို့အောင်နိုင်ခဲ့တဲ့ တိုက်ပွဲတခုကြောင်းကို တခြားစစ်မြေပြင်တခုမှာ လွမ်းဆွတ်တမ်းတ ပြောမိနေတာဖြစ်ကြောင်းသတိရသွားတယ်ထင်တယ်
မီးရောင်ရဲ့အရိပ်ကြောင့်ပဲလား ညအမှောင်ကြောင့်ပဲလားမသိ မဲနက်သွားတဲ့သူတို့မျက်နှာတွေ
အဲ့ဒီနေ့တွေက ပြန်ရနိုင်မှာလား ပြန်မရဘူးလား မသေချာတော့တဲ့ တွေဝေမှုမျိုး သူတို့မျက်နှာပေါ်မှာ ထပ်မြင်ရလိုက်တယ်
သေချာတာကတော့ သူတို့ဟာ အခက်ခဲဆုံးအခြေအနေတွေထဲမှာ လွမ်းဆွတ်မှုနဲ့ အတိတ်ကိုအမှတ်ရခြင်းဟာ မျက်ရည်ကျဖို့အလွယ်ကူဆုံးဖြစ်ကြောင်း သက်သေပြနေကြပြီ
ကျနော်စကားတခွန်းမှမပြောဘဲ မီးပုံကိုစိုက်ငေးကြည့်လိုက်တယ်
တော်တော်ကြာမှ ကိုယ့်ကိုယ်ကိုယ်တောင်သတိမထားမိဘဲ ပါးစပ်ကိုဟရင်း
“ဒါကြောင့်မိန်းကလေးတွေက ယောက်ျားလေးတယောက်ရဲ့ ဘဝမှာ အချစ်ရဆုံးတယောက်ဖြစ်ချင်ကြတာကိုး”လို့ဆိုတဲ့စကားကို လူတိုင်းကြားရုံလောက် လွမ်းဆွေးသံနဲ့ပြောမိလိုက်တယ်
ထိုနေ့ကညက မီးပုံဘေးမှာ အလှဖော်ကြူးခံရတဲ့ မိန်းကလေးတွေဟာ အင်မတန်ကိုမှ ကံကောင်းတဲ့ အမျိုးသမီးတွေသာဖြစ်တယ်
ကံအဆိုးဆုံးတွေလည်းဖြစ်တယ်
