19/03/2025
နည်းပညာသတင်း | မတ်လ ၁၉ ရက် ၂၀၂၅ | Quick Tech
လွန်ခဲ့တဲ့ ၁၀ နှစ်ကျော် (၂၀၁၃) ခုနှစ်က ကယ်လီဖိုးနီးယား အခြေစိုက် Pebble Technology Corporation ကနေ Pebble နာမည်နဲ့ နာရီတွေ ထုတ်ရောင်းဖူးတယ်။ Apple Watch ဆိုတာတောင် မရှိသေးတဲ့ခေတ်။ iPhone 5s ခေတ်ပေါ့။
Pebble က နည်းပညာလောကထဲမှာ မပျောက်သင့်ဘဲ ပျောက်သွားတဲ့ အပိုင်းအစတစ်ခုလို့ ပြောရလောက်အောင် အရေးကြီးပါတယ်။ ဥပမာပေးရရင် ကလေးကအစ၊ ဖိုးဖိုးဖွားဖွားအထိ Tablet မြင်တိုင်း iPad လို့ပဲ ပြောနေတဲ့ခတ်မှာတောင် Amazon Kindle တွေ ဆက်ပြီး ရှိနေသေးတာကို ကြည့်။
Pebble က အဲ့ဒီလိုမျိုး သီးသန့်ဆန်တဲ့ Digital ပစ္စည်းတစ်မျိုးပါပဲ။ iPad တွေ ရွေးစရာအများကြီးရှိနေတဲ့ကြားထဲက Kindle တွေကို သပ်သပ်ထပ်ဝယ်၊ သီးသန့်သုံးရတာ ကြိုက်တဲ့သူတွေ အများကြီးရှိသလိုပဲ ဒီ Pebble နာရီတွေကိုလည်း အသည်းအသန် ကြိုက်ကြတဲ့ ပရိသတ်က မနည်းပါဘူး။
Pebble ကုမ္ပဏီ ပိတ်သွားတဲ့အကြောင်း -
Pebble ကို ၂၀၁၆ ခုနှစ်မှာ ကုမ္ပဏီဖျက်သိမ်းလိုက်တယ်။ အဲ့ဒီအချိန် Fitbit က Pebble နာရီတွေမှာသုံးတဲ့ Operation System အပါအဝင် Pebble ကုမ္ပဏီ ပိုင်ဆိုင်သမျှအရာ အတော်များများကို ဝယ်လိုက်တယ်။ နောက်ပိုင်းကျ Fitbit ကို Google က (၂၀၂၁ ခုနှစ်မှာ) ထပ်ပြီး ကောက်ဝယ်လိုက်ပြန်ရော။ အဲ့ဒီတော့ ဒီ Pebble နာရီနဲ့ဆိုင်တာတွေကို Fitbit က ပိုင်ထားပြီးသားဖြစ်လို့ Google အနေနဲ့ နည်းပညာဆိုင်ရာ မူပိုင်ခွင့်တွေ၊ ပိုင်ဆိုင်မှုတွေ အများကြီး ရလိုက်တာတာပဲ။ အခု Google Pixel Watch တွေမှာ ပါတဲ့ နည်းပညာတွေက Fitbit ဆီကဟာတွေကို ယူသုံးလိုက်တာ များပါတယ်။
ဒါပေမယ့် Pebble နာရီတွေမှာသုံးတဲ့ PebbleOS ကိုတော့ Google က သူ့ Pixel Watch တွေမှာ မသုံးပါဘူး။ မသုံးတဲ့အပြင် ဒီ ၂၀၂၅ ခုနှစ် တစ်လပိုင်းအကုန်နားမှာ Google က PebbleOS ရဲ့ Codebase ကို Open-Sourced အဖြစ် တရားဝင်ကြေညာလိုက်ပြီး လူတိုင်း Download ရယူပြီး စိတ်ကြိုက်ပြင်ဆင် ပြန်လည်ဖန်တီးခွင့်၊ အသုံးပြုခွင့်လည်း ရှိသွားပါတယ်။ အဲ့တာကြောင့်ပဲ Pebble နာရီ အသစ်ပြန်ထွက်လာဖို့ လမ်းစဖြစ်လာတာပါ။
အခု Pebble နာရီအသစ်တွေကို ပြန်ထုတ်ဖို့ စီစဥ်နေတာကလည်း တခြားသူမဟုတ်ပါဘူး။ မူလပထမ Pebble နာရီအစ မူရင်းစိတ်ကူးပိုင်ရှင်၊ ဖန်တီးရှင်ဖြစ်တဲ့ Eric Migicovsky ဆိုတဲ့ ကနေဒါနိုင်ငံဖွား အင်ဂျင်နီယာတစ်ဦးပါ။
သူ Pebble ကို ပြန်လုပ်ဖို့ စိတ်ကူးရတဲ့အကြောင်းကိုလည်း Repebble Website မှာ အခုလို ပြောထားသေးတယ် - “
I've tried pretty much every other smartwatch on Earth, yet I still wear my Pebble every day—nothing else matches its features and long battery life. I really, really, really hoped someone else would create a proper replacement, but no one has stepped up, and my stash of old Pebbles is dwindling!
It's time to take matters into my own hands. A small team and I are working on a new Pebble-like smartwatch that runs open source PebbleOS, has the same beloved features (plus some fun new stuff), and stays true to the core Pebble vision.”
The New Age Pebble -
အခု PebbleOS နဲ့ နာရီတွေကို ထုတ်မယ့်ကုမ္ပဏီကို Core Devices ဆိုပြီး Eric Migicovsky က နာမည်ပေးထားပါတယ်။ နာရီတွေကိုလည်း Core 2 Duo နဲ့ Core Time 2 ဆိုပြီး နာမည်ပေးထားမှာပါ။
Core 2 Duo ကို $149 နဲ့ ရောင်းမှာဖြစ်ပြီး 1.2-inch (144x168 pixels) Black & White E-Paper Screen ၊ Barometer ၊ Compass တွေပါမှာဖြစ်ပြီး ပလပ်စတစ်ကိုယ်ထည်နဲ့ လာမှာပါ။ Core Time 2 $225 စျေးနဲ့ 1.5-inch (200x228 pixels) Color E-Paper ကို Touch Screen ဖြစ်သွားမယ်၊ Metal Frame ၊ Heart Rate Monitor တွေ အပိုပါမယ်။
Model ၂ မျိုးလုံးကတော့ တစ်ခါအားသွင်း ရက် ၃၀ ခံ Battery Life ၊ IPX8 Water Resistance ၊ Step and Sleep Tracking ၊ Mic ၊ Speaker တွေ ပါမှာဖြစ်ပြီး PebbleOS နဲ့ပဲလာမှာဆိုတော့ Watchface နဲ့ App ပေါင်း ၁၀၀၀၀ ကျော်လောက်ကလည်း အဆင့်သင့် ရှိနေပြီးသား။
Pebble နာရီတွေရဲ့ အနှစ်သာရ -
ဒီနာရီတွေမှာ စိတ်ဝင်စားစရာ ၂ ပိုင်းရှိပါတယ်၊ တစ်ပိုင်းက Software ဖြစ်ပြီး တစ်ပိုင်းက Community ပါ။ အင်တာနက်ပေါ်မှာ Pebble နာရီတွေနဲ့ပတ်သက်ပြီး တက်တက်ကြွကြွရှိတဲ့ Community က ကုမ္ပဏီ ပိတ်သွားပြီးတာတောင် အခုထိ ဆက်ပြီး အသက်ရှင်နေတုန်းပါပဲ။ ဒါက PebbleOS ကြောင့်ဆိုရင် မမှားဘူး။
အခု Core နာရီအသစ်တွေမှာလည်း PebbleOS က အရင်အတိုင်းဆက်ပြီး ရှိနေမယ်၊ အရင်လိုပဲ ကလိလို့ရမယ်၊ ကိုယ်လုပ်ချင်သလို စိတ်ကြိုက် Hack လို့ရမယ်ဆိုတာမျိုးကို ဆက်ပြီးဖွင့်ပေးထားမှာပါ။ တနည်းပြောရရင် ကိုယ့်နာရီ ကိုယ်ပိုင်တယ်၊ ကုမ္ပဏီက လွှမ်းမိုးမှု မရှိဘဲ လွတ်လွတ်လပ်လပ် လုပ်ချင်သလို လုပ်ခွင့်ရှိတဲ့ဆိုတဲ့ လွတ်လပ်ခွင့် တစ်ခုပဲဆိုပါတော့။
ဒါတွေကို စိတ်မဝင်စားဘူးဆိုရင်တောင် E-Paper Screen ကြောင့် ဒီနာရီတွေရဲ့ Battery ခံမှုကိုတော့ ကျော်သွားလို့မရဘူး။ အခုခေတ်လို OLED Screen တွေ နေရာတိုင်းပါနေတဲ့ခေတ်ကြီးမှာ ဒီနာရီတွေက E-Paper Screen တွေနဲ့ဆိုတော့ နည်းပညာတိုးတက်မှုကို တော်လှန်တဲ့ Device မျိုးဆန်ဆန် ဖြစ်နေတယ်။ အပေါ်က ပြောတဲ့ Kindle တွေလိုပဲ ဘယ်လောက်ခေတ်တွေ တိုးတက် တိုးတက် E-Ink Display ကြောင့် ပျောက်ကွယ်သွားမယ့် Device မျိုး မဟုတ်တာတော့ သေချာတယ်။
အရောင်ပါတာလိုချင်တယ်ဆိုရင်လည်း Core Time 2 ရဲ့ E-Paper Dispaly က အရောင် ၆၄ မျိုးတောင် ပြပေးနိုင်မှာ။ စျေးတော့ပိုကြီးတယ်ဆိုပေမယ့် အမြန်ခေတ်အောက်သွားမှာမဟုတ်တဲ့ နာရီမျိုးပါ။
နာရီတွေနဲ့ ဘာလုပ်လို့ရလဲ -
PebbleOS အရတော့ သူတို့ကို Smartwatch တွေလို့ ခေါင်းစဥ်တပ်ချင်ရင် တပ်လို့ရပါတယ်။ ဒါပေမယ့် Apple Watch တွေ၊ Android Watch တွေနဲ့ တခြားသော Screen ပါတဲ့ နာရီတွေလောက်တော့ Smart ဖြစ်ချင်မှ ဖြစ်မယ်၊ ဒါပေမယ့် သူ့မှာ ကိုယ်ပိုင် App Ecosystem အသေးလေး ရှိနေပြီးသားဖြစ်လို့ တခြားသော Smartwatch တွေလိုပဲ သီချင်း၊ မြေပုံ၊ ရာသီဥတုလို အခြေခံ App တွေကနေ တခြား App တွေလည်း အများကြီးရှိနေပါတယ်။ ဒါထက်ထူးဆန်းတာက ဒီနာရီပိစိလေးတွေပေါ်မှာဆော့ဖို့ Game သေးသေးလေးတွေပါ လုပ်ထားကြတာလည်း ရှိသေးတယ်။ တကယ်တော့ ဘယ်သူမှ မဆော့လောက်ပါဘူး၊ Cool Party Trick ပေါ့။
ဒီ Core နာရီတွေကို ဖုန်းနဲ့ချိတ်သုံးမယ်ဆိုရင် Android ရော iOS ရောအတွက် App ရှိပါမယ်။ အဲ့ဒီ App ကနေတစ်ဆင့်ပဲ Software Update လုပ်တာမျိုး ဖြစ်လာမှာပါ။ နာရီအသစ်တွေကိုတော့ လာမယ့် ဇူလိုင်လဝန်းကျင်မှ စပြီးရနိုင်ဖို့ သူတို့ စီစဥ်ထားပါတယ်တဲ့။
Design -
Pebble နာရီတွေ ထွက်တုန်းက သူတို့ရဲ့ သီးခြားကွဲထွက်နေတဲ့ နာရီ Design ကြောင့် မှတ်မိလွယ်ပါတယ်။ အခုလည်း အဲ့ဒီလိုပဲ ရိုးရှင်းတဲ့ နာရီ Design ကို ပြန်သုံးမှာဆိုတော့ Product Design မှာ Icon တစ်ခုလိုတောင် ဖြစ်စပြုလာပြီလို့ ပြောရမှာပါပဲ။ အခုခေတ် Smartwatch တွေလို OLED Screen အပြည့်၊ ရောင်စုံ၊ Feature တွေ တစ်ပြုံကြီးနဲ့မဟုတ်ဘဲ ပိုပြီးရိုးရှင်းတဲ့ Digital နာရီတစ်လုံးနဲ့ ပိုနီးစပ်မှာပါ။ ကျန်းမာရေးနဲ့၊ အားကစားအတွက် ပတ်ဖို့လည်း မဟုတ်ပြန်ပါဘူး။ Pebble ရဲ့ မူရင်းရည်ရွယ်ချက်ကိုက ပျော်စရာကောင်းတဲ့၊ ရိုးရိုးရှင်းရှင်း Digital နာရီမျိုး ဖြစ်ချင်တာဆိုတော့ အခုလည်း ဒီလမ်းအတိုင်းပဲ ဆက်သွားဖို့ရှိတယ်ဆိုတာ သေချာပါတယ်။
ဘယ်သူတွေ ဒီနာရီကို မဝယ်သင့်လဲ (မဝယ်သင့်နော်) -
Eric Migicovsky ပြောထားတာအတိုင်း တိတိကျကျဆိုရင် - ဒီနာရီက Fitness ဒါမှမဟုတ် Sports Watch လိုချင်တဲ့သူတွေအတွက် မဟုတ်ပါဘူး၊ အဲ့တာလိုချင် Garmin ဝယ်လို့ ရေးထားပါတယ်။ နောက်ထပ်ပြောထားတာက ဒီနာရီကို Apple Watch နဲ့ ယှဥ်စဥ်းစားနေရင် မဝယ်သင့်ဘူး၊ Apple Watch လိုမျိုးကိုကြိုက်တတ်တဲ့သူဆိုရင် ဒီနာရီကို ဝယ်ဖို့မသင့်ကြောင်း၊ ဒီနာရီက လူတိုင်းအတွက် မဟုတ်ကြောင်းကို ကြိုပြီးတော့ ပြောထားပါတယ်။
နာရီကို Notification အတွက်မဟုတ်၊ ကျန်းမာရေးအတွက်လည်းမဟုတ်ဘဲ Personal Accessory တစ်ခုလို ပတ်ချင်တယ်၊ ပျော်စရာ၊ စိတ်ဝင်စားစရာ Digital Watch တစ်မျိုးလည်း ဖြစ်ရမယ်ဆိုရင် ဒီ PebbleOS နဲ့ Core Watch တွေက လိုချင်စရာ ဖြစ်လာမှာ သေချာတယ်။
ဒီပစ္စည်းက ဘယ်လိုအမျိုးအစားထဲမှာ ပါလဲဆိုတော့ အပေါ်မှာပြောသလို Kindle တို့၊ PlayDate ဂိမ်းစက်၊ Light Phone ကနေ Ricoh GR Camera ၊ Sigma BF Camera တို့တွေလိုမျိုးပဲ ဒီဖက်ခေတ် နည်းပညာပစ္စည်းတွေနဲ့ မတူ၊ အနည်းငယ် တော်လှန်ဆန့်ကျင်တဲ့ အတွေးအခေါ်တစ်ခု၊ ဒါမှမဟုတ် ကိုယ်ပိုင်ဖြစ်တည်မှုတစ်ခုနဲ့ သီးခြား ကွဲထွက်နေတဲ့ နည်းပညာ ထုတ်ကုန်ပစ္စည်းတွေပဲ။ အဲ့ဒီလို ပစ္စည်းမျိုးတွေကို ကြိုက်တဲ့သူတွေက သပ်သပ်ကိုရှိတယ်။
အခု ဒီ PebbleOS နဲ့ Core Watch တွေကိုလည်း အဲ့ဒီလိုပစ္စည်းတွေကြိုက်တဲ့ လူတစ်စုက ဝယ်ကြ၊ သုံးကြ၊ Collect လုပ်ကြဦးမှာပဲဆိုတာ သေချာပါတယ်။ ကျွန်တော်ကိုယ်တိုင်လည်း Core 2 Duo ကို အနည်းငယ် စဥ်းစားနေတယ်။ :3
With love, from Quick Tech.
