12/07/2025
Waxaa la jooga xilligii la dhisi lahaa Dawlad Goboleedka Banaadir si ay ula mid noqoto dawlad goboleedyada kale ee Soomaaliya. Muddo dheer ayaa shacabka ku nool gobolka Banaadir laga reebay nidaamka federaalka ee dalka, taasoo keentay in aanay helin matalaad buuxda oo siyaasadeed iyo dhaqaale.
Gobolka Banaadir oo ah xarunta dalka, isla markaana leh dadka ugu badan iyo dhaqaalaha ugu weyn, wuxuu u baahan yahay maamul u gaar ah oo matala danta shacabka, ka shaqeeya horumarka, iyo adeegyada bulshada si loo gaaro cadaalad iyo sinnaanta siyaasadeed.
In la dhiso Dawlad Goboleedka Banaadir waxay meesha ka saari doontaa dareenka kala soocidda shacabka gobolka, waxayna dhiirrigelin doontaa midnimo qaran iyo wadajir dhameystiran. Waxa kale oo ay fursad u tahay in lagu xalliyo khilaafaadka siyaasadeed iyo maamul ee soo jiitamayay.
Maamulka la sameynayo waa in uu noqdaa mid ku saleysan danaha shacabka, lagu dhiso si sharci ah oo la tixgelinayo ra'yiga dadka deegaanka, lagana ilaaliyo in uu noqdo mid qabiil ku dhisan ama lagu siyaasadeeyo dano gaar ah.
Ugu dambeyntii, dhismaha Dawlad Goboleedka Banaadir waa tallaabo muhiim ah oo loo baahan yahay in si degdeg ah loo qaado, si muwaadiniinta ku nool caasimadda dalka ay u helaan xuquuqdooda federaal, maamul hufan, iyo horumar la jaanqaadaya qeybaha kale ee Soomaaliya.
Maxaa ka hor taagan shacabka reer muqdisho inay dowlad gobaaleed dhistaan ?
Waa kalsooni darro ka dhaxaysa bulshada iyo xumaantii ay qabqablayaashu ka dhex abuureen dhamaadkii qarnigii h**e, taasna waxaa xal u ah hishiis bulsho oo dhab ah markaas ayaa dad meel u wada socda ka soo bixi karaan gobalka .
