03/08/2025
တိုက်ပွဲမဖြစ်ဘဲ တနင်္သာရီ မော်တုန်းရွာကို စစ်ကောင်စီ ဒရုန်းဖြင့်ဗုံးချပြီး လက်နက်ကြီးဖြင့်ပစ်ခတ်
Dawei Watch| ဩဂုတ် ၃
တနင်္သာရီမြို့နယ်ရှိ မော်တုန်းရွာကို စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ ဒရုန်းဖြင့်ဗုံးချပြီး လက်နက်ကြီးဖြင့် ပစ်ခတ်တိုက်ခိုက်ကြောင်း ဒေသခံများနှင့် တော်လှန်ရေးတပ်ဖွဲ့ဝင်အချို့ထံမှ သိရသည်။
ယနေ့ ဩဂုတ် ၃ရက် ညနေ ၃နာရီ ၁၅မိနစ်ခန့်တွင် မော်တုန်းရွာအခြေစိုက် စစ်ကောင်စီ၏ အမှတ် ၃၀၆တပ်က ဒရုန်းဖြင့် ဗုံးချပြီး လက်နက်ကြီးဖြင့်ပစ်ခတ်သဖြင့် လူနေအိမ်နှစ်ဆောင် ပျက်စီးကြောင်း မော်တုန်းရွာနေ အမျိုးသားတစ်ဦးက ဆိုသည်။
“ဒရုန်းလာသံကြားတော့ ရွာသားတွေက ကျုံးတွင်း(ဗုံးခိုကျင်း)ထဲ ဝင်ပြေးကြလို့ လူတွေတော့ ဘာမှမဖြစ်ဘူး။ဒရုန်းနဲ့ ဗုံးသီးလာချတော့ လူနေအိမ် နှစ်အိမ် နောက်ဖေး ပျက်စီးပြီး ကျန်နေရာတွေက အစစင်သွားတယ်” ဟု အထက်ပါ အမျိုးသားက ပြောသည်။
စစ်ကောင်စီတပ်က ဒရုန်းဖြင့် ဗုံးတစ်လုံးချပြီးနောက် လက်နက်ကြီး နှစ်လုံး ဆက်တိုက်ပစ်ခတ်ကြောင်း ဒေသခံအမျိုးသမီးတစ်ဦးက ပြောဆိုသည်။
“ဒရုန်းနဲ့လာချပြီးတာနဲ့ လက်နက်ကြီး တစ်ခါတည်းပစ်တယ်။ လက်နက်ကြီး နှစ်လုံးက ရွာပြင်မှာ ကျတယ်။ ရွာသားတွေတော့ ပျာယာခတ်ကုန်တယ်။ထပြေးသူက ပြေးနဲ့” ဟု အထက်ပါအမျိုးသမီးက ပြောသည်။
စစ်ကောင်စီတပ်သည် မော်တုန်းရွာအနီးရှိ ကမ်းတိုရွာ၊ ဘန်းလမွတ်ရွာနှင့် ရမ်းဖိုရွာဝန်းကျင် ပြည်ထောင်စုလမ်းမကြီးတစ်လျှောက် တိုက်ပွဲဖြစ်ပွားပါက လက်နက်ကြီးဖြင့် ပစ်ခတ်လေ့ရှိကြောင်း တော်လှန်ရေးတပ်ဖွဲ့ဝင်တစ်ဦးက ပြောဆိုသည်။
ထို့အပြင် စစ်ကောင်စီ၏ အမှတ် ၃၀၆အမြောက်တပ်က တိုက်ပွဲဖြစ်ပွားခြင်းမရှိဘဲလည်း မော်တုန်းရွာနှင့်အနီးအနားရှိ ကျေးရွာများကို ဒရုန်းဖြင့်ဗုံးချပြီး လက်နက်ကြီးဖြင့် ပစ်ခတ်လေ့ရှိကြောင်း ဒေသခံအချို့ထံမှ သိရသည်။
ပုံစာ - မော်တုန်းရွာအခြေစိုက် စစ်ကောင်စီ၏ အမှတ် ၃၀၆ အမြောက်တပ်ရင်းအရှေ့ရှိ စစ်ဆေးရေးဂိတ်အားတွေ့ရစဉ်(ပုံဟောင်း)
