10/05/2025
’فتح ون‘ میزائل کیا ہے؟
فتح ون میزائل پاکستان کا جدید اور مختصر فاصلے تک مار کرنے والا ہتھیار ہے جس کی رینج 140 کلومیٹر تک ہے۔ 24 اگست 2021 کو مقامی طور پر تیار کردہ فتح ون راکٹ سسٹم کا تجربہ کیا گیا تھا۔
فتح ون پاکستان کا تیار کردہ زمین سے زمین پر مار کرنے والا گائیڈڈ میزائل ہے جو فتح سیریز کا حصہ ہے۔ اس سیریز میں ایک اور میزائل فتح ٹو بھی شامل ہے۔ پاکستان کی فوج کے شعبہ تعلقات عامہ (آئی ایس پی آر) کے مطابق 400 کلومیٹر تک کے فاصلے پر مار کرنے والے اس میزائل میں اپنے ہدف کو ٹھیک ٹھیک نشانہ بنانے کی صلاحیت ہے۔
فتح ون ہدف کے لحاظ سے 300-500 کلو وار ہیڈ لے جانے کی صلاحیت بھی رکھتا ہے۔
کینبرا کی نیشنل یونیورسٹی میں سٹریٹیجک اور ڈیفینس سٹڈیز کے لیکچرر ڈاکٹر منصور احمد کے مطابق فتح میزائل پاکستان کی لانگ رینج راکٹ آرٹلری سسٹم میں جدید اضافہ ہیں۔ ان کا استعمال انتہائی درستگی کے ساتھ مختلف اہم اہداف پر جوابی حملوں کے لیے کیا جاتا ہے جن میں ائیربیسز، کمانڈ اینڈ کنٹرول سینٹرز، ایمونیشن ڈیپوز، لاجسٹک سپلائی لائنز، اور دشمن کے فاروڈ سپلائی ٹینکس یا توپ خانے وغیرہ شامل ہو سکتے ہیں۔
ڈاکٹر منصور کے مطابق فتح سیریز پاکستان کا بہت مؤثر میزائل سسٹم ہے جو ایئر فورس کے ساتھ مل کر دشمن کی (آفینسو کیپیبلٹی) کو نشانہ بنانے اور اُن کے ہائی ویلیو ڈیفینسو ٹارگٹس کو نیوٹرآئز کرنے میں استعمال ہوتا ہے۔
انھوں نے بتایا کہ اس میزائل کی سب سے اہم خوبی یہ ہے کہ آپ ان میزائلوں کو دشمن کے دفاعی نظام کی حدود سے باہر، سٹینڈ آف رینج سے فائر کر سکتے ہیں۔ ان میزائلوں میں ’شوٹ اینڈ سکوٹ‘ کی صلاحیت موجود ہے، یعنی فائر کرنے کے فوراً بعد یہ اپنی جگہ بدل سکتے ہیں اسی وجہ سے یہ دشمن کی جوابی گولہ باری سے محفوظ رہتے ہیں، کیونکہ ان کا مقام فوری طور پر تبدیل ہو جاتا ہے لہٰذا انھیں نشانہ بنانا یا روکنا نہایت مشکل ہو جاتا ہے۔
’پاکستان نے فتح سیریز کے گراؤنڈ لانچڈ آرٹلری راکٹ سسٹمز کا استعمال کیا ہے جو کہ امریکی ہائی موبیلٹی آرٹلری راکٹ سسٹم (HIMARS) سے مشابہ ہیں اور جنھیں یوکرین میں انتہائی درستگی سے استعمال کیا جا رہا ہے۔‘
ڈاکٹر منصور کے مطابق یہ میزائل سسٹم مقامی طور پر تیار کیا گیا ہے جس کا مطلب یہ ہے کہ اس سیریز کے مزید میزائلوں کی تیاری میں پاکستان کو سپلائی کی کوئی پریشانی نہیں ہو گی۔
اُن کا مزید کہنا ہے کہ فتح سیریز میں ون، ٹو، تھری اور فور میزائل شامل ہیں جن میں فتح ون اور ٹو 400 کلومیٹر تک رینج رکھتے ہیں اور یہ دونون فوج کے آپریشنل استعمال میں ہیں۔ انھوں نے بتایا کہ پاکستان فتح فور پر بھی کام کر رہا ہے جس کی رینج 700 کلومیٹر ہے۔
اس حوالے سے اسلام آباد میں مقیم دفاعی امور کے ماہر سید محمد علی بتاتے ہیں کہ فتح سیریز کے میزائلوں کی خاصیت یہ ہے کہ: ’یہ انتہائی درستگی کے ساتھ ہدف کو نشانہ بناتے ہیں اور یہ سپر سونک ہیں‘
ان کی سب سے اہم خاصیت ’مینوورایبل ان ٹرمینل سٹیج‘ ہے جس کا مطلب یہ ہے کہ کوئی بھی بیلسٹک میزائل سسٹم اس کو ہٹ نہیں کر سکتا۔
اس کی مثال وہ کرکٹ سے دیتے ہیں کہ جس طرح کہا جاتا ہے کہ وقار یونس کی لیٹ سوئنگ ہوتی تھی، اگر کوئی بالر صرف را پیس پر 160 کلو میٹر پر بال کر رہا ہے تو اس کا کوئی فائدہ نہیں لیکن ایک بالر اگر 140 کی سپیڈ پر بھی بالنگ کر رہا ہے لیکن وہ لیٹ سوئنگ ہوتی ہے اور بالر ٹارگٹ پر پہنچنے سے پہلے اچانک اپنی ڈائریکشن تبدیل کر لیتا ہے تو جس طرح بیٹ اور بیٹسمن کے بیچ گیپ نکل آتا ہے اسی طرح ڈیفینس سسٹم کے بیچ گیپ نکل آتا ہے اور دشمن کے لانچ کیے گئے تمام میزائل کنفیوژ ہو جاتے ہیں اور آنے والے راکٹ کو ہٹ نہیں کر پاتے۔‘
سید محمد علی کے مطابق اسرائیل کی طرح انڈیا کے دفاعی نظام کی بھی تین تہیں ہیں: باہر والی تہہ ایس 400 ہے جس کی رینج تین سے چار سو کلومیٹر ہے، اس کے بعد انڈیا کے پاس اسرائیل کا دیا گیا براق 8 سرفیس ٹو ائیر میزائل سسٹم ہے اور تیسرا انڈیا کا اپنا بنایا گیا ’آکاش‘ سسٹم ہے جو اس دفاعی نظام کی تیسری تہہ ہے۔
ان کا دعویٰ ہے کہ ’ٹرمینل سٹیج میں اس میزائل کی درستگی، رفتار اور مینوورایبلٹی انڈیا کے تمام دفاعی نظاموں کو شکست دینے کی صلاحیت رکھتی ہے اور یہ پاکستان کے فل سپیکٹرم ڈیٹرنس یا دفاعی صلاحیت کے ذریعے دشمن کو روکنے کی حکمتِ عملی کا پہلا اور سب سے چھوٹا میزائل ہے۔‘
سید محمد علی کے مطابق اس میزائل سے کسی ایئر بیس کو نشانہ بنانے کا فائدہ یہ ہے کہ یہ سینکڑوں ہزاروں بومبلیٹس یا چھوٹے بارودی گولوں کی بارش سے رن وے کو تباہ کر دیتا ہے اور ایسے گڑہے بنا دیتا ہے کہ وہاں جتنے جہاز کھڑے ہیں جب تک رن وے تباہ ہے وہ پرواز نہیں کر سکتے۔
