10/08/2025
(၇၅) ၀ီတ၀ီ ကညီမၤထူရၤအမုၢ်နံၤ
ကီၢ်ခိၣ်စီၤဘးအူကၠံလၢ ကညီဒီတကလုၥ်ပၣ်ပနီၣ်ဃၥ်၀ဲ ဒ်ကညီဒီတကလုၥ်ခိၣ်နၢ်အသိးဒီး စီၤစဲက့ၣ် ၂ဂၤအံၤန့ၣ် ဖဲ၁၉၅၀နံၣ်, လါအီကူၥ်(၁၂)သီအနံၤ, ဒုၣ်ဒါက၀ီၤကးတံၥ်ဒုးအီၤဖဲ ကီးတရံးကီၢ်ဆၣ်, ထိးကီၥ်ကိသ၀ီ စံၥ်ဒၢတၢ်လီၢ်တခါပူၤအဃိ ဘၣ်ဟ့ၣ်လီၤကွံၥ်အသးသမူလၢအပှၤကလုၥ်အဂီၢ်န့ၣ်လီၤ.
ကလုၥ်ဒူၣ်အဂၤဒီး ကညီဖိလၢအိၣ်ဆိးဖဲကီၢ်ပယီၤကီၢ်စၢဖှိၣ်အပူၤတဖၣ် ဒ်သိးတၢ်သုတပၥ်အဒူၣ်အဆၢလၢ ကလုၥ်ဂ့ၢ်၀ီမ့ၢ်ဂ့ၤဒီး ကဒိးန့ၢ်ထံရူၢ်ကီၢ်သဲးဂ့ၢ်၀ီ တၢ်ထဲးသိးတုၤသိးအခွဲးအယၥ်အဂီၢ် ဒုးထီဒါပၢၢ်ဆၢတ့ၢ်လံ သုးမီၤစိရိၤတဖၣ်အိၣ်ထီၣ်လံ အနံၣ်(၇၀)ဘျဲၣ်လံန့ၣ်လီၤ. တၢ်ထီဒါပၢၢ်ဆၢ ဒ်သိး ကလုၥ်ဂ့ၢ်၀ီတၢ်ထဲသိးတုၤသိးအဂီၢ်အဆၢကတီၢ်တဘိယူၤန့ၣ် ကညီကလုၥ်တဖၣ် ဘၣ်ဟ့ၣ်လီၤကွံၥ် အသးသမူ, သွံၣ်ထံဒီးတၢ်တူၢ်ဆါခီၣ်ဆါသးတဖၣ် အိၣ်အါအါဂီၢ်ဂီၢ်န့ၣ်လီၤ.
ကညီဒီကလုၥ်တၢ်ထဲသိးတုၤသိးခွဲးယၥ်အဂီၢ် ပှၤလၢဟ့ၣ်လီၤကွံၥ် အသးသမူ, သွံၣ်ထံဒီးတၢ်တူၢ်ဆါခီၣ်ဆါသးတဖၣ် ဒ်သိးတၢ်ကမၤလၤမၤကပီၤအီၤအဂီၢ် ကီၢ်ခိၣ်စီၤဘးအူကၠံဒီးအပှၤကရၢလၢ ဘၣ်ဟ့ၣ်လီၤကွံၥ်အသးသမူ ဖဲလါအီကူၥ်(၁၂)သီအနံၤအံၤ ဘၣ်တၢ်ပၥ်ပနီၣ်အီၤဒ် ကညီမၤထူရၤအမုၢ်နံၤအသိးန့ၣ်လီၤ.
ကလုၥ်ဒူၣ်လၢအိၣ်ဆိးဖဲကီၢ်ပယီၤပူၤတဖၣ်အံၤ တအိၣ်ဒီးတၢ်ခွဲးတၢ်ယၥ်လၢကရဲၣ်ကျဲၤမၤလၤမၤကပီၤ အပှၤကလုၥ်အမၤထူရၤမုၢ်နံၤတဖၣ်လၢတၢ်သဘျ့အပူၤတအိၣ်ဘၣ်န့ၣ် ပထံၣ်ဘၣ်လၢကီၢ်ပယီၤတၢ်စံၣ်စိၤဒီတစိၤန့ၣ်လီၤ.
ဒ်သိးတၢ်ကရဲၣ်ကျဲၤမၤလၤမၤကပီၤ ကညီမၤထူရၤမုၢ်နံၤလၢအဖိးသဲးစးကန့ၢ်အဂီၢ် ဖဲ၂၀၁၇ဒီး၂၀၂၂နံၣ်အတီၢ်ပူၤ ကညီကမျၢၢ်ဖိလၢအိၣ်ဖဲ ၀့ၢ်တကူၣ်, အ့ၣ်ယၣ်၀တံၣ်, ပကိလီၢ်က၀ီၤပူၤတဖၣ် ဂုၥ်ကျဲးစၢးဟူးဂဲၤတ့ၢ်၀ဲဘၣ်ဆၣ် ပှၤလၢတီခိၣ်ရိၣ်မဲ ဒံၣ်မိၣ်ကရ့ၣ်စံၣ်ပဒိၣ်တဖၣ် ဖီၣ်န့ၢ်ဆူၣ်ကမျၢၢ် ပၥ်လီၤဃိၥ်ပူၤဒီး မၤကမၣ်တ့ၢ်၀ဲကလုၥ်ဂ့ၢ်၀ီတၢ်ထဲသိးတုၤသိးဒီးနီၢ်ကစၢ်တၢ်ပၢဆှၢလီၤသးခွဲးယၥ် ဒီးပှၤဂ့ၢ်၀ီခွဲးယၥ်တဖၣ်န့ၣ်လီၤ.
၂၀၂၁နံၣ်, လါဖ့ၤဘြူၤအါရံၤ၃သီအနံၤန့ၣ် ခီဖျိလၢထံကီၢ်ပှၤဘၣ်မူဘၣ်ဒါတဖၣ် ဟ့ၣ်တၢ်ဆီၣ်သနံးထုးကွံၥ်၀ဲ ကီၢ်ခိၣ်စီၤဘးအူကၠံ တၢ်ဂီၤစိးပျၤလၢဘၣ်တၢ်သူၣ်ထီၣ်ဃၥ်အီၤဖဲ အ့ၣ်ယၣ်၀တံၣ်ကီၢ်ခီ, ကၣ်ကၠံတီးကီၢ်ဆၣ်, ဘဲကရဲးသ၀ီအပူၤအံၤ၀ံၤဒီး စးထီၣ်ဖဲန့ၣ်န့ၣ် တၢ်ရဲၣ်ကျဲၤမၤလၤမၤကပီၤ ကညီမၤထူရၤအမုၢ်နံၤ လၢကီၢ်ပူၤတန့ၢ်တသ့လၢၤဘၣ်န့ၣ်လီၤ.
တၢ်တတူၢ်လိၥ် ၂၀၂၁နံၣ် တၢ်ဟံးန့ၢ်ဆူၣ်ထံကီၢ်တၢ်စိတၢ်ကမီၤဘၣ်ဒီး တၢ်ကိးသတြီၤထီၣ်တဖၣ်လၢအမ့ၢ် တၢ်ကသူၣ်ထီၣ်ဖဲၣ်ဒရဲၣ်ဒံၣ်မိၣ်ကရ့ၣ်စံၣ်ထံကီၢ်သီကအိၣ်ထီၣ်အဂီၢ်, တၢ်ကမၤဟးဂီၤကွံၥ် ၂၀၀၈ဂံၢ်ခီၣ်ထံးတၢ်ဘျၢသဲစးခိၣ်သ့ၣ်အဂီၢ်, မီၤစိရိၤသနူကလီၤပှီၢ်ကွံၥ်တဖၣ်အသိး ကလုၥ်ဒူၣ်ခဲလၢၥ် ကမျၢၢ်ထံဖိကီၢ်ဖိတဖၣ်အံၤ အကလုၥ်ဂ့ၢ်၀ီတၢ်ထဲသိးတုၤသိးဒီးနီၢ်ကစၢ်တၢ်စံၣ်ညီၣ်ပၢလီၤသးခွဲးယၥ်အဂီၢ် ထီဒါပၢၢ်ဆၢသုးမီၤစိရိၤအံၤ ကျဲအကလုၥ်ကလုၥ်လၢ တုၤမုၢ်မဆါတနံၤအံၤန့ၣ်လီၤ.
ခါလၢကဟဲ၂၀၂၅နံၣ်, လါအီကူၥ်(၁၂)သီအနံၤန့ၣ် အလီၤဘၣ်၀ဲ ကညီမၤထူရၤအမုၢ်နံၤဆၢက့ၤပှဲၤထီၣ် ၇၅၀ီတ၀ီ အမုၢ်နံၤန့ၣ်လီၤ. ၇၅၀ီတ၀ီ ကညီမၤထူရၤမုၢ်နံၤ အနံၤအံၤန့ၣ် ကညီဒီကလုၥ်ပၥ်၀ဲဒ် မူဒါတၢ်မၤတခါအသိး၀ံၤ ပၥ်ကဖၢလၢဒီးကရဲၣ်ကျဲၤမၤလၤမၤကပီၤ၀ဲန့ၣ်လီၤ.
ကတီၢ်ခဲအံၤန့ၣ် မ့ၢ်အဆၢကတီၢ်လၢ ကလုၥ်ဒူၣ်ခဲလၢၥ်ဒီးထံဖိကီၢ်ဖိကမျၢၢ်ဒီတကလုၥ်တဖၣ် ဘၣ်ကွၢ်ဆၢၣ်မဲၥ်ဘၣ်ဒီးတၢ်ကီတၢ်ခဲအါမးနးနးကျံးကျံးဘၣ်ဆၣ် တစိၤဘၣ်တစိၤ ကညီမၤထူရၤပှၤဒူပှၤဃိးတဖၣ်လၢ ဟ့ၣ်လီၤကွံၥ်အသးသမူလၢ တၢ်ထီဒါပၢၢ်ဆၢ မီၤစိရိၤတဖၣ် ပယူးယီၣ်ပၥ်ကဲဒီးပၥ်လုၢ်ပၥ်ပှ့ၤလၢပသးပူၤနီၢ်နီၢ်၀ံၤ ၇၅၀ီတ၀ီကညီမၤထူရၤအမုၢ်နံၤလၢကလီၤဘၣ်ဖဲ လါအီကူၥ်၁၂သီအနံၤန့ၣ် မ်သုတသးပ့ၤနီၤဘၣ်ဒီးကယူးယီၣ်ပၥ်ကဲသကိးအဂီၢ် မ့ၢ်တၢ်ဟ့ၣ်သဆၣ်ထီၣ်န့ၣ်လီၤ.
#ကရင် #ကရင်အာဇာနည်နေ့
