Bonjour CA OWP (2025)

31/12/2023

# # 我在加拿大患上抑鬱的日子（後記）— 收爐啟示

———「I swear sixteen was yesterday, but now I’m closer to twenty-eight」—《QUARTER LIFE CRISIS》Taylor Bickett ———

依家我嘅病況就係每個月都要去醫院睇一次心理醫生，而有隻抗抑鬱藥我係要每晚食，長達六個月🗓️。有時我喺度諗，究竟我做錯咗啲咩，先deserve到我有呢個病，但其實呢個問題係唔值得一問，因為情緒係每個人都擁有，並非係一個問題，只係每個人被情緒所影響到嘅程度有所不同。

我有同我其中一個朋友講過我嘅情況，佢話我嘅處境其實一啲都唔罕見，而且有個term可以形容我嘅依家面對嘅困難，叫做「青年危機 Quarter life crisis」。一開始聽我覺得好有趣🤣，我只係聽過「中年危機」，但未聽過「青年危機」，然後好奇心俱使下我上網研究下呢個term究竟係形容啲咩。

青年危機係講緊啲人一到25歲嘅時候，就會開始因為唔同事情而焦慮，例如要決定自己嘅生涯規劃💼，懷疑自己嘅身份認同，為第一次搬離家人而煩惱同擔憂。呢啲都係我依家亦需要面對嘅事，而且每一位離鄉別井嘅感受由其深刻🏃🏻。人生過咗四分之一，剛出社會嘅我就好似突然間有大量嘅重擔同責任放喺我背後🎒，呢一種無所適從正正就係青年危機嘅定義。16歲嗰種無憂無慮就彷彿係尋日嘅事，但今日嘅我已經24歲，背後嘅包袱又多了兩個。而聽日就好似將要變成28歲，而我，又準備好做其他人口中應該成為嘅嗰種大人未呢？

———「成年後才知忘記是異能」—《閱後即焚》陳柏宇 ———

經過呢兩個月嘅煎熬，我先開始逐漸了解更多抑鬱症同焦慮症😟。當初無知嘅我會覺得呢啲嘅情緒病只係弱者先會有，只要心智夠強硬就唔會有呢啲問題🪨。但當到我自己親身經歷過嘅時候，先發現原來唔係話可以開心就開心到，就算其他人同你講唔使諗咁多，你依然係唔可以控制自己嘅諗法去不斷諗負面嘢🫠。而自己控制唔到嘅唔係個負面情緒本身，反而係控制唔到自己深深記住唔同人講過嘅嘢同諗法，記住以往唔開心嘅事，然後作為好人嘅我就不斷喺度諗點樣可以令所有人開心但唔會得罪身邊嘅人同遺背自己一直以嚟堅守嘅價值觀而鑽牛角尖🐄。當你身邊嘅人都一個一個咁忘記之前講過嘅嘢走出去嘅時候，而你依然留喺當初停滯不前。”If you try to please everyone you'll please no one.” 對你嚟講，只需要揀值得你對佢好嘅人釋出好意就已經好足夠。

而我依家學識咗，執着喺一啲自己控制唔到嘅嘢，只會令你自己更加失落同痛苦，有時候適當地放手👋🏻，忘記一啲唔再需要記住嘅細節，先可以令自己活得自在。唔只係咁，學識忘記的話，可能更會令你身邊重視你嘅人冇咁大負擔，咁你哋之間嘅關係先會更加好。所以學陳柏宇咁唱：「不好的感覺別放著過夜滋生細菌🦠～」

———「如有天可經過有沒有位置給我」—《流離者的海》林家謙 ———

我打呢篇文並唔係想唱淡加拿大🇨🇦，話呢個地方會令到你抑鬱而叫其他人唔好過嚟，每個地方都有佢好同唔好嘅地方，千祈唔好過分放大一個地方嘅唔好而忘記當初想離開嘅原因🧳，亦唔好過分美化將來而無視眼前可能會遇到嘅困境🌳。我只係想搵一個地方俾我去記錄我呢兩個月心情同經歷，如果你唔好彩都遇着差唔多嘅情況，都請記得你唔會係得你自己一個，如果你想搵人傾訴的話，不論你身邊嘅朋友同我都會好樂意聽你講，千祈唔好怕麻煩人哋，更加唔好諗住傷害自己🙅🏻‍♂️。只要係對你上心嘅朋友，無論你經歷過啲咩，佢哋亦都會關心你，喺你需要嘅時候喺你身邊🫂。

呢兩個月對我嚟講就好似過咗兩年咁耐，好多謝我身邊每一個喺我處於低谷之時唔怕我煩聽我傾訴，給我擁抱，如果冇你哋，我亦唔會咁快可以走返出嚟💙。睇緊呢篇文嘅你哋可能冇情緒問題困擾，但如果你身邊有朋友係身於困境的話，不防打個電話俾佢哋問後下，問一句”How are you lately?”，「有冇嘢可以幫手？」，可以的話就俾個擁抱🫂，話俾對方知就算面對緊乜嘢都好，自己都依然會喺度等緊佢。作為過來人嘅身份，可以話你知就算自己當時好焦慮好抑鬱都好，都未必知道自己想要啲乜嘢，更加唔會識得主動求救。所以作為朋友，得閒的話就約出嚟食個飯啦🍶。一個見面，一句問候，對一個失落嘅人嚟講就已經好足夠。

喺加拿大生活滿一年，話長唔長，話短唔短。其實我有好多事都想同大家分享，我仲有幾篇文已經打好咗，但係一直都未畫好圖所以一直都冇出到post🤪。但係遊歷過成人世界嘅我，不免多了幾條無形傷疤😟。雖然我都已經好耐冇出過post上過水，但我亦想趁着呢一年即將完結之際，同一直follow呢個page嘅每一位講聲多謝支持🫰🏻，但我一路上所經歷嘅都話我知，2023，係離別之年🍃。既然今年宜離別，咁我都暫時離開一陣，喺踏入2024之前同大家講聲：「我收爐了！」呢個page會暫時停止更新，直至我好返為至，但係dm我的話我依家會覆的！祝大家新嘅一年，開開心心。休息一下，有緣再會，à bientôt👋🏻！

30/12/2023

# # 我在加拿大患上抑鬱的日子（下）— 緊急聯絡人

———「要是我今晚異地斷氣問你可肯即夜趕搭通宵客機」— 《緊急聯絡人》湯令山 ———

Day 0 17:00

去醫院嘅期間我嘅身體狀況已經開始逐漸變好，我依家係feel唔到我隻手，但起碼面上開始有知覺。去到醫院嘅時候我需要做個登記，但係我只係自己一個坐救護車，而我roommate連埋我部電話攞走埋，佢會之後先到，所以我依家身想就只有我張health card同我手腕上嘅Apple Watch⌚️，就連一張信用卡都冇。登記櫃位度個職員問我啲基本個人資料，而當佢問到我”What’s your emergency contact?”嘅時候，我喺嗰一刻就真係棟咗喺度😶。我身上冇咗手機，亦冇辦法access到我嘅contact book，而我記到嘅電話號碼如今都唔可以即刻嚟到醫院搵我，我實在冇辦法從我口中吐出一個字。以往我去親唔同嘅活動就算要我寫emergency contact，我都係會寫我同行嘅朋友，但如今到真係要用到emergency contact至際，卻沒有任何一個電話號碼浮現喺我腦中🥲。可能個職員問我三次緊急聯絡人都唔出聲之後，覺得我唔識聽英文，又或者見我一個親啲嘅人都冇覺得可憐，所以之後都冇再追問我了。但每次一諗返起當時俾佢問到口啞啞個樣，不然就喺心中浮起為自己可憐嘅情感。

當日總共喺醫院逗留咗6個鐘，好多時候都係等叫名，其除時間見唔同嘅護士同醫生做身體檢查🥼，仲有就係見一下心理醫生，俾佢了解我點解會出現panic attack，然後再開藥俾我同約定下一次見社工同心理醫生嘅時間。

———「舊片段通通不帶走出去編寫出新世界」—《One Way》艾粒 ———

Day 3

雖然發生咗呢啲事之後，suppose都應該要留喺屋企休息下唔好周圍去。但係既然都已經買咗機票🎫，冇理由唔去㗎！就算even我因為某啲事喺我臨飛前五個鐘trigger到我再一次panic attack都好，好彩今次冇咁嚴重唔需要入院，我都選擇戰戰兢兢咁開展我呢一段治療之旅。而呢一個旅程，會係我自depression開始之後其中一個做得最正確嘅決定🥹。

呢趟旅程去咗好多唔同嘅地方🌅，亦見咗好多唔同嘅人🏃🏻‍♂️，玩咗好多唔同嘅活動🏄🏻‍♂️，但最重要嘅係可以俾自己有一個獨處嘅空間，同自己有一個更深入嘅對話🧘🏻，提醒自己想要啲乜，唔想要啲乜。心裏或許仍然在淌淚，但呢個旅行令我有時間俾我療傷。由其是呢個trip大部分時間都係我自己一個人，我更加自覺要好好妥善處理我嘅情緒。雖然係獨遊，但好想好想趁呢個機會多謝每一位幫助我嘅人🙇🏻‍♂️，有你哋嘅出現，我先至可以喺呢次療傷之旅行得更快，我唔敢講我依家已經好返晒，但我依家情緒唔會再有咁大波動，比起一個月前好咗好多🥳。

———「藥力漸過先知道我每日捱一刀」—《痛醒》許廷鏗 ———

Day 24

三個星期嘅旅行，話長唔長，話短唔短，成個trip大部分時間都係好開心，但就好似去迪士尼樂園一樣🎠，就算身處童話世界有幾耐都好，都會有回到現實世界嘅一日🚝，而呢一日到嘅時候，都難免會有啲難過☹️。Anyway，返到現實，就自自然然需要面對我離開之時遺留下未處理嘅事。雖然要處理嘅嘢都係一樣，但自己所面對嘅心態唔同咗。雖然我要面對嘅事排山倒海咁湧入嚟，明明有啲事只係好小事，但係某啲人嘅反應就搞到好似好大件事咁，有啲仲要係明知我嘅情況下都仲要將佢自己嘅情緒發洩喺我身上😮‍💨，就好似要搞到我返到去以前咁再一次panic attack先安落。雖然最後都係不歡而散，但最少喺呢啲事件上俾我睇清楚我身邊嘅人嘅唔同性格，有邊啲係夾，有邊啲係會帶俾我負面情緒🫠。繼而教識我一樣嘢，就係呢個世界乜嘢人都有，有人可以無意之中對待你差，亦有啲人本身就係立心不良👿，不過最重要係，有人會一直喺你身邊陪伴你🫶🏻。而我要做嘅嘢，就係對待對自己嘅人好，唔好為其他人嘅情緒負責，因為對方亦都唔會因為你默默承受而感激你。

29/12/2023

# # 我在加拿大患上抑鬱的日子（中）— 那天白晝，我坐上了開往醫院的救護車

———「一關心我已經等於再殺死我」—《必殺技》古巨基 ———

Day -10

呢日我確實係需要返工，但奈何我已經請晒我所有嘅假期🥲，好彩嘅係唔知係咪因為外國公司，定還是加拿大本身就係好 nice 嘅國家，我嘅上司聽到我嘅情況，我問佢可唔可以下晝離開office一陣去睇醫生。我想像中嘅第一句佢會問我：「你冇晒假啦喎，你OT做埋啲嘢佢ok？🙏🏻」但佢實際上第一句同我講嘅係：「Bonjour，我最擔心嘅唔係你做唔做得切啲嘢，而係你嘅心理情況呀🥹！你睇完醫生處理好你嘅病況先好諗工作啦。」我聽完呢一句真係差少少就喊咗出嚟😭，估唔到可以有幸可以under咁通情達理嘅上司。佢仲同我講，如果有啲咩需要，記得一定要同佢講，公司可以的話都會support你㗎。如是者我就喺呢一日去咗睇第一個session。

呢個session最主要目標有三個：有一個可靠嘅空間俾我傾訴🗣️、睇下有咩可以做令我焦慮情況減低😌、俾佢評估下我嘅抑鬱狀況✍🏻。一開始我都只係抱住試下去睇醫生嘅心態，並冇預計原來我情況都有啲嚴重，我初初都只係講咗啲我當時覺得會trigger到我嘅事，但都不得不配服對方嘅專業，俾佢問多兩三題問題，我先發現過去呢一年經歷嘅嘢只係觸發點，我背後所做同對應嘅原因先至係最根本嘅問題🫚。佢冇診斷我有啲咩病，亦都冇開啲咩藥俾我，但過咗呢個session起碼俾我更加了解到我依家究竟係身處喺一個乜嘢嘅狀況，同俾我認清到我心中最根本嘅痛處喺邊💔。

一個一個鐘頭嘅session承惠$180+tax，本身我以為我份公司保險包九成，所以我都冇點care過個價錢。但之後先發現我公司保險包嘅係Psychologist而唔係Psychothreaphist，所以呢$180蚊我直接硬食💸。而我當時就覺得，我自覺係焦慮同抑鬱，但唔覺得我係$180抑鬱，最多都只係$20抑鬱。所以我就冇打算再去繼續睇了😂。

———「豁出去漫遊不通知親友」—《****離家出走****》衛蘭 ———

Day -3

安眠藥都食咗兩個星期了，每一日都需要靠安眠藥入睡，但每一日都瞓得好差，而每晚都只能夠瞓到五、六個鐘，對比起之前瞓到七、八個鐘明顯睡眠質素差咗好多😩。我本身以為啲人要食安眠藥，係因為瞓咗喺張床好耐都瞓唔到所以先要食，當然呢個係其中一個原因，但更大嘅原因，係對瞓唔到覺嘅恐懼軀使我去服用安眠藥。有時候其實我係可以靠自己意志去瞓覺，但一諗起自己可能不能入睡嗰種不安同焦慮，就會令我主動依賴安眠藥💊。但呢一日比較特別，唔知係咪有事trigger到我，定係我嘅思緒不斷向負面方向走，變咗喺度鑽牛角尖，然後去到某一個位情緒崩潰，開始自己一個爆喊😿。當時我只係喺度諗，好想離開呢個地方，不論目的地係邊都好，我需要一個break俾自己。就係咁，呢一日做咗一啲好衝動嘅決定，第一次食比建議劑量多嘅安眠藥，亦都衝動消費買咗張機票去第二個城市✈️，買嘅時候根本諗都冇諗過究竟公司批唔批准我work from another city。但喺嗰一刻冇諗咁多，只係覺得留喺呢個空間嘅每一秒都好辛苦，每一日都好似時間好長咁。不過好彩第二日同咗上司講完之後佢哋都支持我嘅決定💪🏻。

———「くいちがう時はいつも　僕が先に折れたね」—《One more time,One more chance》山崎まさよし ———

Day 0 15:00

好可惜計劃趕不上變化，就喺我出走離開Toronto嘅前幾日，就真正出事了。我到依家都仲好記得，嗰日我同我喺英國嘅朋友打完機🎮，並沒有任何先兆，我個心好似突然間沉咗一沉，彷如俾人用支槍指住我個頭，然後我右手開始不受控制咁不停震😨。一開始我都冇為意我手震，但係當我嘅視線由螢幕轉向我右手嘅時候，我個腦先process到我隻手喺度震緊。然後我同朋友講咗聲我隻手開始震之後嘅下一秒，我開始呼吸困難，不停咁抖大氣，但每一次吸氣我都好似吸唔到任何氧氣，然後我就開始手痺面痺，個感覺就好你瞓晏覺壓住自己隻手，到你起身嘅時候你隻手冇血循環嗰隻痺法，然後你可以幻想一下呢種痺法蔓延到你全身。呢一種感覺我係從來都冇試過，可能就係因為咁我反而更加之驚，然後再不斷吸大氣，然後再更加驚，不斷惡性循環。當時身在英國嘅朋友聽到我咁講都好擔心我，好彩我仲識得去搵roommate求救，於是佢就幫我打咗911，叫咗白車過嚟🚑。

真係不得不說加拿大做嘢速度真係慢到一個點，打電話俾911係要等成4分鐘先有人聽📞，然後仲要等多十分鐘先有白車到我屋企樓下。Anyway救護人員到場檢查下我血壓同心跳，好好彩地我身體上都冇出現問題，佢哋話我依家係處於panic attack嘅狀態，而手痺腳痺都係因為我呼吸太過急，成個人呼出太多二氧化碳，做成hyperventilation嘅情況，但係為咗穩陣起見，都係坐咗一轉白車，承惠$45。

28/12/2023

# # 我在加拿大患上抑鬱的日子（上）— 你最近還好嗎

大家好，好耐冇見了👋🏻。見我開頭唔係寫Bonjour就知道今個post我想來點不一樣😌。今日係我嚟度 Toronto 滿足足一年，嚟度呢度見過唔同嘅人，經歷過唔同嘅事，而我喺呢度聽得最多嘅就係

———「How are you?」—《How Are You?》Dylan Brady ———

如果係你，你會答返佢啲咩呢？喺我哋小學嘅時候，老師話俾我哋知，面對呢條問題嘅標準答案，就係”I am fine, thank you.”。但如果你喺呢度答呢個答案，換來嘅可能係一個笑話🥲，話俾你知，你唔再係小學生，你唔再只係有”I am fine, thank you”呢個答案。咁下個問題就係，唔答 I am fine，咁可以答啲咩呢？

———「I am not ok」—《I’m Not Ok》 YPU GAIA———

通常問你”How are you”，都只係當地人嘅口頭禪，只要答一句”Good”，或者係”I’m great”，咁大家就會繼續講返你哋原來傾開嘅事。但喺香港，大家見到面嘅時候，好少會有同樣嘅問候，反而我聽得最多嘅係「冇見咁耐，又肥咗喎！」😂（不過講真，嚟到呢度之後我真係肥咗唔少…）就好似大家都有共識，如非必要，我都唔需要知道你最近過得好唔好，只係大家互相潤一兩句，開開心心相處過活就足夠。但喺 Toronto，第一句就問How are you，就好似大家每一次見面，都係關心大家近況如何嘅機會，如果有啲咩需要，歡迎隨時搵我幫手。所以當聽得多”How are you”，而你每次都答”I am ok”嘅時候，總有一日你會喺度諗，有冇機會其實”I am not ok”呢？

———「年月有病空間有毒」— 《我心中尚未崩壞的部分》黃妍 ———

Day -30

事源係由十月我去咗一轉英國旅行，最主要當然係睇林家謙L’underground演唱會🥳！同埋探我好耐冇見移民咗去英國嘅best mates🥹。嚟到Toronto之後就只有去過一次New York旅行，但就冇去朋友可以去探望，但係今次一探佢哋，就好似時光倒流一樣⏳，可以同佢哋返返去當年最純真嘅友誼，沒有猜忌，沒有背叛，只有都好感恩有對方存在嘅友誼。即使呢一趟英國之旅只有四日三夜，但我敢講係當時久遺最開心嘅日子😭。呢一個旅程雖然係短，但亦已經足夠去俾個機會我重新審視我過去呢一年經歷咗啲咩，俾個空間去讓我同自己一次內心對話。然後返到嚟Toronto之後，先至發現原來我過去嘅一年數月，都長期呼吸住有病嘅空氣；我過去所身處嘅空間，都不斷充斥着有毒嘅環境。不論係人際關係，定還是Toronto呢一個地方，都不斷帶俾我負面情緒🥹。當然我唔係講緊我身邊嘅所有朋友都令我唔開心，但當只有一少部分嘅人係咁嘅時候，我會好容易被呢種失落情緒吞噬，不管有好多朋友關心我都好，我都會係提不起勁😞。我自知咁樣諗係對對我好嘅人好唔公平，但呢種諗法就隨住離開英國嘅時間愈嚟愈長而發酵。

———「大事沒有發生怎麼抑鬱至今」—《牙痛文學》N9 ———

Day -20

當大眾都以為抑鬱症定必有導火線，過往經歷過嘅定必係轟轟烈烈嘅時候，事實上並非如此，反而比大家想像中更平平無奇😂。我並沒有突然失去至親，亦沒有受到現實嘅殘酷重擊，每一日依然係返工放工煮飯食飯沖涼瞓覺，唯一有變嘅只有我嘅心態。以往我可以喺朋友面前說說笑，現今我卻無法從我嘅言行當中帶出一絲笑點；過去我可以爽快答應朋友聚會嘅邀請，如今即使我喺朋友聚光燈外亦不由自主咁覺得焦慮；昨日我對未來充滿住熱情期待，今日我因要再活多一日而對入睡覺得恐懼😰。我身邊朋友開始發我有不妥，於是提議我去睇psychotherapist。初初我都唔願意，自己覺得自己都冇病冇痛，跟本唔需要求醫🩺，但俾呢個朋友威逼利誘之下，再加上公司保險好似有包，所以就趁有半天空檔，上網預約咗去downtown睇咗我人生第一次psychotherapist🤧。

———「捱過多少天傷心處方病菌我懶得抵抗」—《病況》張敬軒 ———

Day -17

呢日去睇只俾我同心理治療師互相去了解，成個session只係十五分鐘🕒。一方面我可以睇下對方嘅溝通方式同相處上可唔可以令到我之後嘅sessions可以安心同佢講我嘅私事，另一方面對方亦都可以初步了解我嘅情況，俾佢大概有個方向知道點樣去同我溝通，同嚟緊嘅sessions會有咩方式進行🗣️。呢一個分步了解係唔需要錢嘅，所以我都抱住冇乜所謂嘅心態去睇😵‍💫。總而言之，呢一日係我踏上情緒治療呢個漫長路程嘅第一步，而我呢一日亦都book咗一個星期後接受第一次心理輔導。

但係我情緒開始不受控制咁亂諗嘢，就算今次呢一個十五分鐘嘅session可以暫時舒緩我嘅壓力，我都feel到自己頂唔順，我睡眠時間亦都因深夜焦慮而逐漸越嚟越少🫨，所以我喺呢一日喺Shoppers 度求其買咗啲安眠藥食。（絕對唔建議你咁樣做❌，藥物呢家嘢一定要由醫生處方。）

Bonjour CA OWP

31/12/2023

30/12/2023

29/12/2023

28/12/2023

Address

Website

Alerts

Shortcuts

Share