Hakha News (2025)

05/11/2025

Hakha Peng Ah Kahdohnak Chuak I CDF - Hakha Ralkap 1 Nunnak Liam, Meithal Zuun 10 Hrawng An Sung
===============
Hakha News| 𝐒𝐢𝐤𝐩𝐚𝐫 5 | 2025

Chinram, Hakha khuapi ah hrambunh mi Khah-Lah-Yiah 266 Battalion sakhan in rallam sial ah a chuak mi SSPC ralkap pawl nih Hakha peng, Loklung khua pawng i a um mi Chinram cozah chungtel CDF-Hakha gate pakhat a thlithup in an kah i CDF-Hakha ralkap 1 a nunnak a liam kong, ral lei thawng laaknak hrampi nih Lungmili Post ah an chim.

Nihin November 5, zanlei suimilam 5:30 hrawng ah khan Hakha khuapi in rallam sial ah a chuak mi SSPC ralkap pawl nih Loklung khua pawng i a um mi Nelpa gate cu a thlithup in an luhhnawh i an kah caah kaphnih kar kahdohnak a chuak, tiah kan theih.

"A thlithup in an luhhnawh hna i an kah hna hi a si. SSPC ralkap pawl cu an thazaang a tam ngai nain CDF-Hakha nih an si khawh chung in an kham hna i an kah ve ko hna. Kaphnih kar kahdohnak ah CDF-Hakha ralkap 1 nih ram le miphun caah a nunnak a pek," tiah ral lei thawng laaknak hrampi nih cun Lungmili Post ah an chim.

Cu pin ah Loklung khua pawng kahdohnak ah cun CDF-Hakha meithal zuun 10 hrawng zong SSPC ralkap pawl nih an laak i kahdohnak a dih hnu ah SSPC ralkap pawl cu Hakha khuapi lei ah an pil ṭhan, tiah theih a si.

Hakha News
Hmanthlak:Crd

05/11/2025

BreakingNews:
Hakha Rungtlang um Ralhrang nih Loklung khua (Hakha in Meng 9 tluk hlatnak) lei ah Rallamsial in an ṭum, kal, i meithal thawng um caah Hakha lei in Loklung khualuh ah a um mi inn tam ngai Ralhrial in an zaam.

31/10/2025

Tonzaang Peng Ah Thimnak Tuah Kho Ding In Ralhrang Nih ZRA Hriamnam An Bawmh

Hakha News | 2025 October 31-
Chinram, Tonzaang peng ah thimnak tuah kho ding in ralhrang lei nih Zomi Revolution Army(ZRA) cu hriamnam an bawmh hna tiah Chin hriamtlai phu thawng laaknak hrampi sin in theih a si tiah Yangon Khit Thit Media nih Ocotor 31 ni ah a langhter.

"October 27-29 tiang Kalaymyo in ralhrang lei nih ralkap 100 hrawng, meithal 50 leng, meithal kuan 15,000 leng le Drone 5 hrawng cu Tedim khuapi hrambunh ralhrang Khah-Lah-Lah (ခလရ) 269 Battalion ah Helicopter in an ṭhumh i ralhrang k*t tang um ZRA pawl an bawmh hna, tiah Chin hriamtlai phu thawng laaknak hrampi nih Khit Thit Media nih a chimnak in theih a si.

"Ralhrang nih Chinram chung peng 3 ah thimnak tuah an i timh ca ah Chinland Council humhak mi Tonzaang peng laak ṭhan an duh i ZRA pawl hriamnam an bawmhnak hna a si. ZRA an bawmhnak hna a ruang cu atu thimnak ah hin ZRA hruaitu pawl an i tel ve, Zomi National Party hin minung 40 an i tel. ZRA hruaitu Pau Lun Min Thang zong aa tel ve i anih hi a hlan ah Minister of Social Affairs a rak si. Cun Cin Ngaih Mang zong Amyotha Hluttaw palai hlun a si. Anmah pawl an i tel ca ah ZPN, ZRA le ralhrang i bawm in Tonzaang laak i timh dawh an si," tiah Chin hriamtlai phu thawng laaknak hrampi nih cun an chim.

Zomi Revolutionary Army (ZRA) cu hramhram in nawlngeihnak laak a si hnu ah ralhrang he ṭangṭi in Tonzaang peng chung ah kahdohnak an tuah i khuate ah inn an khangh, tualchung mi an hrem hna i fahnak an pek hna ruang ah Chin National Army( CNA) telh in tualchung hriamtlai phu he atu le tu in an i kap nak a si.

02/08/2025

Tlangcung Mi Hna Nih Ruahnak Dang An Ngeih Ti Awk A Si Lo Tiah SAC Prime Minister Thar Nih Chim

Hakha News || 2 August 2025

Caan karlak President Min Aung Hlaing nih a thim mi Prime Minister thar U Nyo Saw nih nizan August 1 ah Naypyidaw ah ramkomh cozah rianṭuantu phu cu tonbiaruahnak a ngeihpi hna i, Myanmar ram chung ah tlangcung mi nih ruahnak dang an ngeih ti awk a si lo, tiah a chim.

"Atu caan ah hin Myanmar ram chung ramkhel, miphun le biaknak kong ah lung i khah lonak a um awk a si ti lo i remdaihnak he party kip i fonh in Democracy lam kan zulh hna awk a si. Myanmar ram chung i a um mi kan zate nih Democracy lam a pialter khotu tuahsernak kan hrial a hau i phunghrampi he aa tlak mi phunglam zong upatnak he kan zulh cio a herh," tiah SAC Prime Minister thar U Nyo Saw nih a chim.

"Mipi nih an duh mi Democracy lam kan zulhnak ah a biapi bik mi cu thimnak a si ko caah a ralai mi December thla ah khin thimnak kan tuah lai. Vote a thla kho mi nih vote an thlak khawh nakhnga rampi cozah nih a tawlrel lai i a ruang tampi ruang ah vote a thla kho lo mi hna cu a hlankan in vote an thlak khawh ve nakding ah ri kan khiah mi zulhphung he aa tlak ning in kan tawlrelpiak hna lai," tiah U Nyo Saw nih cun a chim.

02/08/2025

Kyaukkyi Peng Ah Tualchung Mi 13 Thah An Tong I KNLA Le PDF An Puh Hna, Kahdohnak Ah SAC Ralkap 32 An Thi
Hakha News || 2 August 2025

Bago ramṭhen, Kyaukkyi peng, Lapat khua kahdohnak ah SAC ralkap nih sualnak ngei lo tualchung mi 13 an thah hna i KNLA le PDF nih an thah hna tiah SAC nih lih in thawng an thanh. Lapat khua kahdohnak ah hin SAC ralkap 32 an thi, tiah Central KNU nih an thanh.

KNLA le PDF nih Lapat khua tualchung mi an thah hna tiah SAC nih a dik lo mi thawng an zamh mi le an chim mi cu KNU nih fak piin kan dohkalh. Sualnak ngei lo tualchung mi 13 tuksapur in an thah hna i minung 15 hliam an tuar ti i SAC k*ttang Media hna le SAC lobby hna nih lih le hrokhrawl in thawng an zamh mi cu timh ciammam tein mipi hlen an timh hna ca ah a si, tiah KNU nih an langhter.

Lapat khua le a pawngkam kahdohnak ah hin SAC ralkap 18 le Pyusawhti 14 tiin minung 32 an thi. Cu kahdohnak ah cun SAC ralkap nih hriamngan le vanlawng an hman i tualchung mi hna nunhimnak ca ah thinphang ngai zong a si. Cuti i SAC ralkap nih kahdohnak an tuah ko bu ah tualchung mi hna cu KNLA le PDF ṭangṭi phu nih an chanhchuah khawh hna, tiah theih a si.

01/08/2025

Ralzaam Ngakchia Leitang Sianginn Ah Him Tein Ca An Cawng Kho Cang

Hakha News || 1 August 2025

Hramhram in nawlngeihnak a latu SAC ralkap nih timh ciammam tein vanlawng in a kahdoh mi hna venhimnak ca ah S&S Fire Fighters Education Assistence Group nih an sak mi leitang sianginn ah ngakchia tete cu him tein fimnak an cawn khawh cang kong, S&S phu nih an thanh.

Leitang ah sak mi sianginn cu SAC ralkap vanral le hriamngan ṭih in khua a sa mi ngakchia pawl pehzulh in fimnak an cawn khawh nakding ruahchannak le saduhthah he sak mi hmun pakhat a si, tiah Radio NUG nih tuzan ah a langhter.

01/08/2025

China Nih Hnahnawhnak An Kan Pek Nain Kan I Tinh Ning Bantuk Tein Pehzulh In Kan Kal Ko Lai — KPICT

Hakha News || 1 August 2025

Kachin ramkulh ah a cang mi kahdohnak le ramkhel dirhmun kong he pehtlai in China ram cozah nih hnahnawhnak an kan pek ko nain chunmang kan manh mi le kan i tinh ning bantuk tein pehzulh in kan kal ko lai, tiah Kachin Political Interim Coordination Team – KPICT nih an chim.

Nizan July 31 ah khan Committee Representing Pyidaungsu Hluttaw – CRPH le Kachin Independence Organisation – KIO Central Committee chungtel pakhat a si mi Lieutenant General Gunmaw Sumlut aa telnak KPICT phu cu tonbiaruahnak an ngei i Kachin ramkulh kahdohnak le ramkhel kong an i ceihmainak ah China hnahnawh peknak i dawnhkhanhter lo in an i tinh ning bantuk tein hmailei panh an i timh kong an chim.

Kachin Political Interim Coordination Team – KPICT kan dirh hramthawk tein kan i tinh mi cu SAC ralkap nawlngeihnak ṭha lo a hram bongh i Federal Democracy ramkomh ser a si caah atu i China nih hnahnawhnak an kan pek ko bu ah hin kan chunmang tlinter ding ah hmailei panh in kan kal ko lai, tiah KPICT nih cun an chim.

📸 — KIO/KIA ralbawi 𝐒𝐮𝐦𝐥𝐮𝐭 𝐆𝐮𝐧 𝐌𝐚𝐰

01/08/2025

NUG Le EROs Uk Mi Hmunram Ah Fak Piin Kahdohnak Kan Kalpi Cang Lai — Min Aung Hlaing

Hakha News || 1 August 2025

National Unity Government – NUG le tlangcung hriamtlai phu (EROs) telh in tualchung hriamtlai phu hna nih an laak mi peng 63 ah ralhrang hriamtlai pawl an daih khawhnak ca ah biatak tein kahdohnak kan kalpi cang lai, tiah Min Aung Hlaing nih a chim i caan karlak President i pe in laakhruak in ralkap uknak a thanh.

Chin hriamtlai phu nih an uk mi peng 7 telh in NUG le tlangcung hriamtlai phu hna nih an uk mi peng 63 ah hin Min Aung Hlaing nih laakhruak in ralkap uknak a thanh bantukin ukhruainak le phunglam he aa pehtlai mi nawlngeihnak cu amah pumpak asiloah Command Commander hna nih an kalpi ding kong zong Min Aung Hlaing nih a chim.

"Atu i peng 63 ah laakhruak in ralkap uknak kan thanhnak a ruang cu, NUG le tlangcung hriamtlai phu (EROs) pawl ralhrang bantukin an cawlcanghnak daihter ding, mahle hmunram cio ah remdaihnak lenter ding le a dik mi phunglam he i ukhruainak biatak tein kalpi kan duh caah a si. Atu i nawl kan chuah mi hi July 31 in aa thawk lai i ni 90 tiang a deih lai," tiah Min Aung Hlaing nih cun a chim.

01/08/2025

SAC nih NDSC ruahnak petu bu ah Dr. Hmuh Thang an telh, Chinram CM rian cu Dr. Vung Suan Thang an pek

August 1 ll Hakha News

SAC k*ttang National Defense and Security Council (NDSC) ruahnak petu bu ah Dr. Hmuh Thang cu chungtel ah SAC nih an telh bang in Dr. Vung Suan Thang cu Chinram Chief Minister rian an pek, tiah theih a si.

July 31 ah SAC nih a tuah mi NDSC meeting ah chungtel 15 in NDSC Central Advisory Board cu an ser i Dr. Hmuh Thang zong chungtel ah an thim ve.

Ramthen le ramkomh cozah bu SAC nih a ser i Chinram Cheif Minister ah Dr. Vung Suan Thang an thim, tiah theih a si.

Hakha News

05/11/2025

05/11/2025

31/10/2025

02/08/2025

02/08/2025

01/08/2025

01/08/2025

01/08/2025

01/08/2025

Address

Website

Alerts

Shortcuts

Share