16/10/2025
Ministeerri Dhimma Alaa sirna dijitaalaa waajiraaleen waraqaa malee itti hojjachuu danda’an ifoomse
Finfinnee, Onkololeessa 16, 2025 : Ministeerri Dhimma Alaa Itoophiyaa Inistitiyuutii Hubannoo Namtolchee Itoophiyaa waliin ta’uun sirna dijitaalaa waajiraaleen waraqaa malee sanadoota ittiin qabatan, hoggananiifi waljijjiiran ifoomsuu Ministeerri Dhimma Alaa Itoophiyaa beeksise.
Sirni bulchiinsafi kuusaa dijitaalaa sanadaa kun ministerichatti qabannaa galmeerraa haga waljijjiirraa odeeffannoo miliyootaan lakkaa’amanii waraqaan ture gara sirna waraqaa maleessaa dijitaalatti jijjiiruun tajaajilli saffisaa akka laatamu taasisa jechuun Ministirrii Ministeera Dhimma Alaa Geediyoon Ximootiyoos himan.
Sirni kun qaama rifoormii jalqabaa dhaabbatichaa ta’uu ibsuun, Inistitiyuutii Hubannoo Namtolchee Itoophiyaa waliin ta’uun sirna dijitaalaa kana uumuu himan.
Sanadoota teknooloojii dijitaalatiin kuusanii kaa’un , ragaalee kana saffisaan murtoo kennuuf, qo’annoofi qorannoof galtee godhachuuf ni gargaaru jedhan Ministeera Dhimma Alaatti Daarektarri Olaanaa Qabeenya Ragaaleefi Qunnamtii Obbo Daani’eel Zagayyee.
Akkasumas, Ejensii Mana Kitaabaafi Kuusaa Biyyaalessaa Itoophiyaa waliin ta’uun hojiin sanadoota gara sirna dijitaalatti galan adda baasuufi iddoo qabsiisuu taasifamaa jiraachuu ibsan.
Bu’aa qabeessummaa sirna kanaa mirkaneessuf Inistitiyuutii Hubannoo Namtolchee Itoophiyaa waliin ta’uun qondaaltotaafi hojjattoota dhaabbatichaaf leenjin kennamaa jiraachuu eeran.
