25/07/2025
"ဘာလဲ ? ဘယ်လဲ ? လီဆူမျိုးနွယ်စုတို့ရဲ့ တော်လှန်ရေး"
၂၅ ရက်၊ ဇူလိုင်လ၊ ၂၀၂၅ ခုနှစ်။
ည ၇ နာရီ (မြန်မာစံတော်ချိန်)
ဒေါ်နှင်းနှင်းမွှေး (တွဲဖက်အထွေထွေအတွင်းရေးမှူး) - လူ့ဘောင်သစ်ဒီမိုကရက်သစ်ပါတီ (DPNS)
ဒေါ်ယာန်ချီမီး (ခ) ဒေါ်ခင်စန်းမြင့် - လီဆူတိုင်းရင်းသားရေးရာဝန်ကြီး (ရှမ်းပြည်နယ်)
Dee Jar Fish (အထွေထွေအတွင်းရေးမှူး) - လီဆူလူငယ်အစည်းအရုံး (LYC)
တင်ဆက်သူ - ကိုအောင်သူရ
ယနေ့ နွေဦးတော်လှန်ရေးသည် လူမျိုးပေါင်းစုံပြည်သူလူထု အားလုံးပါဝင်ပြီး အာဏာရှင်စနစ်အား တော်လှန် တိုက်ပွဲဝင်လျှက် ရှိကြသည်မှာ ကမ္ဘာသိဖြစ်ပါသည်။ လူမျိုးကြီး လူမျိုးငယ် မျိုးနွယ်စုအစုံက ဘက်ပေါင်းစုံမှ နည်းပေါင်းစုံဖြင့် ဆင်နွှဲလျက်ရှိကြသည့် လူထုလှုပ်ရှားမှုကြီးသည် တနေ့တခြား အားသစ်တိုးပြီး တန်ခိုးကြီးထွားလာသည်ကိုလည်း အားလုံး မျက်မြင် ကိုယ်တွေ့ ကြုံတွေ့ကြရပြီ ဖြစ်သည်။ လူထု၏အာဏာ လူထု၏စွမ်းပကားကို အာဏာရှင်တို့ ကြောက်ဒူးတုန်ပြီး စစ်မီးအဟုန်ကို ကြီးသည်ထက်ကြီးအောင် သဘာဝဘေးဒဏ်များကြားပါမရှောင် လေကြောင်းမှတမျိုး၊ မြေပြင်ထိုးစစ်များမှတဖုံဖြင့် ငှင်းတို့ အာဏာထိုင်ခုံမပျောက်ရေးကို ကာကွယ်နေရသည်။
မျိုးနွယ်စုအသီးသီး၏ ကိုယ်ပိုင်ပြဌာန်းခွင့်ဆိုင်ရာ ကြိုးပမ်းမှုများသည်လည်း အလျှိုလျှို ပေါက်ဖွားလာပြီး အချို့ဒေသများတွင် အောင်မြင်စွာ စတင် လည်ပတ်နေနိုင်ပြီ ဖြစ်သည်။ ထိုအထဲတွင် အချို့သောမျိုးနွယ်စုများသည် လူနည်းစုထဲမှ လူနည်းစုများဖြစ်ပြီး မိမိတို့၏ နိုင်ငံရေး၊ အခွင့်အရေးများအတွက် တိုက်ပွဲဝင်ရင်း နွေဦးတော်လှန်ရေးတွင် တတပ်တအား ပါဝင်နေကြသည်။ လူနည်းစုထဲမှ လူနည်းစုတခုဖြစ်သည့် လီဆူလူမျိုးများ၏ နွေဦးတော်လှန်ရေးတွင် ပါဝင်လှုပ်ရှားနေသည့် အခန်းကဏ္ဏများသည်လည်း အနာဂတ် ဖက်ဒရယ်ဒီမိုကရေစီပြည်သစ်အတွက် မဖြစ်မနေ ထည့်သွင်းဆွေးနွေးစရာ ဖြစ်ပါသည်။
ထို့ကြောင့် လီဆူမျိုးနွယ်စု၏ နိုင်ငံရေးလှုပ်ရှားမှုများအကြောင်းနှင့် လက်ရှိ နိုင်ငံရေးဦးဆောင်မှုပေးနိုင်သည့် လီဆူအစုအဖွဲ့ရှိနေလား။ ဘယ်အစုအဖွဲ့ကတော့ဖြင့် လီဆူနိုင်ငံရေးကို ဦးဆောင်ပြီး တိုက်ပွဲဝင်နေလဲ။ နောက်ပြီး အာဏာမသိမ်းခင်တည်းက တန်ခိုးထွားခဲ့ကြတဲ့ လီဆူပြည်သူ့စစ်များကရော သူတို့ကြွေးကြော်နေသလို လီဆူလူမျိုးတွေရဲ့ လွတ်လပ်ရေးနှင့် ကိုယ်ပိုင်ပြဌာန်းခွင့်ကို ဘယ်လောက်ထိ အာမခံနိုင်လဲ။ စသည်တို့အပြင် လက်ရှိ လီဆူလူမျိုးများရဲ့ နိုင်ငံရေးမျှော်လင့်ချက်က ဘာလဲ။ ဘာကြောင့် ဒီနွေဦးတော်လှန်ရေးမှာ ပါဝင်နေရလဲ။ တော်လှန်ရေးအလွန်ကာလများမှာ လီဆူလူမျိုးများရဲ့ နိုင်ငံရေးမျှော်ရည်ချက်များကိုပါ ဒီစကားဝိုင်းဆွေးနွေးပွဲမှာ ဆွေးနွေးသွားကြမည် ဖြစ်ပါသည်။
