26/06/2025
⭕ ဇူဘီမန်ဒီရဲ့ အရည်အသွေး
✍️ ရေးသားသူ - ဇွဲခေတ်
အာတေတာက ဆန်ဆေဘက်ရှန်ဒေသမှာ မွေးတယ်။ အာတေတာ၊ အလွန်ဆို၊ အီရာအိုလာနဲ့ လိုပက်တက်ဂီတို့ဟာ ဘက်စ်ဒေသ၊ အန်တီဂူအိုကိုအသင်းမှာ ငယ်ဘဝကို အတူဖြတ်သန်းခဲ့ကြတယ်။ နောက်တော့ နာမည်ကျော်နည်းပြတွေ ဖြစ်လာကြတယ်။ ဘက်စ်ဒေသခံတွေဟာ မျိုးရိုးဂုဏ် ဒေသဂုဏ် အင်မတန်ကြည့်ကြတယ်။ ဇူဘီမန်ဒီဟာလည်း ဒီလိုလူမျိုးပဲ။ မနှစ်က လီဗာပူးလ်ရဲ့ ကမ်းလှမ်းမှုကို ရရှိခဲ့ပေမဲ့ အသင်းက သူ့ကို မထွက်ဖို့ ဖျောင်းဖျတယ်။ အကြောင်းပြချက်က မီခယ်မယ်ရီနိုကို ရောင်းချပြီးချိန်ဖြစ်လို့ အဓိကကွင်းလယ်လူနှစ်ယောက်ကို ဆိုစီဒက်အသင်း မဆုံးရှုံးချင်ခဲ့ဘူး။ ဒီစကားကို ဇူဘီမန်ဒီ နားထောင်ခဲ့တယ်။ ကမ်းလှမ်းမှုတွေ ရောက်ရှိပြီး သတင်းတွေ ပလူပျံနေတဲ့အချိန်မှာ ဇူဘီမန်ဒီဟာ ဆိုစီဒက်နဲ့ လေ့ကျင့်ရေး အဆင်းမပြတ်ခဲ့ပါဘူး။ အာဆင်နယ်ကို ရွေးချယ်ခြင်းမှာလည်း ဘက်စ်ဒေသ အငွေ့အသက်တွေ ပါဝင်နေတယ်။ အာတေတာရဲ့ ကွင်းလယ်ကို ဖြည့်ဆည်းဖို့ ဇူဘီမန်ဒီ ရောက်ရှိလာခဲ့တယ်။
သဘောတူညီမှု ရရှိထားတာ ကြာမြင့်ပြီဖြစ်ပေမဲ့ အခုအထိကို ဂျာစီမကိုင်သေးဘူး။ ရောက်တာကတော့ သေချာပေါက် ရောက်မှာပါ။ ပုံမှန်ထက် အနည်းငယ် ပိုကြာနေတာက အာဆင်နယ်ဟာ ဇူဘီမန်ဒီရဲ့ စာချုပ်ဖျက်သိမ်းကြေးကို တိုက်ရိုက်ပေး မခေါ်ယူဘဲ အရစ်ကျခေါ်ယူဖို့အတွက် ဆိုစီဒက်နဲ့ ညှိနှိုင်းနေခဲ့လို့ပါ။ ပေးချေရမယ့် စျေးနှုန်းကတော့ တူတူပေမဲ့ Release Clause ကနေ ခေါ်ရင် လာလီဂါရုံးထံ တိုက်ရိုက် တစ်သုတ်တည်း ပေးချေရပြီး ပြောင်းရွှေ့ကြေးအနေနဲ့ ခေါ်မယ်ဆိုရင်တော့ နှစ်သင်းကြား စိတ်ကြိုက် ညှိနှိုင်းလို့ ရပါတယ်။ ဒါက အာဆင်နယ်ကို PSR Rule အတွက် တစ်နှစ်စာစာရင်းချုပ်မှာ ပိုမိုကျန်းမာစေမှာ ဖြစ်တယ်။
အသက် ၂၆ နှစ်အရွယ် ကွင်းလယ်ခံစစ်ကစားသမား ဇူဘီမန်ဒီဟာ ဥရောပရဲ့ အကောင်းဆုံးတစ်ယောက်အဖြစ် သတ်မှတ်ခြင်း ခံထားရသူပါ။ သောမတ်စ်ပါတေး ထွက်ခွာမယ့် ကွင်းလယ်အခြေကို ဇူဘီမန်ဒီ ဝင်လာမယ်။ ဆိုစီဒက်လူငယ်အကယ်ဒမီက စပိန်မှာ နာမည်ကြီးပါ။ ဘီဂီရီစတိန်းကစလို့ ဇာဘီအလွန်ဆိုအလယ် အီလာရာမန်ဒီ၊ အီနီဂိုမာတီနက်ဇ်၊ ဂရီးဇ်မန်း၊ အိုယာဇာဘယ်လ်တို့အဆုံး လက်ရွေးစင်အဆင့်ကစားသမားတွေ မွေးထုတ်ပေးခဲ့တယ်။ ဇူဘီယက်တာဆိုတဲ့ နာမည်နဲ့ ကျော်ကြားပါတယ်။ အလွန်ဆိုနဲ့ ဇူဘီမန်ဒီတို့က အန်တီဂူအိုကိုမှာ လူငယ်ဘဝဖြတ်သန်းခဲ့ပုံချင်းလည်း တူတယ်။ အလွန်ဆိုက ဇူဘီမန်ဒီရဲ့ စံပြကစားသမား ဖြစ်တယ်။
အလွန်ဆိုက ဇူဘီမန်ဒီကို ဆိုစီဒက် B အသင်းမှာ နည်းပြခဲ့သူ ဖြစ်ပြီး ဇူဘီမန်ဒီရဲ့ ခြေစွမ်းကို သဘောကျတယ်။ အလွန်ဆိုက “မာတင်က နည်းပြတိုင်းလိုချင်တဲ့ ကစားသမားပါ။ သူက သူ့ကိုယ်သူထက် အသင်းဖော်တွေအတွက် ပိုတွေးတဲ့သူ ဖြစ်တယ်။ သူက အသင်းရဲ့ကစားပုံကို အသက်သွင်းပေးတဲ့သူဖြစ်ပြီး သူ့ဘေးမှာ ရှိတဲ့ ကစားသမားတွေကို ပိုကောင်းစေတယ်။ လှုပ်ရှားမှုတွေကို ပိုကောင်းစေတယ်။ အသင်းအတွက် ပြဿနာဖြေရှင်းနည်းတွေကို ရှာပေးတယ်။ ဘောလုံးမရောက်ခင်ကတည်းက နောက်ဆက်ပြီး ဘာလုပ်ရမယ်ဆိုတာ သိပြီးတဲ့သူ။ သူက အသင်းရဲ့ဝင်ရိုးအနေနဲ့ ကစားပြီး အသင်းကို စုစည်းပေးတဲ့သူပါ။ ကျွန်တော် သူ့ကို အရမ်းသဘောကျတယ်”လို့ ပြောခဲ့တယ်။
ဇူဘီမန်ဒီက ဆိုစီဒက်အသင်းမှာ ပွဲပေါင်း ၂၀၀ ကျော်ကစားခဲ့တယ်။ အသင်းရဲ့ အဓိကကျောရိုးဖြစ်ခဲ့ပြီး လာလီဂါရဲ့ ထိပ်တန်းအသင်းအဖြစ် ရီးယဲလ်ဆိုစီဒက်ရပ်တည်ခဲ့ခြင်းမှာ အရေးပါတဲ့ကဏ္ဍကနေ ပါဝင်ခဲ့တယ်။ စပိန်နဲ့အတူ ယူရိုချန်ပီယံဖြစ်ခဲ့တယ်။ ယူရိုဗိုလ်လုပွဲမှာ ရိုဒရီရဲ့နေရာကို သက်သောင့်သက်သာ ဝင်ကစားခဲ့ပြီး အဲဒီနောက်ပိုင်းမှာလည်း စပိန်အသင်းရဲ့ ကွင်းလယ်ဗိုလ်ချုပ်ဖြစ်လာတယ်။ သူက အသင်းတွေကို ဟန်ချက်ညီအောင် ထိန်းပေးထားတဲ့ Metronome ဖြစ်တယ်။ စည်းချက်ထုတ်ပေးတဲ့ ကိရိယာ ဖြစ်တယ်။ သူ့ ကစားပုံကို ရိုဒရီ၊ ဘူးစကက်စ်တို့နဲ့ နှိုင်းယှဉ်နိုင်ပါတယ်။ ဘူးစကက်စ်လောက် နည်းစနစ်အရည်အသွေး မမြင့်ပေမဲ့ ကာယကြံ့ခိုင်မှုပိုကောင်းတယ်။ ရိုဒရီ မန်စီးတီး မရောက်ခင်တုန်းကထက်လည်း ပိုတည်ငြိမ်တဲ့ ခြေစွမ်းမျိုးရှိပြီး No.6 role စစ်စစ် ဖြစ်တယ်။ ရိုဒရီက မန်စီးတီးမှာ ဖာနန်ဒင်ညိုဆီက သင်ယူရင်း Single pivot ပုံစံမှာ ကျင်လည်ဖို့ အချိန်ယူခဲ့ရသေးတယ်။ ဇူဘီမန်ဒီက Ready-made ပဲ။
Press resistance ကောင်းတယ်။ ခံစစ်က ဘောလုံးတွေကို ရယူပြီး ပြန်လည်ဖြန့်ကြက်ပေးတယ်။ ဘောလုံးဖြန့်ဝေမှုကောင်းတယ်။ ဘောလုံးကို သယ်ဆောင်နိုင်တယ်။ ဘောလုံးမြဲတယ်။ သောမတ်စ်ပါတေးလည်း စကေးလ်ကောင်းတယ်ဆိုပေမဲ့ ဇူဘီမန်ဒီက အဲဒီထက် ဘောလုံးကို ပိုသက်သောင့်သက်သာ ကိုင်နိုင်တယ်။ ရွေ့လျားပေးနိုင်တယ်။ Build-up play တွေမှာ သူဟာ နေရာစုံရွေ့လျားရင်း ဘောလုံးကို လက်ခံရယူပြီး နောက်အဆင့်တွေကို ပေးပို့မှုအားဖြင့် (သို့မဟုတ်) ကိုယ်တိုင်ဆွဲတက်ခြင်းအားဖြင့် Ball progress လုပ်ပေးတယ်။ သူ့ရဲ့ ပေးပို့မှုအားဖြင့် Ball progress လုပ်ခြင်းက ပါတေးထက် မြင့်တယ်။ ဂျော်ဂျင်ညိုလောက် မများပေမဲ့ ဂျော်ဂျင်ညိုက နှေးလွန်းပြီး ပုံစံမစုံဘူး။ ဇူဘီမန်ဒီက ပြည့်စုံတဲ့ No.6 ပုံစံ ရှိတယ်။ ခံစစ်လည်း အရမ်းကောင်းတယ်။ လာလီဂါရဲ့ ခံစစ်အကောင်းဆုံးထဲမှာ ပါတယ်။ ဖျက်ထုတ်မှု၊ ကြားဖြတ်လုယူမှု၊ ခေါင်းတိုက်လုယူမှုတွေမှာ ထိပ်တန်းအဆင့်ရှိပြီး Interception ဆိုတဲ့ ကြားဖြတ်လုယူခြင်းမှာ လာလီဂါရဲ့အကောင်းဆုံးဖြစ်တယ်။ ခံစစ်ကို ရှေ့ကနေ ဒိုင်းသဖွယ် ကာပေးနိုင်တယ်။
အပြောင်းအရွှေ့စျေးကွက်ကို လေ့လာတဲ့ ကမ္ဘာကျော်ဝက်ဘ်ဆိုက် Transfermarkt ရဲ့ လာလီဂါကျွမ်းကျင်သူ အီဗန်ဖျူယန်တေကတော့ ဇူဘီမန်ဒီဟာ လာလီဂါရဲ့ အကောင်းဆုံးကွင်းလယ်လို့ သတ်မှတ်ရနိုင်သူလို့ ပြောပါတယ်။ သူ့ကို နည်းပြခဲ့ဖူးတဲ့ အလွန်ဆိုရဲ့လက်ထောက်နည်းပြဟောင်း ဇူလာအီကာက ဇူဘီမန်ဒီဟာ အလွန်ရှားပါးတဲ့ ဝိသေသတွေ ပေါင်းစပ်ထားသူ၊ နှိမ့်ချခြင်း၊ ရိုးရှင်းခြင်း၊ ယုံကြည်မှုမြင့်မားခြင်းနဲ့ မာကျောကြံ့ခိုင်ခြင်းတို့ကို ပေါင်းစပ်ထားတယ်လို့ ပြောပါတယ်။ ရိုးရိုးအေးအေး နှိမ့်နှိမ့်ချချ နေတတ်ပေမဲ့ ကိုယ့်အရည်အသွေးကိုယ် ယုံကြည်မှု အပြည့်ရှိတယ်။ လစ်မစ်မှန်တဲ့ မာန ရှိတယ်။ စိတ်ဓာတ်မာကျောတယ်။
ဒါကြောင့်လည်း အာတေတာက အရမ်းသဘောကျတာ ဖြစ်ပါတယ်။ Technical ပိုင်းအရ ညက်ညောပြီး ရုပ်ပိုင်းစိတ်ပိုင်း မာကျောတဲ့သူ၊ Ready-made Single pivot ဆိုတာ ဘောလုံးလောကရဲ့ ရှားပါးရတနာတွေပါ။ ရိုဒရီ၊ မွိုင်ဆက်စ်ကိုင်ဆေဒိုတို့လောက်ပဲ ရှိတယ်။ ဘာစီလိုနာက ဖရန်ကီဒီယောင်ဆို ကျန်တာတွေ ကောင်းပေမဲ့ ခံစစ်နဲ့ ကြံ့ခိုင်မှု အားနည်းတယ်။ ဒက်ကလန်ရိုက်စ်ဆို Single pivot နဲ့ကျင်လည်မှု အားနည်းတယ်။ ချူအာမန်နီဆို Technical အားနည်းတယ်။ ဇူဘီမန်ဒီက ရိုဒရီနဲ့ အနည်းစပ်ဆုံးတူညီတဲ့ မိုဒယ် ဖြစ်တယ်။ ဒက်ကလန်ရိုက်စ်−အိုဒီဂါဒ်တို့ကို ပိုကောင်းစေမယ့်သူ၊ ပိုလွတ်လပ်စွာ ကစားနိုင်အောင် ကူညီပေးမယ့်သူဖြစ်ပြီး အာတေတာ တည်ဆောက်ချင်နေတဲ့ ကွင်းလယ်ရဲ့ နောက်ဆုံးအစိတ်အပိုင်း၊ ပြီးပြည့်စုံစေမယ့် အစိတ်အပိုင်း ဖြစ်လာပါလိမ့်မယ်။
| #ဘောလုံးအိမ် | | |
Soccer House - ဘောလုံးအိမ် မှ အားကစားနှင့် ပတ်သက်သော အစီအစဥ်များကို တင်ဆက်ပေးသွားမှာ ဖြစ်ပါတယ်။
