17/11/2025
အင်္ဂလန်အသင်း ၂၀၂၆ ကမ္ဘာ့ဖလားချန်ပီယံဆု ဆွတ်ခူးနိုင်ဖို့အတွက် NFL "Playbook" ပုံစံ အတုခိုးဖို့ တိုက်တွန်းခဲ့တဲ့ ဟာရီကိန်း
------------------------
အင်္ဂလန်လက်ရွေးစင်အသင်းဟာ နည်းပြတူချယ်လ်လက်ထက်ကစားခဲ့တဲ့ ၂၀၂၆ ကမ္ဘာ့ဖလားခြေစစ်ပွဲ(၇)ပွဲမှာ (၇)ပွဲလုံးကို အနိုင်ရတဲ့အပြင် သွင်းဂိုး(၂၀)ဂိုး၊ ပေးဂိုးမရှိဆိုတဲ့ မှတ်တမ်းကောင်းကိုလည်း ပိုင်ဆိုင်ထားပါတယ်။
အင်္ဂလန်လက်ရွေးစင်အသင်းရဲ့သွင်းဂိုးတွေထဲမှာ ထောင့်ကန်ဘော၊ ဖရီးကစ်၊ လက်ပစ်ဘောလို Set-Pieces တွေက တစ်ဆင့်သွင်းယူတဲ့ဂိုးတွေအများအပြားပါဝင်ခဲ့ပြီး တူချယ်လ်သာမက အသင်းရဲ့လက်ထောက်နည်းပြအန်တိုနီဘယ်ရီ၊ Set-Pieces နည်းပြပေါလ်ကွစ်တာတို့ရဲ့လမ်းညွှန်ချက်တွေကလည်း အဓိက ကျခဲ့ပါတယ်။
မော်ဒန်ဘောလုံးလောကမှာ Set-Piece တွေက အရေးပါအရာရောက်တဲ့အနေအထားကို ရောက်ရှိနေတဲ့အတွက် အင်္ဂလန်လက်ရွေးစင်အသင်းခေါင်းဆောင် ဟာရီကိန်းက Set-Piece တွေကို အခုထက်ပိုမိုထိရောက်စေဖို့ NFL ရဲ့ "Playbook" ပုံစံကို အတုခိုးဖို့ အင်္ဂလန်အသင်းနည်းပြအဖွဲ့ကို တိုက်တွန်းခဲ့ပါတယ်။
NFL (အမေရိကန်ဘောလုံး)ရဲ့ "Playbook" ပုံစံဆိုတာ တိုက်စစ်ဆင်ရာမှာဖြစ်စေ၊ ခံစစ်ကာကွယ်ရာမှာဖြစ်စေ ကစားသမားတွေအနေနဲ့ ဘယ်လိုနေရာယူမယ်၊ ဘယ်လိုရွေ့လျားမယ်၊ ဘယ်ကစားသမားကို လူကပ်ကစားမယ်ဆိုတာကို Step-by-step နည်းဗျူဟာခင်းကျင်းထားတာဖြစ်ပြီး ပြိုင်ဘက်က မိမိရဲ့နည်းဗျူဟာကစားကွက်ကို မရိပ်မိအောင် ပွဲတစ်ပွဲမှာ အကွက်ပေါင်း(၇၀)ကနေ (၁၀၀)ဝန်းကျင်အထိ သတ်မှတ်ထားတာဖြစ်ပါတယ်။
ကစားသမားတွေအနေနဲ့ အကွက်တွေကို မှတ်မိအောင် Key words တွေနဲ့ အကြိမ်ကြိမ်သင်ကြားပြသပေးထားပြီး ဒီလို အကြိမ်ကြိမ်လေ့ကျင့်ထားခြင်းက တကယ့်လက်တွေ့မှာ ပြိုင်ဘက်တွေကို အသာစီးရရှိစေပါတယ်။ အယ်လ်ဘေးနီးယားနဲ့ ကစားမယ့် ၂၀၂၆ ကမ္ဘာ့ဖလားခြေစစ်ပွဲနောက်ဆုံးပွဲမတိုင်မီ ဟာရီကိန်းက "ကမ္ဘာ့ဖလားပြိုင်ပွဲအတွက် လေ့ကျင့်ချိန်သိပ်မရှိတော့ပါဘူး။ ဒါပေမယ့် ကျွန်တော်တို့ set-plays အတွက် သေသေချာချာလေ့ကျင့်သင်ကြားဖို့ လိုပါတယ်။ NFL playbook လို ပြိုင်ဘက်အပေါ်မူတည်ပြီး ဘယ်လိုကစားရမယ်ဆိုတဲ့ လေ့ကျင့်ပြင်ဆင်မှုမျိုးကို ပြုလုပ်ထားသင့်ပါတယ်"လို့ ပြောခဲ့ပါတယ်။
အင်္ဂလန်အသင်းဟာ ၂၀၂၆ ကမ္ဘာ့ဖလားပြိုင်ပွဲရဲ့ ချန်ပီယံရေပန်းစားမှုစာရင်းမှာ စပိန်အသင်း(၉း၂)ရဲ့နောက် ဒုတိယနေရာမှာ (၁၃း၂)လေးနဲ့ ရပ်တည်နေပါတယ်။
#ဘောလုံးအိမ်
